Lajmet

1 janari po afron, çfarë duhet të dinë qytetarët që të udhëtojnë pa viza në Schengen

Published

3 years ago

on

Qytetarët e Kosovës nga 1 janari do të kenë të drejtën të udhëtojnë pa viza në zonën Schengen.

Për këtë, faqja e Integrimit Evropian, që është në kuadër të Qeverisë së Kosovës, ka përpiluar një listë të atyre së cfarë duhet të dinë qytetarët në mënyrë që të udhëtojnë pa viza.

Aty thuhet se udhëtimi pa viza u mundëson qytetarëve të Kosovës që të udhëtojnë pa vizë për qëndrime të shkurtra si turist por edhe të vizitojnë miqtë apo familjarët, të marrin pjesë në ngjarje kulturore apo sportive, takime biznesi, trajtim mjekësor, për programe arsimore afatshkurtra si seminare, konferenca, punëtori, shkolla verore dhe çdo aktivitet i ngjashëm.

Sa i përket kohës së qëndrimit, aty thuhet se qëndrimi është i mundur për 90 ditë në çdo periudhë 180 ditore brenda zonës Shengen.

Ndërsa, për dokumentet e nevojshme, bëhet e ditur se qytetarët duhen të kenë pasaporta biometrike, informata të sakta mbi vendin dhe qëllimit e udhëtimit.

Për ata që udhëtojnë me veturë nevojitet edhe dokumentet, përfshirë kartonin e gjelbër.

Pyetje të shpeshta

Pyetjet e bëra më shpesh (FAQ) mbi udhëtimin pa viza Shengen për qytetarët me pasaportë të Kosovës.

Kur do të mund të udhëtoj pa vizë?

Qytetarët e Kosovës do të mund të udhëtojnë pa vizë në zonën Shengen që nga 1 janari 2024.

Për cilat qëllime mund të udhëtoj pa vizë në zonën Shengen?

Udhëtimi pa viza u mundëson qytetarëve të Kosovës që të udhëtojnë pa vizë për qëndrime të shkurtra si turist por edhe të vizitojnë miqtë apo familjarët, të marrin pjesë në ngjarje kulturore apo sportive, takime biznesi, trajtim mjekësor, për programe arsimore afatshkurtra si seminare, konferenca, punëtori, shkolla verore dhe çdo aktivitet i ngjashëm.

Në cilat vende mund të udhëtoj pa vizë?

Shtetet Anëtare të BE-së të mbuluara nga heqja e vizave janë:

Shtetet Anëtare të BE-së që janë pjesë e zonës Shengen: Për më shumë rreth zonës Shengen dhe listën e shteteve vizitoni: https://home-affairs.ec.europa.eu/policies/schengen-borders-and-visa/schengen-area_en

b) Shtetet Anëtare të BE-së që nuk janë ende pjesë e zonës Shengen, por zbatojnë acquis të BE-së në lidhje me listat e vizave të BE-së: Bullgaria, Qiproja dhe Rumania

c) Heqja e vizave vlen edhe për shtetet e lidhura të Shengenit: Islanda, Lihtenshtajni, Norvegjia dhe Zvicra.

A mund të udhëtoj pa vizë në Irlandë?

Jo. Edhe pse është pjesë e BE-së, Irlanda nuk është pjesë e Zonës Shengen. Ata aplikojnë një regjim tjetër të vizave: për më shumë detaje, shihni faqen përkatëse të Ambasadës/Konsullatës.

A mund të udhëtoj pa vizë drejt Mbretërisë së Bashkuar?

Jo. Mbretëria e Bashkuar nuk është më pjesë e BE-së. Ata aplikojnë një regjim tjetër të vizave: për më shumë detaje, shihni faqen përkatëse të Ambasadës/Konsullatës.

Sa kohë mund të qëndroj pa vizë në zonën Shengen?

Ju mund të qëndroni 90 ditë në çdo periudhë 180 ditore brenda zonës Shengen. Nëse udhëtoni disa herë, duhet të llogaritni me kujdes ditët e qëndrimit, pasi periudha e përgjithshme e qëndrimit nuk duhet të kalojë totalin prej 90 ditësh brenda periudhës 180 ditore.

Gjatë zbatimit të këtij rregulli, duhet të merren parasysh aspektet e mëposhtme:

Data e hyrjes konsiderohet si dita e parë e qëndrimit në territorin Shengen;

Data e daljes konsiderohet si dita e fundit e qëndrimit në territorin Shengen;

Periudha e referencës 180-ditore nuk është fikse. Është një dritare lëvizëse, e bazuar në qasjen e shikimit në çdo ditë të qëndrimit (qoftë në momentin e hyrjes ose në ditën e një kontrolli aktual, si kontrolli i policisë në brendësi ose kontrolli kufitar pas nisjes). Mungesa, mos udhëtimi drejt zonës Shengen për një periudhë të pandërprerë prej 90 ditësh, lejon një qëndrim të ri deri në 90 ditë në një periudhë 180-ditore.

A mund të hyj në zonën Shengen më shumë se një herë gjatë asaj periudhe?

Po. Sidoqoftë, duhet të llogaritni me kujdes ditët e qëndrimit tuaj si periudhën e përgjithshme të qëndrimit, e cila nuk duhet të kalojë totalin e përgjithshëm prej 90 ditësh të qëndrimit brenda çdo periudhe 180-ditore.

Pra, periudha 90 ditë fillon që nga momenti kur ju hyni për herë të parë në zonën Shengen. Për shembull, nëse më datë 1 janar 2024 ju hyni për herë të parë në zonën Shengen , periudha e ardhshme gjashtë mujore fillon pas 180 ditësh ose më saktë me 29 qershor 2024. Pra, brenda këtyre 180 ditëve ju mund të qëndroni në zonën Shengen vetëm deri në 90 ditë. Nëse udhëtoni shpesh në zonën Shengen , duhet të numëroni ditët e mbetura nga periudha e fundit gjashtë mujore.

Cilat dokumente udhëtimi nevojiten për të shfrytëzuar udhëtimin pa viza në zonën Shengen?

√ Pasaportë biometrike (e vlefshme për të paktën tre muaj pas datës së largimit nga zona Shengen);

√ Dëshmi mbi qëllimin e udhëtimit në zonën Shengen;

√ Dëshmi mbi qëndrimin si rezervimi i hotelit apo detajet e vendit ku do të qëndroni;

√ Detajet e udhëtimit, duke përfshirë rezervimin e biletës kthyese;

√ Nëse udhëtohet me veturë, dokumentet e nevojshme të veturës;

√ Dëshmi se keni mjete të mjaftueshme financiare.

