Një rast i sulmit ndaj personit zyrtar është raportuar në Prizren, ku një person është arrestuar nga Policia e Kosovës.

Sipas raportit të fundit të Policisë, ngjarja ka ndodhur më 26 prill 2026 rreth orës 10:10 në fshatin Nashec, ku i dyshuari mashkull kosovar dyshohet se ka sulmuar fizikisht një person zyrtar teksa ai ishte duke ushtruar detyrën e tij.

Me vendim të prokurorit, i dyshuari është dërguar në mbajtje, ndërsa rasti po trajtohet nga organet kompetente.

Dy raste që lidhen me përdorimin dhe posedimin e armëve janë raportuar në Kaçanik dhe Mitrovicë, ku janë përfshirë persona të dyshuar meshkuj kosovarë.

Në fshatin Bajnic të Kaçanikut, më 26 prill, policia ka arrestuar një të dyshuar pasi dyshohet se nga vetura kishte shtënë në ajër me armë zjarri. Në vendin e ngjarjes janë gjetur dhe sekuestruar disa gëzhoja, ndërsa nga i dyshuari është konfiskuar një armë e tipit AK-47 me 35 fishekë. Sipas raportit të fundit të Policisë së Kosovës, me vendim të prokurorit i dyshuari është liruar në procedurë të rregullt.

Ndërkohë, një rast tjetër është shënuar në fshatin Vidimriq të Mitrovicës së Jugut, ,ku gjatë kontrollit të një veture është gjetur dhe sekuestruar një pushkë ajrore me 15 diabolla. Edhe në këtë rast, i dyshuari është arrestuar, por më pas është liruar me vendim të prokurorit, ndërsa rasti vazhdon në procedurë të rregullt.

Sipas raportit të fundit të Policisë së Kosovës, disa raste të vjedhjeve të rënda janë regjistruar në rajone të ndryshme të vendit, përfshirë Prishtinën, Gllogocin dhe Gjilanin.

Në fshatin Prugovc të Prishtinës, një rast i ndodhur më 23 prill ka çuar në arrestimin e një të dyshuari më 26 prill. Sipas policisë, i dyshuari kishte depërtuar me forcë në shtëpinë e viktimës dhe kishte kryer vjedhje. Me vendim të prokurorit, ai është dërguar në mbajtje.

Një tjetër rast është raportuar më 26 prill rreth orës 18:21 në fshatin Fushticë e Poshtme, në Gllogoc, ku persona të panjohur dyshohet se kanë hyrë me forcë në një shtëpi dhe kanë kryer vjedhje. Policia bën të ditur se rasti është duke u hetuar.

Ndërkohë, në Gjilan, më 26 prill rreth orës 11:23, janë identifikuar dhe arrestuar pesë të dyshuar meshkuj kosovarë, të cilët dyshohet se disa ditë më parë kishin depërtuar me forcë në shtëpinë e një qytetari dhe kishin vjedhur gjësende të ndryshme. Sipas policisë, sendet e vjedhura janë kthyer te pronari, ndërsa të dyshuarit janë dërguar në mbajtje me vendim të prokurorit.

Autoritetet njoftojnë se hetimet lidhur me këto raste po vazhdojnë.

Në raportin njëditor të Policisë së Kosovës janë raportuar pesë raste të dhunës në familje, ku tri prej tyre janë regjistruar në rajonin e Prishtinës.

Në rastin e parë në Prishtinë janë arrestuar një çift, pasi si shkak i një mosmarrëveshje janë përleshur fizikisht mes vete.

Sipas raportit, me urdhër te prokurorit të dyshuarit janë liruar ndërsa rasti ka vazhduar të trajtohet në procedurë të rregullt.

Ndërsa, në rastin e dytë, një burrë është shoqëruar në stacionin policor pasi ka sulmuar fizikisht një grua. Sipas raportit viktima ka pranuar tretman mjekësor, ndërsa i dyshuari është liruar në procedurë të rregullt.

Një rast i ngjashëm ka ndodhur edhe në Podujevë, raportohet se një burrë ka ushtruar dhunë fizike ndaj një gruaje. Sipas raportit viktima ka pranuar tretman mjekësor, ndërsa rasti është në procedurë hetimore

Rasti tjetër për dhunë në familje është regjistruar në Pejë, ku është arrestuar një burrë pasi dyshohet se ka ushtruar dhunë në familje ndaj familjarëve të tij.

Me vendim të prokurorit ndaj të dyshuarit është lëshuar vendim për ndalim dhe i njëjti është dërguar në trajtim mjekësor.

Ndërkaq, rasti i fundit ka ndodhur në Gjakovë ku edhe në këtë rast është arrestuar një burrë nën dyshimin se ka ka ushtruar dhunë fizike ndaj një gruaje.

Ndërsa me vendim të prokurorit i dyshuari është dërguar në mbajtje.