George Clooney ka rrëfyer se është ndjerë i tronditur emocionalisht kur ka parë pamjet e vërteta nga filmat e tij të hershëm të përdorura në filmin e ri “Jay Kelly”.

Gjatë premierës në Los Angeles, aktori fitues i Oscar-it tha se kjo përvojë e befasoi më shumë sesa kishte menduar.

Në një deklaratë për “People”, Clooney pranoi se ngjashmëritë mes historisë së filmit dhe jetës reale ishin “të vështira për t’u përballuar”.

Sipas tij, skena finale ku personazhi i tij sheh një përmbledhje të karrierës në një ceremoni nderimi – ishte aq realiste, sa i shkaktoi një valë nervozizmi të papritur.

Noah Baumbach kishte zgjedhur të përdorte pamje autentike nga rolet e rinisë së Clooney-t, një surprizë që aktori nuk e dinte paraprakisht.

“Nuk kisha asnjë ide se do ta bënin,” tha ai. “Herën e parë që e xhiruan, ishte edhe hera e parë që e pashë. Ajo reagim i parë është pikërisht ajo që shihni në film.”

Një moment tjetër që ka bërë bujë është skena ku Clooney mban dorën e menaxherit të tij, të interpretuar nga Adam Sandler. Aktori zbuloi se ky gjest nuk ishte i shkruar në skenar: “Ndodhi krejt natyrshëm. U habita dhe u ndjeva pak nervoz. Nuk është e lehtë.”

Me humor ai shtoi: “Duhet të kesh shumë vetëbesim për të parë një përmbledhje 40-vjeçare të karrierës tënde. Nuk është gjithmonë e bukur.”

Reflektimi i Clooney-t ka rezonuar me fansat, të cilët e vlerësuan sinqeritetin e tij dhe mënyrën se si përballet me të kaluarën, një rrugëtim që e ka shndërruar prej kohësh në një nga figurat më të dashura të Hollywood-i. /A.Z/UBT News/

Brigitte Bardot po rikuperohet, pas raportimeve të fundit për shtrimin në spital për shkak të një problemi shëndetësor.

Në një deklaratë të publikuar të dielën më 30 nëntor nga Fondacioni Bardot, ikona 91-vjeçare e kinemasë franceze u përpoq të qetësonte fansat, duke i cilësuar si “lajme të rreme” informacionet e qarkulluara për gjendjen e saj.

Këto reagime erdhën pasi mediat raportuan se Bardot ishte shtruar sërish në spitalin Saint-Jean në Toulon. Ajo ishte trajtuar edhe në tetor, kur iu nënshtrua një ndërhyrjeje të vogël kirurgjikale, siç konfirmonte ekipi i saj.

Në njoftimin e publikuar në Instagram thuhej: “Përballë përhapjes së lajmeve të rreme, Brigitte Bardot dëshiron t’i sigurojë të gjithë se aktualisht është duke u shëruar. Ajo kërkon respekt për privatësinë e saj dhe u bën thirrje të gjithëve të qetësohen. Për ata që vërtet shqetësohen, ajo dërgon një mesazh: ‘Ju dërgoj dashurinë time të gjithëve.’”

Në tetor, Bardot kishte mohuar edhe një thashethem tjetër në internet që pretendonte se kishte ndërruar jetë, duke deklaruar: “Jam mirë. Nuk e di kush shpiku këtë lajm të rremë për ‘zhdukje’, dijeni se jam në gjendje të mirë dhe nuk kam ndërmend të largohem nga kjo botë.”

Edhe pse ekipi mjekësor nuk ka dhënë detaje shtesë, media franceze shkruan se aktorja ndodhet në gjendje stabile dhe nën kujdes të vazhdueshëm mjekësor. /A.Z/UBT News/

Gjatë koncertit të saj në Bogota, pjesë e turneut “Radical Optimism” që shënoi shfaqjen e fundit të gjysmës së dytë të turneut këngëtarja shqiptare me famë botërore, Dua Lipa dhuroi një performancë elektrizuese, duke mahnitur publikun.

Ndërsa këndonte, Dua befasoi fansat duke bërë një dedikim të ëmbël për këngëtaren kolumbiane fituese e Grammyt, Shakira, duke interpretuar me shpirt hitin e saj të vitit 1995, “Antologia”.

“Jam e prekur që po e dëgjoj këngën time me zërin e Duas, në të njëjtin qytet ku e kam shkruar vite më parë. Shihni si na bashkon muzika? Një vajzë nga Londra, një tjetër nga Barranquilla! Faleminderit @dualipa! Çfarë kënaqësie!”, ka shkruar Shakira në Instagram.

Postimi u shoqërua me një video ku Dua Lipa këndonte” Antologia” në skenë, duke shkaktuar një valë reagimesh të gëzuara nga fansat. /A.Z/UBT News/

Glen Powell po vazhdon ta ndërtojë statusin e protagonistit në filma hollywoodian me përzgjedhjen e roleve unike. I tillë është edhe roli i fundit në filmin e zhanrit triler, “How to Make a Killing”.

Projekti i ardhshëm, një bashkëprodhim mes studiove “A24” dhe “StudioCanal”, besohet se vjen i frymëzuar nga filmi kriminalistik i vitit 1949 i regjisorit Robert Hamer, “Kind Hearts & Coronets”.

Historia e tij përqendrohet te Becket Redfellow, i cili është lënë mënjanë nga familja e tij jashtëzakonisht e pasur dhe është i gatshëm të bëjë çdo gjë të nevojshme – përfshirë dhunën – për të siguruar trashëgiminë e tij.

Regjinë dhe skenarin e filmit e ka bërë John Patton Ford, kurse kasta e aktorëve përbëhet edhe nga yjet Margaret Qualley, Jessica Henwick, Zach Woods, Topher Grace, Bill Camp dhe Ed Harris.

“How To Make A Killing” planifikohet të lansohet nëpër kinema më 20 shkurt të vitit 2026. /A.Z/UBT News/