Botë
Aleatët e Harris fajësojnë Presidentin Biden për humbjen e saj
Published
12 months agoon
By
UBTnewsEmri i Joe Biden nuk ishte në fletëvotime në zgjedhjet e 5 nëntorit, por historia ka të ngjarë ta kujtojë humbjen e madhe të Kamala Harrisit edhe si humbjen e tij.
Pas fitores bindëse të Presidentit të zgjedhur Donald Trump, disa nga mbështetësit e nënpresidentes po shprehin pakënaqësinë e tyre duke thënë se fakti që zoti Biden priti deri në verë për t’u tërhequr nga gara– pavarësisht shqetësimeve të hershme të votuesve për moshën e tij dhe shqetësimeve për inflacionin pas pandemisë, si edhe për gjendjen në kufirin SHBA-Meksikë – vulosi humbjen e Shtëpisë së Bardhë nga partia e tij.
“Përgjegjësia më e madhe për këtë humbje është e Presidentit Biden,” thotë Andrew Yang, i cili kandidoi kundër zotit Biden në vitin 2020 për emërimin e partisë demokrate dhe e mbështeti kandidaturën e pasuksesshme të zonjës Harris.
“Nëse ai do të kishte dhënë dorëheqjen në janar dhe jo në korrik, ne mund të ishim në një situatë shumë të ndryshme.”
Zoti Biden largohet nga posti pasi i nxorri Shtetet e Bashkuara nga pandemia më e keqe prej një shekulli, nxiti mbështetjen ndërkombëtare për Ukrainën pas agresionit të Rusisë dhe miratoi një paketë prej 1 trilionë dollarësh për infrastrukturën në vend që do të ketë ndikim për vite me radhë.
Por pasi kandidoi katër vjet më parë kundër zotit Trump për të “rikthyer shpirtin e vendit”, zoti Biden do t’ia përcjellë postin paraardhësit të tij pas vetëm një mandati. Zoti Trump është zotuar ta reformojë rrënjësisht qeverinë federale dhe të tërhiqet nga shumë nga prioritetet e zotit Biden.
“Ndoshta pas 20 ose 30 vjetësh, historia do ta kujtojë Bidenin për disa nga këto arritje,” thotë Thom Reilly, bashkëdrejtor i Qendrës për një Demokraci të Pavarur dhe të Qëndrueshme në Universitetin Shtetëror të Arizonës.
“Por në një të ardhme afatshkurtër, do të jetë e vështirë që ai t’i shmanget trashëgimisë së të qenit presidenti që mundi Donald Trumpin vetëm për t’i hapur rrugën një administrate tjetër të Donald Trumpit katër vjet më pas.”
Të enjten zoti Biden nuk e përmendi drejtpërdrejt pakënaqësinë e elektoratit ndaj presidencës së tij, por tha se amerikanët do të ndjejnë efektet e nismave legjislative të administratës së tij për vitet në vijim.
“Mos harroni gjithçka që arritëm”, tha zoti Biden në një fjalim të shkurtër në Kopshtin e Trëndafilave të Shtëpisë së Bardhë ku morën pjesë anëtarë të kabinetit dhe ndihmës të lartë, por jo zonja Harris. “Ishte një presidencë historike – jo sepse jam unë president, por falë asaj që kemi bërë. Asaj që keni bërë ju.”
Ai lëshoi një deklaratë menjëherë pasi zonja Harris mbajti fjalimin e saj ku pranoi humbjen të mërkurën, duke e vlerësuar atë për një “fushatë historike” në “rrethana të jashtëzakonshme”.
Sekretarja e shtypit e Shtëpisë së Bardhë, Karine Jean-Pierre nuk iu përgjigj drejtpërdrejt pyetjeve në lidhje me kritikat se zoti Biden priti shumë gjatë për t’u tërhequr.
“Ai besoi se mori vendimin e duhur,” tha zonja Jean-Pierre në konferencën e përditshme për shtyp.