A nënkupton liberalizimi punësim në shtetet e zonës Shengen?

Jo! Liberalizimi i vizave në asnjë rast nuk nënkupton mundësi punësimi në shtetet e zonës Shengen.

A kam nevojë për vizë për të punuar në zonën Shengen për më pak se 90 ditë?

Po, shtetet anëtare kërkojnë vizë dhe leje pune nëse keni ndërmend të punoni atje, edhe nëse është për më pak se 90 ditë. Ju lutem kontaktoni Ambasadën/Konsullatën e Shtetit Anëtar ku synoni të punoni për të pyetur nëse nevojitet një lloj i veçantë vize dhe leje pune, zakonisht lloji i vizës D. Liberalizimi i vizave nuk ju mundëson dhe jep leje punë, por vetëm vizita të shkurta turistike dhe familjarëve.

A do të më duhet të aplikoj për vizë studentore nëse planifikoj të udhëtoj në zonën Shengen për studime?

Po, ju duhet të aplikoni për një vizë studentore në rast se keni ndërmend të kryeni studime që i kalojnë 90 ditë qëndrimi në zonën Shengen brenda një periudhe prej 180 ditësh. Për studime duhet të aplikoni për një vizë studimore derisa dokumentet e nevojshme dhe rregullat ndryshojnë nga vendi në vend. Prandaj rekomandohet që të konsultoheni me ambasadën ose konsullatën e vendit në të cilin planifikoni të filloni studimet.

A mund të udhëtoj për arsye shëndetësore?

Kur arsyetohet juve ju mundësohet udhëtimi në zonën Shengen për trajtime shëndetësore. Ky udhëtim duhet të jetë brenda periudhës maksimale prej 90 ditëve. Varësisht nga shteti që vizitohet juve mund t’ju kërkohen dokumente të ndryshme si pjesë e verifikimit të kushteve për qëndrimin tuaj. Për shembull, juve mund t’ju kërkohet dëshmi nga institucioni shëndetësor pritës si dëshmi për trajtimin shëndetësor të planifikuar apo ftesa për analizat mjekësore. Gjithnjë të keni kujdes që trajtimi shëndetësor duhet të përfundoj brenda periudhës 90 ditore. Nëse trajtimi do të zgjas më shumë se 90 ditë, atëherë duhet të siguroni vizën përkatëse përmes ambasadës përgjegjëse.

A ju jep heqja e vizave të drejtën automatike për të hyrë në territorin e shteteve të Shengenit?

Heqja e vizave nuk jep një të drejtë të pakushtëzuar hyrjeje dhe qëndrimi. Shtetet Anëtare kanë të drejtën për të refuzuar hyrjen dhe qëndrimin në territoret e tyre nëse një ose më shumë nga kushtet e hyrjes nuk plotësohen.

Për qëndrimet jo më shumë se 90 ditë në çdo periudhë 180 ditore, kushtet e hyrjes janë si më poshtë:

Nuk ka pasaportë me vlefshmëri të mjaftueshme (minimumi 3 muaj pas periudhës së planifikuar të kthimit nga zona Shengen);

Paraqet dokumente të falsifikuara; justifikimin e qëllimit dhe kushteve të qëndrimit të synuar, duke pasur mjete të mjaftueshme financiare, si për kohëzgjatjen e qëndrimit të synuar ashtu edhe për kthimin;

Në të kaluarën, Ka tejkaluar 90 ditë qëndrimi në periudhën 180 ditore;

(c) të mos jetë një person për të cilin është lëshuar një sinjalizim në Sistemin e Informacionit Shengen (SIS) për qëllime të refuzimit të hyrjes;

(d) të mos konsiderohet si një kërcënim për politikën publike, sigurinë e brendshme, shëndetin publik ose marrëdhëniet ndërkombëtare të ndonjë prej Shteteve Anëtare, veçanërisht kur nuk ka pasur asnjë alarm të lëshuar në bazat kombëtare të të dhënave të Shteteve Anëtare për qëllime të refuzimit të hyrjes në të bazat.

(e) Kur ka të dhëna se personi është përfshirë në aktivitete kriminale apo dëshmi të qarta se ka për qëllim një gjë të tillë.

A e kam të garantuar hyrjen në Shengen pa vizë?

Hyrja pa vizë në Bashkimin Evropian nuk është e garantuar. Hyrja mund te refuzohet nga policia kufitare në rast se nuk keni pasaportë valide me afat të mjaftueshëm, nuk keni dokumente që dëshmojnë qëllimin e udhëtimit dhe dëshmi se keni mjete të mjaftueshme financiare për qëndrimin e planifikuar në zonën Shengen, apo në të kaluarën keni tejkaluar 90 ditë qëndrimi në periudhën 180 ditore.

Çfarë dokumentesh duhet t’i tregoj zyrtarit/oficerit kontrollues në kufi?

Ju duhet të tregoni pasaportën tuaj që është lëshuar brenda 10 viteve të mëparshme dhe është e vlefshme për të paktën 3 muaj të tjerë pas datës së synuar të nisjes nga territori i Shtetit Anëtar. Përveç kësaj, gjatë kontrollit kufitar mund t’iu kërkohet të tregoni gjithashtu dokumente që vërtetojnë qëllimin dhe kushtet e qëndrimit tuaj (letër ftese nga miku juaj, ftesë për një konferencë, agjendë e një seminari, etj.). Udhëtarët duhet të kenë informacion për qëllimin e tyre të vizitës, vendin e akomodimit dhe rezervimin, biletat e kthimit, dëshmi të mjeteve të mjaftueshme financiare për të mbuluar qëndrimin (para të gatshme dhe/ose kartë krediti). Rekomandohet të keni një sigurim udhëtimi. Nëse keni ndërmend të qëndroni me të afërmit ose miqtë tuaj të familjes, duhet të keni adresën e saktë dhe numrat e tyre të telefonit.

Sa para duhet të kem me vete për të udhëtuar në zonën Shengen?

Sipas nenit 5 (3) të Kodit Kufitar të Shengenit: “Mjetet e jetesës do të vlerësohen në përputhje me kohëzgjatjen dhe qëllimin e qëndrimit dhe duke iu referuar çmimeve mesatare në Shtetet Anëtare të interesuara për akomodimin, shumëzuar me numrin e ditëve të qëndrimit”.

Për çdo informatë më të fundit, çdo Shtet Anëtar përcakton shumën; ju lutemi konsultoni faqen e internetit të Shteteve Anëtare përkatëse nëpërmjet të cilave ju synoni të hyni në Shengen.

