Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

 Foto: Tetova

9 korrik 1993

Në Prishtinë policia serbe pengoi mbajtjen e provimeve pranuese në Fakultetin Filologjik

Sot paradite, policia serbe ndaloi mbajtjen e provimeve pranuese në Fakultetin Filologjik të Prishtinës. Policia ishte kërcënuar se nuk do të lejonte mbajtjen e provimeve në lokalet e shkollës fillore “Nazim Gafurri” në Prishtinë.

Mbi 650 kandidatë që duhej të hynin në provim u njoftuan nga përgjegjësit e Fakultetit Filologjik se provimet shtyhen për muajin shtator.

Policia serbe arrestoi të dy prodekanët e Fakultetit Folologjik, dr. Murat Blakun dhe mr.Sedat Kuçin. Ata policia i mori në pyetje rreth mbajtjes së provimeve pranuese dhe i liroi pas dy orësh.

Policia arrestoi edhe Ibrahim Rukovcin, shërbëtor i shkollës fillore “Nazim Gafurri”.

Gjithashtu sot paradite rreth orës 10, në një punkt të Fakultetit të Mjekësisë në lagjen “Kodra e Trimave” në Prishtinë, policia serbe pengoi mbajtjen e ushtrimeve të studentëve të këtij fakulteti. Policia të gjithë studentët dhe profesorët i largoi me dhunë nga ky punkt.

9 korrik 1994

 Në Jetimoren e Mitrovicës u plaçkitën ndihmat e UNICEF-it

Udhëheqësit e dhunshëm serbë të Jetimores në Mitrovicë, po plaçkisin ndihmat që vijnë për fëmijët e kësaj jetimoreje, shkruan gazeta “Bujku” dhe shton se këto ditë në këtë jetimore u plaçkitën mëse 230 pako me shenjën e Kryqit të Kuq dhe të Gjysmëhënës. Këto ndihma, që u sollën nga UNICEF-i, u vodhën dhe u shitën. Bëhet me dije se në këtë jetimore u shitën edhe 500 palë pelena, 2 ton qumësht dhe 2 ton detergjente, shkruan “Bujku”.

Nga jetimorja në Mitrovicë, siç dihet, fëmijët shqiptarë u dëbuan me kërcënim se ata do të dërgohen nëpër jetimore të Serbisë. Pjesa më e madhe e këtyre fëmijëve, u morën në përkujdesje nga familjet shqiptare në Kosovë.

9 korrik 1997

Policia maqedonase hoqi flamurin shqiptar në Tetovë dhe në Gostivar

Sot në mëngjes njësitë e policisë së Maqedonisë hoqën flamurin shqiptar para kuvendit komunal në Tetovë dhe në Gostivar. Këtë lajm e dha Ministria e Punëve të Brendshme të Maqedonisë, duke e cilësuar flamurin shqiptar si “flamur të vendit të huaj”. Në njoftim thuhet se këtë akt policia e mori duke u bazuar në vendimin e Gjykatës Kushtetuese të Maqedonisë.

Korrespondentët e Televizionit të Maqedonisë (TVM) nga Gostivari dhe Tetova njoftojnë se në Gostivar sot në orën 3,10 minuta të mëngjesit njësitë speciale të policisë maqedonase hoqën nga shtyllat flamurin shqiptar dhe turk të vendosur para Kuvendit të Komunës së Gostivarit. Njoftohet se në orën pesë të mëngjesit u morën në të ashtuquajtura biseda informative kryetari i Kuvendit të Komunës së Gostivarit, Rufi Osmani dhe kryetari i Këshillit të kësaj komune.

Të revoltuar për këtë akt të shëmtuar, rreth orës 7 të mëngjesit u tubuan për të protestuar shumë qytetarë shqiptarë para Kuvendit, mirëpo kundër tyre intervenoi policia. Reporteri i TVM-së nga vendi i ngjarjes nuk njofton nëse pati të lënduar në mesin e qytetarëve, megjithatë ai konfirmoi se në përleshjet midis policisë dhe qytetarëve janë lënduar tre policë.

