Lajmet

A mund të përdoren asetet e ngrira ruse për të rindërtuar Ukrainën?

Bashkimi Evropian po e shqyrton këtë mundësi.

Published

3 years ago

February 15, 2023

Betim Gashi

Bashkimi Evropian po ngre një grup pune i cili do të shqyrtojë nëse asetet e ngrira ruse mund të përdoren për ta rindërtuar Ukrainën.

Grupi do të kryejë një “analizë ligjore, financiare, ekonomike dhe politike” për të vlerësuar këtë mundësi, njoftoi qeveria suedeze përmes një deklarate të martën. Suedia aktualisht mban presidencën e Këshillit të BE-së, i cili përcakton prioritetet politike të bllokut.

Në deklaratë mes tjerash thuhej se do të analizohet se ku janë të vendosura këto asete dhe sa është vlera e tyre.

“Në parim, është e qartë: Rusia duhet të paguajë për rindërtimin e Ukrainës”, tha kryeministri suedez, Ulf Kristersson. “Në të njëjtën kohë, kjo shtron pyetje të vështira. Kjo duhet të bëhet në përputhje me të drejtën e BE-së dhe ligjin ndërkombëtar dhe aktualisht nuk ka asnjë model të drejtpërdrejtë për këtë”.

Diplomatët nga vendet e Bashkimit Evropian u takuan të mërkurën për të vendosur mbi përgjegjësinë për grupin. Sapo të merret ai vendim, do t’i jepet drita jeshile për të filluar punën. Grupi do të kryesohet nga Anders Ahnlid, drejtor i përgjithshëm i Bordit Kombëtar të Tregtisë të Suedisë.

Kanë lindur pyetje të shumta lidhur me rindërtimin e Ukrainës në prag të përvjetorit të parë të pushtimit të Ukrainës. Ekonomia e Ukrainës u tkurr me më shumë se 30% në vitin 2022 pasi lufta shkatërroi infrastrukturën, dëmtoi bizneset dhe ndërpreu jetën e përditshme.

Kostoja e rindërtimit dhe rimëkëmbjes u vlerësua në rreth 349 miliardë dollarë nga Banka Botërore, Komisioni Evropian dhe Qeveria e Ukrainës. Por për shkak të luftës, shifrat mund të jenë rritur që atëherë.

Një zyrtar i lartë i BE-së vlerësoi në fillim të këtij muaji se Bashkimi Evropian dhe aleatët perëndimorë kanë ngrirë mbi 300 miliardë dollarë në asetet e Bankës Qendrore ruse që mund të përdoren për të rindërtuar Ukrainën.

Bashkimi Evropian po punon për paketën e dhjetë të sanksioneve kundër Rusisë. Presidentja e Komisionit Evropian, Ursula von der Leyen tha të mërkurën se blloku do të shënjestrojë mallra me vlerë 11 miliardë euro (11.8 miliardë dollarë).

“Ne kemi miratuar nëntë paketa sanksionesh. Ekonomia ruse po tkurret. Ne duhet të vazhdojmë presionin”, deklaroi ajo tutje./UBTNews/

Lajmet

Aksident në rrugën Dragash-Prizren, tre të lënduar

Published

3 minutes ago

October 1, 2025

UBTnews

Tre persona kanë pësuar lëndime si pasojë e një aksidenti që ka ndodhur sot mes dy veturave në rrugën Dragash-Prizren.

Rastin për Ekonomia Online e ka konfirmuar zëdhënësi i policisë për rajonin e Prizrenit, Shaqir Bytyqi.

Bytyqi tha se të lënduarit janë dërguar për trajtim mjekësor.

“Në aksident janë të përfshira dy automjete. Si pasojë e aksidentit përveç dëmeve materiale, tre persona kanë pësuar lëndime trupore. Policia ka dal në vendngjarje dhe është duke u marrë me rastin” deklaroi Bytyqi./D.B/EO

Lajmet

Nuk ndalet Tare, nis kontaktet me agjentin e top sulmuesit

Published

27 minutes ago

October 1, 2025

UBT News

Milani po mendon për një tjetër goditje të madhe në merkato, pas Luka Modric. Drejtori sportiv Igli Tare ka kontaktuar agjentin e Robert Lewandowskit, Pini Zahavi, për të kuptuar situatën e sulmuesit polak, kontrata e të cilit me Barcelonën skadon më 30 qershor 2026, sipas mediave spanjolle.

