Kryeministri i Sllovakisë, Robert Fico, ka ripërsëritur qëndrimin se vendi i tij nuk do t’i ofrojë Ukrainës ndihmë financiare apo ushtarake për të vazhduar luftën kundër Rusisë.

Gjatë një konference për shtyp, Fico theksoi se Këshilli Evropian nuk ka marrë asnjë angazhim konkret për ndihmë të detyrueshme financiare dhe ushtarake për Ukrainën në samitin e mbajtur të enjten. Sipas tij, çdo mbështetje për Kievin do të mbetet në baza vullnetare, dhe Sllovakia nuk do të jetë mes vendeve që do të ofrojë ndihmë.

Ai gjithashtu përshëndeti përfshirjen e shqetësimeve të Sllovakisë në deklaratën përfundimtare të samitit, veçanërisht lidhur me negociatat për rinovimin e furnizimeve me gaz natyror rus për Evropën Qendrore përmes Ukrainës. Fico tha se tani Bratislava do të ushtrojë presion maksimal ndaj Kievit për të zgjidhur këtë çështje.

Ndërkohë, 26 vende të BE-së – përfshirë Sllovakinë – kanë nënshkruar një deklaratë që përcakton vijat e kuqe për bisedimet e ardhshme të paqes, ku mbështet anëtarësimi i Ukrainës në BE dhe premtohet ndihma e ardhshme ushtarake. Hungaria ishte i vetmi vend që nuk e nënshkroi këtë deklaratë.

Në një sulm nga disidentët kolumbianë FARC në dy lokacione në provincën Kauca, u rrëmbyen 29 anëtarë të forcave të sigurisë kolumbiane, njoftoi sot Ministria e Mbrojtjes e vendit.

Incidentet ndodhën në El Plateado, ku forcat e sigurisë kanë kryer një ndërhyrje prej muajsh kundër grupeve të armatosura , dhe La Hacienda, tha Ministria e Mbrojtjes në një deklaratë, raportoi Reuters.

“Jeta dhe siguria e anëtarëve të rrëmbyer të forcave të sigurisë janë përgjegjësi e drejtpërdrejtë e atyre që kryen këtë krim të urryer,” tha ministria.

Ministri kolumbian i Mbrojtjes Pedro Sanchez tha se dy rrëmbyes, dyshohet se ishin pjesë e FARC, ishin identifikuar dhe se ata ishin të veshur me rroba civile në momentin e incidentit dhe “përdornin vendasit” për të sulmuar policinë, sipas gazetës kolumbiane Tiempo.

Thuhet se militantët e FARC po kërcënojnë vendasit me ndëshkim ose dëbim nga ajo pjesë e Kolumbisë nëse nuk bashkëpunojnë për të parandaluar praninë e ushtrisë kolumbiane në ato territore.

Rusia ka ndërmarrë një sulm masiv ndaj Ukrainës të enjten pas mesnate, duke vazhduar intensifikimin e përplasjeve në fushën e betejës.

Në lidhje me këtë, presidenti amerikan Donald Trump ka reaguar fuqishëm, duke paralajmëruar për sanksione të mëdha ndaj Moskës dhe duke bërë thirrje për një ndalesë urgjente të luftimeve.

Në një postim në mediat sociale, Trump theksoi se do të merrte masa drastike ndaj Rusisë, duke përmendur mundësinë e sanksioneve dhe tarifave bankare në shkallë të gjerë. Ai kërkoi një armëpushim të menjëhershëm dhe një marrëveshje përfundimtare paqeje mes dy vendeve.

“Bazuar në faktin se Rusia po “godit” absolutisht Ukrainën në fushën e betejës tani, unë jam duke konsideruar fuqimisht sanksione, sanksione dhe tarifa bankare në shkallë të gjerë ndaj Rusisë derisa të arrihet një armëpushim dhe një marrëveshje përfundimtare për zgjidhjen e paqes”. shkruan Trump.

Ai gjithashtu iu drejtua drejtpërdrejt dy vendeve, duke kërkuar që të ulen sa më shpejt në tryezën e bisedimeve.

“Për Rusinë dhe Ukrainën, shkoni në tryezë tani, para se të jetë tepër vonë. Faleminderit!!!”, shkroi Trump në postimin e tij.