Në një postim jashtëzakonisht të shkurtër në Truth Social, presidenti i SHBA-së, Donald Trump, ka thënë se “Irani e ka shkelur armëpushimin shumë herë”, pa specifikuar se cilat ishin këto shkelje.

Komentet e tij vijnë mes pasigurisë së vazhdueshme nëse raundi i dytë i bisedimeve të paqes midis Iranit dhe SHBA-së do të zhvillohet sot në Pakistan.

Të dielën, Trump akuzoi Iranin për gjuajtje ndaj anijeve që kalonin nëpër Ngushticën e Hormuzit, veprim ky që sipas tij përbënte shkelje të marrëveshjes së armëpushimit, e cila pritet të skadojë nesër.

Sidoqoftë, një zëdhënës i Ministrisë së Jashtme të Iranit tha se ishte bllokada e Uashingtonit në këtë rrugë ujore ajo që përbënte shkelje të marrëveshjes. Trump deklaroi të premten se bllokada detare e porteve iraniane do të vazhdojë derisa të arrihet një marrëveshje. /The Guardian/

Kryeministri i Kosovës, Albin Kurti, ka pritur sot në takim Shefen në Detyrë të Zyrës së Bashkimit Evropian në Kosovë, Eva Palatova, e cila i dorëzoi raportin përfundimtar të Misionit të Ekspertëve Zgjedhorë mbi zgjedhjet e fundit lokale dhe parlamentare.

Gjatë këtij takimi, të dy bashkëbiseduesit vlerësuan lart procesin zgjedhor të 28 dhjetorit, duke konfirmuar se Kosova ka dëshmuar pjekuri demokratike duke organizuar zgjedhje të lira, të drejta dhe sipas standardeve evropiane.

Kryeministri Kurti shprehu mirënjohjen e tij për angazhimin e misionit vëzhgues dhe konfirmoi gatishmërinë e plotë të Qeverisë për të adresuar dhe zbatuar rekomandimet e dala nga ky raport.

Një vëmendje e veçantë gjatë bisedës iu kushtua sfidave të dezinformimit dhe ndërhyrjeve të huaja në informacion, të cilat u shfaqën përmes lajmeve të rreme, sondazheve të fabrikuara dhe materialeve të manipuluara vizualisht.

Kurti theksoi se këto forma të manipulimit kanë për qëllim ndikimin në perceptimin publik dhe dëmtimin e besimit në proceset zgjedhore, andaj kërkoi një qasje më proaktive për t’i luftuar këto dukuri.

Ai po ashtu rikujtoi se zgjedhjet e ndershme janë shtylla kryesore e kritereve të Kopenhagës, të cilat Kosova i ka përmbushur në mënyrë të vazhdueshme.

Në përfundim të takimit, kryeministri kërkoi që këto gjetje pozitive të pasqyrohen qartë edhe në Raportin e Vendit të Komisionit Evropian për vitin 2026, si dëshmi e progresit demokratik të vendit.

Kryeministri Albin Kurti ka adresuar krizën për zgjedhjen e presidentit, duke vënë në shënjestër opozitën për refuzimin e asaj që ai e quajti ofertë “gjeneroze”, pavarësisht fuqisë së tyre të vogël në Kuvend.

Ai argumentoi se nuk mund t’i dhurojë poste dikujt që nuk ka marrë mbështetjen e nevojshme nga qytetarët, duke theksuar se me 51.1% të votave, Lëvizja Vetëvendosje ka një mandat të qartë të cilin opozita duhet ta respektojë.

Kurti përdori një krahasim ironik, duke thënë se PDK-ja me 22 deputetë nuk i ka as “dokumentet” bazë për të aplikuar për postin e presidentit, pasi nuk mund të mbledhin as nënshkrimet e mjaftueshme për një kandidat.

Ndonëse Kurti propozoi që PDK-ja ose LDK-ja të merrnin drejtimin e Kuvendit si një koncesion të madh politik, liderët opozitarë i kanë hedhur poshtë këto propozime.

Lumir Abdixhiku i LDK-së bëri të ditur se ka refuzuar dy oferta konkrete: përfshirjen në qeveri me katër ministri dhe postin e kryeparlamentarit. Ngjashëm ka vepruar edhe Bedri Hamza i PDK-së, i cili refuzoi takimin me kryeministrin dhe e konsideroi të mbyllur rolin e partisë së tij në këtë proces.

Gjendja politike mbetet e tensionuar pasi afati kushtetues po skadon; deputetët kanë kohë vetëm deri më 28 prill për të zgjedhur pasuesin e Vjosa Osmanit.

Nëse dështon sigurimi i 80 votave në sallë për kandidatët e propozuar nga LVV, Glauk Konjufca dhe Fatmire Mulhaxha, Kosova do të detyrohet të shkojë në zgjedhje të parakohshme, të cilat mund të mbahen më së largu më 7 qershor.

Kjo do të shënonte herën e tretë që qytetarët i drejtohen kutive të votimit brenda 15 muajve, një skenar që Kurti e sheh si të panevojshëm pasi beson se rezultati zgjedhor nuk do të prodhonte asgjë të re.

Zyra e Rregullatorit për Energji (ZRRE) ka njoftuar zyrtarisht se çdo konsumator i prekur nga devijimet e orëve tarifore në faturimin e energjisë elektrike do të kompensohet plotësisht. Sipas ZRRE-së, pas verifikimeve është konstatuar se matja e energjisë ka qenë e saktë, por pasaktësitë kanë lidhje me devijimin e kohës tarifore, çka ka ndikuar në mënyrën se si janë llogaritur faturat.

Rregullatori ka kërkuar zëvendësimin e menjëhershëm të këtyre njehsorëve dhe korrigjimin financiar për qytetarët, ndonëse theksoi se në shumicën e rasteve të verifikuara deri më tani, korrigjimet nuk kanë rezultuar në favor të konsumatorëve.

Në të njëjtën kohë, Inspektorati Qendror i Mbikëqyrjes së Tregut ka gjobitur KEDS-in me 6 mijë euro për mosrespektim të afatit të vlefshmërisë së njehsorëve.

Ky zhvillim vjen paralelisht me nisjen e intervistimeve nga Prokuroria Themelore në Prishtinë, e cila ka autorizuar Policinë për hetime në terren. Hetimet nisën pas raportimeve të deputetit Visar Azemi, i cili pretendoi se mbi 80 për qind e njehsorëve në Prishtinë dhe Ferizaj nuk kanë orën e saktë.

Ndërsa KEDS-i ka mohuar çdo mundësi manipulimi, ZRRE-ja ka bërë të ditur se moszbatimi i detyrimeve për kompensim nga operatorët do të trajtohet me masa të rrepta ligjore.