Lajmet

​Sindikata e Policisë paralajmëron veprime sindikale

Kryesindikalisti i PK-së theksoi se zyrtarët policorë të Kosovës janë të vetmit në botë që nuk kanë sigurime shëndetësore.

Published

on

Ndonëse sot institucioni i Policisë së Kosovës po e shënon 23-vjetorin e themelimit, pjesëtarët policorë ende nuk gëzojnë sigurimet shëndetësore.

E ky 23 vjetor policët po i gjen edhe pa Ligjin për pensionim të parakohshëm, një kërkesë e kamotshme e tyre.

Kryetari i Sindikatës së Policisë së Kosovës, Imer Zeqiri tha se në rast se Qeveria e Kosovës nuk vepron sa i përket kërkesave të tyre për Ligjin e pagave do të ndërmarrin veprime sindikale.

Ai tha se Policia e Kosovës duke qenë me moshën më të shtyrë në rajon ka nevojë të madhe për Ligjin për pensionim të parakohshëm.

Sipas tij, ky ligj ndonëse i finalizuar ende nuk është dërguar në Kuvend përkundër zotimit të Qeverisë së Kosovës se kjo do të ndodh shpejt.

Jemi policia e vetme në botë që nuk ka sigurim shëndetësor, jemi Policia me moshën më të shtyrë në rajon që mosha mestare ka arritur moshën 47-vjeçare dhe ende nuk është dërguar dhe ka qenë i premtuar nga kjo Qeveri që të dërgohet në Kuvend për miratim një draft-ligj i cili është përpunuar dhe është gati veç i finalizuar për pensionim për moshën 55-vjeçare. Arsyeja e vetme është se zyrtari policor pas gjithë këtyre sfidave që i bënë gjatë shërbimit duke rrezikuar shëndetin dhe jetën e vet kur e arrin moshën 65-vjeçare është pa pension, po e them pa pension me plot kuptimin e fjalës”, theksoi Zeqiri.

Kryesindikalisti i PK-së theksoi se zyrtarët policorë të Kosovës janë të vetmit në botë që nuk kanë sigurime shëndetësore.

Sipas tij, ofrimi i sigurimeve shëndetësore nuk është kosto e papërballueshme për buxhetin e vendit.

E vetmja Polici në botë pa sigurime shëndetësore për këtë unë kam adresuar një kërkesë tek ministri i Punëve të Brendshme zotëri Sveçla e kam biseduar me të dhe pasi që e patëm situatën siç e patëm me marrëveshjet që janë politike dhe ne jemi institucion i sigurisë na është kërkuar një kohë që të bisedojmë për këtë çështje. Unë besoj që nuk është një shumë e papërballueshme për Qeverinë që t’i bëjë zyrtarët policor me sigurim shëndetësor një shumë rreth 4,5 milionë euro në vit. kështu që kjo do të ishte nder jo vetëm për Policinë, jo vetëm nevojë e jashtëzakonshme por edhe nder për qeverinë që t’i bëjë me sigurime shëndetësor pas 23 vitesh”, theksoi ai.

Zeqiri adresoi kritika dhe vërejtje edhe për Ligjin e pagave i cili është në konsultim paraprak. Sipas tij, në këtë ligj nuk është përcaktuar ende vlera e koeficientit për zyrtarët policorë.

Pakënaqësia e Sindikatës së Policisë tek ky draft-ligj i cili është ofruar për diskutim publik është sepse vlera e koeficientit ende nuk është caktuar, prandaj neve po trajtojmë apo na është ofruar diçka figurativisht po e them në treg pa çmim… Kjo është ajo pakënaqësia e parë sepse në Ligjin e Pagave duhet të caktohet vlera e koeficientit. Nuk jemi të kënaqur me krahasim me nivelet tjera të punësuarve me koeficientet aktuale. Pse për shembull ne jemi gati në secilën gradë dy koeficiente më pak se FSK-ja pse mos të jemi barazi me FSK edhe ne jemi institucion i sigurisë edhe ata me shumë respekt për FSK-në por neve jemi bartësit kryesore të sigurisë… Pakënaqësi tjetër është se në këtë ligj shkruhen se pas publikimit në gazetën zyrtare ligji do të hyjë në fuqi pas 8 muajve pse pas 8 muajve, cila është arsyeja”, theksoi kryetari i Sindikatës së Policëve të Kosovës.

Kryetari i Sindikatës së Policisë së Kosovës, Imer Zeqiri tha se aktualisht kanë ofruar dialog social për Qeverinë lidhur me pakënaqësitë e tyre për Ligjin e ri të pagave në të kundërtën paralajmëron edhe veprime sindikale.