Poashtu reporteri i TVM-së nga Tetova njofton se sot në orët e hershme të mëngjesit njësitë speciale të policisë kanë hequr me dhunë nga shtyllat flamurin shqiptar, me pretekst se ai qenka flamur i një shteti të huaj, përkatësisht i Republikës së Shqipërisë. Flamuri kombëtar shqiptar ishte vendosur para këtij kuvendi para dy muajve.

Njëjti burim bën të ditur se të gjitha hyrje-daljet në Tetovë kontrollohen rreptësisht nga policia maqedonase. Tash për tash Kuvendit të Komunës nuk mund t’i afrohet asnjë qytetar, sepse ai edhe më tej kontrollohet nga policia.

Burime të QIK-ut nga Tetova njoftojnë se sot në bisedë informative është marrë zëdhënësi i Partisë Demokratike Shqiptare (PDSH) dhe disa veprimtarë të tjerë të kësaj partie. Rrugët e Tetovës edhe më tej i kontrollojnë njësitë e policisë. Nga Tetova bëhet me dije se udhëheqja PDSH-së ka konvokuar për sot një konferencë me gazetarë.

Thuhet se janë demoluar dyert dhe dritaret e Kuvendit të Komunës së Tetovës dhe se në këtë objekt është hedhur një koktej “mollotovi”. Mirëpo ende nuk ka konfirmim të këtyre pohimeve as hollësi të tjera lidhur me të.

 9 korrik 1998

Gjakovë: U varrosën pesë të vrarë të paidentifikuar

Sot, paradite, me urdhërin e pushtetit të instaluar serb, në varrezat e Gjakovës u varrosën trupat e pajetë të pesë shqiptarëve, të cilët dje policia i solli në morgun e spitalit të këtij qyteti.

Identiteti i të vrarëve nuk është bërë i ditur, por vetëm dieht se ata janë sjellë nga fshatrat e Rekës së Keqe.

Vdiq një qytetar i plagosur para një muaji nga forcat serbe

Brahim Zeka nga Skivjani i Gjakovës, i cili u plagos para një muaji nga forcat serbe, vdiq në spitalin e Prishtinës, njofton KI i Degës së LDK-së në Gjakovë.

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Foto: Spitali i Gjakovës

8 korrik 1993

Në Deçan e rrethinë valë e re e represionit policor serb

Dje, një ekspeditë e policisë serbe që nga orët e hershme të mëngjesit, filloi një valë e re represioni ndaj popullatës shqiptare në Deçan dhe disa fshatra përreth.

Me pretekst të kërkimit të armëve, policia serbe vetëm në ditën e djeshme, bastisi, plaçkiti dhe keqtrajtoi 64 familje, u rrahën shumë qytetarë, ndërsa karakteristikë e këtyre bastisjeve ishin thyerjet dhe demolimet e orendive tek të gjitha shtëpitë që u bastisën. Bastisje masive pati në fshatrat Broliq, Papiq, Prapaqan, Dubovik, Isniq, Pobergjë, Voksh, Lumbargj dhe Lloçan.

Kjo ekspeditë policore në fshatin Dubovik, bastisi shtëpinë e Muharrem Rr.Berishës, me ç’rast thyen të gjitha orenditë në këtë shtëpi. Ekspedita policore serbe pasdite shkoi edhe në fshatin Isniq, e cila bastisi shtëpinë e Maxhun Tishukut, anëtar i Kryesisë së Degës së LDK-së në Deçan. Në Isniq u bastisën edhe disa familje të tjera, tek të cilat policët serbë u sollën me vandalizëm të paparë.

