Situata në Ukrainë tregon se ndihma ushtarake e BE-së është “vendimtare”, tha të martën shefi i politikës së jashtme të bllokut.

“Situata bën që ndihma jonë ushtarake është ende më e rëndësishme, vendimtare, kritike, ajo mund të bëjë një ndryshim”, u tha Josep Borrell gazetarëve në pragun e takimit të ministrave të mbrojtjes të BE-së në Bruksel.

“Mendoj se gjëja e rëndësishme është të vendoset baza për financim më të mirë të zhvillimit të mbrojtjes evropiane. Ne kemi nevojë për më shumë financime private dhe më shumë financime publike”, tha ai, transmeton AA.

I pyetur në lidhje me qëndrimin bllokues të Hungarisë ndaj fondit të Fondit Evropian të Paqes (EFF) për Ukrainën, Borrell tha se Budapesti “ka shqetësime që nuk lidhen saktësisht me çështjen e mbrojtjes”.

“Firmat hungareze janë marrë me problemet në Ukrainë. Ukraina po merret me minoritetin hungarez në territorin e saj. Ne po bëjmë maksimumin për t’i zgjidhur këto probleme”, tha ai.

Edhe Sekretari i përgjithshëm i NATO-s, Jens Stoltenberg është deklaruar se Rusia shkeli ligjin ndërkombëtar duke sulmuar Ukrainën dhe se Kievi ka të drejtën të vetëmbrohet dhe vendet e NATO-s kanë të drejtën ta ndihmojnë atë.

Këshilli i Sigurimit i Kombeve të Bashkuara do të mbajë të martën një takim urgjent, pas sulmeve izraelite që kanë lënë të vrarë dhjetëra persona të zhvendosur në një kamp në Rafah të Gazës.

Sulmet e së dielës kanë lënë të vdekur 45 persona, sipas autoriteteve shëndetësore palestineze.

Sulmi ka nxitur kritika ndërkombëtare. Shumë shtete arabe e kanë quajtur sulmin si “masakër”.

Izraeli, në anën tjetër, ka thënë se po kryen hetime për këtë “aksident tragjik”.

“Nuk ka vend të sigurt në Gazë. Ky tmerr duhet të përfundojë”, ka thënë Sekretari i Përgjithshëm i Kombeve të Bashkuara, Antonio Guterres, përmes një postimi në rrjetet sociale.

Shefi i Kombeve të Bashkuara për Çështje Humanitare, Martin Griffiths, ka thënë se përshkrimi i sulmit në Gazë si “gabim”, nuk do të thotë asgjë për personat e vrarë, ata që kanë humbur familjarë, dhe ata që po tentojnë të shpëtojnë.

Mbledhja e së martës është thirrur prej Algjerisë.

Kryediplomati i Bashkimit Evropian, Josep Borell ka thënë se është “i tmerruar nga lajmi” për sulmin në Gazë, derisa presidenti francez, Emmanuel Macron, ka thënë se është i “indinjuar”.

Zyrtarë prej Këshillit të Sigurisë Kombëtare të Shteteve të Bashkuara, kanë thënë se Izraeli duhet të marrë çdo masë të mundshme për t’i mbrojtur civilët.

Ushtria izraelite ka thënë se po kryen hetime për rastin.

Lufta në Gazë është nxitur prej sulmeve të kryera prej Hamasit në tokën izraelite, duke vrarë mbi 1 mijë e 200 persona dhe duke marrë peng 250 të tjerë.

Hamasi është grup palestinez, i shpallur terrorist prej Shteteve të Bashkuara dhe Bashkimit Evropian.

Izraeli, më pas, ka nisur fushatë ushtarake në Gazë, me qëllim të shkatërrimit të Hamasit.

Si pasojë e sulmeve hakmarrëse janë vrarë më shumë se 36 mijë palestinezë në Gazë, kryesisht civilë, sipas autoriteteve shëndetësore palestineze./REL/

Rusia do të ndërtojë një termocentral të vogël bërthamor në Uzbekistan, projekti i parë i tillë në Azinë Qendrore post-sovjetike, tha presidenti uzbek, Shavkat Mirziyoyev, teksa takoi presidentin rus, Vladimir Putin.

Putin tha të hënën se Rusia do të vendosë 400 milionë dollarë në një fond të përbashkët investimi prej 500 milionë dollarësh për të financuar projektet në Uzbekistan.

Mirziyoyev tha gjithashtu se Tashkenti është i interesuar të blejë më shumë naftë dhe gaz nga Rusia, një ndryshim i praktikës prej dekadash ku Moska importonte hidrokarbure nga Azia Qendrore.

Presidenti i Uzbekistanit e përshkroi vizitën e Putinit si “historike”.

“Ai paralajmëron fillimin e një epoke të re në partneritetin gjithëpërfshirës strategjik dhe marrëdhëniet aleancë midis vendeve tona”, tha Mirziyoyev.

Putin e përshkroi Tashkentin si një “partner strategjik dhe aleat të besueshëm”./UBTNews/

Zyra e OKB-së për Koordinimin e Çështjeve Humanitare (OCHA) raporton se më shumë se 1 milion njerëz janë zhvendosur në jug dhe veri të Gazës që nga 6 maji.

Bëhet e ditur se luftime të ashpra po zhvillohen edhe në kampin e refugjatëve Jabalia në jug të qytetit të Gazës, si dhe në veri të zonës Nuseirat në Gazën qendrore dhe në lindje të Deir el-Balah, gjithashtu në zonën qendrore, dhe në zonat lindore dhe qendrore të Rafahut në jug të Gazës.

Për shkak të mbylljes së kufijve në Gaza, agjencia e OKB-së për refugjatët palestinezë (UNRWA) raporton se qendrat e saj shëndetësore nuk kanë marrë furnizime mjekësore në 12 ditë, duke ndikuar veçanërisht në rezervat e antibiotikëve për fëmijët dhe ilaçet antiepileptike./UBTNews/