Lajmet

Ambasadori ukrainas në Shqipëri: Kërkojmë mbështetje ushtarake

Ai tha se është shumë e nevojshme që vendi të forcojë mbrojtjen ajrore.

Published

on

“Një kërcënim shumë serioz” i konsideroi ambasadori i Ukrainës, Volodymyr Shukrov, bombardimet e fundit ruse mbi Ukrainë. I ftuar në emisionin “Mirëmëngjes Shqipëri” në RTSh, Shukrov tha se si pasojë e sulmeve është shkatërruar infrastruktura kritike, teksa akuzoi qeverinë ruse se po përdor terrorin dhe po krijon panik duke vrarë njerëz të thjeshtë.

“Është një kërcënim shumë serioz, ju kujtoj se Presidenti i Ukrainës tha se me siguri ushtria ruse është duke humbur në fushën e betejës dhe ndaj qeveria e Rusisë po përdor terrorin dhe situata është shumë e vështirë. Situata në Ukrainë mbetet e vështirë, deri më 10 tetor popullsia pjesërisht ishte rikthyer në jetën normale por pas goditjes me raketa, janë dëmtuar shumë objekte, përfshirë objekte e infrastrukturës kritike dhe vendbanimet. Situata u përkeqësua menjëherë. Shkollat dhe universitetet sot kanë filluar online. Puna vazhdon, kafenetë dhe restorantet janë hapur, por njerëzit shumë shpesh duhet të shkojnë në vendet e strehimit. Sulmi ndodhi në kohën kur njerëzit po shkonin në punë, po parkonin makinat e tyre. Ky është realiteti, një realitet ku ne kuptojmë që pala ruse po krijon panik duke vrarë njerëz të thjeshtë dhe duke shkatërruar strukturën kritike”, tha ambasadori i Ukrainës.

Ai bëri thirrje për më shumë mbështetje ushtarake për Ukrainën, ku tha se është shumë e nevojshme që vendi të forcojë mbrojtjen ajrore.

“Unë mendoj qe mbështetja nga ShBA do të vazhdojë pasi pas sulmeve raketore Presidenti Zelensky ka patur një bisedë me Presidentin Biden ku u diskutua mbi bombardimet dhe rëndësinë e mbrojtjes ajrore. Ishte dhe një takim, urgjent i G7 ku u diskutua për një mbështetje të radhës me armatime për Ukrainën. Sot do bëhet një mbledhje e OKB. Mbështetja e SHBA vazhdon dhe është e përqendruar në furnizimin me armatime. Bëj kërkesë për mbështetje ushtarake ndaj Ukrainës. Është shumë e nevojshme të kemi armatime që të ndalojnë dronët dhe raketat kemi nevojë të përmirësojmë mbrojtjen tonë ajrore”, theksoi Shukrov.

I pyetur mbi jetën e qytetarëve në Ukrainë, ambasadori u shpreh se ata janë tashmë shumë më të bashkuar dhe se vazhdojnë aktivitetet e tyre të përditshme, por i duhet të vrapojnë për të shkuar nëpër vendstrehime në momentin që dëgjohen sirenat e alarmit, për shkak se rreziku është real.

“Ukrainasit sot janë shumë të bashkuar dhe e mirëkuptojnë faktin e rrezikut që ekziston sot, por puna vazhdon në të njëjtën kohë, vetëm se gjatë sirenave të sulmeve ajrore, ata detyrohen të shkojnë të vendstrehime sepse rreziku është shumë i lartë. Por vendi vijon të punojë”, tha Shukrov.

Breshëria e sulmeve me raketa të së hënës ishte bombardimi më i rëndë që ka parë Ukraina që nga ditët e para të luftës. Disa sulme goditën Kievin, hera e parë që kryeqyteti është shënjestruar pas disa muajsh. Zonat civile duke përfshirë një park popullor dhe shesh lojërash për fëmijë u goditën gjatë orës së pikut të mëngjesit. Infrastruktura u shkatërrua, duke shkaktuar ndërprerje të energjisë elektrike në shumë lagje.

Aktualitet

Punëtorët e KEK-ut protestojnë më 1 maj

Published

on

Sindikata e Re e Korporatës së Energjisë së Kosovës njoftoi për organizimin e një proteste më 1 Maj, Ditën Ndërkombëtare të Punëtorëve, për të kërkuar paga më dinjitoze dhe kushte më të mira pune për punëtorët e sektorit energjetik.

Protesta do të mbahet të mërkurën, në ora 12:00, në sheshin “Skënderbeu” në Prishtinë.

Në njoftimin e bërë publik, Sindikata thekson se puna e tyre përmban lodhje ekstreme, rrezik të përhershëm dhe sakrificë të përditshme, duke theksuar se “kjo punë nuk ka para që mund ta paguajë”.

Për të ilustruar realitetin e vështirë, sindikata ka shpërndarë edhe një fotografi të një punëtori me fytyrë të mbuluar nga pluhuri i zi, simbol i kushteve të rënda në të cilat punojnë minatorët dhe teknikët e KEK-ut.

