Vetëm disa javë më vonë, vëmendja globale do të zhvendoset në Kupën e Botës më të madhe në histori, që do të zhvillohet në SHBA, Kanada dhe Meksikë, me 48 ekipe dhe 104 ndeshje. Edhe aty, nostalgjia do të jetë e pranishme: Adidas ka prezantuar fanella të reja me frymë estetike të viteve ’90, të kombinuara me dizajn modern dhe me rikthimin e logos ikonike “trefoil”, për herë të parë pas më shumë se tri dekadash.

Sipas analizës së zhvillimeve në kulturën e futbollit, fanella nuk është më thjesht uniformë sportive. Ajo është shndërruar në objekt kulturor, modë dhe kujtim kolektiv. Dizajnet e viteve ’90, dikur të diskutueshme, sot konsiderohen ikonike dhe të kërkuara në tregjet globale të fanellave vintage.

Ekspertët theksojnë se fanellat e futbollit filluan të bëhen pjesë e kulturës së përditshme sidomos në vitet ’70, por shpërthimi i tyre estetik dhe kulturor ndodhi në vitet ’90, kur teknologjia e re e prodhimit lejoi dizajne më të guximshme dhe më grafike. Fanella u shndërrua në “kanavacë lëvizëse” të identitetit të klubeve dhe kombëtareve.Kujtimet sportive dhe emocionale kanë luajtur rol të madh në këtë fenomen. Fanellat e Kupës së Botës 1990 apo Euro 1996 janë bërë simbole të forta nostalgjie, të lidhura me momente historike të futbollit dhe kulturës pop, duke u kthyer në objekte koleksionimi me vlera të larta.

Gjatë dy dekadave të fundit, tregu i fanellave retro është profesionalizuar dhe globalizuar, duke u kthyer nga një rrjet i vogël koleksionistësh në industri të mirëfilltë. Ndërkohë, ndikimi i modës dhe i kulturës së të famshmëve ka bërë që fanellat vintage të kthehen në deklarata stilistike në rrugë, rrjete sociale dhe evente publike.Sipas studiuesve të kulturës, kjo valë nostalgjie nuk lidhet vetëm me të kaluarën, por edhe me mënyrën si brezat e rinj e përjetojnë historinë përmes internetit dhe përmbajtjeve digjitale. Futbolli, ashtu si filmat apo moda, po përjeton një cikël të vazhdueshëm rikthimi dhe ripërpunimi të së shkuarës.

Në prag të Kupës së Botës, mes fanellave të reja dhe atyre të rikthyera nga arkivat, futbolli po hyn në një epokë ku e kaluara dhe e ardhmja bashkëjetojnë në të njëjtën fushë. Fanella nuk është më thjesht uniformë: ajo është kujtim, identitet dhe kulturë që vazhdon të riciklohet brez pas brezi.

Aktorja amerikane Joy Harmon ka ndërruar jetë në moshën 87-vjeçare. Sipas mediave amerikane, ajo vdiq në shtëpinë e saj në Los Anxhelos, pas disa javësh përballje me pneumoni.

Harmon u bë e njohur për një skenë të shkurtër, por shumë të komentuar në filmin klasik “Cool Hand Luke”, ku luante përkrah Paul Newman. Edhe pse personazhi i saj nuk kishte asnjë replikë dhe qëndronte në ekran vetëm për disa minuta, skena e saj gjatë larjes së një makine u bë një nga momentet më të paharrueshme të filmit.

E kredituar thjesht si “The Girl”, personazhi i saj u quajt “Lucille” nga një prej të burgosurve në film. Kjo paraqitje mbeti momenti më i njohur i karrierës së saj artistike.

Në një intervistë të vitit 2017, Harmon kishte deklaruar se nuk ishte e vetëdijshme për nëntekstin që u interpretua nga publiku në atë skenë, duke theksuar se thjesht kishte tentuar ta realizonte rolin në mënyrë natyrale.