Vetëm rreth 4 ndër 10 votues në zgjedhjet presidenciale të vitit 2024 e miratuan punën e zotit Biden si president, sipas AP VoteCast, një sondazh me më shumë se 120,000 votues në mbarë vendin. Afërsisht 6 ndër 10 nuk e miratuan atë dhe Donald Trump bëri për vete një shumicë të ndjeshme të atyre votuesve që ishin të pakënaqur me zotin Biden.
Disa demokratë me peshë, përfshirë tre këshilltarë të fushatës së zonjës Harris, shprehën zhgënjimin e thellë që zoti Biden nuk pranoi që më herët në ciklin zgjedhor se nuk e përballonte dot sfidën e rikandidimit. Këshilltarët folën në kushte anonimiteti sepse nuk ishin të autorizuar të komentonin publikisht.
81 vjeçari Biden i dha fund fushatës së tij për rizgjedhje në korrik, disa javë pas një paraqitjeje tepër të dobët në një debat përballë zotit Trump, që ngriti pikëpyetje lidhur me mprehtësinë mendore të tij për të qenë një kandidat i besueshëm.
Por sondazhet kishin treguar prej kohësh se shumë amerikanë ishin të shqetësuar për moshën e tij. Rreth 77% e amerikanëve thanë në gusht të vitit 2023 se zoti Biden ishte shumë i moshuar për të qenë efektiv edhe për katër vjet të tjera, sipas një sondazhi nga agjencia e lajmeve Associated Press dhe Qendra për Çështjet Publike NORC (AP-NORC).
Presidenti u tërhoq më 21 korrik pasi u nxit në mënyrë jo edhe aq delikate nga figurat e njohura të Partisë Demokrate, përfshirë ish-presidentin Barack Obama dhe ish-kryetaren e Dhomës së Përfaqësuesve, Nancy Pelosi që të hiqte dorë nga gara për rizgjedhje.
Zoti Biden mbështeti zonjën Harris për kandidaturën. Ligjvënësi nga shteti i Masaçusetsit Seth Moulton, një nga disa ligjvënësit demokratë që i kërkuan publikisht zotit Biden të largohej këtë verë, tha të enjten në CNN se Partia Demokrate “do të kishte qenë në një pozicion shumë më të mirë” nëse zoti Biden do ta kishte lënë garën më herët.
Zoti Yang argumentoi se edhe udhëheqësit e Partisë Demokrate duhet të mbahen përgjegjës që pritën aq gjatë për të larguar zotin Biden. Me pak përjashtime, si ligjvënësi nga Minesota, Dean Phillips, demokratët nuk dolën të flisnin hapur për moshën e zotit Biden.
“Pse nuk u bë një gjë e tillë nga ndonjë udhëheqës demokrat?” tha zoti Yang. “Arsyeja është një mungese guximi dhe pavarësie dhe një karrierizëm i tepruar”.
Fushata vuajti gjithashtu pasojat e zemërimit të votuesve arabo-amerikanë dhe të rinjve për qasjen ndaj luftës së Izraelit në Gaza dhe Liban.
Senatori Bernie Sanders, një aleat i Presidentit Biden dhe Nënpresidentes Harris, tha në një deklaratë se demokratët nuk po u kushtonin rëndësi shqetësimeve të amerikanëve të klasës së mesme.
“A do të nxjerrin ndonjë mësim real nga kjo fushatë katastrofike ata që mbështesin interesat e të pasurve dhe konsulentët e paguar mirë që kontrollojnë Partinë Demokrate?” tha ligjvënësi i pavarur nga Vermonti.
Zonja Harris arriti të ngjallte entuziazëm shumë më të madh sesa zoti Biden në bazën e partisë. Por ajo nuk arriti të shprehte qartë se si do të ndryshonte administrata e saj nga ajo e zotit Biden.
Në një emision televiziv në shtator, Nënpresidentja Harris nuk mund të përmendte ndonjë shembull se si do të merrte një vendim të ndryshëm nga zoti Biden.
“Nuk më vjen ndonjë gjë ndër mend,” tha zonja Harris, duke i dhënë fushatës së zotit Trump material për reklama që u transmetuan deri ditën e zgjedhjeve.
