Sot mbi vendin tonë po mban mot pjesërisht i vranët por dhe me diell.

Fundjava do të jetë me temperatura më të larta se këto ditë që sapo kaluan.

Temperatura minimale do të jetë në mëngjes 3°C kurse atë maksimalen do ta kemi 14°C.

Edhe nesër, pra ditën e diel do të kemi mot pothuajse të kthjellët, me pak re por me temperatura të nxehta.  /UBT News/

Aleatët e Ukrainës premtuan sot ndihmë ushtarake me vlerë 21 miliardë euro (23,8 miliardë dollarë), ndërsa vendi vazhdon të jetë nën sulmin rus, njoftoi sot sekretari i Mbrojtjes i Britanisë së Madhe, John Healey.

“Jam i impresionuar dhe mirënjohës për njoftimet dhe premtimet, për paketat mbështetëse nga partnerët në mbarë botën”, tha ministri gjerman i Mbrojtjes, Boris Pistorius.

Ministrat britanikë dhe gjermanë kryesuan takimin ndërkombëtar për koordinimin e ndihmës së mëtejshme ushtarake për Ukrainën në selinë e NATO-s në Bruksel, në të cilin u përfaqësuan rreth 40 vende.

“Takimi i sotëm do të ketë një ndikim në fushën e betejës këtë vit”, tha Pistorius.

“Paqja në Ukrainë duket se është e paarritshme në të ardhmen e afërt”, tha ai.

“Ne do të sigurojmë që Ukraina të vazhdojë të përfitojë nga mbështetja jonë e përbashkët ushtarake. Rusia duhet të kuptojë se Ukraina është në gjendje të vazhdojë të luftojë dhe ne do ta mbështesim atë”, theksoi ai.

“Presidenti rus Vladimir Putin tha se donte paqe, por ai vazhdon të zvarrisë dhe vonojë negociatat”, tha Healey.

Gjermania njoftoi planet afatgjata në takim – për të mbështetur Kievin me mbi 1,100 radarë të mbikqyrjes tokësore dhe sisteme shtesë raketore të mbrojtjes ajrore IRIS-T.

“Përveç premtimeve afatgjata, Ukraina do të marrë katër sisteme të tjera “IRIS-T”, 300 raketa dhe 100 radarë të mbikqyrjes tokësore këtë vit”, tha Pistorius.

Gjermania, kohët e fundit dorëzoi 30 raketa shtesë “Patriot” në Ukrainë.

Healey njoftoi ndihmen e Britanisë së Madhe me vlerë 350 milionë paund (458,2 milionë dollarë) duke përfshirë sistemet e radarëve, minat anti-tank, dronët e rinj dhe fonde të reja për riparimin dhe mirëmbajtjen e pajisjeve të fushëbetejës.

Presidenti ukrainas Volodymyr Zelensky dhe sekretari amerikan i Mbrojtjes, Pete Hegseth iu bashkuan takimit përmes lidhjes me video.

Burimet ushtarake paralajmëruan, kohët e fundit se Ukraina mund të përballej me vështirësi të mëdha ushtarake deri në fund të verës – nëse partnerët nuk angazhoheshin për te ofruar ndihmë të mëtejshme ushtarake.

Ukraina është mbrojtur nga sulmi i plotë rus për më shumë se tre vjet, me ndihmën e vendeve perëndimore.

Bashkimi Evropian është i gatshëm të vendosë taksa ndaj gjigantëve të teknologjisë amerikane nëse negociatat me Presidentin Donald Trump për uljen e tarifave për mallrat evropiane dështojnë, raportoi Financial Times për atë çfarë ka deklaruar presidentja e Komisionit Evropian, Ursula von der Leyen.

“Ne po përgatisim masa hakmarrëse,” deklaroi von der Leyen, duke përmendur mundësinë e taksimit të të ardhurave nga reklamat dixhitale të kompanive si Meta, Google dhe Facebook. “Ka një gamë të gjerë kundërmasash… në rast se negociatat nuk janë të kënaqshme.”

BE-ja njoftoi dje pezullimin për 90 ditë të tarifave hakmarrëse ndaj SHBA-së, pas vendimit të njëjtë të Trump për një pauzë 90-ditore të tarifave të tij “reciproke”. Blloku evropian ishte prekur nga tre lloje tarifash amerikane: një taksë 25% për çelikun dhe aluminin, një tjetër 25% për makinat, si dhe një tarifë 20% për mallrat e tjera.

Megjithëse tarifa “reciproke” është pezulluar, Trump vazhdon të aplikojë një taksë 10% ndaj një sërë partnerësh tregtarë, përfshirë Bashkimin Evropian.

Në përgjigje, BE-ja po shqyrton mundësinë e vendosjes së një “bazuke” tregtare, e cila do të synonte shërbimet amerikane, dhe në veçanti gjigantët e teknologjisë. “Një shembull është që ju mund të vendosni një taksë mbi të ardhurat nga reklamat e shërbimeve dixhitale,” theksoi von der Leyen.

Në një deklaratë të enjten, ajo u shpreh se BE-ja është e përkushtuar ndaj negociatave konstruktive me SHBA-në, por paralajmëroi se kundërmasat do të hyjnë në fuqi nëse nuk arrihet një marrëveshje.

Kryeministri francez, François Bayrou, ka paralajmëruar se është një ide “tmerrësisht e rrezikshme” të mendohet se Kina mund të zëvendësojë Shtetet e Bashkuara si një partner tregtar i rëndësishëm.

Ai gjithashtu ka apeluar për një qëndrim të bashkuar të shteteve anëtare të Bashkimit Evropian përballë pasigurisë që shkaktojnë tarifat e vendosura nga Presidenti i SHBA-së, Donald Trump.

“Kur presidenti i Shteteve të Bashkuara rrit tarifat, është një tërmet, por kur 48 orë më vonë ai heq tarifat, është një tjetër tërmet,” tha Bayrou, duke theksuar pasigurinë dhe pasojat e papritura të politikave tregtare të administratës Trump.

Ky është komenti i fundit nga autoritetet franceze në lidhje me tarifat. Më herët, presidenti Emmanuel Macron tha se pezullimi i pjesshëm i tarifave për 90 ditë ishte një “derë e hapur” për mundësinë e negociatave me SHBA-në.