“Protestojmë për një pagë dinjitoze dhe respekt për punën tonë”, thuhet në thirrjen publike, ku organizatorët ftojnë qytetarët dhe përfaqësuesit sindikalë të solidarizohen me kërkesat e tyre.

Continue Reading

Aktualitet

Zhduket një person në Shtime

Published

on

Një person është raportuar i zhdukur në Shtime tash e dy ditë.

Sipas njoftimit nga Policia, babai i viktimës ka raportuar në polici të hënën pasdite se djali i tij është  larguar nga shtëpia dhe nuk është kthyer më.

Rasti vazhdon të hetohet.

Continue Reading

Lajmet

Presidenti i Malit të Zi nuk e dekreton ligjin për Plazhin e Madh të Ulqinit

Published

on

By

Presidenti i Malit të Zi, Jakov Millatoviq, ia ka kthyer Kuvendit për rishqyrtim njërën nga dy marrëveshjet që Qeveria e Malit të Zi i kishte nënshkruar me Emiratet e Bashkuara Arabe – atë që i hapte rrugë dhënies me qira të Plazhit të Madh në Ulqin.

Sipas asaj marrëveshjeje, Mali i Zi do t’ia jepte Plazhin e Madh me qira për 99 vjet kompanisë Emmar të biznesmenit arab, Mohamed Alabbarit, që do të ndërtonte një kompleks megaturistik në Ulqin.

Alabbar ka marrë pjesë edhe në projekte rajonale në Kroaci, Shqipëri dhe në “Beogradin mbi ujë” në Serbi.

Por, Millatoviq, i cili dekretoi Ligjin për ratifikimin e Marrëveshjes për bashkëpunim ekonomik, nuk e bëri të njëjtën edhe për Ligjin për ratifikimin e Marrëveshjes për bashkëpunim në fushën e turizmit dhe zhvillimit të pasurive të paluajtshme. Këtë të fundit ai ua ktheu deputetëve për ta votuar sërish.

Që marrëveshjet e nënshkruara nga kryeministri Millojko Spajiq në fund të marsit me zyrtarët e Emirateve të hyjnë në fuqi, Kuvendi i Malit të Zi i miratoi dy ligjet me procedurë të përshpejtuar më 23 prill, me propozim të Qeverisë.

Ato u mbështetën nga deputetët e shumicës parlamentare – lëvizja e Spajiqit “Evropa tani”, partia “Demokracia e Re Serbe” e kryetarit të Kuvendit, Andrija Mandiq, Demokratët dhe Partia Boshnjake.

Ditëve para miratimit, Millatoviq dhe një pjesë e sektorit joqeveritar paralajmëruan se me miratimin e Marrëveshjes për bashkëpunim në turizëm dhe zhvillim të pasurive të paluajtshme po pezullohet Kushtetuta dhe një pjesë e ligjeve të Malit të Zi.

Kthimi i këtij ligji nga Millatoviq e detyron Kuvendin që të votojë sërish për të. Nëse ligji miratohet përsëri, ai do t’i dërgohet sërish Millatoviqit për nënshkrim. Sipas Kushtetutës, në atë rast ai është i detyruar ta nënshkruajë, dhe ligji hyn në fuqi./REL/

Continue Reading

Lajmet

Rama: Buxheti për vitin 2025 po sabotohet, kërkojmë zgjidhje alternative

Published

on

By

Kryetari i Prishtinës, Përparim Rama, pas dështimit të seancës së Kuvendit Komunal, ka deklaruar se buxheti i kryeqytetit për vitin 2025 po përballet me pengesa serioze.

Sipas tij, ndonëse buxheti është votuar që në dhjetor 2024 dhe është planifikuar për projektet madhore të qytetit, Parlamenti i Kosovës ende nuk ka miratuar atë.

Rama akuzoi institucionet për shmangie të vazhdueshme dhe tentim sabotimi. “Do të vazhdojmë të punojmë me projekte të reja dhe të kërkojmë fonde nga instanca të tjera”, u shpreh ai.

“Buxhetin e dini që ne e kemi votuar në dhjetor të vitit 2024, i cili është planifikuar për të gjitha projektet madhore të kryeqytetit. Kemi kërkuar që atëherë që Parlamenti i Kosovës ta miratojë, por asnjëherë nuk është ftuar seanca. Tani kemi një çështje tjetër që ende nuk është konstituar. Ne kemi shqyrtuar në mënyrë ligjore se si Ministria e Financave të kërkojë buxhetin, e kemi kërkuar tashmë dy herë, por është shmangur. Tani ne duhet të gjendemi në mënyra të ndryshme, duhet t’i gjejmë fondet përmes projekteve të reja. Është tentuar të sabotohet edhe buxheti, por ne kemi arritur që të bëhet. Nuk po shfrytëzohet mundësia që buxheti i vitit 2025 të aprovohet. Ne vazhdojmë me projektet, nuk do të ndalemi dhe do të vazhdojmë të kërkojmë instanca të tjera”, tha Rama.

 

Continue Reading

Të kërkuara