Numri i personave të zhdukur nga përmbytjet detyruese në Nepal ka arritur në 4,247 vetë në ditën e gjashtë të operacioneve të kërkim-shpëtimit, sipas Agjencisë Kombëtare të Menaxhimit të Fatkeqësive. Deri më tani, autoritetet konfirmojnë se së paku 903 persona kanë humbur jetën.

Ndërkohë, fokusi kryesor i ekipeve të emergjencës po përqendrohet në shpëtimin e 933 punëtorëve të hidrocentraleve, të cilët dyshohet se kanë mbetur të bllokuar brenda tuneleve të 13 projekteve energjetike në të gjithë vendin. Për të depërtuar në brendësi, ekipet e shpëtimit po përdorin shpërthime të kontrolluara në shpatet e kodrave.

Situata në terren mbetet kritike për shkak të motit të keq. Paralajmërimet portokalli për reshje të dendura shiu vazhdojnë të jenë në fuqi në veri të vendit, duke vështirësuar ndjeshëm punën e ekipeve ushtarake dhe të emergjencës, të cilat i kanë shndërruar bazat ushtarake në qendra ndihme dhe kërkim-shpëtimi.

Kriza shtrihet edhe përtej kufirit, në rajonin e Tibetit, ku ekipet kineze po kërkojnë për të mbijetuar. Paralelisht, autoritetet në Kinë dhe Nepal kanë ndërmarrë masa strikte ndaj përmbajtjeve në rrjetet sociale, ku Kina ka ndëshkuar 10 persona të akuzuar për shpërndarje të informacioneve të rreme, me gjithë kritikave për censurë të cilat Pekini zyrtar i ka mohuar. /BBC/

Irani dhe Shtetet e Bashkuara kanë shkëmbyer sulme ushtarake pasi forcat amerikane goditën dy lëshues raketash në ishullin Larak, i cili ndodhet në Ngushticën e Hormuzit.

Sulmet e para të konfirmuara të SHBA-së ndaj Iranit që nga fundi i korrikut lanë të vdekur dy persona dhe plagosën dy të tjerë, sipas Trupave të Gardës Revolucionare Islamike të Iranit (IRGC), të cilët u zotuan për “përgjigje dhe ndëshkim”.

Komanda Qendrore e SHBA-së (CENTCOM) deklaroi se kishte ndërmarrë një “veprim të kufizuar dhe të saktë” kundër “forcave që po vendosnin mina dhe që përbënin një kërcënim të menjëhershëm në Ngushticën e Hormuzit”.

Si përgjigje, Irani njoftoi se ka goditur bazat ushtarake amerikane në Jordani. Ushtria e Jordanisë bëri të ditur se ka penguar tetë raketa në orët e hershme të mëngjesit të së hënës. Ndaras nga kjo, televizioni shtetëror iranian tha se ushtria vendase ka sulmuar me dronë një bazë ajrore në Emiratet e Bashkuara Arabe.

Sulmi amerikan është i pari i këtij lloji ndaj Iranit që nga fundi i korrikut, kur presidenti Donald Trump pezulloi një fushatë të rinovuar ushtarake.

Ishulli Larak ndodhet pranë bregdetit të portit kyç të Bandar Abbasit, drejtpërdrejt në Ngushticën e Hormuzit — një rrugë detare me rëndësi jetike për transportin global. Rreth 20% e naftës dhe gazit të lëngshëm natyror në botë kalonin përmes saj para fillimit të luftës.

Tani Irani po kërkon që trafiku i anijeve me cisternë të kalojë pranë këtij ishulli për kontroll dhe, sipas raportimeve, po i detyron anijet të paguajnë 2 milionë dollarë (1.5 milionë funte) për të kaluar.

Agjencia iraniane e lajmeve Tasnim, e afërt me IRGC-në, raportoi më herët se sulmi në Larak u krye me dronë. Disa orë më vonë, mediat iraniane transmetuan një deklaratë të IRGC-së ku thuhej se ajo ka sulmuar me raketa balistike bazat amerikane Mbreti Hussein dhe Al-Azraq në Jordani, si përgjigje ndaj sulmit në ishullin Larak.

Ministria e Jashtme e Iranit dënoi ashpër “agresionin ushtarak amerikan në Larak”, duke i cilësuar sulmet ndaj bazave në Jordani si “mbrojtje të legjitime”.

Ndërkohë, presidenti iranian Masoud Pezeshkian tha në një deklaratë të cituar nga televizioni shtetëror: “Ne nuk kërkojmë luftë, por do t’u japim një përgjigje vendimtare agresorëve”, sipas agjencisë AFP.

Disa orë pas sulmit amerikan, Trump publikoi në platformën Truth Social video që dukeshin si të krijuara me inteligjencë artificiale, ku shfaqej shpërthimi i infrastrukturës së naftës.

Njëra nga videot mbante mbishkrimin: “Ishulli Kharg po bëhet copë e çikë”, duke iu referuar një terminali kryesor të naftës pranë bregdetit të Iranit, të cilin Trump ka kërcënuar ta marrë. Postimi i tij nuk jepte detaje të mëtejshme.

