FC Prishtina ka njoftuar se ka arritur marrëveshje me Prof. Malsor Gjonbalajn, i cili është emëruar udhëheqës i Këshillit Profesional të klubit.

Sipas njoftimit të klubit, Gjonbalaj, krahas angazhimit të tij akademik, prej vitesh ka dhënë kontribut të rëndësishëm në futbollin kosovar. FC Prishtina vlerëson se përvoja dhe kualifikimet e tij akademike, shkencore dhe profesionale përfaqësojnë një vlerë të shtuar për strukturat drejtuese të klubit.

Në rolin e ri, ai do të ketë përgjegjësi në hartimin e planeve zhvillimore të klubit, me fokus të veçantë në avancimin e Akademisë së të Rinjve, si pjesë e strategjisë afatgjatë të bardhekaltërve.

Klubi ka shprehur bindjen se angazhimi dhe vizioni i Gjonbalajt do të ndikojnë në forcimin e mëtejshëm të FC Prishtinës dhe në realizimin e objektivave sportive në të ardhmen.

Gjonbalaj është një emër i njohur për tifozët prishtinas, pasi ka veshur fanellën e FC Prishtinës për disa sezone në periudha të ndryshme, duke u dalluar për paraqitjet në repartin ofensiv dhe numrin e madh të golave të shënuar.

“Mirë se u ktheve në familjen bardhekaltër, Prof. Gjonbalaj!”, thuhet në fund të komunikatës së FC Prishtinës.

Liverpooli ka konfirmuar zyrtarisht emërimin e Andoni Iraolas si trajnerin e ri të skuadrës. Strategu spanjoll ka nënshkruar kontratë dyvjeçare me klubin nga “Anfield”.

Iraola merr drejtimin e “Reds” pas largimit të Arne Slot, i cili u shkarkua më 30 maj, pas dy sezonesh në krye të ekipit.

Trajneri spanjoll vjen nga Bournemouthi, ku kaloi tre sezone të suksesshme dhe arriti ta udhëheqë klubin drejt kualifikimit historik në garat evropiane për herë të parë.

Puna e tij në Ligën Premier u vlerësua gjerësisht, pasi Bournemouthi shfaqi paraqitje të qëndrueshme dhe rriti ndjeshëm nivelin konkurrues gjatë sezonit 2025/26.

Tashmë, Iraola përballet me sfidën më të madhe të karrierës së tij, duke marrë drejtimin e njërit prej klubeve më të mëdha në Evropë, me objektivin për ta rikthyer Liverpoolin në garën për trofe dhe sukseset e mëdha në vitet e ardhshme.

Ylli kolumbian i muzikës pop, Shakira, do të performojë këngën zyrtare të Kupës së Botës 2026, “Dai Dai”, në ceremoninë hapëse të turneut që do të mbahet në Meksikë.

Shakira do të ngjitet në skenë së bashku me këngëtarin Burna Boy më 11 qershor në stadiumin “Estadio Azteca” në Mexico City, para ndeshjes hapëse mes Meksikës dhe Afrikës së Jugut. Titulli i këngës, “Dai Dai”, është një shprehje italiane që do të thotë “Hajde” ose “Vazhdo”.

Në ceremoninë hapëse në Meksikë do të performojnë edhe ylli kolumbian i reggaetonit, J Balvin, si dhe këngëtarja nga Afrika e Jugut, Tyla.

Ndërkohë, ceremoni hapëse do të organizohen edhe në dy vendet e tjera pritëse të Kupës së Botës. Në Kanada, para ndeshjes Kanada – Bosnje dhe Hercegovinë, do të performojnë Michael Bublé dhe Alanis Morissette, ndërsa në Shtetet e Bashkuara, para sfidës SHBA – Paraguai, do të performojnë Katy Perry dhe reperi Future.

Shakira do të jetë pjesë edhe e spektaklit të madh të pushimit mes pjesëve në finalen e Kupës së Botës më 19 korrik, ku do të performojë së bashku me Madonna dhe grupin korean BTS.

Presidenti i Ukrainës, Volodymyr Zelensky, i ka bërë thirrje presidentit rus Vladimir Putin për një takim ballë për ballë, në një përpjekje të re për t’i dhënë fund luftës që vazhdon prej më shumë se katër vitesh.

Në një letër të hapur drejtuar Putinit, Zelensky tha se do të ishte “gabim të pritej” derisa lufta në Evropë të rikthehej në qendër të vëmendjes së Shteteve të Bashkuara, duke theksuar se paqja mund të arrihet vetëm përmes dialogut të drejtpërdrejtë mes Ukrainës dhe Rusisë.

Ai propozoi gjithashtu një armëpushim të plotë gjatë zhvillimit të negociatave, ndonëse Putin e hodhi poshtë këtë ide më herët gjatë së enjtes.

“Ukraina propozon përfundimin e kësaj lufte përmes angazhimit të drejtpërdrejtë mes nesh – me ju. Unë propozoj një takim”, shkroi Zelensky, duke sugjeruar që bisedimet të zhvillohen në vende neutrale si Zvicra ose Turqia.

Në letër, presidenti ukrainas theksoi se Ukraina po humb qytetarë çdo ditë dhe se çdo humbje është e dhimbshme për vendin.

“Mos kini frikë të merrni rrugën për daljen nga kjo luftë. Kjo është gjëja kryesore që kërkohet nga ju tani”, shkroi ai.

Nga ana tjetër, Kremlini konfirmoi se e ka pranuar letrën dhe se Putini do të njoftohet për përmbajtjen e saj. Rusia deklaroi se Zelensky është i mirëpritur të takohet me Putinin në Moskë.

Duke folur në Shën Petersburg, Putin tha se është i gatshëm për të arritur një marrëveshje me Ukrainën, por shtoi se nevojiten kompromise. Ai përsëriti qëndrimin e Moskës se Ukraina duhet të heqë dorë nga katër rajone pjesërisht të pushtuara nga Rusia – Donetsk, Luhansk, Kherson dhe Zaporizhzhia – si dhe nga synimi për anëtarësim në NATO.

Kievi ka refuzuar vazhdimisht këto kërkesa, duke argumentuar se dorëzimi i territorit do ta inkurajonte Rusinë për agresione të tjera në të ardhmen.

Ndërkohë, presidenti amerikan Donald Trump mbështeti idenë e një takimi mes dy liderëve.

“Mendoj se do të ishte shumë mirë nëse ata takohen. Duhet ta bëjnë. Le ta përfundojnë këtë”, deklaroi Trump.

Bisedimet për armëpushim kanë ngecur muajt e fundit, ndërsa përpjekjet e mëparshme diplomatike në Gjenevë, Abu Dhabi dhe Stamboll nuk kanë sjellë marrëveshje konkrete për përfundimin e konfliktit.