Lajmet

Aktivitete të shumta karakterizojnë shënimin e 20-vjetorit të UBT-së

Në një ceremoni solemne UBT do të shpalos 20 inovacionet për 20-vjetorin e UBT-së.

Published

4 years ago

December 14, 2021

Betim Gashi

Aktivitete të shumta do të karakterizojnë gjysmën e dytë të muajit dhjetor, në kuadër të shënimit të 20-vjetorit të UBT-së, njërit prej institucioneve më cilësore të arsimit të lartë në vend.

Duke filluar me turneun në futsal, nën organizimin e Fakultetit Shkencat e Sportit dhe Lëvizjes në UBT, si dhe me përurimin e qendrës për krijimin e dokumentarëve “UBT-Docs”, ka filluar maratona e dhjetorit të kaltër, që UBT-në do e vë në sipërfaqe si institucionin më inovativ në vend dhe rajon.

Aktivitetet do të vazhdojnë me turneun në ping pong, ku studentët e UBT-së do të kenë mundësi të shpalosin aftësitë e tyre në këtë garë, duke nderuar institucionin model në rajon që këtë vit këtyre studentëve iu ofroi edhe programin unik Shkencat e Sportit dhe Lëvizjes.

Aktivitetet do të vazhdojnë me ekspozitën tradicionale të Fakultetit të Arkitekturës dhe Planifikimit Hapësinor në UBT, në të cilën do të ekspozohen punimet e studentëve të UBT-së, me tema aktuale sociale që ofrojnë zgjidhje për problemet e shoqërisë, teksa aktivitetet do të vazhdojnë edhe me Fakultetin e Psikologjisë në UBT, me workshopin me temën “Rëndësia e Shkathtësive të Lidershipit (udhëheqëse) në shekullin 21”, workshop ky me elemente fuqizuese për të rinjtë.

Në kuadër të shënimit të 20-vjetorit të UBT-së, do të bëhet edhe përurimi i “Sport Hub”, qendër kjo e cila do të mbledhë të rinjtë në një vend dhe që do të përmbledh të gjitha sportet në një ekosistem të mahnitshëm të dijes.

Në një ceremoni solemne UBT do të shpalos 20 inovacionet për 20-vjetorin e UBT-së, nën patronatin e rektorit të UBT-së, prof.dr. Edmond Hajrizi, duke dëshmuar edhe njëherë lidershipin e institucionit në zhvillimin e shkencës dhe arsimit në Kosovë dhe rajon.

Në kuadër të shënimit të 20-vjetorit të themelimi të institucionit më të madh të arsimit të lartë në vend – UBT, do të bëhet edhe promovimi i librit për 20-vjetorin e UBT-së, që përmban 20 vite aktivitete të institucionit, storie suksesi, bashkëpunime të institucionit dhe detaje të tjera të cilat do të shpalosen me rastin e promovimit të librit të 20-vjetorit të UBT-së.

Në kuadër të aktiviteteve për 20-vjetorin e UBT-së, Fakulteti i Gjuhës Angleze në UBT, ka organizuar aktivitetin “UBT has got talents”, aktivitet ky që përfshin muzikë, poezi, shkrim, instrument, aktrim, si dhe garën “Spelling Bee”, një garë që sfidon studentët në germëzimin e fjalëve më të reja në gjuhën angleze.

Aktivitet për të shënuar 20-vjetorin e themelimit të institucionit më të madh akademik në vend, do të mbajë edhe Shkolla e Mesme e Mjekësisë dhe Gjimnazi UBT, që sivjet ka filluar punën me një kurrikulë unike në arsimin e mesëm të lartë.

Shkolla e Dizajnit në kuadër të Fakultetit Dizajn i Integruar në UBT, do të mbajë aktivitetin me temën: “Aftësitë prezantuese dhe komunikimi”, teksa në natën finale do të hapet ekspozita me fotografi që përmbledhin 20 vite aktivitete dhe angazhim i palodhshëm në nxjerrjen e gjeneratave të reja e të suksesshme.