Tare ëndërron ta sjellë 37-vjeçarin në Milano me parametër zero, një operacion i ngjashëm me atë të Modric.

Edhe pse Lewandowski fiton rreth 33 milionë euro në vit dhe interesimi nga klubet arabe është i madh, Milani po përgatitet të jetë gati nëse sulmuesi vendos të largohet nga “Camp Nou” dhe të vazhdojë karrierën në Evropë.

Në “San Siro”, fanella me numrin 9 po pret ende një pronar të ri, ndërsa Massimiliano Allegri shihet i gatshëm ta mirëpresë një lojtar me përvojën dhe cilësitë e Lewandowskit./S.K/KP/

Lajmet

Zgjedhjet e 12 tetorit, Orav dhe shefat e misioneve të vendeve të BE e presin Radoniqin

Published

30 minutes ago

October 1, 2025

UBTnews

Ambasadori i Bashkimit Evropian në Kosovë, Aivo Orav, ka bërë të ditur se ai së bashku me shefat e misioneve të BE-së, sot e kanë pritur në takim kryetarin e Komisionit Qendror të Zgjedhjeve, Kreshnik Radoniqi.

Në njoftim thuhet se në takim është diskutuar roli thelbësor i KQZ-së në sigurimin e integritetit dhe organizimit të qetë të zgjedhjeve të ardhshme.

‘‘Ambasadori i BE-së, Aivo Orav, priti sot Kryetarin e Komisionit Qendror të Zgjedhjeve, Radoniqi, në takimin e të Shefave të Misioneve të BE-së.

Ata diskutuan rolin thelbësor të KQZ-së në sigurimin e integritetit, përfshirjes, transparencës dhe organizimit të qetë të zgjedhjeve të ardhshme dhe vendimmarrjes së paanshme dhe të bazuar në ligj, duke ndërtuar besimin e publikut’’, thuhet në njoftim./D.B/EO

Lajmet

KQZ emëron më shumë se 520 ekipe të numërimit në Qendra Komunale të Numërimit

Published

32 minutes ago

October 1, 2025

UBTnews

Komisioni Qendror i Zgjedhjeve (KQZ) ka emëruar më shumë se 520 ekipeve të numërimit në Qendrat Komunale të Numërimit me mbi 2 mijë anëtarë, për zgjedhjet lokale që do të mbahen me 12 tetor të këtij viti.

Sipas Ligjit për Zgjedhjet e Përgjithshme, në Zgjedhjet Lokale numërimi i votave të kandidatëve për Kryetarë të Komunave dhe votave të subjekteve politike për Kuvende Komunale bëhet në vendvotime pas përfundimit të votimit, të cilat evidentohen në formularë. Ndërkaq, sipas të njëjtit ligj, votat e kandidatëve për anëtarë të Kuvendeve Komunale numërohen në Qendra Komunale të Numërimit, proces i cili do të realizohet përmes ekipeve të numërimit.

Përveç numërimit të votave të kandidatëve për anëtarë të Kuvendeve Komunale, në këto qendra, sipas aktit nënligjor të KQZ-së, Rregullore Zgjedhore nr. 16/2024 për Qendrat Komunale të Numërimit, do të bëhet edhe verifikimi i votave të subjekteve politike, nga formularët që janë plotësuar në vendvotime pas numërimit të fletëvotimeve.

Po ashtu KQZ mori vendim për miratimin e procedurës së veprimit në Qendrat Komuna e të Numërimit për Zgjedhjet Lokale 2025. Me anë të kësaj procedure, përcaktohet themelimi, funksionimi dhe menaxhimi i QKN-ve, duke përfshirë mbikëqyrjen, pranimin e materialeve zgjedhore, numërimin e fletëvotimeve dhe verifikimin e rezultateve nga formularët e plotësuar në vendvotime./D.B/EO