Performanca e shkëlqyer e Edon Zhegrovës, futbollistit të përfaqësueses së Kosovës, ka tërhequr vëmendjen e shumë klubeve të mëdha në Europë. Së fundmi, mediat italiane raportojnë se Atalanta, nën drejtimin e trajnerit Gian Piero Gasperini, ka shfaqur interes për të mësuar më shumë mbi mundësinë e blerjes së kartonit të Zhegrovës nga klubi francez Lille.

Zhegrova, i cili ka treguar një stil driblues të jashtëzakonshëm dhe performanca të mira në Ligue 1, vlerësohet rreth 25 milionë euro. Atalanta, e njohur për zhvillimin e talenteve dhe krijimin e skuadrave ambicioze, duket se po planifikon të investojë në të rinj për të forcuar ekipin për të ardhmen.

Gasperini, që ka një histori të suksesshme me zhvillimin e lojtarëve, dëshiron ta sjellë Zhegrovën në Bergamo për të përforcuar skuadrën. Atalanta ka një plan afatgjatë për ndërtimin e një ekipi konkurrues dhe Zhegrova përfaqëson një mundësi të shkëlqyer për të arritur këtë qëllim.

Me këtë situatë, Zhegrova mund të përfitojë nga një kalim në një ligë më të fortë dhe një mundësi për të shkëlqyer në një kampionat prestigjioz si Serie A, duke rritur edhe më tej profilin e tij në arenën ndërkombëtare. Negotiatat për transferimin e tij pritet të zhvillohen në javët e ardhshme, ndërsa tifozët e Atalantës shpresojnë për një njoftim pozitiv./UBTNews/

Fenerbahçe po monitoron me kujdes situatën e talentit turk, Arda Güler, i cili aktualisht po kalon një periudhë të vështirë në Real Madrid, duke luajtur me minutash të kufizuara. Skuadra e drejtuar nga José Mourinho ka shfaqur interes për të shfrytëzuar këtë rast dhe për ta sjellë Gülerin në radhët e saj.

Drejtuesit e Fenerbahçes planifikojnë të kontaktojnë Realin e Madridit për të shqyrtuar mundësinë e një huazimi për gjysmën e dytë të sezonit. Nëse klubi “merengues” jep dritën jeshile, Fenerbahçe mund të veprojë shpejt për të siguruar lojtarin.

Ky zhvillim ndodh në një kontekst ku klubi i Mourinhos po kërkon të rinovojë emocionet për tifozët e tij, sidomos pas spekulimeve mediatike mbi interesimin e Galatasaray-t për të mbajtur Victor Osimhen.

Mario Branco, drejtor sportiv i Fenerbahçes, është gati të nisë bisedimet me drejtuesit e Realit të Madridit. Megjithëse klubi spanjoll nuk ka në plan ta shesë Gülerin, ata mund të shqyrtojnë mundësinë e huazimit për të ndihmuar lojtarin të fitojë përvojë në ligat më sfiduese evropiane.

Burime të afërta me klubin turk kanë bërë të ditur se presidenti Ali Koç mund të takohet personalisht me Gülerin për të diskutuar për të ardhmen e tij dhe për mundësitë që ai ofron për Fenerbahçen.

Në një deklaratë pas prezantimit të tij, Mourinho ka shprehur dëshirën e madhe për të pasur Arda Güler në skuadër. Nëse Real Madridi nuk vendos kushte strikte për transferimin e tij dhe nëse Fenerbahçe merr përsipër pagën e lojtarit, negociatat mund të avancojnë me shpejtësi./UBTNews/

Në një konferencë për shtyp Marash Kumbulla tha se dy kundërshtarët e radhës të Shqipërisë janë shumë të vështirë, por si gjithmonë Kombëtarja do të futet në fushë për të fituar. Qendërmbrojtësi kuqezi komentoi edhe formën e mirë që po kalon me ekipin e Espanyol si dhe konkurrencën e madhe në repartin e prapavijës në Kombëtare.

“Ajo periudhë ishte shumë e keqe për mua. Një vit e gjysmë dhe pas dëmtimit muajt në vazhdim nuk ishin shumë të thjeshta. Tani besoj se zhvillova një fazë përgatitore shumë të mirë, kalova te Espanyol dhe tani po i luaj të gjitha ndeshjet. Fizikisht ndihem shumë mirë dhe jam shumë i lumtur për këtë moment”, tha fillimisht Kumbulla.