Këshilltarët e zonjës Harris thanë se fushata e shkurtër e bëri edhe më të vështirë për nënpresidenten që të distanconte veten nga presidenti. Nëse zoti Biden do të ishte tërhequr në fillim të vitit, thanë ata, kjo do t’u kishte dhënë demokratëve kohë të mjaftueshme për të mbajtur zgjedhje brenda partisë. Një garë brenda partisë do ta kishte detyruar zonjën Harris ose një kandidat tjetër të mundshëm që t’i theksonin më shumë dallimet me zotin Biden.
Këshilltarët demokratë e pranojnë se pakënaqësia e thellë në lidhje me kostot në rritje si pasojë e pandemisë dhe shqetësimet e gjera në lidhje me sistemin e imigracionit të SHBA-së, ishin të rëndësishme për votuesit në shtetet kyçe.
Megjithatë, ata thanë se zoti Biden i kishte vënë demokratët në një pozitë të vështirë.
David Plouffe, një këshilltar i lartë i zonjës Harris, tha se ekipi i fushatës “u përpoqën me mish me shpirt për vendin e tyre”.
“Ne u ngritëm nga një pikë shumë e ulët, por mesa duket jo mjaftueshëm,” tha ai. “Një humbje e dhimbshme”.
Ky postim u fshi më vonë.
Disa përkrahës të zonjës Harris thonë se do të kishin dashur që ajo të kishte pasur më shumë kohë për të bërë për vete votuesit amerikanë.
Përveç Shtëpisë së Bardhë, republikanët do të kontrollojnë edhe Senatin. Kontrolli për Dhomën e Përfaqësuesve nuk është përcaktuar.
Matt Bennett, nënkryetar ekzekutiv i grupit “Rruga e Tretë”, një aleat i demokratëve, tha se është momenti më i vështirë i partisë që ai ka parë.
“Harris u vu në një pozitë shumë të vështirë, pjesërisht për shkak të zotit Biden dhe pjesërisht për arsye të tjera”, thotë zoti Bennett, i cili ishte këshilltar i Nënpresidentit Al Gore gjatë administratës së (Presidentit) Klinton.
“A do të ishin në një pozitë më të mirë demokratët nëse Biden do të ishte tërhequr më herët? Nuk e di nëse mund ta themi me siguri, por kjo është një pyetje e vlefshme.”
Botë
Flamuri i Kosovës valon në mesin e mbi 190 shteteve në ceremoninë e hapjes së First Global Challenge 2025 në Panama
Published
6 hours agoon
October 30, 2025By
Driton Iseni
Në një atmosferë madhështore, mes flamujve të mbi 190 shteteve dhe duartrokitjeve të mijëra pjesëmarrësve nga e gjithë bota, flamuri i Kosovës u valëvit me krenari në ceremoninë e hapjes së First Global Challenge 2025 në Panama. Ky është momenti kur rinia e Kosovës, përmes ekipit First Kosovo, hyn në arenën botërore të inovacionit, teknologjisë dhe kreativitetit.
Në këtë ngjarje madhështore, ekipi përfaqësues i Kosovës – First Kosovo, i përbërë nga të rinj të talentuar që janë përgatitur me muaj në laboratorët e UBT-së, do të garojë për të treguar kreativitetin, dijen dhe shpirtin inovativ të rinisë kosovare. Ata do të përfaqësojnë Kosovën në një nga garat më të rëndësishme botërore në fushën e robotikës dhe teknologjisë.
Tema e sivjetshme e garës, “Biodiversiteti dhe ndryshimet klimatike”, synon të nxisë të rinjtë të krijojnë zgjidhje teknologjike që ndihmojnë në mbrojtjen e mjedisit dhe ruajtjen e jetës në planetin tonë.
UBT, si partneri institucional që ka mbështetur këtë iniciativë që nga fillimi, është vlerësuar më herët me medalje të artë ndërkombëtare për kontributin e jashtëzakonshëm në promovimin e edukimit STEM dhe pjesëmarrjen e suksesshme të ekipeve kosovare në garat globale të robotikës.
Në këtë garë të dijes dhe inovacionit, të rinjtë e Kosovës po e bëjnë vendin tonë të njihet si një forcë e re kreative në hartën teknologjike botërore.
