Presidenti dhe Rektori i UBT-së, Prof. Dr. Edmond Hajrizi, ishte folës në Forumin Global të ACEEU (The Accreditation Council for Entrepreneurial & Engaged Universities), i cili po mbahet në Pragë.

Në këtë forum ndërkombëtar, që mbledh qindra përfaqësues nga universitetet më të mëdha dhe inovative në botë, Rektori Hajrizi prezantoi mbi temën: “Leading Beyond Boundaries: Innovation, Sustainability, and Social Impact at UBT”, duke paraqitur modelin unik të ekosistemit UBT Smart City si një shembull frymëzues për transformimin e arsimit të lartë në shekullin XXI.

Në fjalën e tij, ai theksoi rëndësinë e ndërthurjes së arsimit, teknologjisë, sipërmarrjes, përgjegjësisë sociale dhe inovacionit, duke prezantuar rezultate konkrete dhe modele të reja, ndër të cilat edhe ai i fundit që konfirmon UBT-në si “The leading fully AI-powered ecosystem in Europe” – një ekosistem i ndërtuar mbi inteligjencën artificiale, i cili po shërben si model për universitetet evropiane dhe globale.

Pjesëmarrësit patën mundësinë të njihen nga afër me mënyrën se si UBT ka arritur të krijojë një platformë gjithëpërfshirëse, ku studentët, profesorët, industria dhe institucionet vendore e globale bashkëpunojnë për të gjeneruar dije të reja dhe për të ndërtuar zgjidhje inovative. Ky ekosistem po kontribuon në adresimin e sfidave të ndryshme që lidhen me urbanizimin, shëndetin, rritjen ekonomike, mjedisin dhe zhvillimin e qëndrueshëm.

Kjo konferencë vlerësohet si një ndër më të rëndësishmet në fushën e arsimit të lartë, sipërmarrjes dhe inovacionit, duke theksuar nevojën që universitetet të jenë të adaptueshme, të orientuara drejt impaktit dhe të angazhuara ngushtë me shoqërinë.

Kryeministri Edi Rama, ka prezantuar kabinetin e ri qeveritar, duke konfirmuar Belinda Ballukun si numrin dy të qeverisë, në rolin e zëvendëskryeministres dhe ministre të Infrastrukturës dhe Energjisë.

Risia e këtij kabineti është edhe emërimi i një gruaje në krye të Ministrisë së Brendshme për herë të parë. Rama ia besoi këtë post Albana Koçiut, e cila ka një përvojë të gjatë në administratën publike.

“Në drejtimin e Ministrisë së Brendshme do të vijë Albana Koçiu, e cila ka një karrierë tanimë të gjatë në administratë, ka filluar nga shkalla më e ulët, e njeh si pakkush në këtë vend administratën publike, ka qenë për 10 vjet, në mos gabohem drejtore e Administratës Publike dhe në drejtimin e Ministrisë së Shëndetësisë, më ka krijuar bindjen që jo vetëm ka ambicien dhe këmbënguljen, por ka dhe një kapacitet të veçantë motivues të njerëzve”. është shprehur Rama.

Ndërsa Elisa Spiropali do të drejtojë Ministrinë e Jashtme, ndërsa mjekja e njohur Evis Sala, e angazhuar prej vitesh në qendrat spitalore më prestigjioze në Evropë dhe SHBA, do të marrë drejtimin e Ministrisë së Shëndetësisë dhe Mirëqenies Sociale.

Nga kabineti Rama 4 mbetën jashtë Ulsi Manja, Igli Hasani, Arbjan Mazniku dhe Anila Denaj, ndërkohë që në vend të tyre erdhën Besfort Lamallari (Ministër i Drejtësisë), Elisa Spiropali (Ministër për Evropën dhe Punët e Jashtme), Ervin Demo (Ministër i Shtetit për Pushtetin Vendor) dhe Andis Salla (Ministër i Bujqësisë dhe Zhvillimit Rural).

Mirela Kumbaro, një prej ministreve më jetëgjata në qeverinë socialiste, do të kalojë nga Mjedisi në Arsim, ndërsa Blendi Gonxhja do të drejtojë Kulturën, Turizmin dhe Sportin. Delina Ibrahimaj u emërua ministre e Ekonomisë dhe Inovacionit.

Niko Peleshi do të drejtojë Kuvendin, ndërsa Taulant Balla rikthehet si kryetar i grupit parlamentar socialist./D.B/TopChannel

Shqipëria do të luajë në datën 11 tetor një nga ndeshjet më të rëndësishme jo vetëm për kualifikueset e Botërorit, por gjithashtu edhe për historinë, duke ditur rivalitetin e kuqezinjve me Serbinë, historikun mes tyre dhe problemet politike.

Pavarësisht se këto në futboll nuk kanë vend, në tribunat e tifozerisë serbe kanë qenë gjithmonë prezentë, madje edhe atëherë kur asgjë nuk lidhej as me Shqipërinë dhe as me Kosovën.

Kjo ndeshje e shumëpritur, pritet të zhvillohet në datën 11 tetor në Beograd dhe numri 11, nuk vetëm data në të cilën luhet ndeshja, por lidhet edhe me shumë “11-a” të tjera.

