Lajmet

​A do të sjellë 2025-ta një ndryshim të madh për udhëtarët në BE?

Published

2 years ago

on

Fundjavën e kaluar mund të zbulohej Sistemi i ri i Hyrje/Daljes në Bashkimin Evropian (EES).

Ky sistem i ri nënkupton se kur një shtetas jo i BE-së hyn në cilindo prej 29 vendeve të zonës së lëvizjes së lirë, Schengen, ai duhet ta regjistrojë emrin e plotë dhe kombësinë, t’i japë gjurmët e gishtërinjve dhe të fotografohet – sipas të gjitha gjasave në një kabinë me vetëshërbim.

Sistemi u miratua nga BE-ja në fund të vitit 2017 dhe do ta heqë vulosjen manuale të pasaportave jo të BE-së, përkatësisht do ta zëvendësojë sistemin e vjetër me një bazë të madhe elektronike të të dhënave.

Sipas Komisionit Evropian, sistemi i ri do të ndihmojë në parandalimin e migrimit të parregullt, do t’i ndihmojë shtetasit e vendeve të treta të udhëtojnë më lehtë, do t’i identifikojë përpjekjet për ta tejkaluar kohën e lejuar të qëndrimit, ose për fshehje të identitetit.

Megjithatë, ai nuk u funksionalizua – as më 10 nëntor siç ishte planifikuar, e as në datën rezervë, më 17 nëntor.

Por, për të qenë më të saktë, datat nuk u përcaktuan kurrë me vendosmëri.

Flitej që kjo mund të ndodhte dikur edhe në tremujorin e fundit të këtij viti dhe nuk ishte hera e parë që u shty.

As në vitet 2022 dhe 2023, sistemi i ri nuk ishte gati.

Dhe, shtrohet pyetja: përse këto vonesa të vazhdueshme?

Një përgjigje është se bëhet fjalë për një ndërmarrje masive të teknologjisë informative dhe, në këtë shkallë, ajo nuk ka qenë e testuar më parë.

Kur në tetor, ministrat e Brendshëm të BE-së ranë dakord se prezantimi në nëntor nuk është i mundur, ishin Franca, Gjermania dhe Holanda – tri shtete anëtare me shumë pika të hyrjes – që e frenuan.

Ministria e Brendshme gjermane tha atëkohë se sistemit qendror kompjuterik, që do ta mbështeste sistemin e ri, e që mbikëqyret nga agjencia e BE-së, eu-LISA, i mungon “stabiliteti dhe funksionaliteti i nevojshëm”.

Një diplomat i BE-së, i cili ka dijeni për çështjen, u shpreh edhe më ashpër, duke i thënë Radios Evropa e Lirë se i gjithë sistemi është “i dobët” dhe se nuk është testuar përpara nisjes zyrtare.

Ndërsa agjencia e BE-së, eu-LISA, tha se të gjitha vendet anëtare të BE-së janë gati teknikisht, ka frikë se sistemi i ri do të krijojë kaos në qendrat kryesore të kontinentit, duke goditur kështu biznesin dhe turizmin me radhë masive kufitare.

Një nga problemet është se BE-ja donte ta lansonte sistemin kudo në të njëjtën kohë. Por, në Bruksel tani flitet për një qasje me faza, që do të thotë se rregulloret e miratuara tashmë, duhet të ndryshohen.

Kjo mund të bëhet nëse ka vullnet politik, i cili duket se ekziston, por i takon Komisionit Evropian të përcaktojë se çfarë do të thotë saktësisht qasja me faza.

Ndërkohë, shumë qendra dhe pika kufitare do të vazhdojnë të përgatiten për lansimin eventual të sistemit në vitin 2025, duke shtuar më shumë barriera automatike dhe kabina të vetëshërbimit, si dhe duke trajnuar stafin dhe rojet kufitare.

Pasi të funksionalizohet ky sistem, qytetarët jashtë BE-së i pret edhe një gjë tjetër.