Verifikimi që shtetasi i vendit të tretë në fjalë ka mjete të mjaftueshme jetese për kohëzgjatjen dhe qëllimin e qëndrimit të synuar, për kthimin e tij/saj në vendin e origjinës ose tranzitin në një vend të tretë ose që ai/ajo mund t’i marrë këto mjete në mënyrë të ligjshme. Për të vlerësuar mjetet e jetesës, duhet të merren parasysh shumat e referencës të përcaktuara nga çdo shtet i zonës Shengen.

Verifikimi i mjeteve të mjaftueshme të jetesës mund të bazohet në para të gatshme, çek udhëtarësh dhe karta krediti në zotërimin e shtetasit të vendit të tretë. Deklaratat e sponsorizimeve, kur deklarata të tilla parashikohen nga legjislacioni kombëtar dhe letrat e garancisë/ftesave nga pritësit, siç përcaktohet nga legjislacioni kombëtar, në rast se shtetasi i vendit të tretë qëndron me një mikpritës, mund të përbëjë gjithashtu dëshmi të mjeteve të mjaftueshme të jetesës. Vlefshmëria e një karte krediti mund të verifikohet duke kontaktuar kompaninë lëshuese ose duke përdorur lehtësira të tjera të disponueshme në pikën e kalimit kufitar (p.sh. zyrat e këmbimit). Ftesa nga nikoqirët mund të verifikohet duke kontaktuar drejtpërdrejtë mikëpritësin ose duke verifikuar mirëbesimin e pritësit nëpërmjet pikave kombëtare të kontaktit të Shteteve Anëtare në të cilat banon pritësi.

A është gjithmonë i nevojshëm sigurimi mjekësor i udhëtimit për të udhëtuar në zonën Shengen?

Sigurimi mjekësor i udhëtimit nuk është i detyrueshëm. Megjithatë, rekomandohet të merrni një në rast të udhëtimit në vendet e Shengenit.

Nëse planifikoj të vizitoj një mik ose të afërm që jeton në zonën Shengen, do të më duhet të siguroj ndonjë informacion specifik për këtë person në kufi?

Mund t’iu kërkohet të jepni informacion për këtë person. Rekomandohet të keni të paktën adresën e banimit dhe numrin e kontaktit. Autoritetet kufitare mund ti thërasin në telefon miqt tuaj për ta verifikuar nëse ju do të qëndroni tek ata ose tju vizitojnë në adresën e dhënë për tu siguruar që është vizitë private ose familjare.

Pasi të zbatohet udhëtimi pa viza, a mund të udhëtoj nga një vend Shengen në një tjetër vend?

Nuk ka kontrolle kufitare midis vendeve në zonën Shengen. Megjithatë, kontrollet kufitare kryhen ndërmjet vendeve të Shengenit dhe Bullgarisë, Qipros dhe Rumanisë (Shtetet Anëtare të BE-së që ende nuk e zbatojnë plotësisht acquis Shengen).

Nëse qëndroj përtej 90 ditësh (pa leje qëndrimi ose vizë afatgjatë) ose punoj në Zona Shengen (pa leje pune), çfarë mund të ndodhë?

Një shtetas jo-BE që qëndron në zonën Shengen për më shumë se 90 ditë (pa leje qëndrimi ose vizë qëndrimi afatgjatë) është i pranishëm në mënyrë të paligjshme, gjë që mund të rezultojë në një ndalim të rihyrjes në zonën Shengen. Puna në zonën Shengen pa leje pune është gjithashtu e paligjshme (edhe nëse është më pak se 90 ditë) dhe gjithashtu mund të rezultojë në një ndalim të rihyrjes në zonën Shengen. Në varësi të shtetit anëtar, mund të zbatohen edhe gjoba administrative. Keqpërdorimi dhe qëndrimi i tepërt mund të çojnë në gjobë financiare dhe të rezultojnë në dëbimin dhe ndalimin e hyrjes në zonën Shengen deri në 5 vjet.

Çfarë pasoja mund të keni në rast të shkeljeve eventuale?

Në rast të shkeljeve eventuale dhe abuzimit të udhëtimit pa vizë, pasojat personale përfshijnë: shqiptimin e gjobës financiare, shënim zyrtar në pasaportën dhe dosjen tuaj ku figuron shkelja në sistemin Shengen si dhe ndalimi i hyrjes së zonën Shengen deri në 5 vite.

Kush nuk mund të udhëtoj në zonën Shengen?

Persona që figurojnë në listat e personave që përbëjnë kërcënim për rendin, shëndetin publik apo sigurinë e brendshme.

Persona ndaj të cilëve është dhënë masa ndalim hyrje qoftë edhe në një nga vendet e zonës Shengen, apo kanë qenë subjekt i një urdhër largimi, largimi me forcë (kthimi apo dëbimi), që kryesisht zbatohen për raste të qëndrimit të paligjshëm.

A mund të më refuzohet hyrja në shtetet e zonës Shengen?

Pra, policia kufitare e shtetit Shengen ka të drejtë t’i mohojë hyrjen çdo qytetari në rast se:

X Nuk ka pasaportë me vlefshmëri të mjaftueshme (minimumi 3 muaj pas periudhës së planifikuar të kthimit nga zona Shengen);

X Paraqet dokumente të falsifikuara;

X Nuk posedon dokumente që dëshmojnë qëllimin e udhëtimit;

X Nuk paraqet dëshmi se ka mjete të mjaftueshme financiare për të mbuluar shpenzimet e qëndrimit;

X Ka tejkaluar 90 ditë qëndrimi në periudhën 180 ditore;

X Paraqet rrezik për sigurinë publike, shëndetin publik apo marrëdhëniet ndërkombëtare për një apo më shumë shtete të Shengenit;

X Kur ka të dhëna se personi është përfshirë në aktivitete kriminale apo dëshmi të qarta se ka për qëllim një gjë të tillë.

Çka është ETIAS dhe kur do të jetë funksional?

Sistemi Evropian i Informacionit dhe Autorizimit të Udhëtimit shkurt njihet si ETIAS (nga gjuha angleze). Sistemi ETIAS ende nuk është funksional dhe sipas paralajmërimeve mund të operacionalizohet dikur gjatë ose pas vitit 2024. Derisa nuk është ende në funksion, qytetarët e Kosovës me pasaporta valide do ta gëzojnë të drejtën e udhëtimit pa viza duke filluar nga 1 janari, 2024. Në momentin që është plotësisht operativ dhe funksionon, sistemi ETIAS do të vlej për të gjitha shtetet që nuk kanë viza për të hyrë në zonën Shengen, pra njëjtë edhe për Kosovën.