11 VITE NGA DRONI- Në vitin 2014, Shqipëria luante një ndeshje të madhe në Serbi, teksa ëndrra për një vend në Europianin e Francës sapo kishte nisur. Kuqezinjtë përballeshin jo vetëm me skuadrën serbe, por me terrorin serb, me tifozerinë e cila në çdo moment bënte thirrje për vdekjen e shqiptarëve, apo edhe me vendimet për të mos lejuar jo vetëm tifozët shqiptarë, por as flamurin kuqezi në stadium. Gjithçka u duk se po shkonte mirë, kur në qiellin e Beogradit u shfaq flamuri “Autochthonous”, me autor Ballist Morinën, “incident” ky që jo vetëm që i solli Shqipërisë 3 pikët në tavolinë, por gjithashtu dënoi edhe Serbinë me zbritje pikësh, duke e bërë kualifikimin e kuqezinjve edhe më të lehtë.

11 PIKË NË SERBI- Kuqezinjtë kanë objektiv vendin e dytë në grup, pasi Anglia praktikisht e ka blinduar vendin e parë, duke treguar forcën ndaj çdo rivali. Të gjithë në Kombëtare e dinë se pas hapit fals ndaj Letonisë, vendi i dytë mund të arrihet vetëm duke mundur Serbinë në Beograd, që duhet të shoqërohet patjetër me një fitore ndaj Andorrës e më pas, ndaj Anglisë mund të luajnë pa presionin e rezultatit. Me një fitore në Serbi, kuqezinjtë do të arrinin në kuotën e 11 pikëve dhe me shumë gjasa, do të blindojnë vendin e dytë në grup.

11 PËRBALLJE MES DY SKUADRAVE- Dy skuadrat janë përballur në historinë e tyre 11 herë, nga të cilat 3 ndeshje kanë qenë mes Shqipërisë e Serbisë, e 8 të tjera kanë qenë mes Shqipërisë dhe Ish-Jugosllavisë, megjithatë fitorja e vetme e kuqezinjve ka qenë në 14 tetorin e vitit 2014, me rezultatin 0-3 në tavolinë, fitore kjo që e ndihmoi Shqipërinë të shkonte në Europianin e 2016 me 14 pikë.

11 LUANË NË FUSHË- Në datën 11 tetor, në fushë nuk duhet të jenë vetëm 11 futbollistë por 11 luanë, të cilët duhet të dinë vlerën e fitores, vlerën e 3 pikëshit e për më tepër, duhet të dinë vlerën e fanellës kuqezi dhe faktin se një fitore, i afron jashtëzakonisht shumë me Botërorin, pavarësisht se duhet të kalojnë edhe fazën e “Play Off”. Nëse në fushë janë 11 luanë të cilët japin shpirtin deri në vërshëllimën e fundit, fitorja mund të arrihet pa vështirësi ashtu siç merrej ndaj Greqisë kampione të Europës, apo edhe ndaj Francës në miqësore e ndaj Portugalisë në kualifikueset e Europianit./S.K/EO/

Ministri i Punëve të Jashtme dhe Tregtisë së Jashtme të Maqedonisë së Veriut, Timço Mucunski, dhe koordinuesja e përhershme e Kombeve të Bashkuara në vend, Rita Kolumbia, kanë nënshkruar sot Kornizën e re të bashkëpunimit për periudhën 2026 – 2030.

Ky dokument strategjik kyç do të udhëheqë punën e të gjitha agjencive të KB-së në Maqedoninë e Veriut gjatë pesë viteve të ardhshme, me fokus në katër prioritete kryesore, shkruan Zhurnal.mk.

MPJ dhe TJ bëri të ditur se Korniza për bashkëpunim është në përputhje me bashkëpunimin e deritanishëm mes Kombeve të Bashkuara dhe Qeverisë, duke shërbyer si bazë për partneritete më të afërta mes institucioneve vendore dhe ndërkombëtare. Dokumenti lidhet gjithashtu me Strategjinë Kombëtare për Zhvillim 2024 – 2044, procesin e integrimit evropian dhe Agjendën 2030 për zhvillim të qëndrueshëm.

“Marrëveshja e re është rezultat i vizionit tonë të përbashkët me Qeverinë, i formuar përmes konsultimeve me shoqërinë civile, komunitetin akademik dhe qytetarët. Katër prioritetet e dakorduara janë të lidhura mes veti dhe të dizajnuara për të mbështetur njëra-tjetrën. Ato janë të harmonizuara me Strategjinë Kombëtare për Zhvillim dhe pasqyrojnë angazhimin tonë të përbashkët për progres të qëndrueshëm, pa lënë askënd pas. KB do të punojë krah për krah me popullin e Maqedonisë së Veriut për të ndërtuar një të ardhme më të ndritshme për të gjithë,” deklaroi Rita Kolumbia, koordinuese e përhershme e Kombeve të Bashkuara.

Në total, 15 agjenci, programe dhe fonde të Kombeve të Bashkuara, mes tyre FAO, ILO, IOM, ITU, UNDP, UNECE, UNEP, UNFPA, UNHCR, UNICEF, UNIDO, UNOPS, UN Women dhe WHO, e kanë nënshkruar këtë kornizë, duke u zotuar të mbështesin dhe kontribuojnë në arritjen e Qëllimeve për Zhvillim të Qëndrueshëm në vend gjatë periudhës së ardhshme./D.B/UBTnews/Zhurnal.mk