Botë
Pesë arrestime të reja për grabitjen në Luvër
Published
6 hours agoon
October 30, 2025By
UBTnews
Pesë të dyshuar të rinj janë arrestuar në lidhje me grabitjen në Luvër, ku hajdutët vodhën stoli mbretërore me vlerë të vlerësuar prej rreth 88 milionë euros, ka bërë të ditur prokurorja publike e qytetit, por gurët e çmuar ende mungojnë.
Sipas The Guardian, Laure Beccuau tha për radion RTL të enjten se arrestimet janë bërë të mërkurën në mbrëmje në kryeqytetin francez dhe në zonat përreth, veçanërisht në departamentin fqinj Seine-Saint-Denis. Por ata “nuk na ndihmuan të gjenim mallrat e vjedhura”, shtoi ajo.
Njëri nga burrat e ndaluar “ishte në shënjestër të hetuesve, kemi gjurmë ADN-je që e lidhin me grabitjen”, tha Beccuau. “Ai ishte dikush që e kishim nën vëzhgim”. Katër të tjerët “mund të na japin informacione se si është kryer vjedhja”, shtoi ajo.
Beccuau tha në një konferencë për media të mërkurën mbrëma se dy burra që ishin arrestuar më parë të shtunën mbrëma kishin “pranuar pjesërisht” rolin e tyre dhe do të akuzohen “për vjedhje të organizuar, që dënohet me 15 vjet burg, dhe për komplot kriminal, që dënohet me 10 vjet”.
Banda me katër persona ndaluan jashtë muzeut të Luvrit rreth orës 9:30 më 19 tetor me një kamion të vjedhur për transport mobiliesh, të pajisur me shkallë dhe ngritës teleskopik. Dy prej tyre, të veshur si punëtorë mirëmbajtjeje, u ngjitën në galerinë “Apollo”, thyen një dritare dhe hapën dy vitrina xhami me prerëse metalike, duke ikur më pas me motorë.
Grabitja zgjati më pak se shtatë minuta. Ata lanë pas një kurorë me diamante e smeralde, por morën tetë objekte të stolisura me gurë të çmuar, përfshirë një varëse që Napoleoni I ia kishte dhuruar Marie Louise dhe një diademë me 212 perla e gati 2,000 diamante që i kishte përkitur perandoreshës Eugénie.
Sipas prokurores Laure Beccuau, dy të arrestuarit e shtunën, njëri ndaluar në aeroportin Charles de Gaulle teksa përpiqej të udhëtonte për në Algjeri, dyshohet të jenë ata që hynë në galeri. ADN-ja e tyre është gjetur në një vitrinë dhe në një skuter të përdorur për arratisje. Hetuesit nuk përjashtojnë mundësinë që banda të ketë pasur më shumë se katër anëtarë, por deri tani nuk ka prova për ndihmë nga brenda.
Njëri prej tyre, një shtetas algjerian, ishte 34 vjeç, kishte jetuar në Francë që nga viti 2010 dhe ishte i njohur për shkelje të rregullave të trafikut. I dyti ishte 39 vjeç, i lindur në periferi të Parisit, në Aubervilliers, dhe kishte dënime për vjedhje./KP
Botë
Pas 30 vitesh, Trump urdhëron nisjen e testeve bërthamore
Published
7 hours agoon
October 30, 2025By
UBTnews
Presidenti Donald Trump u bëri thirrje udhëheqësve ushtarakë amerikanë që të rifillojnë testimin e armëve bërthamore amerikane në mënyrë që të mbajnë ritmin me vendet e tjera si Rusia dhe Kina.

“Për shkak të programeve të testimit nga vendet e tjera, unë i kam udhëzuar Departamentit të Luftës që të fillojë testimin e armëve tona bërthamore në baza të barabarta”, shkroi ai në mediat sociale pak para takimit me Presidentin kinez Xi Jinping në Korenë e Jugut.
Postimi i Trump të mërkurën në mbrëmje pranon “fuqinë e jashtëzakonshme shkatërruese” të armëve bërthamore, por tha se ai “nuk kishte zgjidhje tjetër” veçse të përditësonte dhe rinovonte arsenalin amerikan.