ETIAS është një sistem i automatizuar IT i cili duhet të zbulojë rreziqet, nga pikëpamja e emigracionit dhe sigurisë, te njerëzit që mund të udhëtojnë në zonën Shengen pa vizë. Në të njëjtën kohë, ky sistem do ta bëjë më të lehtë për shumicën dërrmuese të udhëtarëve që nuk paraqesin rrezik kalimin e kufijve. Të gjithë shtetasit jashtë BE-së që hyjnë në zonën Shengen pa viza, pra edhe poseduesit e pasaportës së Kosovës, do të duhet të aplikojnë për një autorizim udhëtimi përmes sistemit ETIAS përpara nisjes. Për këtë shërbim do të paguhet online një shumë simbolike e cila për momentin ende nuk është e caktuar. Informacioni i mbledhur nga ETIAS lejon kontrollimin paraprak për rreziqet e mundshme të emigracionit të parregullt dhe të sigurisë.

Pas plotësimit të formularit të aplikimit online, sistemi kryen kontrolle ndaj sistemeve të informacionit të BE-së për kufijtë dhe sigurinë. Në shumicën dërrmuese të rasteve, leja për të udhëtuar merret brenda pak minutash. Autorizimi i udhëtimit ETIAS do të jetë i detyrueshëm për të hyrë në zonën Shengen. Rojet kufitare do t’i kontrollojnë këto autorizime, së bashku me dokumentet e udhëtimit, kur udhëtarët kalojnë kufijtë e BE-së. Ky para-kontroll i shtetasve të përjashtuar nga viza nga jashtë BE-së lehtëson kontrollet kufitare, shmang burokracinë dhe vonesat për udhëtarët që mbërrijnë në kufi, koordinon dhe harmonizon vlerësimin e rrezikut të shtetasve të vendeve të treta dhe redukton ndjeshëm refuzimet e hyrjes në pikat e kalimit kufitar.

Sa para duhet të kem me vete për të udhëtuar në zonën Shengen?

Kohëve të fundit kemi marr shumë pyetje se sa para duhet ti kemi me vehte ose të deponuara në bankë në mënyrë që të vizitojmë shtetet e zonës Shengen. Duke marr parasysh që #paviza mund të udhëtoni nga 1 janar, 2024 vetëm për vizita afatshkurta turistike ose familjare e atë më së shumti deri në 90 ditë qëndrim në vijim po i japim disa informata praktike.

Si udhëtar/e, me të arritur në pikën e parë kufitare të Shengenit, nga policia kufitare juve mund tju kërkohet nëse keni dëshmi të mjaftueshme financiare për udhëtimin tuaj. Sasia e këtyre mjeteve varet nga dy grupe faktorësh: 1) nga numri i ditëve që do të qëndroni dhe shteti të cilin e vizitoni dhe 2) nga ajo nëse do të qëndroni në akomodim me pagesë si hotel/apartment apo tek të afërmit tuaj.

Nëse deklaroni se do të qëndroni tek të afërmit tuaj duke ofruar adresën dhe kontaktin e tyre, varësisht se cilin shtet e vizitoni, shuma e mjeteve është rreth 30 – 50 EUR në ditë për person. Nëse deklaroni se do të qëndroni në një hotel apo apartment apo çfardo akomodimi tjetër me pagesë, varësisht se cilin shtet e vizitoni, shuma e mjeteve që duhet të ofroni si dëshmi financiare është rreth 50 – 100 EUR në ditë për person.

Akomodimi nga miqtë apo familjarët mund të verifikohet duke kontaktuar drejtpërdrejtë mikëpritësin me telefon ose duke verifikuar adresën e tyre përmes policisë. Derisa, verifikimi i mjeteve të mjaftueshme financiare mund të bëhet në disa forma duke ju kërkuar të tregoni para të gatshme (cash), kartelë bankare, kartë krediti, letër konfirmimi nga një konferencë apo seminar që mbulon shpenzimet tuaja për akomodim e ushqim, dëshmi për pagesën e hotelit apo çfardo konfirmimi a dëshmie tjetër për kostot tuaja gjatë udhëtimit.

Çdo shtet i Shengenit përcakton shumën; ju lutemi konsultoni faqen e internetit të shteteve anëtare të zonës Shengen të cilat planifikoni ti vizitoni. Pra, shuma ditore dallon nëse vizitoni Greqinë, Kroacinë apo nëse vizitoni Zvicrën apo Norvegjinë. Një tabelë me shumat referente mund ta shihni në këtë link: https://home-affairs.ec.europa.eu/system/files/2023-09/reference_amounts_table.pdf

Për fund, ju nuk keni nevojë të keni të deponuara sasi të caktuar të mjeteve në bankë, por ju duhet të dëshmoni që keni mjete të mjaftueshme financiare për të mbuluar qëndrimin tuaj atje duke përfshirë kostot për kthimin në Kosovë.

Unë kam një vizë me afat deri me datën 31 dhjetor, 2023. Nëse kam udhëtuar para vitit të ri, a mund të qëndroj në zonën Shengen edhe disa ditë pas vitit të ri?

Ju duhet të keni një vizë Shengen valide deri me datë 31 dhjetor, pra duke përfshirë edhe datën 31 dhjetor, 2023. Nëse tashmë keni hyrë në zonën Shengen para datës 31 dhjetor, 2023 dhe meqë me pasaportë të Kosovës nuk kërkohet vizë nga 1 janari, 2024 ju mund të vazhdoni të qëndroni në zonën Shengen. Në këtë rast rregulla e njëjtë vlen, ju mund të qëndroni vetëm 90 ditë brenda periudhës 180 ditë. Pra, ditët e kalkuluara në zonën Shengen për vizitë afatshkurtë në rastin tuaj përfshijnë edhe ato të vitit 2023, prandaj kujdes me llogaritjen e ditëve meqë për ju ato llogariten nga data e hyrjes së parë në zonën Shengen.

Për më shumë vizitoni https://home-affairs.ec.europa.eu/policies/schengen-borders-and-visa/smart-borders/european-travel-information-authorisation-system_en

Me rëndësi:

Hyrja pa vizë në Bashkimin Evropian nuk është e garantuar. Hyrja mund te refuzohet nga policia kufitare në rast se nuk keni pasaportë valide me afat të mjaftueshëm, nuk keni dokumente që dëshmojnë qëllimin e udhëtimit dhe dëshmi se keni mjete të mjaftueshme financiare për qëndrimin e planifikuar në zonën Shengen, apo në të kaluarën keni tejkaluar 90 ditë qëndrimi në periudhën 180 ditore.