Lajmet

“Syrigana” e Petrit Halilajt prezantohet me sukses në Berlin

Published

21 minutes ago

June 1, 2026

UBT News

Opera bashkëkohore “Syrigana” e artistit kosovar Petrit Halilaj është prezantuar para publikut ndërkombëtar në Berlin, në hapësirat e “Hamburger Bahnhof”, një prej muzeve më të rëndësishëm të artit bashkëkohor në Evropë.

Interpretimi u realizua nga një ansambël i Filharmonisë së Kosovës në kuadër të ekspozitës “An Opera Out of Time”, e cila kishte në qendër operën e parë të Halilajt dhe njëherësh shënoi mbylljen e ekspozitës së tij personale në këtë institucion prestigjioz.

E bazuar në mite, legjenda dhe rrëfime të lidhura me vendlindjen e artistit, “Syrigana” ndërthur muzikën, teatrin dhe instalacionin artistik, duke sjellë një përvojë unike për publikun. Vepra pati premierën në qershor të vitit të kaluar në Syriganë të Skenderajt dhe që atëherë është vlerësuar si një nga projektet më të veçanta artistike të realizuara në Kosovë.

Sipas Filharmonisë së Kosovës, prezantimi në Berlin përbën një moment të rëndësishëm në rrugëtimin e operës, e cila tashmë ka potencial të vazhdojë jetën e saj artistike edhe në skena të tjera ndërkombëtare.

Me këtë paraqitje, Petrit Halilaj ka vazhduar ta prezantojë artin dhe kulturën e Kosovës në qendra të rëndësishme botërore, duke e shndërruar kujtesën, mitet dhe historitë lokale në vepra me jehonë ndërkombëtare.

Lajmet

Protestë në Tiranë kundër ndërtimeve në zonat e mbrojtura

Published

1 hour ago

June 1, 2026

UBTNews

Qindra qytetarë, aktivistë mjedisorë dhe përfaqësues të shoqërisë civile protestuan më 31 maj në Tirana kundër ndërtimeve që po planifikohen ose po zhvillohen në zona të mbrojtura natyrore të Shqipërisë. Protesta erdhi pas tensioneve të regjistruara në zonën e Zvërnec, ku pati përplasje mes protestuesve dhe personave të angazhuar në sigurinë e një projekti turistik.

Marshimi nisi pranë institucioneve të Policisë së Shtetit dhe vijoi drejt Ministrisë së Brendshme e më pas para Kryeministrisë. Protestuesit kërkuan ndalimin e ndërtimeve në zonat e mbrojtura dhe hetim të veprimeve të forcave private të sigurisë gjatë incidenteve në Zvërnec.

Në qendër të debatit është një projekt turistik që lidhet me zonën e mbrojtur të Narta dhe Pishë Poro, afër Zvërnecit. Aktivistët dhe organizatat mjedisore pretendojnë se zhvillimi i projekteve turistike në këtë territor rrezikon ekosistemet lokale, habitatet e shpendëve dhe karakterin e zonës së mbrojtur.

Tensionet u përshkallëzuan pas raportimeve për përplasje fizike mes protestuesve dhe rojeve private në zonën e kantierit. Pas incidentit, autoritetet njoftuan masa hetimore, ndërsa çështja mori jehonë të gjerë në media dhe rrjete sociale.

Debati lidhet me ndryshimet e viteve të fundit në legjislacionin për zonat e mbrojtura në Shqipëri. Kritikët argumentojnë se këto ndryshime kanë krijuar mundësi më të mëdha për investime dhe ndërtime në territore që më parë kishin kufizime më të forta mjedisore. Nga ana tjetër, qeveria ka mbrojtur projektet turistike duke argumentuar se ato sjellin zhvillim ekonomik, punësim dhe investime strategjike.

Organizata mjedisore vendase dhe ndërkombëtare kanë ngritur vazhdimisht shqetësime për menaxhimin e zonave të mbrojtura në Shqipëri, duke kërkuar që zhvillimi ekonomik të mos cënojë biodiversitetin dhe pasuritë natyrore.

