Nën sloganin “Gjithçka shihet në Vidovdan”, të dielën në Kralevë – pjesa qendrore e Serbisë – u mbajt një protestë e organizuar nga studentët që po udhëheqin bllokadat e fakulteteve në këtë vend.

Mijëra qytetarë u mblodhën në Sheshin e Luftëtarëve Serbë në qendër të qytetit.

Pavarësisht temperaturave të larta, disa protestues përshkuan në këmbë rreth 50 kilometra për të marrë pjesë në tubim.

Ai u zhvillua vetëm një ditë pas mitingut të organizuar nga Partia Pëparimtare Serbe në pushtet, në qendër të Beogradit.

Ai ishte njëri në vazhdën e disa protestave të organizuara nga lëvizja studentore qysh në nëntor të vitit 2024, kur nga shembja e një strehe në Stacionin Hekurudhor të Novi Sadit humbën jetën 16 persona.

Fillimisht, studentët kërkuan përgjegjësi penale dhe politike për tragjedinë, duke argumentuar se shembja ishte pasojë e korrupsionit në projektin e rindërtimit të stacionit.

Pas disa muajsh protesta, ata shtuan edhe kërkesën për mbajtjen e zgjedhjeve të parakohshme.

Megjithatë, në protestën e së dielës në Kralevë dominuan mesazhet për Kosovën, pavarësinë e së cilës Beogradi nuk e njeh.

Ajo u zhvillua në Ditën e Vidovdanit – festë fetare dhe shtetërore në Serbi – që përkujton Betejën e Kosovës të vitit 1389 kundër Perandorisë Osmane.

Çfarë u tha për Kosovën?

Duke iu drejtuar protestuesve, Millena Petroviq, profesoreshë në Fakultetin e Shkencave të Natyrës dhe Matematikës të Universitetit të Prishtinës, që vepron brenda sistemit të Serbisë në Mitrovicën e Veriut, tha se qendrat e pushtetit në Beograd dhe në Prishtinë po veprojnë në mënyrë të koordinuar për të mbrojtur interesat e tyre, në dëm të qytetarëve të zakonshëm që jetojnë në Kosovë.

“Një qasje e tillë nuk kontribuon në respektin, mirëkuptimin dhe pranimin e ndërsjellë mes popullsisë serbe dhe shqiptare, që është parakusht për paqe të qëndrueshme në Kosovë”, tha Petroviq.

Në protestë foli edhe Vlladan Vesellinoviq, veteran i luftës nga Brigada e 63-të Parashutiste, i cili tha se “represioni i pushtetit” është shtrirë edhe ndaj veteranëve që kanë mbështetur protestat studentore.

“Na kanë arrestuar, kontrolluar, ndaluar për intervistim, na kanë linçuar në media, na kanë dërguar inspektorate dhe disa prej nesh, madje, kanë humbur vendet e punës”, tha ai.

Brigada e 63-të Parashutiste e Ushtrisë së Serbisë është shoqëruar me polemika për rolin e saj gjatë luftës në Kosovë.

Ato lidhen veçanërisht me praninë e saj në vendin ku është kryer një nga krimet më të mëdha të forcave serbe ndaj civilëve shqiptarë, në komunën e Gjakovës.

Para të pranishmëve foli edhe Llazar Stevanoviq, student i Fakultetit të Bujqësisë në Universitetin e Beogradit, i cili tha se studentët nuk janë armiq të shtetit.

“Në një vend ku korrupsioni dhe dhuna janë bërë pjesë e përditshmërisë, kërcënimi më i madh bëhen ata që kërkojnë përgjigje”, tha ai.

Në pritje të datës së zgjedhjeve

Ndërsa protestuesit antiqeveritarë vazhdojnë të kërkojnë mbajtjen e zgjedhjeve të parakohshme parlamentare, presidenti i Serbisë, Aleksandar Vuçiq, deklaroi më 27 qershor, gjatë një tubimi të Partisë Pëparimtare Serbe, se brenda disa javësh do të japë dorëheqje.

