Pas gati një dekade betejash ligjore, divorci mes Angelina Jolie dhe Brad Pitt po i afrohet përfundimit. Më 12 korrik, binjakët e tyre Vivienne dhe Knox mbushin 18 vjeç, duke mbyllur edhe çështjen e kujdestarisë së fëmijëve.

Jolie kërkoi divorcin në vitin 2016, duke akuzuar Pitt për sjellje abuzive gjatë një fluturimi privat. Aktori i ka mohuar vazhdimisht akuzat, ndërsa autoritetet amerikane nuk ngritën akuza për mungesë provash. Sipas mediave amerikane, Pitt ka kontakte të kufizuara me fëmijët e tij, ndërsa disa prej tyre kanë hequr ose po kërkojnë të heqin mbiemrin e tij.

Ish çifti vazhdon të jetë në konflikt ligjor edhe për pronën dhe vreshtarinë franceze Chateau Miraval.

Nvidia ka prezantuar RTX Spark, një çip të ri për kompjuterët personalë që synon të sjellë inteligjencën artificiale në një nivel të ri për përdoruesit e zakonshëm.

Drejtori ekzekutiv i kompanisë, Jensen Huang, e cilësoi këtë zhvillim si një hap po aq të rëndësishëm sa transformimi i telefonave në telefona të mençur. Çipi i ri do të integrohet në kompjuterët Windows të prodhuar nga Lenovo, HP, Dell, Microsoft Surface, Asus dhe MSI, të cilët pritet të dalin në treg gjatë vjeshtës.

Sipas analistëve, ky hap e vendos Nvidian në konkurrencë më të drejtpërdrejtë me kompani si Apple, Intel, AMD dhe Qualcomm, duke forcuar pozicionin e saj në tregun e inteligjencës artificiale.

Prezantoimi i RTX Spark vjen në një periudhë kur SHBA-ja po shtrëngon kufizimet për eksportin e çipave të avancuar të inteligjencës artificiale drejt Kinës.

Reperi amerikan Kanye West, i njohur edhe si Ye, ka performuar para një audience masive në Stamboll, duke tërhequr më shumë se 100 mijë fansa në koncertin e mbajtur të shtunën mbrëma në stadiumin “Atatürk Olympic”.

Sipas raportimeve ndërkombëtare, rreth 118 mijë persona kanë ndjekur koncertin e tij dyorësh, në atë që konsiderohet paraqitja e tij e parë në Evropë që nga viti 2014 dhe e para në Turqi.

Në mesin e publikut raportohet se kishte fansa nga Britania e Madhe, Gjermania, Franca, Holanda, Italia, Rusia, Polonia dhe vendet e Lindjes së Mesme.

West ka qenë subjekt i anulimeve të shumta në Evropë vitet e fundit, pas deklaratave të tij antisemitike dhe publikimeve kontroverse, përfshirë edhe projekte muzikore që kanë ngjallur reagime të forta ndërkombëtare. Disa vende dhe festivale kanë refuzuar ta lejojnë performimin e tij, duke përmendur arsye të sigurisë publike dhe reagimit shoqëror.

Pavarësisht polemikave, ai pritet të vazhdojë turneun me paraqitje të planifikuara në Holandë në fillim të qershorit.

Në të kaluarën, West ka kërkuar falje për disa nga deklaratat e tij dhe ka deklaruar se ka ndryshuar qëndrim, duke përmendur edhe probleme shëndetësore si çrregullimi bipolar dhe një dëmtim të mundshëm të trurit si faktorë që kanë ndikuar në sjelljen e tij.

Koncerti në Stamboll vjen si një nga rikthimet e tij më të mëdha në skenën ndërkombëtare pas një periudhe të gjatë polemikash dhe anulimesh.

Këngëtari i njohur i R&B-së dhe soul-it, Peabo Bryson, ka pësuar një goditje në tru në moshën 75-vjeçare. Lajmi është konfirmuar nga një përfaqësues i artistit, i cili ka bërë të ditur se ai ndodhet nën kujdes mjekësor dhe po merr trajtimin e nevojshëm.

Familjarët e tij kanë kërkuar privatësi në këtë periudhë të vështirë, ndërsa kanë falënderuar fansat për mbështetjen dhe lutjet e tyre.

Peabo Bryson është një nga zërat më të njohur të muzikës R&B në SHBA dhe në botë, i famshëm për interpretimet në kolonat zanore të filmave të Disney-t, përfshirë “Beauty and the Beast” dhe “A Whole New World”, duet me Regina Belle. Ai ka bashkëpunuar gjithashtu me artiste si Celine Dion dhe ka fituar dy çmime Grammy gjatë karrierës së tij të gjatë muzikore.

Bryson, i lindur në Greenville të Karolinës së Jugut, nisi karrierën në vitet ’70 dhe u konsolidua si një prej emrave më të respektuar të industrisë muzikore ndërkombëtare, me një sërë hitesh në toplistat botërore.