Sipas organizatorëve, protestat pritet të vazhdojnë edhe në ditët në vijim nëse nuk ka reagim institucional për anulimin ose rishikimin e projekteve të kontestuara. Ndërkohë, kryeministri Edi Rama ka paralajmëruar një deklaratë publike lidhur me situatën në Zvërnec dhe projektin që ka shkaktuar kundërshtimet./Top Channel/

Lajmet

Mot i paqëndrueshëm në javën e parë të qershorit

Published

2 hours ago

June 1, 2026

UBTNews

Kosova këtë javë do të përfshihet nga mot i paqëndrueshëm gjatë ditëve të para të javës, me reshje lokale shiu, shkarkesa elektrike dhe rrezik për breshër në disa zona.

Sipas parashikimit të Institutit Hidrometeorologjik të Kosovës, java 1–5 qershor do të karakterizohet nga mot i ndryshueshëm, me intervale me diell dhe zhvillim të vranësirave që vende-vende do të sjellin reshje shiu dhe stuhi të izoluara.

Dita e hënë dhe e martë, priten të ketë reshje të shoqëruara me rrufe, ndërsa në disa rajone mund të ketë edhe breshër.

Pavarësisht kushteve të paqëndrueshme, temperaturat do të mbeten mbi mesataren për këtë periudhë. Vlerat maksimale do të arrijnë deri në 29 gradë Celsius, duke sjellë mot veror në pjesën më të madhe të vendit.

Nga mesi i javës moti pritet të stabilizohet gradualisht, me më shumë intervale me diell dhe vetëm reshje të izoluara lokale.

Instituti Hidrometeorologjik njofton gjithashtu se cilësia e ajrit do të mbetet kryesisht e mirë, ndërsa indeksi UV gjatë orëve të mesditës do të jetë i lartë. Qytetarët këshillohen të shmangin ekspozimin e zgjatur në diell gjatë orëve më të nxehta të ditës.

Java do të sjellë temperatura të këndshme verore, por edhe rrezik për stuhi të shkurtra lokale, veçanërisht në fillim të saj.

lajme

Artistja Arbresha Hoxha prezanton veprat e saj në Barcelonë, New York dhe Vjenë

Published

15 hours ago

May 31, 2026

ubtnews

Artistja dhe dizajnerja, njëherit profesoreshë në Fakultetin e Artit dhe të Dizajnit në UBT, Arbresha Hoxha do të përfaqësojë krijimtarinë e saj në tri ngjarje të rëndësishme ndërkombëtare të artit bashkëkohor gjatë vitit 2026, duke zgjeruar praninë e saj artistike në skenën globale dhe duke promovuar artin shqiptar në kontekste prestigjioze ndërkombëtare.

Pjesëmarrja e parë do të realizohet në Barcelona Contemporary Art Exhibition 2026, e cila do të mbahet në Barcelonë gjatë muajit korrik 2026. Në këtë ekspozitë ndërkombëtare, veprat e Arbresha Hoxhës do të prezantohen përkrah artistëve nga vende të ndryshme të botës, duke krijuar mundësi të reja bashkëpunimi dhe shkëmbimi profesional me kuratorë, artistë dhe institucione kulturore ndërkombëtare.

Më pas, veprat e saj do të ekspozohen në Times Square Billboard Showcase në New York City, një platformë prestigjioze që promovon artin digjital dhe bashkëkohor në një nga hapësirat publike më ikonike në botë. Kjo pjesëmarrje përfaqëson një mundësi të rëndësishme për prezantimin e krijimtarisë së saj para një audience të gjerë ndërkombëtare.

Gjithashtu, më 27–28 qershor 2026, Arbresha Hoxha do të marrë pjesë në një ekspozitë ndërkombëtare të arteve pamore në Vjenë, Austri, ku do të ekspozojë veprat e saj së bashku me artistë nga vende të ndryshme. Ngjarja synon të nxisë dialogun ndërkulturor dhe shkëmbimin e ideve artistike përmes praktikave bashkëkohore të artit vizual.

Këto paraqitje ndërkombëtare dëshmojnë angazhimin e vazhdueshëm të Arbresha Hoxhës në zhvillimin e praktikës së saj artistike dhe në promovimin e artit shqiptar në skenën ndërkombëtare. Përmes pjesëmarrjes në këto ngjarje të rëndësishme, ajo kontribuon në forcimin e dialogut kulturor dhe në prezantimin e vlerave bashkëkohore të artit vizual para publikut global.