Në raportin njëditor të Policisë së Kosovës janë raportuar pesë raste të dhunës në familje, ku tri prej tyre janë regjistruar në rajonin e Prishtinës.

Në rastin e parë në Prishtinë janë arrestuar një çift, pasi si shkak i një mosmarrëveshje janë përleshur fizikisht mes vete.

Sipas raportit, me urdhër te prokurorit të dyshuarit janë liruar ndërsa rasti ka vazhduar të trajtohet në procedurë të rregullt.

Ndërsa, në rastin e dytë, një burrë është shoqëruar në stacionin policor pasi ka sulmuar fizikisht një grua. Sipas raportit viktima ka pranuar tretman mjekësor, ndërsa i dyshuari është liruar në procedurë të rregullt.

Një rast i ngjashëm ka ndodhur edhe në Podujevë, raportohet se një burrë ka ushtruar dhunë fizike ndaj një gruaje. Sipas raportit viktima ka pranuar tretman mjekësor, ndërsa rasti është në procedurë hetimore

Rasti tjetër për dhunë në familje është regjistruar në Pejë, ku është arrestuar një burrë pasi dyshohet se ka ushtruar dhunë në familje ndaj familjarëve të tij.

Me vendim të prokurorit ndaj të dyshuarit është lëshuar vendim për ndalim dhe i njëjti është dërguar në trajtim mjekësor.

Ndërkaq, rasti i fundit ka ndodhur në Gjakovë ku edhe në këtë rast është arrestuar një burrë nën dyshimin se ka ka ushtruar dhunë fizike ndaj një gruaje.

Ndërsa me vendim të prokurorit i dyshuari është dërguar në mbajtje.

Dy raste  të posedimit të substancave narkotike janë raportuar në Kosovë gjatë 22 dhe 23 prillit, bëjnë të ditur autoritetet.

Rasti i parë është regjistruar në Qendra Korrektuese Dubravë, ku më 22 prill rreth orës 14:00 është gjetur një sasi e dyshuar narkotike prej rreth 7 gramësh, e llojit marihuanë. Rasti është në hetim nga njësitë përkatëse.

Ndërkohë, rasti i dytë ka ndodhur në Gjakovë, në rrugën “Behije Gashi”, më 23 prill rreth orës 18:35. Gjatë kontrollit në trupin e një të dyshuari mashkull kosovar, policia ka gjetur dhe konfiskuar 0.35 gram substancë të dyshuar narkotike të llojit kokainë.

Pas intervistimit, me vendim të prokurorit, i dyshuari në Gjakovë është liruar në procedurë të rregullt.

Autoritetet po vazhdojnë hetimet për të dy rastet.

Një rast i kontrabandimit me mallra është evidentuar në Hani i Elezit, në Pikën e Kalimit Kufitar.

Sipas njoftimit, më 23 prill rreth orës 10:00, gjatë kontrollit të një autobusi të përzgjedhur për inspektim, janë zbuluar mallra të padeklaruara.

Lidhur me rastin, njësitë policore në bashkëpunim me Doganën e Kosovës kanë ndërmarrë veprimet e nevojshme procedurale, në përputhje me legjislacionin në fuqi.

Rasti është duke u trajtuar nga autoritetet kompetente.

Gjatë 24 orëve të fundit, Policia e Kosovës ka raportuar disa raste të dhunës dhe kanosjes, ku disa persona janë dërguar në mbajtje.

Në Podujevë, rreth orës 11:55, është arrestuar një i dyshuar mashkull kosovar nën dyshimin se ka kanosur një viktimë mashkullore. Me vendim të prokurorit, ai është dërguar në mbajtje.

Ndërkohë, në Fushë Kosovë janë shënuar dy raste. Në njërin rast, një i dyshuar është arrestuar për dhunë ndaj një viktime femër, e cila ka pësuar lëndime trupore dhe ka marrë trajtim mjekësor. Në rastin tjetër, një i dyshuar është arrestuar pasi dyshohet se ka ofenduar, kanosur dhe sulmuar fizikisht një viktimë femër, duke i shkaktuar lëndime. Viktima është trajtuar dhe dërguar në strehimore, ndërsa i dyshuari, pas intervistimit, është liruar në procedurë të rregullt.

Në Pejë, rreth orës 09:00, një i dyshuar është arrestuar për sulm fizik ndaj një mashkulli. Pas intervistimit të palëve, me vendim të prokurorit, ai është liruar në procedurë të rregullt.

Një tjetër rast është raportuar në Rahovec, rreth orës 20:30, ku një i dyshuar në gjendje të dehur dyshohet se ka ushtruar dhunë fizike dhe ofendime ndaj një viktime femër. Policia ka bastisur shtëpinë e tij, por nuk ka gjetur asgjë të dyshuar. Me vendim të prokurorit, i dyshuari është dërguar në mbajtje.

Po ashtu, në Mitrovicë, rreth orës 22:49, një i dyshuar në gjendje të dehur është arrestuar pasi dyshohet se ka dëmtuar gjësende në shtëpi pas një mosmarrëveshjeje me një viktimë femër. Viktima ka refuzuar strehimin dhe masat mbrojtëse, ndërsa i dyshuari është dërguar në mbajtje me urdhër të prokurorit.

Autoritetet po vazhdojnë hetimet lidhur me këto raste.