Plani është që rreth gjashtë muaj më vonë, të procedohet me Sistemin Evropian të Informacionit dhe Autorizimit të Udhëtimit (ETIAS).

Ky do t’i mbulojë të gjithë udhëtarët e përjashtuar nga vizat me BE-në, përfshirë shtetasit e SHBA-së dhe Britanisë, por edhe ukrainasit, gjeorgjianët dhe moldavët, si dhe qytetarët e shteteve të Ballkanit Perëndimor jashtë BE-së.

Vlen të theksohet se marrja e miratimit nga ETIAS-i nuk është vizë dhe nuk garanton hyrjen.

Autorizimi, i vlefshëm për tre vjet, do të kushtojë 7 euro dhe do të duhet të plotësohet nga të gjithë personat e moshës 18 deri në 70 vjeç.

Përjashtime do të mund të bëjnë individët me viza dhe leje qëndrimi, refugjatët, mbajtësit e pasaportave diplomatike dhe pasagjerët transit në aeroporte.

Për ETIAS-in, BE-ja ra dakord në vitin 2018 dhe, sikurse EES-ja, ai është pjesë e përpjekjeve për ta bërë zonën Schengen më të fuqishme dhe më të kontrolluar.

Me imigracionin sërish në krye të agjendës politike në të gjithë bllokun, ka të ngjarë që të ketë një shtytje të fortë nga disa shtete anëtare, si dhe nga vetë Komisioni Evropian, për t’i funksionalizuar të dyja sistemet në vitin 2025./REL/

Related Topics:
Continue Reading

Lajmet

Galeria Kombëtare e Kosovës rihap dyert pas rinovimit dhe zgjerimit më të madh pas luftës

Published

3 minutes ago

on

July 8, 2026

By

Galeria Kombëtare e Kosovës do të rihapë dyert për publikun më 9 korrik, në orën 19:00, pas përfundimit të procesit të rinovimit dhe zgjerimit, i cilësuar si më i rëndësishmi në historinë e saj të pasluftës.

Si institucioni qendror i vendit për artin modern dhe bashkëkohor, Galeria Kombëtare e Kosovës do ta shënojë këtë moment me një ceremoni të hapur për të gjithë qytetarët.

Rihapja pritet të shënojë një kapitull të ri për institucionin, duke ofruar hapësira të përmirësuara për ekspozita, aktivitete artistike dhe programe kulturore, në funksion të zhvillimit dhe promovimit të artit bashkëkohor në Kosovë.

Ngjarja do të mbahet më 9 korrik, duke filluar nga ora 19:00, ndërsa hyrja do të jetë e lirë për të gjithë të interesuarit./A.K/

Continue Reading

Lajmet

Zhduket një burrë në Gjilan

Published

6 minutes ago

on

July 8, 2026

By

Në raportin 24 orësh të Policisë së Kosovës është raportuar për zhdukjen e një burri në Gjilan.

Rasti është raportuar nga bashkëshortja e personit të zhdukur, e njëjta i ka thënë Policisë se nga data 05.07.2026 është larguar nga shtëpia personi dhe me nuk ka pasur kontakte me familjaret.

Lidhur me rastin, është informuar edhe prokurori, ndërsa njësitet policore janë duke hetuar rastin. /E.A/

Continue Reading

Lajmet

Interes i madh për koncertin e Kanye West në Tiranë, Rama: Më shumë bileta nga të huajt se për finalen e Conference League

Published

10 minutes ago

on

July 8, 2026

By

Koncerti i reperit amerikan Kanye West, që do të mbahet më 11 korrik në Tiranë, ka zgjuar interes të madh edhe jashtë Shqipërisë. Sipas kryeministrit Edi Rama, numri i biletave të blera nga shtetas të huaj për këtë event ka tejkaluar atë të finales së Conference League, e zhvilluar më parë në kryeqytetin shqiptar.

Përmes një postimi në rrjetet sociale, Rama publikoi pamje nga stadiumi i ndërtuar posaçërisht për koncertin, duke bërë të ditur se përgatitjet kanë hyrë në fazën përfundimtare.