Postimi i Trump nuk përfshinte detaje se si do të zhvilloheshin testet, por shkroi se “procesi do të fillojë menjëherë”.
Kjo shënon një përmbysje të dukshme të një politike të kahershme të SHBA-së. Testi i fundit i armëve bërthamore të SHBA-së ishte në vitin 1992, përpara se ish-Presidenti republikan George HW Bush të lëshonte një moratorium me përfundimin e Luftës së Ftohtë./EO
Botë
Rusia godet sërish Ukrainën, raportohet për viktima
Published
8 hours agoon
October 30, 2025By
UBTnews
Lufta në Ukrainë ka hyrë në ditën e saj të 1344-të, me një tjetër valë sulmesh të rënda ruse gjatë natës.
Autoritetet ukrainase raportojnë se të paktën një person është vrarë dhe 13 të tjerë janë plagosur në qytetin Zaporizhzhia, mes tyre gjashtë fëmijë të moshës 3 deri në 6 vjeç. Sulmet goditën një konvikt dhe disa ndërtesa banimi, duke shkaktuar zjarr dhe dëme në infrastrukturën energjetike.
Sirena alarmi u dëgjuan në të gjitha rajonet e Ukrainës, ndërsa ushtria ruse përdori dronë, raketa supersonike dhe balistike. Ministria e Energjisë njoftoi se vendi ka kufizuar furnizimin me energji pas dëmtimeve të mëdha në rrjetin elektrik.
Në Kherson, një tjetër sulm rus goditi spitalin e fëmijëve, ku u plagosën të paktën nëntë persona, përfshirë katër fëmijë. Presidenti Volodymyr Zelenskyy e quajti sulmin “të qëllimshëm” dhe “provë se Moska nuk dëshiron paqe”.
Sipas Shtabit të Përgjithshëm të Ukrainës, forcat e saj kanë goditur rafineri dhe impiante gazi në disa rajone të Rusisë, përfshirë Mari El, Ulyanovsk dhe Stavropol.
Presidenti amerikan Donald Trump tha pas takimit me liderin kinez Xi Jinping në Korenë e Jugut se çështja e Ukrainës “u diskutua gjatë” dhe se “të dy vendet do të punojnë për të gjetur një zgjidhje”.
Ndërkohë, Zelanda e Re njoftoi sanksione të reja ndaj 65 anijeve dhe kompanive nga Bielorusia, Irani dhe Koreja e Veriut, të akuzuara për ndihmë në transportin e naftës ruse dhe financimin e luftës./EO
Tension i lartë? Ja metodat natyrale që ndihmojnë
Kosova ndalon importin e shpezëve dhe produkteve të tyre nga Gjermania
Rikthehet në punë njësia B2
Subvencionet e QKK-së: Tre filma artistikë që do t’i mbushin kinematë në 2025
Shkoi i dehur në xhirime! Colin Farrell: E përsërita 46 herë skenën
Gjykata Supreme refuzon ankesën e Arbër Eminit, kandidat i pavarur për kryetar të Kllokotit
Murati pas takimit për pagën minimale: Rritja duhet të marrë parasysh kushtet e tregut
Basha: Nuk ka dakordim për themelimin e komisioneve parlamentare
Haxhiu: Nesër marrim pjesë në takimin e presidentes, do të ketë Qeveri “Kurti 3”
Të kërkuara
-
Lajmet2 months agoProfesori i UBT-së, Bahri Gashi, pjesë e rrjetit prestigjioz ndërkombëtar të recensimit shkencor në Taylor & Francis
-
Rajoni1 month agoPolicia, FSK-ja dhe Shërbyesit Civilë përfitojnë bursë 20 për qind në programet Master Shkenca Politike dhe Studime të Sigurisë në UBT
-
Aktualitet1 week agoProfesoresha e UBT-së, Marigona Bekteshi-Ferati, fituese e bursës prestigjioze Fullbright Visiting Scholar, Profesor Vizitor dhe Post Doktoraturë
-
Vendi2 months agoVotoni për UBT-në dhe Rektorin Hajrizi në Triple E Awards: Dy nominime të reja ndërkombëtare për institucionin dhe Kosovën