Related Topics:
Continue Reading

Lajmet

UBT hap horizonte të reja në arsim me programe të avancuara studimi

Published

10 hours ago

on

June 21, 2026

By

Me vendimin e fundit të Këshillit Shtetëror të Cilësisë, UBT është akredituar me një seri programesh të reja studimi, duke e konsoliduar edhe më shumë pozitën e saj si një nga institucionet lidere të arsimit të lartë në Kosovë dhe rajon.

Përveç mbi 150 programeve dhe specializimeve ekzistuese, risitë e këtij viti sjellin drejtime moderne dhe të kërkuara në tregun global të punës, si: Fintech dhe Analitika e Biznesit, Fintech dhe Menaxhim i Inovacionit, Estetikë dhe Kozmetologji, Inxhinieri e Mjedisit dhe Infrastrukturë e Qëndrueshme, si dhe Inxhinieri Mekanike me fokus në teknologjitë më të avancuara industriale.

Në veçanti, programi i Inxhinierisë Mekanike është i konceptuar për të përgatitur studentët për profesionet e së ardhmes, duke integruar njohuri dhe aftësi në fusha si dizajni dhe prodhimi inxhinierik, automatizimi industrial, inxhinieria e automjeteve, teknologjitë hapësinore, sistemet e dronëve, robotika dhe sistemet inteligjente të prodhimit. Ky program synon të lidhë drejtpërdrejt studentët me zhvillimet më të fundit teknologjike dhe kërkesat reale të industrisë globale.

Po ashtu, programi Fintech dhe Analitika e Biznesit përfaqëson një kombinim të avancuar të financave me teknologjinë dhe analizën e të dhënave, duke i përgatitur studentët për karriera në banking digjital, kompani teknologjike, tregti elektronike, konsulencë dhe startup-e inovative.

Me këto zhvillime, UBT vazhdon të investojë në cilësi, inovacion dhe ndërkombëtarizim, duke u ofruar studentëve mundësi konkrete për zhvillim profesional dhe konkurrencë në tregun global të punës.

Continue Reading

Kujtesë

Ditari: Lajmet kryesore që shënuan datën 21 qershor 1993-1998?

Published

11 hours ago

on

June 21, 2026

By

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Foto: Më 21 qershor 1998, nëpër Novi Pazar (në foto) kanë kaluar tre autobusë me shqiptarë të zënë rob

 21 qershor 1993

Në Prishtinë policia serbe plaçkiti disa qytetarë në tregun e veturave

Dje, rreth orës 13.30, në tregun e veturave në Prishtinë, një grup policësh serbë plaçkiti një sasi të konsiderueshme malli me vlerë prej afro 3.000 markash gjermane nga disa qytetarë shqiptarë. Nga plaçkitja e policisë serbe më së keqi pësuan qytetarët, Sadri Llapashtica, Xhafer Latifi, Ibrahim Berisha, Jakup Aliu etj., të gjithë nga Prishtina.

Përveç plaçkitjes, Jakup Aliu edhe u rrah brutalisht.

 

21 qershor 1994

Represioni në Kosovë

Podujevë: – Më 18 qershor rreth orës 18:00, në rrugën e fshatit Bellopojë, një ekspeditë e policisë takoi imamin e xhamisë së këtij fshati, Beqir Llumnicën, të cilin pasi e legjitimoi e detyroi me dhunë që t’i dërgojë deri te shtëpia e Mustafë Malokut. Policia, nën pretekst të kërkimit të armëve, bastisi shtëpinë e Mustafë Malokut, tek i cili nuk u gjet asgjë. Pas bastisjes, ai u dërgua në qendrën e sigurimit në Prishtinë, ku u keqtrajtua fizikisht deri në orën 22:00, sa u mbajt në polici. Pas rrahjes, policia shkoi sërish me Mustafën në fshatin Bellopojë për të bastisur shtëpinë e tij, ndërsa një grup tjetër policësh në orët e vona të natës legjitimoi shumë kalimtarë të rastit në fshatin Bellopojë. Njoftohet se gjatë bastisjes së dytë, policia shkaktoi dëme të mëdha materiale, me ç’rast theu e demoloi shumë orendi.

Mustafë Maloku ende po mbahet në arrest.

Kamenicë: – Dje, policia mori në pyetje korrespodentin e “Bujkut” nga Kamenica, Daut Maliqin. Daut Maliqin e mori në pyetje kuislingu shqiptar Naser Shevelli, i cili iu kërcënua për publikimin e emrit të tij dhe të inspektorëve të tjerë serbë në mjetet e informimit.

Njoftohet se dje u mor në pyetje edhe Refik Kryeziu, delegat i Odës Ekonomike të Kosovës nga Kamenica. Inspektorët serbë kërkonin nga Refik Kryeziu emrat e delegatëve të Odës Ekonomike të Kosovës.

Viti: – Më 14 qershor, policia nën pretekst të kërkimit të armëve bastisi shtëpinë e Ramadan Nezirit (60) në fshatin Dëbollde të Vitisë. Njoftohet se policia në prani të anëtarëve të familjes torturoi brutalisht Ramadan Nezirin.

Dje, rreth orës 3:00 të mëngjesit, policia bastisi shtëpinë e Ruzhdi Shabanit (70) në Sadovinë i Jerlive të Vitisë. Policia në fillim kërkoi Bislim Shabanin, i cili arriti të ikë nga shtëpia, ndërsa më vonë policia mori me vete bashkëshorten e tij Ajne Shabanin, e cila në polici u mbajt deri rreth orës 13:00.

Ferizaj: – Më 14 qershor, policia ishte në shtëpinë e Murat Shabanit në Manastirc, tek i cili konfiskuan një pushkë gjuetie me leje.

Më 15 qershor, policia kërkoi dy herë në shtëpinë e tij, Florim Veliun në Ferizaj. Meqë Florim Veliu nuk gjendej në shtëpi, policia ia la thirrjen që të paraqitet në stacionin e policisë në Ferizaj.

Më 17 qershor rreth orës 8:00, policia mori në shtëpinë e tij, Arif Hashanin nga Ferizaj, nga i cili para pak ditësh morën një automatik. Arif Hashani u dërgua në Burgun e Qarkut në Prishtinë.

Dje, policia mori në pyetje Nijazi Sahitin nga Komogllava e Ferizajt. Inspektorët serbë e morën në pyetje nën pretekst se ai merret me kontrabandë armësh, si dhe u interesuan të dinë rreth kushëririt të tij, Nysret Sahitit, i cili gjendet në Shqipëri nga viti 1982.

