Mbrojtësi i Kosovës, Mërgim Vojvoda, ishte titullar në humbjen 2:1 të Udineses ndaj ish-skuadrës së tij, Torinos, në kuadër të javës së gjashtë të Serie A.

Takimi i zhvilluar të hënën mbrëma përfundoi 1:1 në pjesën e parë, ndërsa Torino realizoi golin e fitores gjatë pjesës së dytë.

Vojvoda qëndroi në fushë deri në minutën e 72-të, ndërkohë që për Torinon u aktivizua në pjesën e dytë edhe mbrojtësi shqiptar, Ardian Ismajli.

Pas kësaj fitoreje, Torino ngjitet në pozitën e 12-të me shtatë pikë, ndërsa Udinese zbret në vendin e 15-të me katër pikë.

Ethet e futbollit elitar evropian zbarkojnë sërish në fushë sonte me ndeshjet e xhiros së dytë të fazës së ligës në Ligën e Kampionëve. Skuadrat më të mëdha të continentit do të përballen në nëntë duele mjaft interesante, ku secila pikë ka peshë të jashtëzakonshme në garën për kualifikim.

Vëmendja kryesore e mbrëmjes do të jetë në Madrid, ku Atletico Madridi përballet me Manchester Unitedin, si dhe në Stamboll te dueli i zjarrtë mes Galatasarayt dhe Barcelonës. Sfida mjaft interesante priten edhe në Angli e Itali, me Arsenalin që pret Lille-n, ndërsa Interi do të kërkojë fitoren në shtëpi përballë Club Brugge. Ndërkohë, Napoli udhëton drejt Spanjës për një përballje të fortë me Villarrealin.

Në takimet e tjera të kësaj xhiroje, Bayern Mynihu do të ndeshet me Vikingun, RB Leipzigu do të masë forcat me PSV Eindhovenin, ndërsa Lensi pret Sportingun e Lisbonës. Programi i sotëm hapet me përballjen mes Sabahut dhe Slavia Pragës.

Sa i përket orarit, sfidat Lens – Sporting dhe Sabah – Slavia Pragë startojnë nga ora 18:45, ndërsa shtatë përballjet e tjera të mbrëmjes do të luhen nga ora 21:00. Me këtë rikthim, skuadrat do të luftojnë për çdo pikë, në një format të ri ku secila ndeshje mund të jetë vendimtare për të ardhmen e tyre në garë.

Basketbollisti i Golden Eagle Yllit, Khalil Shabazz, është shpallur lojtari më i vlefshëm i javës së katërt në ProCredit Superligën e Kosovës.

Shabazz shkëlqeu me një paraqitje të jashtëzakonshme, duke regjistruar 32 pikë, katër kërcime dhe tetë asistime.

Me një indeks vlerësimi prej 31, basketbollisti i Yllit u dallua si një nga lojtarët më efikasë të kësaj xhiroje, duke merituar çmimin MVP të javës.

D.L

Sulmuesi i Malishevës, Xhemal Ibishi, është shpallur futbollisti më i mirë i xhiros së tetë në Superligën e Kosovës, duke fituar çmimin “Ylli i Javës”, të ndarë nga Federata e Futbollit e Kosovës.

25-vjeçari ishte vendimtar në fitoren 1:0 të Malishevës ndaj kampiones në fuqi, Dritës, duke realizuar golin e vetëm të takimit dhe duke i siguruar skuadrës së tij tri pikë të rëndësishme.

FFK-ja ka vlerësuar paraqitjen e Ibishit, duke theksuar se përveç golit vendimtar, sulmuesi u dallua edhe për angazhimin dhe kontributin e tij gjatë gjithë ndeshjes.

Me këtë paraqitje, Ibishi ka merituar vlerësimin si lojtari më i mirë i javës së tetë në elitën e futbollit kosovar.

D.L