Në Kampusin Inovativ të UBT-së është mbajtur forumi akademik me temë diskutimi “Nga Çlirimi te Lidershipi: Edukimi i Gjeneratës së Ardhshme përmes Partneritetit Kosovë–SHBA”, i organizuar për nder të 250-vjetorit të Shteteve të Bashkuara të Amerikës.

Në këtë ngjarje mori pjesë profesori dhe analisti amerikan për Ballkanin, Daniel Serwer, i cili u fokusua në zhvillimin e Kosovës, ndryshimet historike dhe rëndësinë e arsimit.

Në fillim të fjalës së tij, Serwer falënderoi stafin akademik dhe komunitetin e UBT-së për organizimin.

Duke reflektuar mbi ecurinë e Kosovës, ai theksoi se vendi ka shënuar progres të dukshëm ndër vite. “Kosova ka bërë një rrugë të gjatë,” u shpreh Serwer, duke kujtuar vitin 1998 kur kishte vizituar vendin për herë të parë, periudhë në të cilën përmendi takimet me Adem Demaçin dhe zhvillimet ku përfshihej edhe Albin Kurti.

Serwer përshkroi rrethanat e asaj kohe, kur të rinjtë shqiptarë detyroheshin të ndiqnin mësimet nëpër bodrume dhe shtëpi-shkolla private për shkak të masave të regjimit të atëhershëm.

Ai e krahasoi atë periudhë me infrastrukturën dhe gjendjen e sotme arsimore në vend.

“Disa thonë se asgjë nuk ka ndryshuar, por përgjigjja ime është: gjithçka ka ndryshuar,” deklaroi ai, duke iu referuar ndryshimeve institucionale dhe arsimore.

Në përmbyllje të fjalës së tij, profesori amerikan ndau me të pranishmit edhe një reflektim mbi sistemet politike dhe funksionimin e demokracisë në SHBA dhe në botë, duke nënvizuar se zhvillimet dhe ndryshimet historike janë procese të pakthyeshme. /A.K/

Në Kampusin Inovativ të UBT-së është mbajtur forumi akademik për shënimin e 250-vjetorit të Shteteve të Bashkuara të Amerikës, në kuadër të projektit madhor “America Inspires Freedom – The Kosovo Story”.

Gjatë kësaj ngjarjeje, themeluesi dhe rektori i UBT-së, Prof. Dr. Edmond Hajrizi, mbajti një fjalim ku ndau me të pranishmit rrugëtimin e tij personal dhe kolektiv, duke nisur nga sfidat e arsimit në vitet e 90-ta e deri te roli i SHBA-së për lirinë dhe shtetndërtimin e Kosovës.

Në fjalën e tij hapëse, Hajrizi vuri në dukje peshën simbolike të këtij jubileu dhe ndikimin e vlerave amerikane në nivel global.

“Përvjetori i 250-të i Shteteve të Bashkuara të Amerikës. Ky kremtim është shumë më tepër sesa thjesht një përkujtim i themelimit të një kombi. Është një kremtim i ideve që ndryshuan botën, siç janë liria, demokracia, qeverisja kushtetuese, dinjiteta njerëzor dhe inovacioni. Dhe besimi se edukimi është investimi më i madh që një shoqëri mund të bëjë. Këto vlera kanë frymëzuar gjenerata anembanë globit. Ato sigurisht që na kanë frymëzuar edhe ne,” u shpreh ai.

Më tej, rektori i UBT-së bëri një paralelizëm mes rrugëtimit të institucionit që udhëheq dhe historisë së shtetit aleat, duke theksuar themelet e tyre të përbashkëta.

“250 vjet Amerikë, 25 vjet UBT; dy rrugëtime të ndryshme, por që të dyja janë ndërtuar mbi të njëjtën bindje: se liria krijon mundësi, se edukimi sjell progres dhe se inovacioni formëson të ardhmen,” deklaroi Hajrizi.

Rektori Hajrizi kujtoi se për gjeneratën e tij, pas heqjes së autonomisë së Kosovës, Amerika përfaqësonte shpresën për drejtësi, duke veçuar vizitën historike të Senatorit Bob Dole si mesazhin e parë që tregonte se vendi nuk ishte vetëm. Ky rrugëtim historik, sipas tij, ndërlidhet drejtpërdrejt me misionin aktual të UBT-së për edukimin e gjeneratave të reja përmes arsimit, inovacionit dhe partneritetit ndërkombëtar.

Në kuadër të analizës së raporteve dypalëshe, ai vlerësoi mbështetjen e vazhdueshme dhe të palëkundur të të gjitha administratave amerikane ndër vite, pa dallime politike.

