Agjencia Kosovare për Krahasim dhe Verifikim të Pronës ka hedhur poshtë deklarimet e kreut të ashtuquajturës zyrë për Kosovën Petar Petkoviq lidhur me një rast pronësor në veri të Kosovës, duke i konsideruar ato si përpjekje të rrezikshme për politizim dhe dezinformim.

Petkoviq gjatë ditës në rrjetin X kishte shkruar mbi një rast të pronës në veri të Mitrovicës, me pretendimet se ajo i takon një pjesëtari të komunitetit serb.

AKKVP ndërkohë thotë se rasti në fjalë, që përfshin pronën e familjes Ferki Shipolli, është trajtuar që në vitin 2005, ku është vërtetuar se pala është poseduese e ligjshme e pronës.

“Rikthimi i pronës bëhet përmes procedurave të rregullta ligjore dhe zbatohet ndaj çdo uzurpimi të paligjshëm, pavarësisht përkatësisë etnike apo statusit të palës. Deklaratat e tilla si kjo e Petkoviq janë të papranueshme pasi ato nxisin tensione dhe minojnë sundimin e ligjit dhe bashkëjetesën.”, rikujton AKKVP.

AKKVP zbaton vendime përfundimtare të institucioneve ligjore në përputhje me mandatin dhe kornizën ligjore në fuqi, dhe se mbetet e përkushtuar ndaj zbatimit të drejtë, të barabartë dhe ligjor të mandatit të saj.

Rusia dhe Ukraina kanë filluar një raund të tretë bisedimesh paqeje në Stamboll, ku presidenti ukrainas Volodymyr Zelensky tha se pritjet e tij nuk janë të larta, duke thënë se bisedimet e hollësishme mbi një armëpushim nuk janë në agjendë.

“Takimi duhet të përqendrohet në progresin në kthimin e të burgosurve të luftës dhe fëmijëve ukrainas të rrëmbyer nga Rusia, si dhe në përgatitjen për një takim në nivel presidencial”, u tha Zelensky diplomatëve.

Dy raundet e mëparshme të bisedimeve, të organizuara në Stamboll më 16 maj dhe 2 qershor, nuk arritën të prodhonin përparim konkret në një armëpushim. Ato përfunduan vetëm me një marrëveshje për shkëmbimin e të burgosurve dhe riatdhesimin e mbetjeve të ushtarëve.

Takimet u nxitën nga presioni i presidentit të SHBA-së Donald Trump. Raundi i tretë vjen pasi Trump shprehu pakënaqësi me Moskën për përpjekjet për t’i dhënë fund luftës dhe kërcënoi me sanksione.

Ekipi ukrainas do të udhëhiqet nga ish-ministri i mbrojtjes Rustem Umerov, i cili që atëherë është emëruar kreu i Këshillit të Sigurisë dhe Mbrojtjes Kombëtare. Delegacioni rus do të udhëhiqet përsëri nga këshilltari presidencial dhe ish-ministri i kulturës Vladimir Medinsky.

Ndërsa Kievi këmbëngul për një armëpushim pa kushte për të lejuar bisedimet për t’i dhënë fund konfliktit, Rusia po i përmbahet kërkesave të saj maksimale, duke përfshirë tërheqjen e plotë të forcave ukrainase nga rajonet lindore të aneksuara nga Moska.

Ministria e Punëve të Jashtme dhe Diasporës njofton se Zyra Ndërlidhëse e Republikës së Kosovës në Serbi është njoftuar mbrëmjen e 22 korrikut për arrestimin e shtetasit të Republikës së Kosovës, Lulzim Halili.

Sipas informacioneve të pranuara, Halili është ndaluar nga autoritetet serbe në afërsi të qytetit Svilajnac, rreth 100 kilometra nga Beogradi dhe është dërguar menjëherë në mbajtje në Stacionin Policor të këtij qyteti.

Zyra Ndërlidhëse ka tentuar të konfirmojë arrestimin përmes kontaktit me Stacionin Policor në Svilajnac rreth orës 23:00 mbrëmë, mirëpo zyrtari policor kujdestar ka refuzuar të ofrojë detaje mbi rastin.

Zyra Ndërlidhëse i ka adresuar një kërkesë zyrtare Qeverisë së Serbisë, përmes Zyrës Ndërlidhëse të Serbisë në Kosovë dhe me njoftim paralel për Delegacionin e Bashkimit Evropian në Serbi, për të konfirmuar zyrtarisht arrestimin dhe për të marrë informata shtesë lidhur me rastin. Deri më tani, nuk kemi pranuar përgjigje nga pala serbe.

Gjithashtu, Zyra Ndërlidhëse ka njoftuar për këtë rast misionet diplomatike të vendeve të QUINT-it të akredituara në Serbi si dhe Delegacionin e Bashkimit Evropian.

Sapo të konfirmohet nëse Halili do t’i nënshtrohet masës së paraburgimit dhe do të iniciohet procedurë penale ndaj tij, Zyra Ndërlidhëse do të parashtrojë kërkesë zyrtare për vizitë në Qendrën e Mbajtjes dhe për çdo zhvillim të mëtejmë rreth këtij rasti MPJD do të informojë publikun me kohë.

MPJD u bën thirrje të gjithë qytetarëve të Kosovës të shmangin udhëtimet dhe kalimet transite përmes territorit të Serbisë, për shkak të rrezikut të shtuar për ndalime dhe arrestime arbitrare nga autoritetet serbe.

Njësia Rajonale për Hetimin e Krimeve Ekonomike dhe Korrupsionit Prizren, ka ndërmarrë veprime hetimore sipas autorizimit të prokurorit të shtetit, mbi dyshimet se zyrtarë nga Drejtoria e Urbanizmit dhe Drejtoria për Gjeodezi dhe Kadastër në Gjakovë, kanë mundësuar kundërligjshëm bartjen e pronave në pronësi të personave të tretë.

Pas një mori veprimesh hetimore, të kryera në koordinim me prokurorin e shtetit, janë siguruar dëshmi që mbështesin dyshimin se dy meshkuj dhe dy femra nga Drejtoria e Urbanizmit dhe Drejtoria e Kadastrës e Gjakovës. Dyshohet se me veprimet e tyre në vitet 2018 dhe 2019, kanë lëshuar kundërligjshëm pëlqimet dhe vendimet për parcelizimin dhe bartjen e pronave te personat e tretë, pa dijeninë dhe autorizimin e pronarëve legjitimë, raporton KosovaPress.

Personat e dyshuar janë intervistuar në prezencën e mbrojtësve të tyre, ndaj tyre është iniciuar rasti keqpërdorimi i pozitës apo autoritetit zyrtar dhe me aktvendim të prokurorit, të katër të dyshuarit janë ndaluar deri në 48 orë.