Fakulteti i Psikologjisë në UBT, nën organizimin e Asst. Prof. Elona Krasniqi, organizoi me sukses një punëtori statistikore me ligjëruese të ftuar Besjana Krasniqi, kandidate doktorante në Psikologji Zhvillimore të Aplikuar në Universitetin e Maryland, Baltimore County (UMBC), ShBA, si dhe pjesë e Laboratorit për Zhvillimin e Fëmijëve, Familjes dhe Shkollës.

Punëtoria u zhvillua në kuadër të lëndës Metodologji e Avancuar Kërkimore dhe ishte i dedikuar për studentët e programit master në Psikologji. Qëllimi kryesor i këtij aktiviteti ishte avancimi dhe praktikimi i njohurive statistikore, me fokus në përdorimin e modeleve parashikuese përmes analizave të regresionit.

Gjatë punëtorisë, studentët u angazhuan në mënyrë aktive përmes ndërveprimeve dinamike, shembujve konkretë nga kërkimi empirik, testimit të hipotezave kërkimore duke përdorur programin SPSS, si dhe interpretimit të rezultateve statistikore. Ky format praktik u mundësoi studentëve të lidhin teorinë me aplikimin real në kërkimin shkencor.

Ky aktivitet kontribuoi në ngritjen e kapaciteteve shkencore dhe profesionale të studentëve, duke promovuar njëkohësisht rrjetëzimin profesional dhe bashkëpunimin ndërkombëtar me studiues dhe profesionistë nga institucione prestigjioze. Punëtoria është në përputhje me planin strategjik të UBT-së për zhvillimin e kapaciteteve kërkimore profesionale, si në nivel institucional ashtu edhe në atë kombëtar.

Javën e kaluar, në ambientet e Bibliotekës në Parkun Shkencor, Inovativ dhe Teknologjik të UBT-së, u mbajt një ligjëratë me karakter edukativ dhe profesional, e organizuar për studentët e vitit të tretë të programit Dizajn i Integruar – specializimi Enterier. Ligjërata u zhvillua në kuadër të lëndës Semiotikë dhe Estetikë, nën udhëheqjen e profesoreshës Ardita Rizvanolli.

I ftuar ishte Burim Bajraktari, Arkitekt Kryesor dhe CEO i studios arkitekturore MODIUM, i cili ndau me studentët përvojën e tij shumëvjeçare profesionale në fushën e arkitekturës dhe dizajnit. Bajraktari ka përfunduar studimet pasuniversitare në Kingston University London në vitin 2011 dhe ka ndërtuar karrierën e tij përmes angazhimeve profesionale në Londër dhe në Shtetet e Bashkuara të Amerikës.

Gjatë ligjëratës, ai prezantoi rrugëtimin e tij profesional, duke filluar nga projektet e hershme të vizualizimit 3D, themelimi i shërbimeve arkitekturore në vitin 2008, si dhe procesin e ribrandimit strategjik në vitin 2015, i cili çoi në krijimin e studios MODIUM. Sot, kjo studio njihet për qasjen e saj bashkëkohore, dizajnet e qëndrueshme dhe trajtimin estetik të hapësirës.

Ligjërata u karakterizua nga diskutime interaktive, ku studentët patën mundësi të bëjnë pyetje dhe të njihen më nga afër me sfidat, mundësitë dhe realitetin e profesionit të arkitektit dhe dizajnerit të enterierit. Ky takim shërbeu si një urë lidhëse mes teorisë akademike dhe praktikës profesionale, duke i motivuar studentët për zhvillimin e mëtejmë të aftësive të tyre kreative dhe profesionale.

Aktivitete të tilla dëshmojnë përkushtimin e UBT-së në ofrimin e përvojave praktike dhe frymëzuese për studentët, duke i përgatitur ata për tregun e punës dhe sfidat e industrisë së dizajnit dhe arkitekturës.

Studentët e Fakultetit të Psikologjisë në UBT, nën organizimin e profesoreshës Besarta Sadriu dhe profesor Emrush Thaçi, realizuan një vizitë me karakter humanitar dhe edukativ në SOS Fshatin e Fëmijëve në Prishtinë.

