Aktualitet

​Situata me zjarret në Mitrovicë, e menaxhueshme

Gjendje më e rëndë paraqitej në fshatrat Cërnushë, Zasellë, Vërnicë, Vaganicë dhe Vidimriq.

Published

on

Situata nga rreziku i shpërfaqjes dhe shtrirjes së zjarreve fushore e malore në rajonin e Mitrovicës që ditë më parë mori përmasa të mëdha, tani paraqitet e menaxhueshme dhe nën kontroll.

Gjendje më e rëndë paraqitej në fshatrat Cërnushë, Zasellë, Vërnicë, Vaganicë dhe Vidimriq, ku për të mbajtur situatën nën kontroll u aktivizuan të gjitha kapacitetet komunale dhe më gjerë, duke përfshirë FSK-në dhe KFOR-in.

Bahtir Maxhuni, drejtor i Drejtorisë për Siguri dhe Emergjenca në komunën e Mitrovicës, ka bërë të ditur se situata aktuale rreth zjarreve në terren është e menaxhueshme.

Sipas tij, kapacitetet komunale për menaxhimin e situatave janë të mjaftueshme, përveç kapaciteteve për të intervenuar në operativë, sepse ka mungesë të zjarrfikësve, makinerisë së tyre, si dhe pajisjeve personale.

Ai tha se shiu që ka rënë dy ditët e fundit ka ndihmuar në shuarjen e të gjitha vatrave të zjarrit, ndërsa falënderoi zjarrfikësit, FSK-në dhe KFOR-in për kontributin e tyre të jashtëzakonshëm.

“Situata aktuale është e menaxhueshme në terren. I kemi njësitë të zjarrfikësve në gjendje gatishmërie. Në momentin që rishfaqen vatrat e zjarrit, të jemi sa më afër tyre për arsye se intervenimi sa më herët pasojat janë më të vogla. Kështu që për momentin situata është nën kontroll…Kapacitetet e komunës për menaxhimin e situatave janë të mjaftueshme, përveç kapaciteteve për të intervenuar në operativë, kemi mungesë të zyrtarëve të zjarrfikësve, mungesë të makinerisë dhe pajisjeve personale të zjarrfikësve. Kemi bërë kërkesa të vazhdueshme në nivelin qendror që zjarrfikësit të trajtohen në mënyrë dinjitoze, mirëpo në njëfarë forme po hasim në veshë të shurdhër… Falënderojmë Zotin që dërgoi shiun dhe i shoi të gjitha pikat e vatrave të zjarrit në terren. Po ashtu, falënderoj edhe zjarrfikësit, edhe KFOR-in e FSK-në, për shkak se kanë dhënë maksimumin e mundshëm të tyre”, ka thënë Maxhuni.

Ai apeloi te qytetarët të cilët frekuentojnë zonat malore për vikende, që të kenë kujdes në hedhjen e cigareve dhe ndezjen e zjarreve për grill.

Ndërkaq, Tahir Mikullovci, drejtor i Njësisë së zjarrfikësve në Mitrovicë, potencoi nevojën e shfaqur atë ditë për të kërkuar ndihmë, pasi siç u shpreh ai, zjarri kishte tejkaluar kapacitetet e tyre. Drejtori Mikullovci theksoi veç tjerash, mungesën e stafit si problemin më të madh të tyre.

“Zjarri ka tejkaluar kapacitetet tona kështu që është dashur të kërkojmë ndihmë nga njësia në Vushtrri, FSK-ja na ka ndihmuar, pastaj edhe KFOR-i është aktivizuar me anë të helikopterëve për fikjen e zjarrit… Të njëjtën ditë në fshatin Vërnicë, Vaganicë, Vidimriq kemi pasur afër shtatë zjarre. Zjarri në Cërnushë dhe Zasellë ka zgjatur dy ditë, kështu që situata është e menaxhueshme dhe nën kontroll, faktikisht tani zjarre nuk ka… Si njësi profesionale e zjarrfikësve problemin më të madh e kemi me mungesë të stafit, sepse në bazë të rregullores së MPB-së në 1 mijë e 500 banorë duhet të ketë një zjarrfikës. Ne aktualisht kemi 30 zjarrfikës, kështu që na mungojnë 17-18 zjarrfikës. Pastaj edhe automjetet, disa janë të vjetruara, por janë në gjendje funksionale, komuna ka premtuar të na furnizojë edhe me dy automjete, një automjet sulmues dhe një përcjellës, dhe besoj se me furnizimin e tyre intervenimet tona do të jenë më efikase dhe gjendja operacionale e gatishmërisë do të jetë më e lartë… Për momentin I kemi pesë automjete”, u shpreh Mikullovci.