Po ashtu dje pasdite, rreth orës 4.30 minuta, kjo ekspeditë policore serbe, ishte edhe në fshatin Pobergjë ku u bastisën familjet e disa veprimtarëve të LDK-së, si ajo e Isa A.Tolajt, kryetar i Nëndegës së LDK-së së këtij fshati, pastaj e Sami, Jashar, Hasan, Fadil dhe Ali R.Tolajt. Pas Pobergjës, ekspedita policore serbe, vazhdoi aksionin e saj në fshatin Voksh ku u bastisën shtëpitë e vëllezërve Ali dhe Beqir Mazrekajt. Në prani të familjes u rrah djali i Aliut, kurse Beqirit i plaçkitën një kamerë dhe një pasaportë.

Ekspedita policore serbe, ishte edhe në fshatin Lumbardh, e cila bastisi shtëpinë e Maxhun N.Lekajt, kryetar i Nëndegës së LDK-së dhe demoloi dhe thyejti të gjitha orenditë në këtë shtëpi. Në Lumbardh, policia serbe bastisi dhe plaçkiti edhe disa familje si ato të Dervish U.Lekajt, të cilit policët serbë ia plaçkitën 500 marka gjermane. Ekspedita policore serbe ishte edhe në fshatin Lloçan, e cila bastisi familjet e Brahim, Osman, Hysen, Murat dhe Shaban Kasumajt, ky i fundit ish-punëtor i sigurimit.

Nga Deçani, merret vesh se pos ditës së djeshme edhe sot situata në këtë komunë është ende e tensionuar.

8 korrik 1994

Represioni në Kosovë

Gjilan: –  Më 5 korrik, inspektorët serbë morën në pyetje Shemsedin Mustafën, nga Kmetovci i Gjilanit, anëtar i Kryesisë së Degës së FR të LDK-së në Gjilan, Xheladin Ibrahimin, kryetar i Nëndegës së LDK-së në Myqybabë dhe Ali Sylën, inkasant i Këshillit për Financim nga Bresalci i Gjilanit.

Nga Shemsedin Mustafa, inspektorët serbë u interesuan të dinë rreth aktivitetit të Degës së FR të LDK-së në Gjilan, si dhe rreth manifestimit “Vullneti ’94”, i cili u mbajt këto ditë.

Edhe nga aktivistët e tjerë të lartëshënuar, policia u interesua të dijë rreth aktivitetit të institucioneve ku ata janë të angazhauar.

Prishtinë – Dje, prej orës 17:00 deri rreth orës 19:00, një ekspeditë e policisë serbe, nën pretekst të kërkimit të armëve, bastisi shtatë shtëpi në fshatin Grashticë të Prishtinës. Policia bastisi shtëpitë e Ibrahim, Zeqir, Shaban, Rexhep, Nazif, Jahir e Jetullah Krasniqit. Njoftohet se gjatë bastisjes, policia keqtrajtoi fizikisht Jahir Krasniqin, punëtor i “Rilindjes”.

Personave të lartëshënuar policia iu kërcënua se do të kthehen sërish për t’i bastisur.

Pardje rreth orës 9:00, policia ishte në shtëpinë e Bajram Çokut në Koliq të Prishtinës dhe kërkoi djalin e Bajramit, Selatin Çokun. Kur Selatin Çoku doli para tyre, ata i thanë se nuk na duheni ju, por vëllai juaj Agim Çoku.

Njoftohet se Agim Çoku është arrestuar, ndërsa familja e tij ka tri ditë që nuk di asgjë për të.

Dje rreth orës 8:00, policia ishte në shtëpinë e Idriz Gubetinit në rr.”Drenica” në Prishtinë, të cilin e urdhëroi që të paraqitet në stacionin e policisë. Njoftohet se Idriz Gubetini dorëzoi një revole.

Vlenë të theksohet se Idriz Gubetini në gjashtë muajt e fundit është marrë në pyetje katër herë nga ana e inspektorëve serbë.

Vushtrri: – Sot rreth orës 9:00, një ekspeditë e policisë hyri në fshatin Stanovc i Poshtëm të Vushtrrisë dhe kërkoi kryetarin e Nëndegës së LDK-së së këtij fshati, Tahir Tahirin.