Ai foli më tutje edhe për partneritetin në mbrojtje me Ismajlin.

“Jep garanci, por nuk është vetëm punë e imja dhe e Ismajlit, por e të gjithë ekipit. Kemi shumë konkurrencë, jemi shumë të mirë si mbrojtës, jo vetëm në qendër, por edhe në krah. Vendos trajneri dhe kush luan do të bëjë mirë”, theksoi ai.

Me sa pikë mendoni se Kombëtarja është e kënaqur në këto dy ndeshje? – Ne do futemi në fushë si gjithmonë për të fituar të dy ndeshjet. Tani mendojmë vetëm për Çekinë, është një ekip shumë fizik dhe i fortë në duele, tani mendojmë vetëm për ata dhe të shohim më pas për Gjeorgjinë.

Pas golit me Espanyol, presim një gol me ngjyrat kuqezi? – Po e pres edhe unë, pasi janë shumë ndeshje pa bërë gol në Kombëtare. Kam shumë dëshirë që të shënojë.

Ka ngacmime me nota humori mes teje, Ismajlit dhe Ajetit? – Nuk ka ngacmime, Kombëtarja është e para. Nëse ekipi, fiton të tjerat vijnë mbrapa. Është normal që të gjithë lojtarët duan të luajnë, por e dimë që në Kombëtare ka shumë konkurrencë. Janë të gjithë shumë lojtarë të mirë, të shohim zgjidhjet e trajnerit.

Dallimi mes kampionatit spanjoll dhe italian? – Kampionati në Spanjë është ndryshe nga Italia. Është më shumë taktik, loja është e hapur me kundërsulme dhe duele. Jam përshtatur shumë mirë në këtë kampionat.

Nuk keni qenë në dy ndeshjet me Çekinë në kualifikueset e Europianit, tani jeni më i motivuar për fitoren? – Po sigurisht. Të dy ndeshjet i kam parë nga shtëpia. Sic e thashë edhe më para, me Çekinë do të jetë një ndeshje shumë e vështirë, ne jemi shumë të motivuar, edhe ekipi kundërshtar gjithashtu. Presim një ndeshje shumë të vështirë.

Kombëtarja shqiptare e futbollit vazhdon përgatitjet në Tiranë për dy sfidat e radhës në Nations League, përballë Çekisë më 11 tetor dhe Gjeorgjisë më 14 tetor. Të gjithë lojtarët janë bashkuar me ekipin, ndërsa sot mbrojtësit Mario Mitaj dhe Marash Kumbulla zhvilluan një konferencë për median, ku ndanë mendimet e tyre mbi ndeshjet e ardhshme.

Mitaj, duke folur për ndeshjen me Çekinë, theksoi se kjo skuadër është tashmë një kundërshtar i njohur dhe që ekipi i kuqezinjve e di mirë se çfarë duhet të bëjë për të arritur një rezultat pozitiv. “E dimë kundërshtarin dhe e dimë se çfarë duhet të bëjmë. Mbrojtja jonë është shumë e fortë, dhe shumica e lojtarëve kanë luajtur me klubet e tyre, çka na jep besim,” deklaroi ai.

Mbrojtësi theksoi se humbja me Gjeorgjinë nuk ka ndikuar në psikologjinë e ekipit dhe se skuadra është e gatshme për sfidat e ardhshme. “Duhet të rikthehemi te fitorja. Kjo humbje nuk duhet të na ndikojë, por të na motivojë për t’u rikthyer më të fortë,” shtoi Mitaj.

Për aventurën e tij të re me Al Itihadin, ai shprehu kënaqësinë për pritjen që ka marrë në Arabinë Saudite, duke theksuar se ambienti është shumë profesional dhe ndihmues. “Jam çuditur me mënyrën si më kanë pritur, sidomos lojtarët që janë gjithmonë afër. Më ndihmojnë të ambientohem,” tha ai.

Kur u pyet se ku mendon se janë më të fortë përballë Çekisë, Mitaj theksoi mbrojtjen: “Besoj se në mbrojtje jemi më të fortë. Qendërmbrojtësit dhe mbrojtësit e krahut kanë shumë minuta në këmbë me klubet e tyre.”

Me optimizëm për sfidat e ardhshme, Mitaj u shpreh se dëshira e ekipit është të fitojë dhe se janë të gatshëm për të dhënë maksimumin në fushë. “E njohim kundërshtarin më mirë se më herët. Jemi më të fortë, besoj,” përfundoi ai./UBTNews/