Trump tha javën e kaluar se të gjitha minat e vendosura nga Irani në Ngushticën e Hormuzit si pjesë e bllokadës së rrugës detare u çaktivizuan ose u larguan. Ai shtoi se Irani është paralajmëruar se çdo anije apo varkë që vendos mina të reja do të shkatërrohet. Zëvendësministri i Jashtëm i Iranit, Kazem Gharibabadi, e cilësoi këtë deklaratë të Trumpit si një mashtrim “propagandistik”.

Irani po përballet me presion të ri ekonomik pasi Uashingtoni shpalli më 24 gusht një fushatë të re sanksionesh, me synim izolimin e mëtejshëm të Teheranit dhe zgjerimin e sanksioneve dytësore ndaj aleatëve të tij. /BBC/

Numri i viktimave nga përmbytjet e menjëhershme në Nepal është rritur në 538, ka bërë të ditur Autoriteti Kombëtar për Menaxhimin e Fatkeqësive në këtë vend aziatik, ndërsa operacionet për kërkimin dhe shpëtimin e personave të zhdukur po vazhdojnë.

Përmbytjet katastrofike kanë goditur zonën kufitare mes këtij shteti dhe Kinës, duke lënë pas dëme të mëdha dhe qindra persona të zhdukur. Para përditësimit të fundit, autoritetet nepaleze kishin raportuar 469 viktima dhe 977 persona të zhdukur, ndërsa më shumë se tre mijë persona ishin evakuuar me helikopter, raporton AP, transmeton KosovaPress.

Operacionet e shpëtimit po zhvillohen në kushte të vështira. Policia e Nepalit ka lëshuar alarm të ri pasi ka marrë informacione se një digë në anën tibetiane është çarë, duke kërkuar nga ekipet e shpëtimit dhe banorët në zonat e rrezikuara të jenë në gatishmëri për përmbytje të tjera.

Në zonën e Rasuwa-s, pjesëtarët e ushtrisë po përpiqen të shpëtojnë njerëzit e bllokuar në një tunel të hidrocentralit Upper Trishuli-1. Balta ka mbuluar hyrjet dhe daljet, duke e vështirësuar ndjeshëm operacionin.

Sipas shkencëtarëve që kanë analizuar pamjet satelitore, katastrofa dyshohet se nisi pasi shkëmbinjtë nën një akullnajë në Himalaje u shembën, duke marrë me vete një pjesë të saj. Masa e shkëmbinjve dhe ujit të shkrirë fryu lumenjtë në luginat poshtë, duke krijuar një valë të fuqishme që mori përpara ndërtesa, ura dhe sasi të mëdha dheu në Tibet dhe Nepal.

Mes të zhdukurve janë edhe qindra shtetas të huaj. Bordi i Turizmit i Nepalit kishte bërë të ditur se më shumë se 500 të huaj rezultonin të zhdukur, përfshirë rreth 90 amerikanë. Disa prej personave për të cilët ende nuk ka informacion besohet se kishin udhëtuar drejt Malit Kailash në Tibet, vend i shenjtë për hindusët, budistët dhe besimtarë të tjerë.

Ushtria e Nepalit ka njoftuar se ka arritur të shpëtojë 900 persona nga zonat më të goditura nga përmbytjet shkatërruese, përfshirë rajonet Rasuwa dhe Nuwakot. Mes të shpëtuarve ndodhen edhe 119 shtetas të huaj, prej të cilëve 92 janë indianë — grupi më i madh i vizitorëve të huaj të prekur nga kjo katastrofë natyrore.

Sipas zëdhënësit të ushtrisë, Gjeneral Brigade Rajaram Basnet, të gjithë të shpëtuarit janë të lënduar dhe po marrin trajtim mjekësor në spital. Ai tha se reshjet e pandërprera të shiut dhe moti i paparashikueshëm po e vështirësojnë punën në terren.

“Pavarësisht pengesave, po bëjmë çmos për të intensifikuar operacionet e shpëtimit në koordinim të ngushtë me të gjitha palët. Në gjithë jetën time nuk kam parë një katastrofë të këtyre përmasave,” u shpreh Basnet.

Policia e Nepalit konfirmoi se deri në orët e mëngjesit të së premtes, numri i personave që kanë humbur jetën vetëm në rajonin Resuwa ka arritur në 475. Ekipet e emergjencës po vazhdojnë kërkimet në terren si dhe punën për zhbllokimin e rrugëve të zëna nga balta e rrënojat.

Lutja e dhimbshme e familjes britanike: “Ju lutemi, na ndihmoni ta gjejmë”

Mes të zhdukurve nga përmbytjet e së mërkurës është edhe 51-vjeçarja me shtetësi britanike, Neetu Goyal Tiwari. Ajo udhëtoi nga Londra në drejtim të Katmandusë më 14 gusht për një pelegrinazh shpirtëror, ndërsa kontakti i saj i fundit me familjen ishte në pikën kufitare të Gyirong-ut.

I vëllai i saj, Naresh Goyal, mes lotësh bëri thirrje publike për ndihmë përmes rrjetit BBC:

“Shkuarja në këtë pelegrinazh ishte ëndrra e saj, ishte shumë e lumtur dhe e ngazëllyer. Kemi thirrur në çdo linjë emergjente të qeverisë indiane dhe kemi kontaktuar Ambasadën Britanike në Katmandu. Ju lutemi, na ndihmoni ta gjejmë, jemi të gjithë të terrorizuar”. /BBC/