Meqë Tahir Tahiri nuk gjendej në shtëpi, policia më pas shkoi në një familje tjetër të këtij fshati ku para pak ditësh vdiq një i ri 25 vjeç, me ç’rast trazuan të pranishmit që pritnin miqtë për shprehje ngushëllimesh.

Policia u kthye sërish në shtëpinë e Tahir Tahirit dhe arrestuan djalin e tij Ilir Tahirin, i cili u mor peng dhe u dërgua në postkomandën e policisë në Prilluzhë.

Ekspedita e policisë në të njëjtin fshat kërkoi edhe Sherif Musliun. Meqë edhe Sherif Musliu nuk gjendej në shtëpi, policia ia mori peng bashkëshorten dhe fëmijët, të cilët u mbajtën deri në mesnatë. Pasi i liruan bashkëshorten dhe fëmijët e Sherifit, atyre u thanë se do vijnë sërish.

Ferizaj: KMDLNJ i Ferizajt, njofton se më 30 qershor, rreth orës 22:00, policia nën pretekst të kërkimit të armëve, bastisi shtëpinë e Adem Tershanit në fshatin Koshare të Ferizajt. Pas bastisjes, policia mori me Ademin, i cili në stacionin e policisë në Ferizaj u keqtrajtua fizikisht. Adem Tershani u lirua rreth orës 24:00, me kusht që të paraqitet sërish të nesërmen në polici.

Më 5 korrik, inspektorët serbë morën në pyetje Isuf Malokun, nën pretekst të kërkimit të armëve.

Dje, policia ishte në shtëpinë e Danush Tërshanës në Ferizaj për të kërkuar djalin e tij Ekrem Tërshanën, i cili nuyk gjendej në shtëpi. Të nesërmen policia Danush Tërshanën e kërkoi edhe në vendin e punës. Kur Danushi u lajmërua në polici, inspektori serb i quajtur Dejan, nga Danushi kërkon që të dorëzojë një revole.

Të nesërmen, sipas urdhërave të policisë, Ekrem Tërshana u lajmërua në polici me ç’rast u mbajt rreth pesë orë dhe u keqtrajtua fizikisht.

Pardje, inspektorët serbë morën në pyetje edhe Hamdi Nezirin, kryetar i Nënkëshillit për Financim në fshatin Gackë. Inspektorët u interesuan të dinë nga Hamdiu rreth mënyrës së grumbullimit të mjeteve e tj.

Pardje, u mor në pyetje Hamdi Neziri, kryetar i Këshillit për Financim në fshatin Gaçkë të Ferizajt. Hamdi Neziri në stacionin e policisë qëndroi rreth dy orë, nga i cili inspektorët serbë u interesuan të dinë rreth aktivitetit tij në LDK, për Nëndegën V-të, anëtarët e Kryesisë së kësaj Nëndege e tj.

Dje, nën pretekst të kërkimit të armëve, policia bastisi shtëpinë e Naser Ibrahimit në fshatin Tern. Pas bastisjes, policia ia la thirrjen Naser Ibrahimit që të paraqitet sot në stacionin e policisë në Ferizaj.

Dje, në stacionin e policisë në Ferizaj, nën pretekst të kërkimit të armëve u mor në pyetje Musli Rexhepi, anëtar i Kryesisë së Aktivit I të Nëndegës XI të LDK-së. Musli Rexhepi u lirua me kusht që të paraqitet sërish sot në orën 8:00,  në stacionin e policisë në Ferizaj.

Bëhet me dije se Musli Rexhepi është keqtrajtuar fizikisht.

Dje, rreth orës 12:00, policia mdori në shtëpitë e tyre Nijazi Veselin dhe Sylë Mehmetin, aktivistë të LDK-së në fshatin Gërlicë. Njoftohet se Nijazi Veseli është keqtrajtuar deri në alivanosje, me ç’rast u detyrua që të bëjë intervenim mjekësor në Prishtinë.