“Presidenti Bill Clinton, Sekretarja Madeleine Albright dhe Gjenerali Wesley Clark u bënë pjesë e historisë së Kosovës përgjithmonë. Presidenti George W. Bush mbështeti fuqishëm pavarësinë e Kosovës, ndërsa Presidenti Barack Obama vazhdoi mbështetjen për institucionet tona demokratike, siç bëri edhe Presidenti Donald Trump dhe administratat pasuese. Administratat ndryshojnë, partitë politike ndryshojnë, megjithatë një gjë mbetet konstante: miqësia e palëkundur mes Kosovës dhe Shteteve të Bashkuara,” përfundoi Rektori Hajrizi. /E.A/

Në Kampusin Inovativ të UBT-së kanë nisur punimet e forumit akademik në kuadër të projektit “America Inspires Freedom – The Kosovo Story”, i cili organizohet nga UBT dhe partenere e projektit. Ky aktivitet është pjesë e programit ndërkombëtar për shënimin e 250-vjetorit të Shteteve të Bashkuara të Amerikës, duke rikonfirmuar lidhjen e fuqishme historike mes Kosovës dhe SHBA-së.

Forumi me titull “Nga Çlirimi te Lidershipi: Edukimi i Gjeneratës së Ardhshme përmes Partneritetit Kosovë–SHBA” ka bërë bashkë një panel të shquar ku po diskutojnë Rektori i UBT-së, Edmond Hajrizi, Daniel Serwer, Faton Bislimi nga Fondacioni Shqiptaro-Amerikan, Edward P. Joseph, Besa Tafilaj Pinchotti dhe Mario Marquez.

Gjatë forumit, në cilësinë e drejtorit të projektit, Faton Bislimi u shpreh mjaft falënderues për bashkëpunimin e ngushtë dhe pritjen e shkëlqyer që i është bërë këtij organizimi madhor nga ana e institucionit mikpritës.

Ai vlerësoi lart angazhimin e të gjithë njerëzve vendas që mundësuan jetësimin e kësaj ngjarjeje, duke theksuar se ekipi që po menaxhon aktivitetet ka qenë forca shtytëse pas çdo gjëje që është arritur deri më tani.

Si kulmim i këtij momenti solemn, Bislimi i dorëzoi Rektorit Hajrizi një dhuratë ekskluzive të sjellë direkt nga kryeqyteti amerikan.

“Kjo është monedha zyrtare e ‘America 250’ që e sollëm nga Uashingtoni. Po jua dorëzoj këtë sepse është thjesht një shenjë e vogël vlerësimi për atë që keni bërë ju dhe për atë që ky universitet ka realizuar sot”, deklaroi Bislimi

Me këtë rast, ai falënderoi stafin e UBT-së dhe bëri të ditur se ky forum hap rrugën për aktivitete të tjera të rëndësishme që do të pasojnë gjatë kësaj jave.

/E.A/

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

 Foto: Ish-rektori i UP, dr. Ejup Statovci

 29 qershor 1993

Shtypi gjerman rreth diskriminimit racial në Kosovë

Agjencia gjermane DPA, sot në një raport nga Prishtina, njofton për ashpërsimin e masave kundër shqiptarëve në Kosovë. Kjo agjenci, njofton se dënimi i autotransportuesve shqiptarë, kryesisht bëhet për shkak të synimit të regjimit serb për të penguar furnizimin me mallëra për nevojat jetësore të shqiptarëve, të cilët janë të rrezikuar në çdo pikëpamje. Kosova, e cila banohet kryesisht nga shqiptarët, po sundohet përmes dhunës policore dhe ushtarake serbe që nga rrënimi i autonomisë së saj. Në punë të kolonizimit të Kosovës dhe me qëllim të ndërrimit të strukturës së saj etnike, është angazhuar edhe kisha ortodokse serbe, e cila stimulon natalitetin serb në Kosovë.

Gazeta e njohur “Frankfurter Allgemeine”, po ashtu shkruan se janë shpikur forma të ndrushme të plaçkitjes së shqiptarëve, siç është rasti me tarifën e veçantë doganore, sipas së cilës pronarët shqiptarë të kamionëve dënohen me nga 500 marka gjermane.

29 qershor 1994

Forcat serbe ndërhynë në Universitetin e Prishtinës dhe morën në pyetje drejtuesit e tij

Forcat serbe ndërhynë dje rreth orës 11:30 në Rektoratin e Universitetit të Prishtines, ndërprenë mbledhjen e Senatit të UP-së dhe morën në polici për rreth tri orë rektorin Statovci, kryetarin e Senatit të UP-së dr. Fadil Berishën dhe sekretarin e UP-së Destan Halimin.

Siç njofton sot Rektorati i UP-së, kur ndërhynë forcat serbe, në Rektorat po mbahej mbledhja e Senatit të UP-së.

Mbledhja kishte në rend të ditës shpalljen e zgjedhjeve në Universitet për rektor, për anëtarë të Senatit, për dekanë nëpër fakultete dhe për drejtorë në shollat e larta, në bazë të Dekretligjit mbi shkollimin e lartë, të aprovuar Qnga Qeveria e Republikës së Kosovës më 22 qershor 1994 dhe që ka hyrë në fuqi të njëjtën ditë.

Forcat serbe legjitimuan pjesëmarrësit e mbledhjes dhe bastisën lokalet e Rektoratit, morën dokumentacionin dhe kopjet e Dekretligjit mbi shkollimin e lartë që ishin bërë gati për t’iu shpërndarë fakulteteve dhe shkollave të larta, si edhe materiale të tjera.