Do të ulemi që të bisedojmë çdo detaj rreth këtij projektligji dhe si çdo sindikatë edhe neve nëse na detyrojnë me shkua me ndërmarrë hapa sindikal do të ndërmarrim, por aktualisht e kemi shpallë qeverisë dialog, mirëkuptim dhe dhashtë Zoti dhe po shpresoj se nuk na shtyjnë në atë fazën që edhe ne si Sindikatë të kalojmë në radikalizëm… Ne duhet të veprojmë nëse jo me mirëkuptim atëherë do të veprojmë edhe me veprime sindikale”, u shpreh Zeqiri.

Lidhur me sulmet ndaj zyrtarëve policorë, Zeqiri u shpreh se toleranca e organeve të drejtësisë karshi kryerësve të këtyre veprave penale, po i rritë edhe më shumë sulmet ndaj tyre.

Në vazhdimësi neve po na sulmohen zyrtarët policor dhe këtu kam adresuar kërkesën tek organet e drejtësisë ngase toleranca ndaj organeve të drejtësisë ndaj kryesve të këtyre veprave apo ndaj të dyshuarve që po bëjnë sulm ndaj zyrtarëve policor disi po i motivon këta të dyshuar, ndryshe kam thënë se e vetmja preventiv për parandalimin e sulmeve ndaj zyrtarëve policorë është që organet e drejtësisë të veprojnë sipas ligjit”, deklaroi kryesindikalisti, Zeqiri.

Ndërsa krerët shtetërorë, presidentja Vjosa Osmani dhe kryeministri Albin Kurti lavdëruan punën e Policisë së Kosovës me rastin e shënimit të 23-vjetorit të themelimit.

Më 6 shtator 1999, Misioni i OSBE-së në Kosovë në pajtim me Rezolutën e Kombeve të Bashkuara 1244 ka hapur Shkollën e Policisë dhe ka filluar trajnimin e kandidatëve për pjesëtarë të Policisë së Kosovës e cila gjeneratë numëro 176 pjesëtarë. Aktualisht, Policia e Kosovës numëron rreth 9 mijë punonjës.

Bota

​Rutte në Kiev: NATO mbështet Ukrainën

Published

on

Sekretari i përgjithshëm i NATO-s Mark Rutte ka siguruar presidentin Volodomyr Zelensky se Aleanca Veri-Atlantike do të vazhdojë të mbështesë Kievin zyrtar në përballje me agresionin ushtarak rus.

Ai në një konferencë për media në Kiev me presidentin e Ukrainës theksoi se ndihma e NATO-së do të vazhdojë të rritet.

“Tri vjet e gjysmë pas pushtimit në shkallë të plotë të Rusisë, Ukraina vazhdon të qëndrojë e fortë. Dhe miqtë dhe partnerët tuaj në NATO vazhdojnë të qëndrojnë me ju. Mbështetja jonë është e palëkundur dhe vazhdon të rritet. Përfshirë, siç thatë edhe ju, përmes Listës së re të Kërkesave me Prioritet për Ukrainën- PURL- që mbështet një rrjedhë të rëndësishme të armëve vdekjeprurëse amerikane në Ukrainë përmes financimit të ofruar nga Aleatët e NATO-s. Në më pak se një muaj, kjo tashmë ka nënkuptuar 1.5 miliardë dollarë shtesë në pajisje thelbësore, mbrojtje ajrore. Municione. Dhe më shumë. Paketa të mëtejshme do të pasojnë”, tha Rutte.

Ai shtoi se po punojnë së bashku në NSATU, komandën e NATO-s në Gjermani – për të siguruar që forcat ukrainase të kenë atë që u nevojitet.

Rutte ka folur edhe mbi takimin e së hënës në Uashington, së bashku me presidentin e SHBA-së dhe shumë udhëheqës evropianë, për të shfrytëzuar mundësinë për t’i dhënë fund kësaj lufte të tmerrshme dhe për të sjellë paqe dhe siguri pas kaq shumë vuajtjesh.

“Presidenti Trump e ka bërë këtë një përparësi – jo vetëm duke thyer bllokimin me Putin, por duke e bërë të qartë se Shtetet e Bashkuara do të përfshihen në ofrimin e garancive të sigurisë për Ukrainën. Garancitë e forta të sigurisë do të jenë thelbësore – dhe kjo është ajo që po punojmë tani për ta përcaktuar. Në mënyrë që kur të vijë koha që ju të hyni në atë takim dypalësh – të keni forcën e padyshimtë të miqve të Ukrainës pas jush. Duke siguruar që Rusia do të mbështesë çdo marrëveshje. Dhe kurrë, kurrë më nuk do të përpiqet të marrë një kilometër katror të Ukrainës”, tha Rutte.