Rahovec: – Pardje, rreth orës 8:00 të mëngjesit, policia nën pretekst të kërkimit të armëve mori në shtëpitë e tyre Jahir Kastratin, Kadri Berishën dhe Abdullah Krasniqin, të cilët në stacionin e policisë u mbajtën rreth tetë orë.

Njoftohet se Kadri Berishën e urdhëruan që të paraqitet sërish të nesërmen në polici.

Malishevë: – Dje në mëngjes, policia e postkomandës së Kijevës, shkoi në shtëpitë e Jonuz, Azem, Mustafë e Ramadan Gashit dhe Halil Toplanës nga Kijeva, të cilët i urdhëroi që sot në mëngjes të paraqiten në stacionin e policisë në Klinë. Njoftohet se edhe pse të thirrurit kishin kërkuar dëshmi me shkrim, policia atyre u tha se nuk ka nevojë për dëshmi me shkrim dhe nuk iu dha kurrfarë arsyetimi se për çfar ftohen në polici.

Dje rreth orës 5:00 të mëngjesit, policia e Rahovecit, nën pretekst të kërkimit të armëve, për herë të dytë bastisi shtëpinë e Hamit Morinës në fshatin Lubizhdë të Malishevës. Gjatë bastisjes, policia keqtrajtoi fizikisht anëtarët e familjes, si dhe mori me vete të rinjtë Tafil e Sali Morinën, të cilët në stacionin e policisë në Rahovec u mbajtën rreth katër orë me ç’rast u keqtrajtuan rëndë.  Tafil Morina u lirua me kusht që në stacionin e policisë në Rahovec të paraqitet axha i tij, Hasan H.Morina.

Sot, rreth orës 7:00 të mëngjesit, në fshatin Shkozë të Malishevës, policia e Rahovecit arrestoi në shtëpinë e tij, Sadri Rr.Bytyçin, i cili ende po mbahet në polici.

Nga Malisheva bëhet me dije se tash tetë ditë po mbahet në arrest i riu Afrim H.Bytyçi, ndërsa shkaku i arrestimit të tij tash për tash nuk dihet.

Gllogovc: – Më 1 korrik rreth orës 14:00, policia serbe ndërhyri në lokalet e shkollës fillore “Rilindja” në fshatin Dobroshevc, me ç’rast pyetën domarin e kësaj shkolle, se ç’po përgatitet me rastin e 2 Korrikut. Edhe të nesërmen policia ndërhyri në lokalet e kësaj shkolle dhe bastisi atë. Policia konfiskoi dy fotografi të figurave tona kombëtare, si dhe u kërcënuan që emri i kësaj shkolle të shkkruhet në cirilicë.

Ndërkaq, pardje policia mori në pyetje në stacionin e policisë në Prishtinë, të miturit Bujar A.Kiçinën (11) dhe Afrim R.Vrellakun (9). Ky i fundit u mor në pyetje për herë të tretë. Policia mori në pyetje të miturit me rastin e vrasjes së një qytetari më 29 qershor në fshatin Baicë të Gllogovcit, prej nga janë edhe dy të miturit.

8 korrik 1997

Mitrovicë: – Gjatë gjashtë muajve të kaluar u bastisën 26 familje

Komisioni për Informim i Degës së LDK-së në Mitrovicë, raportin për dhunën e ushtruar kundër banorëve të kësaj komune gjatë gjashtë muajve të kaluar të këtij viti, thekson se gjatë kësaj periudhe janë ndaluar arbitrarisht 48 veta, janë marrë në arrest 57, në biseda informative 32, janë keqtrajtuar fizikisht 24, për vepër penale është dënuar 1, për kundërvajtje 2, ndërsa në procedurë hetimore janë 5 veta.

Po gjatë kësaj periudhe policia ka bastisur 26 familje shqiptare ka kërcënuar 8 veta, i ka dërguar në vuajtje të dënimit 8, ka keqtrajtuar për armë 35, i ka fyer 18, ka shkuar në 70 familje shqiptare, ka shpërndarë 72 thirrje për paraqitje në polici dhe ka legjitimuar 25 veta.

