Policia e Kosovës ka iniciuar një rast për shpërdorim të pasurisë së huaj, pasi dy persona dyshohet se kanë përdorur një kartelë bankare të gjetur për të kryer blerje.

Sipas raportit 24-orësh të Policisë, rasti ka ndodhur të enjten rreth orës 14:10 në rrugën “Adem Mikullovci” në Mitrovicën e Veriut.

Ankuesja ka raportuar se i kishte humbur kartela bankare, ndërsa përmes saj ishin kryer disa blerje.

Pas veprimeve hetimore, policia identifikoi dy të dyshuar, të cilët gjatë intervistimit pranuan se e kishin gjetur kartelën dhe e kishin përdorur për të blerë artikuj në vlerë rreth 200 euro.

Me konsultim të prokurorit është iniciuar rasti, ndërsa pas intervistimit të dyshuarit janë liruar në procedurë të rregullt./A.K/

Një kompani në fshatin Bardhosh të Prishtinës është bërë cak i një vjedhjeje, ku persona të panjohur dyshohet se kanë hyrë me forcë në objekt dhe kanë marrë para.

Sipas raportit 24-orësh të Policisë së Kosovës, rasti ka ndodhur të enjten rreth orës 01:09.

Ankuesi ka njoftuar policinë se të dyshuarit kanë depërtuar me forcë në objektin e kompanisë së tij dhe, përveç vjedhjes së parave, kanë shkaktuar edhe dëme materiale.

Njësitë përkatëse policore kanë dalë në vendin e ngjarjes, ndërsa për rastin është njoftuar prokurori dhe hetimet janë duke vazhduar./A.K/

Studentët e Fakultetit të Studimeve të Sigurisë në UBT kanë përgatitur punimin akademik “Strategjia e Sigurisë së Kosovës 2026–2031”, një dokument që analizon sfidat bashkëkohore të sigurisë dhe ofron rekomandime konkrete për forcimin e kapaciteteve shtetërore dhe të sigurisë kombëtare.

Punimi trajton çështje me rëndësi strategjike, duke përfshirë ndikimin e fushatave të dezinformimit, sfidat që lidhen me pretendimet territoriale të Serbisë ndaj Kosovës, si dhe nevojën për zhvillimin e mekanizmave shtesë të sigurisë, përfshirë krijimin e një xhandarmërie. Gjithashtu, dokumenti vë theks të veçantë te rëndësia e pavarësisë energjetike, forcimit të institucioneve të sigurisë dhe avancimit të integrimit të Kosovës në NATO dhe Bashkimin Evropian si faktorë kyç për garantimin e stabilitetit dhe sigurisë afatgjatë.

Përmes këtij punimi, studentët kanë demonstruar aftësi të avancuara kërkimore dhe analitike, duke ofruar një kontribut akademik në diskutimin e politikave të sigurisë dhe zhvillimit strategjik të vendit.

Ky projekt pasqyron përkushtimin e UBT-së për të nxitur mendimin kritik, kërkimin shkencor dhe angazhimin e studentëve në trajtimin e çështjeve me rëndësi kombëtare, duke e konsoliduar rolin e universitetit si një qendër e dijes, analizës dhe mendimit strategjik në Kosovë.

Mary Jo Campbell, e njohur si MJ Shannon dhe nëna e Kris Jenner, ka ndërruar jetë në moshën 91-vjeçare.

Lajmin e bëri të ditur vetë Kris Jenner përmes rrjeteve sociale, duke i kushtuar një mesazh prekës nënës së saj.

“Sot i thamë lamtumirë mamit tim të mrekullueshëm, MJ. Ajo na mësoi se familja është gjithçka, si të duam pa kushte dhe të gjejmë gëzim në momentet e vogla të jetës”, shkroi Jenner.

Shkaku i vdekjes nuk është bërë i ditur.

Mary Jo Campbell ishte një figurë e njohur për publikun falë paraqitjeve të saj në emisionet “Keeping Up with the Kardashians” dhe “The Kardashians”, ku fitoi simpatinë e fansave me humorin dhe këshillat e saj.

Ajo ishte nëna e Kris Jenner dhe Karen Houghton, e cila ndërroi jetë në mars të vitit 2024 në moshën 65-vjeçare.

MJ ishte gjyshja e Kim, Kourtney dhe Khloe Kardashian, si dhe e Kendall dhe Kylie Jenner. Gjatë viteve, ajo u bë një personazh i dashur i familjes Kardashian-Jenner, ndërsa fliste hapur edhe për betejën e saj të suksesshme me kancerin.

Në mesazhin e saj lamtumirës, Kris Jenner shkroi se çdo pjesë e jetës së saj është formësuar nga nëna e saj dhe se gjithmonë është përpjekur të jetojë në një mënyrë që do ta bënte krenare./BBC/A.K/