Continue Reading

Bota

Pekini kundërshton tarifat e SHBA-së për tarifat 50% ndaj Indisë

Published

on

Ambasadori kinez në Indi, Xu Feihong, tha se Pekini kundërshton fuqimisht tarifat e larta të Uashingtonit ndaj Delhit dhe bëri thirrje për bashkëpunim më të madh midis Indisë dhe Kinës.

Xu e krahasoi SHBA-në me një ngacmues, duke thënë se ajo kishte përfituar prej kohësh nga tregtia e lirë, por tani po përdor tarifat si një “kartolinë negociuese” për të kërkuar çmime të tepruara nga vendet e tjera.

“SHBA-të kanë vendosur tarifa deri në 50% ndaj Indisë dhe madje kanë kërcënuar për më shumë. Kina e kundërshton fuqimisht këtë. Heshtja vetëm sa e trimëron ngacmuesin”, tha Xu të enjten, shkruan BBC.

Më parë këtë muaj, Trump vendosi një gjobë prej 25% ndaj Indisë, përveç tarifave prej 25% për blerjen e naftës dhe armëve nga Rusia. Shkalla e re do të hyjë në fuqi më 27 gusht.

Importet e shtuara të naftës së papërpunuar ruse të lirë nga Delhi që nga lufta në Ukrainë kanë shkaktuar një tendosje në lidhjet e saj me SHBA-në dhe kanë ndikuar në negociatat për një marrëveshje tregtare.

India ka mbrojtur blerjet e saj të naftës ruse, duke argumentuar se si një importuese e madhe e energjisë, duhet të blejë naftën më të lirë të disponueshme për të mbrojtur miliona indianë të varfër nga rritja e kostove. Ajo gjithashtu ka theksuar se administrata Biden i kishte thënë Indisë të blinte naftë ruse për të krijuar tregje botërore të energjisë.

Continue Reading

Aktualitet

​73 raste të dhunës në familje për një javë

Published

on

Zyra për Mbrojtje dhe Ndihmë të Viktimave, që funksionon në kuadër të Zyrës së Kryeprokurorit të Shtetit, ka trajtuar gjithsej 78 raste të reja gjatë periudhës 15 – 22 gusht 2025, në të gjitha regjionet e Republikës së Kosovës.

Sipas të dhënave zyrtare, pjesa më e madhe e rasteve, konkretisht 73 kanë të bëjnë me dhunën në familje, duke reflektuar edhe njëherë përmasat shqetësuese të këtij fenomeni në shoqëri.

“Përveç rasteve të dhunës në familje, janë trajtuar edhe dy raste të dhunimit, një rast i ngacmimit seksual, një rast i sulmit seksual, një rast i lëndimit të lehtë trupor”, thuhet në njoftim.

Continue Reading

Bota

​Kallas paralajmëron për ‘kurthin’ rus për shtyrjen e Kievit për lëshime tokash

Published

on

Kryediplomatja evropiane paralajmëroi kundër detyrimit të Ukrainës për të hequr dorë nga territori, duke thënë se ky është në fakt një “kurth” në të cilin Rusia dëshiron që ne të hyjmë.

“Dua të them, diskutimi është rreth asaj që duhet të heqë dorë Ukraina, cilat janë lëshimet që Ukraina është e gatshme të bëjë”, tha Kaja Kallas për BBC-në.

Kallas tha se Rusia është ajo që filloi luftën dhe nuk ka bërë ende asnjë lëshim, transmeton KosovaPress.

“Nëse biem në këtë kurth që po i bëjmë presion Ukrainës, çfarë janë të gatshme të heqin dorë, atëherë do ta shohim përsëri këtë, sepse agresioni do të jep fryte,” shtoi ajo.

Duke iu referuar samitit të javës së kaluar në Alaskë midis presidentit të SHBA-së Donald Trump dhe atij rus Vladimir Putin, Kallas tha se Putin mori “gjithçka që donte”.

“Putin thjesht po qesh, jo duke i ndaluar vrasjet, por duke i rritur ato”, shtoi ajo.

Duke folur për nevojën për garanci sigurie të besueshme dhe të forta për Ukrainën, Kallas, megjithatë, pranoi se nuk kishte shumë hapa konkretë për një forcë penguese në këtë fazë të negociatave.

Kallas tha se i takon shteteve anëtare të Koalicionit të Gatshëm të përcaktojnë saktësisht se çfarë mund të ofrojnë.

Trump tha të enjten se perspektivat për paqe midis Ukrainës dhe Rusisë do të bëhen të qarta brenda dy javësh.

Rusia aneksoi rajonet Donetsk, Luhansk, Kherson dhe Zaporizhzhia të Ukrainës në shtator 2022.

 

Continue Reading

Të kërkuara