Po gjatë kësaj periudhe janë keqrajtuar 8 veprimtarë politikë, 10 punëtorë të arsimit, 11 veprimtarë humanitarë dhe 1 veprimtar sindikal, janë keqtrajtuar edhe 4 ish të burgosur politikë dhe 1 femër. Është shënuar një ndërhyrje në institucionet arsmore, tri ndërhyrje në institucionet humanitare, dy familje janë larguar me dhunë nga banesa ndërsa një personi i është konfiskuar pasaporta.

Për rekrutim në armatën serbe janë thirrur 4 të rinjë shqiptarë, ndërsa 3 shqiptarë të punësuar në botën e jashtme janë keqtrajtuar gjatë kthimit, ndërsa 3 të tjerëve nuk u është lejuar kthimi.

Po gjatë kësaj periudhe janë plaçkitur 23 persona.

8 korrik 1998

Pesë trupa të pajetë në morgun e spitalit të Gjakovës

Sot, në morgun e spitalit të Gjakovës, policia serbe ka sjellë trupat e pajetë të pesë shqiptarëve.

Nuk dihet identiteti i të vrarëve, por supozohet se ata janë sjellë nga zona e luftimeve në Rekë të Keqe.

Morgu i spitalit të Gjakovës po mbahet nën kontroll të rreptë të policisë serbe.

Suharekë: U vra Sadri Arif Kryeziu

Sot në orën 8. 30, në qendër të Suharekës, u vra në vendin e tij të punës, në kiosk, Sadri Arif Kryeziu (41), shitës i gazetave.

Rrethanat e vrasjes së tij nuk dihen, por në momentin e vrasjes aty u vërejtën forca të mëdha policore me automjete të blinduara.

Vendi i ngjarjes po mbahet i rrethuar nga forca të mëdha policore.

Prokurori special, Bekim Kodraliu, në seancën e fjalëve hyrëse në rastin për sulmin terrorist në kanalin e Ibër-Lepencit, tha se sulmi i 29 nëntorit 2024 nuk ishte një veprim spontan, por pjesë e një serie sulmesh të rënda, që rol kyq në përgaditje ka pasur Qeveria e Serbisë kundër rendit juridik dhe sigurisë kombëtare të Kosovës , raporton Ekonomia Online.

Ai tha se Prokuroria para trupit gjykues do të paraqes edhe prova që janë bërë në bashkëpunim me FBI nga SHBA dhe prova shkencore nga policia italiane, që dëshmojnë se të pandehurit janë fajtor për sulm terrorist.

Ai tha se, sipas Prokurorisë, sulmi në Ibër-Lepenc përbën sulmin e katërt të kësaj natyre, pas sulmit ndaj zyrave të KQZ-së në Mitrovicë në vitin 2022, sulmit ndaj ushtarëve të KFOR-it në vitin 2023, barrikadave dhe sulmit në Banjskë po atë vit.

“Nga hetimet e zhvilluara dhe nga provat e siguruara është vërtetuar se të pandehurit Dragisha e Jovan Viqentijeviq, dhe Igor Dimoviq, kanë kryer veprat penale siç janë përshkruar në dispozitivin e aktakuzës. Kjo aktakuzë nuk ka të bëjë me një vepër të zakonshme penale. Ajo ka të bëjë me një sulm të organizuar dhe të planifikuar mirë kundër infrastrukturës kritike të Kosovës, për furnizimin e qytetarëve me ujë të pijshëm dhe për funksionimin energjetik të Kosovës… Të akuzuarit së bashku me disa persona ende të panjohur kanë vendosur eksploziv të llojit TNT, 20 kilogramë. Për këto veprime, Prokuroria i ngarkon të pandehurit për veprën penale ‘Rrezikim i rendit kushtetues me shkatërrimin apo dëmtimin e pajisjeve publike’, lidhur me veprën penale ‘Vepër terroriste’ në bashkëkryerje”, tha ai.