Karriera e saj përfshiu 32 role në filma dhe televizione nga vitet ’50 deri në fillim të viteve ’70. Ajo u shfaq gjithashtu në seriale të njohura si “Bewitched”, “Batman”, “The Man from U.N.C.L.E.”, “The Beverly Hillbillies”, “The Odd Couple” dhe “The Monkees”.

Pas tërheqjes nga aktrimi, Harmon punoi në Disney Studios dhe më vonë, në vitin 2003, hapi një furrë buke në Los Anxhelos.

Joy Harmon lë pas tre fëmijë dhe nëntë nipër e mbesa.

Madonna ka konfirmuar zyrtarisht publikimin e albumit të saj të ri “Confessions II”, i cili vjen si vazhdim i albumit të suksesshëm të vitit 2005, “Confessions On A Dancefloor”. Projekti i ri pritet të publikohet më 3 korrik.

Këngëtarja kishte paralajmëruar rikthimin në këtë stil që nga viti 2023, ndërsa së fundmi fshiu të gjitha postimet në Instagram dhe ndryshoi biografinë me një varg nga kënga “Hung Up”, duke shtuar më tej pritshmëritë e fansave.Albumi i ri shënon rikthimin e saj pas “Madame X” të vitit 2019 dhe është i 15-ti në karrierën e saj. Madonna ka bashkëpunuar sërish me producentin britanik Stuart Price, me të cilin realizoi edhe albumin origjinal.

Si paralajmërim për projektin, artistja publikoi një video 60-sekondëshe për këngën hapëse “I Feel So Free”, e cila përfshin elemente nga hiti i saj i viteve ’80 “Into The Groove”.Në një deklaratë, Madonna theksoi se muzika e saj e re do të vazhdojë të eksplorojë kulturën e muzikës elektronike dhe vallëzimit, duke e cilësuar pistën e vallëzimit si një hapësirë shpirtërore dhe lidhjeje njerëzore.

Ndërkohë, interesimi për albumin është rritur ndjeshëm muajt e fundit, ndërsa artistja pritet të shfaqet edhe në projekte të tjera televizive dhe muzikore gjatë këtij viti.

Këngëtarja e njohur ndërkombëtarisht Katy Perry është përfshirë në një çështje që po hetohet nga autoritetet australiane, pas akuzave për sulm seksual të ngritura nga aktorja Ruby Rose.

Sipas një deklarate zyrtare nga policia në shtetin e Victorias, njësia për Hetimin e Veprave Seksuale dhe Abuzimit ndaj Fëmijëve ka nisur hetimet për një incident që dyshohet të ketë ndodhur në vitin 2010 në Melbourne. Autoritetet bëjnë të ditur se rasti lidhet me një ngjarje të pretenduar në një ambient në qendër të qytetit, duke shtuar se për shkak të hetimeve në vazhdim nuk mund të japin detaje shtesë në këtë fazë.

Aktorja Rose, e njohur për rolin e saj në serialin “Orange Is the New Black”, i bëri publike akuzat përmes disa postimeve në rrjetet sociale, duke pretenduar se incidenti ka ndodhur në një klub nate në Melbourne, kur ajo ishte në të 20-at. Ajo ka deklaruar se i janë dashur pothuajse dy dekada për të folur publikisht për këtë përvojë.

Në reagimin e tyre për mediat amerikane, përfaqësuesit e Perryt kanë mohuar kategorikisht akuzat, duke i cilësuar ato si të pavërteta dhe të rrezikshme. Në deklaratë thuhet se pretendimet e Rose janë të pabazuara dhe se ajo ka ngritur edhe më parë akuza të ngjashme ndaj individëve të ndryshëm, të cilat sipas tyre janë hedhur poshtë.

Nga ana tjetër, Rose ka bërë të ditur se planifikon ta raportojë rastin zyrtarisht, edhe pse pranon mundësinë që afatet ligjore për ndjekje penale mund të kenë kaluar. Ajo ka theksuar se do të vazhdojë të ndajë informacione dhe përditësime lidhur me këtë çështje.

Rasti mbetet nën hetim dhe deri më tani nuk ka një përfundim zyrtar nga autoritetet kompetente