Vushtrri: – Dje rreth orës 9:00, policia e postkomandës së Prilluzhës, nën pretekst të kërkimit të armëve, bastisi shtëpinë e Isuf Zabelit në Lumëmadh të Vushtrrisë. Policët nga Isuf Zabeli kërkuan që të dorëzojë një pushkjë dhe një revole. Më pas policët e morën me vete djalin e Isufit, Ilaz Zabelin, i cili u rrah brutalisht në postkomandën e Prilluzhës. Ilaz Zabeli u lirua me

kusht që të lajmërohet sërish në dorën 13:00.

Istog: – Më 18 qershor organet e sigurimit serb bashkë me policinë financiare bastisën shtëpinë e Tush Lekë Gegajt, kryetar i SHBH “Nëna Terezë” për Istog dhe depon e Shoqatës, e cila është e legalizuar, punëtorët gjegjësisht oplicët u sollën në mënyrë të vrazhdë kundër familjes, duke i sharë dhe fyer. Më pas policët bastisën shtëpinë e vëllait të Tushit, Tunë Gegajt. Ky objekt dhe shtëpia e tiju bastisën sivjet për herë të gjashtë.

Më 21 qershor në organet e sigurimit serb në Istog qëndroi i arrestuar kryetari i Shoqatës bëmirëse “Nëna Terezë”, Tush Lekë Gegaj nga Gjyrakoci për t’i kontrolluar dokumentacionin e materialit që gjendet në depo e i legalizuar nga vet organet komunale, me pretekst të pengimit të aktivitetit.

Sot u lirua në orën 12, pasi kinse punëtorët financiarë dhe të organeve të punëve të brendshme konstatuan se çdo gjë ishte në rregul.

 

21 qershor 1995

Procesi në Prishtinë, S. Çitaku tha se u mor në pyetje mbi 60 herë

Në seancën e djeshme të procesit të montuar politik kundër 72 ish-policëve të Kosovës, që po zhvillohet në Prishtinë, filloi marrja në pyetje e të akuzuarve, nga i ashtuquajturi “grupi i Mitrovicës”. Fjalën e tyre mbrojtëse dje e paraqitën Selim Çitaku, Zejnullah Shala, Enver Maxhuni, Afrim Olloni dhe Jonuz Loshaj, të cilët, në këtë proces të montuar gjyqësor, akuzohen se gjoja , në kuadër të “ministrisë së punëve të brendshme të Republikës së Kosovës”, kanë vepruar në territorin e Mitrovicës.

Edhe këta të akuzuar, sikur edhe ta akuzuarit tjerë që paraqitën mbrojtjen e tyre deri tash, i mohuan në tërësi veprimet inkriminuese që u vihen për barrë sipas aktakuzës dhe shpjeguan se janë marrë vetëm me aktivitet sindikal dhe me kurrfarë aktiviteti tjetër.

Gjithashtu ata mohuan deklaratat që i kanë dhënë në hetuesi dhe para gjyqtares hetuese dhe shpjeguan se të gjitha pohimet e tyre janë rezultat i dhunës së shfrenuar që është përdorur kundër tyre.

I akuzuari Selim Çitaku, rrëfeu se është marrë në pyetje më shumë se 60 herë, madje edhe më 25 prill, d.m.th., edhe pas ngritjes së aktakuzës e cila mban datën e 7 prillit. Ai rrëfeu se është mbajtur rreth 100 ditë në vetmi, për dhunën e madhe fizike që është ushtruar kundër tij dhe për kërcënimet e vazhdueshme. Ndër të tjera, atij i janë kërcënuar se do t’ia rrjepin djalin para syve të tij nëse nuk i pranon veprimet që i vihen barrë. Rezultat i kësaj dhune, tha ai në vazhdim, është pranimi që unë bëra në hetuesi.

Në vazhdim ai e mohoi tërësisht deklaratën e tij të mëhershme dhe hodhi poshtë në tërësi aktakuzën.

Edhe të akuzuarit e tjerë rrëfyen për format e dhunës dhe kërcënimeve që janë përdorur kundër tyre. Zejnullah Shalën, inspektorët e kanë kërcënuar se nuk guxon të angazhojë avokat dhe nuk guxon të mbrohet në heshtje. Gjithashtu atë e kërcënuan se nuk guxon as para gjyqtraes hetuese e as në procesin gjyqësor të ndryshojë deklaratën e dhënë në hetuesi. Gjatë marrjes në pyetje para gjyqtares hetuese, e cila në një moment u shpreh se është e lodhur, punën e saj vazhdoi ta kryejë prokurori, fakt ky që paraqet shkelje të rëndë të dispozitave të procedurës penale.

Avokati, dr. Bardhyl Çaushi, në një moment reagoi me këto fjalë: Nga e gjithë kjo që u tha në këtë gjykatore të improvizuar, del se kemi të bëjmë me një proces të pazakonshëm dhe të inskenuar. Kërkoj nga gjykatësi Dragolub Zdravkoviq të veprojë si profesionist, të mos bjerë në grackat e politikës së ditës, të gjykojë drejtë e të ndaj drejtësinë sipas provave e fakteve juridike. Sa i përket “rastit penal”, vazhdoi ky avokat, nuk ka prova se të akuzuarit i paskan kryer veprimet inkriminuese sipas neneve 136 e 116 të ligjit penal serb.

Edhe dje u bë fjalë për rastin e të akuzuarit Bajram Jakaj, i cili, pasi deshi të bëjë vetëvrasje në burgun e Prishtinës, u dërgua në spitalin e burgut “CZ” në Beograd. Kryetari i kolegjit informoi se ai ende gjindet në Beograd dhe gjendja e tij shëndetësore po përmirësohet!

Pas mbarimit të seancës së djeshme, nga ora 15:00 deri në orën 17:00, në gjykatoren e improvizuar, anëtarët e familjeve të ta akuzuarve, biseduan me të afërmit e tyre. Bisedat kaluan në stilin e pyetjeve të zakonshme për shëndetin dhe me porosinë “mos u mërzit…”.

Në seancën e sotme, mrojtjen e tyre do ta paraqesin Hamit Peci, Abdullah Doroci, Shefqet Budakova, Murat Sahiti, Afrim Karaxha, etj.

 

21 qershor 1997

“Amnesti International”: Shqiptarët e Kosovës edhe më tej torturohen

Tortura dhe keqtrajtimi nga policia qenë shumë të përhapura, shumica e viktimave qenë shqiptarët etnikë në krahinën e Kosovës. Të paktën dy vetë vdiqën si rezultat i torturave nga plicia dhe vdekja e dy të tjerëve duket se ka lidhje me rrahjet e policisë. Rreth 60 të burgosurve të ndërgjegjës, shqiptarë etnikë, mbesin edhe më tutje në burg: disa mbase të burgosur të ndërgjegjës. Të paktën pesë njerëz janë dënuar me vdekje. Nuk ka njoftime për ekzekutime.