Kodraliu tha se gjatë kontrolleve tek të pandehurit janë gjetur dhe sekuestruar armë, municion dhe pajisje ushtarake.

“Po ashtu gjatë kontrolleve tek të pandehurit janë gjetur e sekuestruar municione, granata, mjete ushtarake të komunikimit, uniforma ushtarake dhe pajisje të tjera, posedimi i të cilave ka qenë në kundërshtim me ligjin në fuqi dhe akuzohen për veprën penale armëmbajtje pa leje. Jovani Viqentijeviq, nga provat e mbledhura gjatë hetimit, do të dëshmohet se i njëjti për një periudhë të caktuar kohore e deri në arrestimin e tij ka vepruar në dobi të shërbimit inteligjent ushtarak serb dhe atë duke mbledhur, transmetuar informacione dhe dokumente të ndjeshme dhe konfidenciale të sigurisë, që drejtpërdrejt ka cenuar rendin juridik dhe sigurinë kombëtare, për këtë arsye akuzohet për veprën e spiunazhit në vazhdimësi”, tha ai.

Sipas tij, edhe i akuzuari Igor Dimoviq do të përballet me akuzat për armëmbajtje pa leje.

“Igor Dimoviq, nga provat se tek i njëjti janë gjetur armë dhe municion dhe pajisje ushtarake pa lejen e organit kompetent. Provat që do të paraqiten përbëhen nga raportet e Policisë së Kosovës, raportet e teknikës kriminalistike, ekspertizat e Agjencisë së Kosovës për Forenzikë, analizat e ADN-së, ekspertiza e Byrosë Federale të Hetimeve të SHBA-së, ekspertizat shkencore të Policisë së Italisë, raportet e organeve kompetente mbi analizat e eksplozivëve duke përfshirë edhe ato të KFOR-it amerikan, analizat e pajisjeve elektronike, dëshmitë materiale… Prokurori do të provojë që ky sulm nuk ishte një veprim spontan apo i mbuluar i të pandehurve, por pjesë e një veprimtarie të organizuar, të planifikuar dhe të koordinuar mirë me të vetmin qëllim që të cenojë infrastrukturën dhe sigurinë kombëtare të Kosovës”, tha ai.

Ai tha se sulmi në Ibër-Lepenc është pjesë e një vargu sulmesh të rënda ndaj institucioneve dhe sigurisë së vendit.

“Sulmi në këtë kanal përbën vazhdimësi të një serie sulmesh të rënda, që në tre vitet kanë pasur për objektiv cenimin e rendit juridik dhe sigurisë kombëtare. Sipas provave që kemi siguruar dhe që do të paraqiten para jush, ky sulm paraqet sulmin e katërt të natyrës së tillë, pas ngjarjeve të mëhershme që kanë cenuar institucionet dhe sigurinë e vendit. Më duhet të veçoj sulmin e zyrave të KQZ-së në Mitrovicë, në dhjetor 2022, duke vazhduar me sulmin ndaj ushtarëve të KFOR-it në maj 2023, vendosjen e barrikadave dhe sulmin në Banjskë në shtator të vitit 2023 e duke u finalizuar me sulmin terrorist në kanalin Ibër-Lepenc”, tha ai.

Prokurori special tha po ashtu se një pjesë e provave lidhen edhe me trajnimet dhe përgatitjet që dyshohet se janë zhvilluar në Serbi.

Ai tha se të dy vëllezërit e akuzuarit dyshohen edhe për vrajse të rënd në territorin e Istogut, duke kërkuar denim sipas kodit penal të Kosovës.

“Nga provat që do të paraqiten do të jenë edhe provat që paraqesin trajnimet dhe përgatitjet që janë zhvilluar në poligonin ushtarak të quajtur ‘Livadhet e Pasulit’, në Serbi, që tashmë po dyshohet që ka edhe varrezë masive, krejt kjo si pjesë e përgatitjeve të kundërligjshme ndaj shtetit të Kosovës. E që nga provat që kemi siguruar, që do të prezantohen para jush, por edhe nga provat e rasteve të mëhershme, vërtetohet se qeveria e Serbisë ka pasur një rol kyç në këto përgatitje”, ka thënë Kodraliu.