Lajmet

Donika Emini kritikon interpretimin e këngës nacionaliste serbe në forumin e BE-së në Bruksel

Published

on

Ekspertja e politikës së jashtme, Donika Emini, ka kritikuar interpretimin e këngës nacionaliste serbe “Oj Kosovo, Kosovo” në mbrëmjen hapëse të Forumit të Zgjerimit të Bashkimit Evropian në Bruksel, duke e cilësuar të papranueshme përzgjedhjen e një kënge që përmban pretendime territoriale ndaj Kosovës.

Gjatë fjalimit të mbajtur më 16 nëntor, Emini tha se ngjarja e kishte detyruar ta ndryshonte tërësisht fjalimin e përgatitur. Ajo e nisi paraqitjen duke cituar disa vargje të këngës, të interpretuar një natë më parë.

“Popull serb, thërrit fort. Kosovë, nuk do të të dorëzojmë. Ti gjithmonë ke qenë e jona. Kështu ka qenë që nga kohët e lashta”, citoi Emini, duke theksuar se teksti përmban pretendime të drejtpërdrejta territoriale ndaj Kosovës.

Ajo ngriti pikëpyetje nëse institucionet evropiane i kuptojnë kompleksitetet politike dhe ndjeshmëritë historike të Ballkanit Perëndimor.

“Pas asaj që ndodhi mbrëmë, vërtet pyes veten nëse ata i kuptojnë kompleksitetet e rajonit, edhe pse po flasim për një Komision Evropian që është mjaft afër këtij rajoni”, deklaroi ajo.

Emini tregoi se kishte vendosur të merrte pjesë në forum pasi kishte vërejtur mungesën e përfaqësuesve nga Kosova në listën e folësve. Megjithatë, ajo theksoi se prania e saj si përfaqësuese e shoqërisë civile nuk mund ta zëvendësonte përfaqësimin institucional të vendit.

Ajo tha se nuk do të befasohej nëse një këngë e tillë do të interpretohej në tubime nacionaliste apo në një tubim të ish-presidentit serb Slobodan Millosheviq, por u shpreh e befasuar që ajo u dëgjua në një aktivitet të Komisionit Evropian.

“U befasova shumë kur e dëgjova në Komisionin Evropian, një projekt paqeje, një projekt që po e udhëheq rajonin drejt demokracisë”, u shpreh Emini.

Ekspertja sqaroi se kundërshtimi i saj nuk kishte të bënte me gjuhën apo muzikën serbe, duke theksuar se do ta mirëpriste interpretimin e këngëve shqipe dhe serbe që promovojnë bashkëjetesën dhe tejkalimin e ndarjeve.

Në përfundim të fjalimit, Emini i bëri thirrje Bashkimit Evropian të mos riprodhojë narrativa nacionaliste dhe revizioniste që, sipas saj, kanë penguar procesin e pajtimit në Ballkan.

“A mundeni të paktën të mos i riprodhoni narrativat revizioniste dhe propagandistike të një regjimi që e përçau rajonin dhe që e bëri pajtimin kaq të vështirë deri më sot?”, pyeti ajo.

Fjalimi u mbajt në kuadër të forumit “Përmes pajtimit drejt zgjerimit të Bashkimit Evropian”, më 16 nëntor, një ditë pas interpretimit të këngës në mbrëmjen hapëse të aktivitetit në Bruksel./A.K/

Continue Reading

lajme

Studentët e Masterit në Agrokulturë me Mjedis nisin hulumtimin eksperimental për kultivimin e sallatës së gjelbër pa tokë

Published

on

By

Studentët e programit Master në Agrokulturë me Mjedis, Sihana Bokshi dhe Shpëtim Salihu, nën udhëheqjen e profesorit Ismet Babaj, kanë dizajnuar metodikën e hulumtimit dhe kanë nisur punën eksperimentale për kultivimin e sallatës së gjelbër (Lactuca sativa L.) në sistemin e kultivimit pa tokë.