Kështu është përmbledhur raporti i fundit i organizatës ndërkombëtare “Amnesti International” që merret me mbrojtjen e të drejtave të burgosurve politikë. Në raportin për “RFJ”-në, sa i përket Kosovës, Amnesti Interneshënell thekson se liderët politikë të shqiptarëve etnikë vazhdojnë të apelojnë për pavarësinë me mjete paqësore. Ndërkaq, kur flitet për sjelljen e pushtetit, në raport thuhet se reagimet qenë në formë të arrestimeve, keqtrajtimeve, rrahjeve. Në raport është përmendur rasti i arrestimit të Osman Ramës, Besim Ramës dhe Avni Nurës, i pari i liruar pas gjashtë ditësh arrestimi e i arrestuar prapë pas katër ditësh dhe torturuar për gjashtë ditë rresht. Besim Rama dhe Avni Nura qenë mbajtur në arrest të fshehtë pa u dhënë komunikata për më shumë se dy javë, para se të silleshin para gjyqtarit hetues, duke shkelur ligjin shtetëror, i cili lejon maksimumin e arrestimit deri në tri ditë.

Në këtë raport më tutje thuhet se gjatë tërë vitit ka pasur pothuajse përditë raportime për incidentet, të cilat nuk lidhen me sulmet e armatosura, e në të cilat policia ka torturuar, ka rrahur dhe ka keqtrajtuar shqiptarë etnikë. Inicidentet ndodhën gjatë bastisjesve për armë nëpër shtëpitë, e viktima qenë edhe të moshuarit, femrat dhe fëmijët. Arsimtarët të cilët ligjërojnë nëpër shkolla private qenë në shënjestër. Të paktën në dy raste të arrestimeve dukej se tortura kishte shkaktuar në mënyrë diretke, apo i kishte kontribuar vdekjes së viktimave. Arsimtari Feriz Blakçori, kishte vdekur më 10 dhjetor në spital e fletëlëshimi ia atribuonte vdekjen dëmtimeve në kokë dhe në trup. Arsimtarët janë dënuar gjithashtu edhe për shkak të organizimit të ligjëratave jashtë sistemit shkollor zyrtar dhe për shkak të zhvillimit të ndeshjeve sportive pa leje. Kështu, Pal Krasniqi u burgos për shkak të dënimit me burg nga gjyqi me arsyetim se ka mbajtur mbledhje të degës së sindikatës së arsimit.

Amnesti Interneshënell thuhet në raport për vitin 1996, apeloi te pushteti që të bëhen hetime të paanshme dhe të pavarura, në të gjitha rastet e deklarimeve për “zhdukje”, torturë, keqtrajim dhe ka kërkuar nga kryerësit e këtyre shkeljeve që të vihen para gjyqit. Ai kërkoi lirimin e menjëhershëm dhe të pakushtëzuar të të burgosurve të ndërgjegjës dhe për të burgosurit e tjerë politikë të kenë gjykime korrekte, thuhet mes tjerash në këtë raport të AI.

 

21 qershor 1998

Dje në fshatin Smolicë të Gjakovës u vra Valon Musa Kurti

Dje nga granatimet e ushtrisë serbe në fshatin Smolicë të Gjakovës u vra Valon Musa Kurti, i cili edhe u varros po në këtë fshat.

Po ashtu bëhet e ditur se sot rreth orës 12,00 një kamion i policisë i cili vinte nga fshatrat e Rekës së Keqe ishte i mbushur përplot me teknikë dhe aparate të tjera shtëpiake, që supozohet se janë plaçkitur nga shtëpitë e boshatisura të këtyre fshatrave.

Rreth orës 13,00 një ekspeditë policore rrethuan shtëpinë e Hysen Haxhisë, aktivist i Forumit Rinor të LDK-së në Gjakovë. Preteksti i bastisjes ende nuk dihet, por bëhet e ditur se më këtë rast është maltretuar fizikisht nëna e tij 65 vjeçare.

Mbrëmë rreth orës 21,00 kanë filluar granatimet nga Reka e Keqe, prej Sukës dhe nga ana e Gllogjanit. Po kështu sot aty-këtu dëgjohen të shtëna, njofton KI i Degës së LDK në Gjakovë.

 

Kanë mbetur pa u varrosur edhe së paku 40 të vrarë

Nga numri i përgjithshëm i pesonave të vdekur që janë identifikuar, kanë mbetur të pavarrosur 40 persona. Ndër të vrarët janë 15 femra, 27 pleq të moshës mbi 65 vjeç dhe 8 janë fëmijë të moshës nën 15 vjeç.

Në fshatrat e regjionit të Vokshit, Carrabregut të Epërm dhe Deçanit është i pamundshëm depërtimi, prandaj dyshohet se mund të ketë varreza masive e të vrarë të tjerë të pavarrosur, njofton Komisioni për Informim i Degës së LDK-së në Deçan.

 

Tre autobusë me shqiptarë të zënë rob kanë shkuar në drejtim të Rashkës

Sot rreth orës 11:00 nëpër Novi Pazar kanë kaluar tre autobusë me shqiptarë të zënë rob, të përcjellë nga automjetet e policisë, të cilët kanë ardhur ngre drejtimi i Ribariqit dhe kanë shkuar në drejtim të Rashkës.

Shërbimi për Informim i Këshillit Kombëtar të Boshnjakëve të Sanxhakut në Novi pazar njofton se robërit shqiptarë kishin lëndime të dukshme nëpër fytyrë e kokë dhe se kur po kalonin nëpër qytet ngritnin duart e lidhur me pranga që të bënin me dije se ishin robër.

Kolona e autobusëve dhe automjeteve të policisë është ndalur për pak kohë në hyrje të Novi Pazarit, afër një pompe të benzinës, për shkak të një defekti në njërin prej autobusëve. Gjatë kësaj kohe policët e armatosur me armë automatike kanë penguar qytetarët që t’i qasen autobusit.

Kjo ka shkaktuar revoltë ndër banorët e Novi Pazarit, si dhe shqetësim për zhvillimet e mëtejshme të situatës, thuhet në njoftimin e këtij shërbimi.