Përfaqësuesja e palës së dëmtuarës Ibër-Lepenc, Naxhie Sadiku, tha se e mbështet në tërësi fjalën hyrëse të Prokurorisë, duke theksuar se shpërthimi kishte krijuar frikë dhe pasiguri edhe tek punëtorët e ndërmarrjes.

“Ibër-Lepenci përveçse ka pasur një sfidë shumë të madhe ditën e ngjarjes, ka pasur edhe rrezikim dhe frikë të krijuar për punëtorët e tij në terren, pasi shpërthimi ka qenë shumë i madh dhe ka dëmtuar infrastrukturën kritike me të cilën operon Ibër-Lepenci për furnizim me ujë industrial, ujësjellësit, KEK-un, Ferronikelin dhe industritë e tjera. Përveç kësaj është dashur të ndërmerren hapa që menjëherë të bëhet një zgjidhje teknike që të mos ketë dëme në pronat përreth dhe të bëhet zgjidhja teknike që industritë që furnizohen me ujë të pandërprerë të kenë mundësinë që të mos ndërpriten shërbimet për qytetarët. Kemi pësuar dëme të mëdha materiale në vlerë e cila është potencuar edhe në aktakuzë”, tha ajo.

Edhe drejtori i Infrastrukturës në Ibër-Lepenc, Enes Kërçeli, tha se e mbështet fjalën e Prokurorisë, duke paralajmëruar për pasojat që do të mund të kishte sulmi.

“Kosova ka pasur mundësi të hyjë në krizë të madhe energjetike dhe në krizë të madhe sanitare si pasojë e mungesës së ujit të pijes”, tha ai./ekonomiaonline/A.K/

Dronët ukrainas kanë goditur të enjten një sërë objektesh të naftës brenda territorit rus, si dhe kanë djegur dy anije-cisternë në Detin Azov. Këto sulme vijnë vetëm një ditë pasi presidenti i SHBA-së, Donald Trump, u zotua t’i japë Ukrainës licencën për të prodhuar vetë sistemet e mbrojtjes ajrore Patriot.

Fushata e fundit e Kievit ndaj rafinerive dhe infrastrukturës energjetike ka shkaktuar një krizë të gjerë të karburantit në Rusi. Në shumë rajone raportohet për mungesë të benzinës dhe racionim të rreptë të karburantit, ku shoferët po presin me orë të tëra nëpër pika të furnizimit për të mbushur rezervuarët e tyre.

Autoritetet lokale ruse kanë konfirmuar dëmet e shkaktuara nga sulmet e fundit:

Ushtruesi i detyrës së guvernatorit, Vitaly Korolyov, deklaroi se një sulm me dron ka shkaktuar zjarr të madh në një depo nafte në qytet.

Guvernatori Vladimir Vladimirov njoftoi se rezervuarët e naftës janë përfshirë nga flakët. Si pasojë e zgjerimit të zjarrit, autoritetet urdhëruan evakuimin e menjëhershëm të banorëve nga disa ndërtesa banimi pranë objektit.

Dronët ukrainas kanë djegur dy anije-cisternë (tankerë).

Përmes një njoftimi në Telegram, Shtabi i Përgjithshëm i ushtrisë ukrainase bëri të ditur se këto anije përdoreshin nga Moska për të furnizuar me karburant trupat ruse në front, si dhe për të transportuar naftë duke anashkaluar sanksionet ndërkombëtare.

Kjo seri sulmesh është pjesë e një fushate të intensifikuar të Ukrainës, e cila synon ndërprerjen e linjave të furnizimit për forcat pushtuese ruse dhe izolimin logjistik të Krimesë së aneksuar. /BBC/ /E.A/