“Mirëmëngjes, dhe me stadiumin e ngritur enkas për koncertin më të madh që ky vend ka parë ndonjëherë, për të cilin janë blerë nga të huajt më shumë bileta sesa për finalen e Conference League në Tiranë, e i cili do ta kthejë Tiranën të shtunën, më 11 korrik, në kryeqytetin botëror të spektaklit muzikor, ju uroj një ditë të mbarë”, ka shkruar Rama.

“Eagle Stadium”, i vendosur pranë autostradës Tiranë–Durrës, pritet të mirëpresë rreth 60 mijë spektatorë, duke u konsideruar si eventi më i madh muzikor i organizuar ndonjëherë në Shqipëri. Çmimet e biletave nisin nga 120 euro, ndërsa paketat VIP arrijnë deri në 339 euro.

Ndalimi në Tiranë është pjesë e turneut botëror të Kanye West për vitin 2026, një turne që në disa vende është shoqëruar me polemika.

Një muaj më parë, artisti performoi në Stadiumin Olimpik “Atatürk” në Stamboll. Sipas organizatorëve, koncerti u ndoq nga rreth 118 mijë spektatorë, ndërsa vetë West deklaroi se ishte vendosur një rekord për numrin më të madh të të pranishmëve në një koncert stadiumi.

Koncerti në Tiranë organizohet nga kompania “Streetlife”, me seli në Berlin, e njohur për organizimin e performancave të artistëve ndërkombëtarë si 50 Cent, Drake, Snoop Dogg, Kendrick Lamar dhe Nicki Minaj. Në Shqipëri, eventi mbështetet nga Redcloud dhe Live Label./A.K/

Continue Reading

Lajmet

KURIOZITETET E DITËS

Published

13 minutes ago

on

July 8, 2026

By

Lexoni pesë kuriozitete nga bota. Mund të mos i keni ditur:

 

  1. Një re peshon rreth një milion tonë. Një re zakonisht ka një vëllim prej rreth 1 kilometër kub dhe një dendësi prej rreth 1.003 kg për m3 – kjo është një dendësi që është rreth 0.4 për qind më e ulët se ajri që e rrethon (kështu ato janë në gjendje të fluturojnë).

 

  1. Gjirafat kanë 30 herë më shumë gjasa të goditen nga rrufeja sesa njerëzit. Është e vërtetë që ka vetëm pesë goditje fatale nga rrufeja mbi gjirafat, të dokumentuara mirë, midis viteve 1996 dhe 2010.Por, për shkak se popullsia e specieve është vetëm 140,000 gjatë kësaj kohe, kjo përbën rreth 0.003 vdekje nga rrufeja për një mijë gjirafa çdo vit. Kjo është 30 herë më shumë se shkalla ekuivalente e vdekshmërisë për njerëzit.

 

  1. Binjakët identikë nuk kanë të njëjtat gjurmë gishtash. Në fund të fundit, nuk mund ta fajësoni binjakun tuaj për krimet tuaja. Kjo ndodh sepse faktorët mjedisorë gjatë zhvillimit në mitër (gjatësia e kordonit të kërthizës, pozicioni në mitër dhe shkalla e rritjes së gishtave) ndikojnë në gjurmën tuaj të gishtave.

 

  1. Rrotullimi i Tokës po ndryshon shpejtësi. Në fakt, po ngadalësohet. Kjo do të thotë që, mesatarisht, gjatësia e një dite rritet me rreth 1.8 sekonda për shekull. 600 milionë vjet më parë, një ditë zgjati vetëm 21 orë.

 

  1. Laprat e veshit nuk kanë asnjë qëllim biologjik. Ndërsa ato janë të pasura me mbaresa nervore dhe mund të luajnë një rol në lidhjet shoqërore, shumë shkencëtarë argumentojnë se ato nuk kanë ndonjë qëllim të vërtetë biologjik./A.K/

 

Continue Reading

Të kërkuara