Në mesditën e sotme, 15 persona kryesisht mosha të reja kanë mbetur të lënduar nga një shpërthim i cili po dyshohet se është bombol gazi. Ky aksident ndodhi në një objekt afarist në afërsi të lagjes “Marigona”.

Shtatë persona janë në gjendje më të rëndë sepse nga shpërthimi kanë marrë djegie të rëndë në fytyrë dhe duar dhe tashmë trajtim po marrin në Kirurgjinë Plastike, ndërsa të tjerët janë në Klinikën Emergjente ku po vazhdojnë të marrin trajtim mjekësor, por që gjendja e tyre është më e lehtë.

Këto informacione për KosovaPress i ka dhënë doktor Ejup Govori, kujdestar në Klinikën Emergjente.

Govori tha se rreth orës 13:00 sot i kanë pranuar 15 pacientë të lënduar nga shpërthimi i një bombole gazi. Ai deklaroi se përkundër që djegia ka ndodhur kryesisht në fytyrë asnjë nuk ka pësuar dëmtim në të pamur.

“Sot rreth orës 12:45 minuta janë sjellë me autoambulancë 15 raste të lënduar, shtatë prej tyre janë me djegie që kanë përfshirë fytyrën dhe shuplakat e duarve, me të vërtet djegia është serioze mund të them sepse është e lokalizuar në fytyrë dhe është një djegie relativisht e lartë, djegien e shkallës së dytë dhe aty këtu djegie e shkallës së tretë, kjo e bënë serioze djegien dhe gjendjen e tyre shëndetësore. Gjendja e tyre nuk është në rrezik fatmirësisht që nuk ka përfshirë sipërfaqe të mëdha, mirëpo djegia është e shkallës se lartë të gjithë janë trajtuar fillimisht dhe janë pranuar në Kirurgjinë Plastike për mjekim të mëtutjeshëm. Fatmirësisht të pamurit e kanë të gjithë të ruajtur, nuk ua ka përfshirë sytë. Rastet e tjera janë jo me gjendje të rëndë, por me lëndime të eksremiteteteve të kokës, shpinës dhe janë me lëndime të lehta dhe ata lirohen për në shtëpi”, tha ai.

Govori po ashtu deklaroi se moshat janë të ndryshme, por kryesisht i takojnë moshave më të reja .

“Mosha është e ndryshme kryesisht është moshë e re viti 2001, 98 pastaj edhe disa 85 janë të ndryshme, por sa e kuptova unë ata janë punëtorë dhe ishin duke punuar në objekt si një qendër për lodra dhe të gjithë janë punëtorë dhe aty ka pëlcitur një bombol gazi”, theksoi Govori.

Zjarri që përfshiu objektin tashmë është shuar, por që njësitet policore ende janë ne vendin e ngjarjes.