Qëllimi i këtij eksperimenti është vlerësimi i efekteve të sistemit të prodhimit dhe furnizimit me azot në formë të nitratit mbi statusin ushqyes të bimëve, akumulimin e nitrateve dhe nitriteve, prodhimin e biomasës, si dhe morfologjinë e sistemit rrënjor.

Në kuadër të hulumtimit po testohen tre trajtime me tretësira ushqyese në dy sisteme të hapura të prodhimit pa tokë, përmes vazove me vëllim prej 1 litri: njëri sistem përdor vermikulitin si substrat rritës, ndërsa tjetri përdor cocopeat (torfë kokosi).

Puna kërkimore do të përmbyllet me analiza kimike dhe matje të parametrave të rritjes së bimëve. Të dhënat dhe rezultatet e përfituara do t’u shërbejnë studentëve për përgatitjen e punimeve të tyre të diplomës, si dhe për publikime në revista shkencore, duke dëshmuar gërshetimin e suksesshëm të teorisë me praktikën shkencore.

Continue Reading

lajme

Rama kritikon interpretimin e melodisë së këngës nacionaliste serbe në Bruksel

Published

on

By

Kryeministri i Shqipërisë, Edi Rama, ka kritikuar interpretimin e melodisë së një kënge nacionaliste serbe në koncertin e organizuar nga Komisioni Evropian në Bruksel. Ai e bëri këtë në fillim të një debati në “Forumin e Zgjerimit“, duke thënë se kjo çështje nuk mund të mbetet pa u përmendur.

“Nuk mund të heshtet ajo që ndodhi mbrëmë me muzikën e interpretuar në një mbrëmje në prag të këtij forumi. Nuk e di a ishte e qëllimshme apo injorancë, por ishte një këngë nacionaliste këtu, në mbrëmjen e këtij eventi. Për ta shtuar ironinë, u bë nën logon ‘Meloditë e Unitetit’”, tha Edi Rama.

“Asnjëherë nuk mund të lëmë anash diçka që na kthen nga e kaluara. E kam thënë për vite se sa e rëndësishme është Serbia për rajonin tonë, sa e rëndësishme është ta mbajmë Serbinë në anën tonë. Por dua të sigurohem që ajo që them të mos shkojë kundër kësaj bindjeje. Por, në të njëjtën kohë, mendoj se nuk duhet të tolerojmë hapësirë që betejat e mesjetës të bëhen motivim për ndasitë e sotme”, ka thënë Rama.

“Sa më shpejt Serbia ta njohë Kosovën, aq më mirë do të jetë për Serbinë dhe për të gjithë”, ka thënë kryeministri i Shqipërisë. /KOHA/

Continue Reading

Vendi

Ndalohet një zyrtar i Gjykatës së Prishtinës, dyshohet për keqpërdorim detyre

Published

on

By

Prokuroria Themelore në Prishtinë, në bashkëpunim me Drejtorinë për Hetimin e Krimeve Ekonomike dhe Korrupsionit (DHKEK) në Policinë e Kosovës, ka ndaluar sot për 48 orë personin me inicialet A.B., udhëheqës i Zyrës për Menaxhimin e Lëndëve në Gjykatën Themelore në Prishtinë.

Sipas njoftimit të Prokurorisë, ndalimi është bërë pas hetimeve disamujore, nën dyshimin se A.B. ka kryer veprën penale “Keqpërdorimi i pozitës apo autoritetit zyrtar”. Ai dyshohet se gjatë ushtrimit të detyrës, me qëllim të përfitimit të kundërligjshëm pasuror për vete dhe persona të tjerë, ka krijuar dosje fiktive duke vendosur vulën e vërtetësisë në kopjen e një kontrate të falsifikuar të shitblerjes.

Përmes këtyre veprimeve, shtetasit të Serbisë me inicialet M.B. — i cili aktualisht ndodhet në arrati — i është mundësuar regjistrimi i kundërligjshëm i një banese me sipërfaqe prej 55.89 m² në Zonën Kadastrale në Matiçan, pranë Zyrës Kadastrale në Prishtinë.

Prokurori i Shtetit ka paralajmëruar se brenda afatit ligjor do të paraqesë kërkesë në gjykatën kompetente për caktimin e masës së paraburgimit ndaj të pandehurit. /E.A/

Continue Reading

Të kërkuara