Continue Reading

Vendi

United Hospital, standard i ri i kujdesit shëndetësor në Kosovë: Emergjenca 24 orë kur çdo sekondë vendos për jetën

Published

13 hours ago

on

June 21, 2026

By

Një emergjencë funksionale 24 orë në ditë është tregues i kapacitetit real të një institucioni shëndetësor, i gatishmërisë së tij për të reaguar në çdo kohë dhe i përkushtimit për ta vendosur pacientin në qendër të kujdesit mjekësor. Në standardet më të avancuara evropiane, fuqia e një spitali matet pikërisht nga aftësia e emergjencës për të ofruar reagim të menjëhershëm, diagnostikim të saktë dhe trajtim profesional, pa humbur asnjë minutë të çmuar.

Në një kohë kur nevoja për qasje të shpejtë dhe profesionale në shërbimet shëndetësore po bëhet gjithnjë e më e madhe, United Hospital po vendos standarde të reja të kujdesit mjekësor në Kosovë, duke funksionalizuar shërbimin emergjent 24 orë në ditë, shtatë ditë në javë. Ky është një hap i rëndësishëm që e afron institucionin me praktikat më të avancuara të spitaleve evropiane, duke ofruar siguri dhe mbështetje për pacientët në çdo orë të ditës dhe natës.

Në arkitekturën e një spitali modern, Emergjenca nuk është thjesht një repart mjekësor; ajo është porta e parë e shpresës, vendi ku koha matet me sekonda dhe ku profesionalizmi, teknologjia dhe vendimmarrja e shpejtë bëhen vendimtare për jetën e pacientit. Pikërisht aty fillon beteja për shëndetin, aty ku qytetari kërkon ndihmën e parë profesionale në momentet më të vështira dhe më kritike të jetës së tij.

Një emergjencë funksionale 24 orë në ditë është tregues i kapacitetit real të një institucioni shëndetësor, i gatishmërisë së tij për të reaguar në çdo kohë dhe i përkushtimit për ta vendosur pacientin në qendër të kujdesit mjekësor. Në standardet më të avancuara evropiane, fuqia e një spitali matet pikërisht nga aftësia e emergjencës për të ofruar reagim të menjëhershëm, diagnostikim të saktë dhe trajtim profesional, pa humbur asnjë minutë të çmuar.

Nën udhëheqjen e re të Edmond Hajrizi, United Hospital po kalon një fazë të rëndësishme transformimi dhe modernizimi, duke investuar në teknologjitë më bashkëkohore diagnostikuese dhe terapeutike që sot aplikohen në qendrat më të avancuara mjekësore evropiane.

Hajrizi vlerëson se qytetarët e Kosovës meritojnë shërbime shëndetësore cilësore, profesionale dhe të përballueshme ekonomikisht, pa pasur nevojë të kërkojnë trajtim jashtë vendit.

Kosova dhe populli i saj kanë nevojë për një shëndetësi të avancuar, të mbështetur në dije, profesionalizëm dhe teknologji moderne. Ne po punojmë çdo ditë që këto standarde t’i sjellim në praktikë në United Hospital, duke ofruar shërbime të nivelit të lartë me çmime të arsyeshme për qytetarët, përfshirë edhe ekzaminimet e rezonancës magnetike dhe diagnostikimet e avancuara që deri dje konsideroheshin të paarritshme për shumë familje”, ka theksuar Hajrizi. Sipas tij, misioni i spitalit është që cilësia, inovacioni dhe kujdesi ndaj pacientit të jenë të qasshme për secilin qytetar, duke e vendosur shëndetin publik në qendër të çdo investimi dhe vendimmarrjeje institucionale.

Me moton se shëndeti nuk mund të presë deri në mëngjes, United Hospital ka ndërtuar një sistem të organizuar të kujdesit emergjent, ku ekipet mjekësore janë në gatishmëri të vazhdueshme për të reaguar në situata kritike dhe për të ofruar trajtim profesional në kohën kur pacientët kanë më së shumti nevojë.

I pajisur me infrastrukturë moderne, teknologji bashkëkohore diagnostikuese, ambulancë të specializuar dhe staf të kualifikuar, spitali synon të garantojë shërbime cilësore sipas standardeve më të larta mjekësore. Funksionalizimi i emergjencës 24-orëshe konsiderohet një nga investimet më domethënëse në sektorin privat shëndetësor, duke krijuar një model të ri të kujdesit të pandërprerë për qytetarët.

Në United Hospital, ndërsa qyteti pushon, ekipet mjekësore mbeten në detyrë. Sepse në mjekësi, çdo minutë ka peshë, çdo sekondë mund të bëjë dallimin dhe çdo jetë meriton kujdesin më të mirë të mundshëm./rajonipress/

📞 038 60 70 70 / 046 60 70 70
📍 M2 Prishtinë–Ferizaj, Km 7, Prishtinë, Kosovë

United Hospital – aty ku profesionalizmi, teknologjia dhe përkushtimi ndaj jetës janë në shërbim 24 orë për ju.

Continue Reading

Lajmet

Mërgata i bashkohet protestave në Shqipëri, vazhdojnë për të 21-ën ditë

Published

22 hours ago

on

June 20, 2026

By

Protestat që po zhvillohen prej 21 ditësh në Shqipëri kanë tërhequr edhe pjesëmarrjen e mërgatës shqiptare. Sipas raportimeve të mediave në Shqipëri, përfshirë Euronews Albania, protestës së së shtunës i janë bashkuar qytetarë të ardhur nga Anglia, Franca, Gjermania dhe Austria.

“Rama në burg, Berisha në burg” ka qenë thirrja kryesore e protestuesve, ndërsa organizatorët kanë paralajmëruar se tubimet do të vazhdojnë edhe pas mesnate.

Protestat në Tiranë nisën si reagim ndaj projekteve të zhvillimit turistik në zonat e mbrojtura të Sazanit dhe Zvërnecit, por me kalimin e ditëve ato janë zgjeruar në kërkesa për më shumë transparencë, llogaridhënie institucionale dhe kundërshtim ndaj politikave të qeverisë së kryeministrit Edi Rama.

Projekti turistik në Zvërnec është lidhur publikisht me Jared Kushner, dhëndrin e presidentit amerikan Donald Trump, duke u bërë një nga çështjet më të debatuara të protestave.

Ndërkohë, kryeministri Rama deklaroi të shtunën se kundërshtimet ndaj projektit në Zvërnec po ndikohen nga aktorë ndërkombëtarë dhe “mercenarë digjitalë”. Ai përmendi edhe pjesëmarrës nga Kosova dhe Maqedonia e Veriut, duke thënë se reagimet lidhen më shumë me emrat e Jared Kushnerit dhe Donald Trumpit sesa me shqetësimet për mbrojtjen e mjedisit. /E.A/

Continue Reading

Të kërkuara