Policia dërgoi në stacion rektorin Statovci, kryetarin e Senatit dr. Fadil Berishën dhe sekretarin e UP-së Destan Halimin.

Këta u mbajtën dhe u morën në pyetje prej dy deri në tri orë.

Policisë i interesonte puna përfundimtare rreth Dekretligjit mbi shkollimin e lartë, për aprovimin e tij nga Qeveria e Kosovës dhe për mënyrën e komunikimit me Qeverinë dhe personat që e bëjnë këtë. Policia interesohej edhe për bazën juridike të Dekretligjit e për zbatimin e tij, për atë se përse bëhen dhe si bëhen tash zgjedhjet në UP dhe me çka dallohen këto zgjedhje me ato të mëparshmet.

Drejtuesit e UP-së u pyetën edhe për qëllimin e mbledhjes së Senatit të UP-së dhe për punën e këtij senati tash.

Pas marrjes në pyetje ata u liruan, por rektori Statovci u paraqit sot në polici në orën 8:00 në bazë të urdhërit që iu dha dje.

Rektori u mor në pyetje rreth një orë për çështjet që ishte marrë në pyetje edhe ditën e djeshme.

Në kumtesën e Rektoratit të UP-së të shpallur sot thuhet se qëllimi i ndërhyrjes së djeshme ishte pengimi i punës së UP-së dhe frikësimi i mësimdhënësve e studentëve.

Universiteti i Prishtinës, thuhet në kumtesë, si edhe deri më tash do ta vazhdojë punën e vet me vendosmëri dhe me bazë të re, të krijuar me nxjerrjen e Dekretligjit mbi shkollimin e lartë.

Ndërhyrja e djeshme e forcave serbe kundër UP-së është e dyta gjatë këtij muaji. Në fillim të qershorit policia serbe ndërhyri kundër mbledhjes së Kuvendit të UP-së që po mbahej në Medresenë “Alaudin” të Prishtinës, me ç’rast kishte arrestuar rektorin dhe disa drejtues të lartë të UP-së.

29 qershor 1995

Në Podujevë vazhdon aksioni për kërkimin e armëve

Gjatë kësaj jave në Podujevë, policia serbe me pretekst të kërkimit të armëve ishte në shtëpinë e Kadri Hakiqit, Ramadan Osmanit të cilët në stacionin e policisë në Podujevë u maltretuan fizikisht si dhe në shtëpinë e Salih Salihut, Nazmi Podvoricës e Riza Fazliut. Gjithashtu në fshatin Bradash poicia kërkoi edhe Rexhep Hotin, i cili ditë më parë ishte maltretuar fizikisht.

Në Bajçinë policia ishte në shtëpinë e Bejtush Muçollit ku kërkuan të birin e tij Hasanin, si dhe në shtëpinë e Naip Muçollit. Preteksti ishte kërkimi i armëve, njofton Komisioni për Informim i Degës së LDK-së në Podujevë.

Ndërsa dje në Sfeçël policia serbe kontrolloi shtëpinë e Hetem Ajetit. Pasi që Hetemi nuk ishte në shtëpi policia iu la fleturdhëresën që të lajmërohet të nesërmen. E njëjta ekspeditë e policisë ishte sot në ora 8:00 të mëngjesit për të kërkuar sërish Hetemin, mirëpo pasi nuk ishte në shtëpi, policia bëri demolimin e orendive shtëpiake.

29 qershor 1998

Një burrë e një fëmijë të vrarë dhe tre fëmijë tjerë të plagosur në Drenoc të Klinës

Shaip Krasniqi (30) dhe Betim Xhevdet Fejza (12) janë vrarë mbrëmë në fshatin Drenoc të Klinës, ndërsa Fidan Rasim Agushi (12), Arben Hamzë Fejza (17) dhe Labinot Ismet Fejza (10) janë plagosur gjatë sulmit të policisë e të civilëve serbë që filloi në orën 20:00. Sulmi i furishëm në këtë fshat përskaj rrugës Prishtinë – Pejë zgjati rreth një orë. Thuhet se janë rrëmbyer Qaush Haxhi Fazlia (38) dhe Skënder Imer Ademi (51).

Fshatarët bënë një rezistencë të fuqishme me mjetet që i kishin.

Fshati vazhdon të mbahet ende në rrethim. Dega e LDK-së në Klinë tërheq vërejtjen për rrezikun nga një masakër i fshatit, pasi në të gjenden fëmijë, gra e pleq.

Lismir: Behar Gojnovci vdiq, Hajrullah Konjuhi në gjendje të rëndë

Behar Gojnovci (8) nga Lismiri, i cili u plagos sot në mëngjes nga forcat serbe që sulmuan fshatin, vdiq disa orë më vonë, në pamundësi të ofrimit të ndihmës mjekësore, për shkak se fshati mbahet në rrethim të plotë nga forcat serbe.

Njoftohet se është plagosur edhe Hajrullah Konjuhi (56) nga ky fshat, i cili gjithashtu është në gjendje të rëdnë, për shkak se atij nuk ka mundësi t’i afrohet ndihmë mjekësore.