Qëllimi i vizitës ishte njohja nga afër me punën fisnike të institucionit, i cili ofron mbështetje për fëmijët pa përkujdesje prindërore, si dhe sensibilizimi i studentëve për përgjegjësinë sociale dhe empatinë profesionale.

Gjatë vizitës, studentët patën mundësinë të njihen me funksionimin e SOS Fshatit, programet psiko-sociale të ofruara për fëmijët, si dhe rolin e psikologut në mbështetjen emocionale dhe zhvillimore të tyre. Kjo përvojë praktike dhe interaktive u shndërrua në një mësim të vlefshëm për studentët, duke i nxitur të reflektojnë mbi rëndësinë e mbështetjes emocionale dhe përgjegjësisë profesionale në punën me fëmijët.

Në kuadër të kësaj vizite, studentët dhe profesorët e UBT-së dhuruan një donacion simbolik, si shprehje solidariteti dhe përkrahjeje për fëmijët dhe stafin e SOS Fshatit. Ky veprim thekson angazhimin e UBT-së për të kombinuar dijen akademike me vlerat humanitare, duke promovuar ndjeshmëri sociale dhe përkushtim profesional tek studentët.

Vizita u vlerësua pozitivisht nga të dyja palët, duke shprehur dëshirën që bashkëpunime të tilla të vazhdojnë edhe në të ardhmen, me qëllim zhvillimin e vlerave etike, sociale dhe profesionale te gjeneratat e reja të psikologëve.

Në një ceremoni të veçantë të zhvilluar në UBT, në prani të drejtuesve të institucionit, mentorëve, prindërve të anëtarëve të ekipit, si dhe përfaqësuesve të komunitetit akademik, u ndanë certifikatat për ekipin kosovar që mori pjesë në garën ndërkombëtare të robotikës FIRST Global Challenge në Panama.

Ekipi i përfaqësuesve të Kosovës ishte i përbërë nga Leona Hajrizi, Amar Rama, Ardi Krosa dhe Marta Çerkini, të cilët nën mentorimin e Elita Hajrizit demonstruan përkushtim, profesionalizëm dhe përfaqësuan denjësisht Kosovën në këtë garë prestigjioze.

Në fjalën e saj gjatë ceremonisë, mentore Elita Hajrizi theksoi sfidat me të cilat u përball ekipi, sukseset dhe angazhimin dinjitoz të treguar gjatë garës:

“Ekipi ynë përballoi sfida të shumta, por me përkushtim, bashkëpunim dhe punë të palodhur, arritëm të përfaqësojmë Kosovën me krenari. Kjo garë na dha mundësinë të tregojmë profesionalizmin tonë dhe të krijojmë miqësi ndërkombëtare që do të mbeten të paharrueshme”.

Gjithashtu, gjatë ceremonisë u certifikuan edhe mentorët e tjerë Ylli Rexhaj, Redon Rexhepi dhe Argjend Jetullahu, për ndihmën dhe përkushtimin e tyre gjatë gjithë procesit.

Ekipi shprehu falënderime të veçanta për UBT, si mbështetës kryesor i të rinjve të Kosovës, si dhe për mentorët, stafin administrativ dhe ekipin e mediave që dokumentoi gjithë aktivitetet e ekipit. Po ashtu, falënderime iu drejtuan familjeve të ekipit, të cilat kanë qenë mbështetësit më të mëdhenj gjatë gjithë këtij udhëtimi.

Rektori i UBT-së, Prof. Dr. Edmond Hajrizi, shprehu mirënjohje të thellë për punën dhe vullnetarizmin e treguar nga studentët dhe nxënësit, të cilët po dëshmojnë suksese të jashtëzakonshme në fushën e robotikës.

Ky sezon i FIRST Global Challenge ishte një eksperiencë e paharrueshme për ekipin kosovar, i cili përveç njohurive teknologjike dhe robotike, fitoi edhe miqësi të reja dhe përvoja të çmuara ndërkombëtare. Team Kosova përfundoi sezonin me energji dhe pasion, duke premtuar rikthim edhe në sezonin e ardhshëm për të përfaqësuar vendin me krenari.