Në përgjigje të kërkesave të studentëve, Vuçiq ka paralajmëruar disa herë deri më tani mbajtjen e zgjedhjeve parlamentare.

Sipas deklaratave të tij të fundit, ato pritet të mbahen në vjeshtën e këtij viti. /REL/ /E.A/

Dy persona, babë e bir, kanë vdekur të dielën në fshatin Maznik të Deçanit, pasi dyshohet se kanë rënë në kontakt me rrymën elektrike.

Viktimat janë Xhemajl dhe Hasan Mustafaj.

Lajmin për vdekjen e tyre e ka konfirmuar kryesuesi i Kuvendit Komunal të Deçanit, Hajdar Sutaj.

Përmes një postimi në rrjetet sociale, ai i ka shprehur ngushëllime të thella familjes Mustafaj, duke u uruar forcë për të përballuar këtë dhimbje të madhe. /E.A/

Lajm në zhvillim: 

Një 32-vjeçar me inicialet F.H. është gjetur pa shenja jete të dielën rreth orës 22:50, në një banesë në katin e nëntë të një objekti banesor në rrugën “Sejdi Sejdiu” në Ferizaj.

Zëdhënësi i policisë rajonale, Kanun Veseli, bëri të ditur se deri te vrasja ka ardhur pas një përleshjeje ku më pas është përdorur arma e zjarrit. Ekipi mjekësor i spitalit të Ferizajt e ka konstatuar vdekjen e viktimës në vendngjarje, ku gjatë ekzaminimit është vërejtur një plagë që dyshohet se është shkaktuar nga arma e zjarrit. Në cilësinë e provave materiale, policia ka gjetur dhe sekuestruar një pistoletë dhe një gëzhojë.

Sipas hetimeve fillestare, ngjarja ka ndodhur në banesën e të dyshuarit M.B., 48 vjeç. Në momentin e incidentit aty ndodheshin edhe bashkëshortja e tij, si dhe vajza e tij A.R., 24 vjeçe. Kjo e fundit ka pësuar lëndime trupore dhe është dërguar për trajtim mjekësor në Qendrën Klinike Universitare të Kosovës (QKUK).

Pas ekzaminimit të vendit të ngjarjes nga hetuesit rajonalë, krim-teknikët dhe prokurori i Krimeve të Rënda, rasti po trajtohet si “Vrasje e rëndë”.

Me vendim të prokurorit, të dyshuarit M.B. i është caktuar masa e ndalimit prej 48 orësh. Vendim për ndalim prej 48 orësh është lëshuar edhe ndaj 24-vjeçares A.R., e cila po vazhdon trajtimin mjekësor në QKUK nën mbikëqyrjen e policisë.

Trupi i pajetë i viktimës është dërguar në Institutin e Mjekësisë Ligjore në Prishtinë për obduksion, ndërsa Sektori i Hetimeve Rajonale po ndërmerr veprime intensive për zbardhjen e plotë të rrethanave të këtij rasti.

Vrasje në Ferizaj pas një përleshjeje me armë zjarri

Një burrë ka mbetur i vrarë me armë zjarri të dielën mbrëma në Ferizaj, rreth orës 22:50, në rrugën “Sejdi Sejdiu”.

Lajmin pë Ekonomia Online e ka konfirmuar zëdhënësi i policisë rajonale, Kanun Veseli, i cili bëri të ditur se ngjarja ka ndodhur pas një përleshjeje.

Sipas tij, në vendngjarje është gjetur pa shenja jete një burrë i moshës madhore, i cili dyshohet se ka marrë plagë nga arma e zjarrit.

Vdekja e viktimës është konfirmuar nga ekipi mjekësor i spitalit të Ferizajt, ndërsa policia po merret me rastin. /Ekonomia Online/ /E.A/