Lajmet

Protestojnë punëtorët e Lotarisë së Kosovës, kërkojnë miratimin e ligjit

Published

4 years ago

June 16, 2021

Betim Gashi

Sindikata e Punëtorëve të Lotarisë së Kosovës kanë organizuar sot një protestë para Qeverisë së Kosovës, me kërkesa për miratimin e ligjit për Lotarinë e Kosovës dhe kthimin e tyre në vendet e punës.

Ata thonë se qe dy vjet kanë mbetur pa punë, ndërsa kanë kaluar më shumë se 12 muaj pa marrë asnjë pagë, gjë e cila ua ka rënduar edhe më shumë gjendjen ekonomike.

Kryetari i Sindikatës së Punëtorëve të Lotarisë, Shkumbin Goçi ka tentuar të takohet me zyrtarët nga Qeveria e Kosovës, por ai tregon se një gjë e tillë ishte e pamundur.

“Prej formimit të qeverisë kemi tentuar disa herë të takohemi me ministrin, kemi dërguar shkresa, kërkesa fizikisht, kemi dërguar edhe përmes e-mail, kemi tentuar të kontaktojmë dhe përmes telefonit. Kemi ardhur edhe fizikisht disa herë, nuk kanë pranuar që të takohen. Edhe sot kërkova që të takohen, më thanë që janë në rishikim të buxhetit edhe nuk kanë kohë me u taku me juve”, tha ai.

Ai tha se do të dalin çdo ditë në rrugë të kërkojnë të drejtat e tyre, meqë gati 70 familje janë shkatërruar ekonomikisht. Edhe Ibadete Hasani, dikur punëtore në Lotarinë e Kosovës, ka shprehur pakënaqësitë e saj, duke shtuar se durimit të tyre u ka ardhur fundi.

“Ne më 10 maj 2019 jemi të pezulluar dhe kanë kaluar pothuajse dy vjet edhe asgjë nuk kanë marrë asnjë hap. Nuk kërkojmë asgjë më tepër, vetëm miratimin e ligjit dhe pagat. Kanë kaluar një vit prej kur nuk ka pasur as paga. Duke e marrë parasysh edhe pandemia, punëtorët janë në hall të madh. Shkaqet ekonomike do të thotë na takon… Është e tepërt durimin pothuajse i ka ardhur fundi, duke pritur. Para zgjedhjeve premtime, pas zgjedhjeve neglizhim total për Lotarinë e Kosovës”, tha ajo.

Ajo shton se kanë dërguar shumë kërkesa në adresë të ekzekutivit, por që shumë prej tyre as nuk janë hapur.

Për këto vështirësi flet edhe Zijadin Ramadani, i cili tregon se ai është i shqetësuar për gjendjen e tij të rëndë ekonomike.

“Edhe një vit dal në pension dhe nuk kemi kurrfarë të drejt. Kjo nuk është e mirë as për shtetin, as për neve. Kemi kredi, absolutisht nuk ka dëgjuar askush për ne. Deri në momentin e fundit do të jem këtu”, ka thënë Ramadani për KosovaPress.

Pjesë e protestës ishte edhe Shkëlzen Morina nga Gjakova, i cili ka punuar më shumë se tri dekada në Lotarinë e Kosovës. Ai tha se nga qeveria po kërkojnë punë dhe jo lëmoshë.

“Kemi mbetur shumë keq, kemi familje. Jemi në prag të ekzistencës elementare për jetesë. Ne do të dalim prapë këtu, qeveria nuk pranoi të bisedojë. Ne do të dalim çdo ditë derisa të na plotësohen kushtet. Ligji është miratuar, andaj Kuvendi duhet ta miratojë. Nuk jemi duke kërkuar lëmoshë, por punë”, u shpreh ai.

Para dy vjetësh, Kuvendi i Kosovës ka miratuar ligjin, sipas të cilit mbyllen të gjitha lojërat e fatit në tërë Kosovën, përfshirë lojërat që organizohen nga Lotaria e Kosovës. Ligji ka hyrë në fuqi më 10 maj 2019 dhe nga ajo datë janë pezulluar të gjitha lojërat e fatit të lotarisë deri në miratimin e ligjit të veçantë për Lotarinë e Kosovës.

Lajmet

KQZ hap periudhën për ndërrimin e Qendrës së Votimit për zgjedhjet lokale

Published

8 hours ago

June 28, 2025

UBTNews

Komisioni Qendror i Zgjedhjeve (KQZ) ka njoftuar se më 28 qershor ka nisur periudha për ndërrimin e Qendrës së Votimit brenda komunës për Zgjedhjet Lokale, e cila do të zgjasë deri më 29 gusht 2025.

Gjatë kësaj periudhe 63-ditore, të gjithë qytetarët me të drejtë vote kanë mundësi të kontrollojnë qendrën e tyre aktuale të votimit dhe, nëse dëshirojnë, të kërkojnë ndërrimin e saj, duke zgjedhur një lokacion më të afërt me vendbanimin e tyre brenda të njëjtës komunë.

Ndërrimi i Qendrës së Votimit mund të bëhet në dy mënyra:

përmes platformës elektronike të KQZ-së në https://qv.kqz-ks.org
ose duke paraqitur kërkesën në Komisionin Komunal të Zgjedhjeve të komunës ku është i regjistruar votuesi.

Lajmet

Serbët festojnë Vidovdanin mes masave të shtuara të Policisë së Kosovës

Published

8 hours ago

June 28, 2025

UBTNews

Grupe serbësh janë drejtuar për në Graçanicë për të nisur festimet e atij që njihet si Vidovdan. Festimet nisën në mëngjes në Manastirin e Graçanicës dhe po vazhdojnë në Gazimestan, ku janë paralajmëruar edhe ardhje të tjera gjatë ditës.

Për të siguruar mbarëvajtjen e aktivitetit, Policia e Kosovës ka ndërmarrë masa të rrepta sigurie. Në hyrje të Gazimestanit, po zhvillohen kontrolle për të gjithë të pranishmit, ndërkohë që njësi të shumta policore janë të vendosura në terren, bashkë me forcat e KFOR-it.

Policia ka njoftuar se masat planifikuese dhe operative janë ndërmarrë për ruajtjen e rendit publik, menaxhimin e trafikut dhe sigurinë kufitare. PK ka apeluar për një manifestim të qetë, duke kërkuar nga qytetarët të shmangin provokimet dhe të respektojnë ligjet dhe udhëzimet e organeve të sigurisë.

Në fillim të këtij muaji, Gjykata Themelore në Prishtinë anuloi vendimin e mëparshëm të komunës së Graçanicës që lejonte shfaqjen e flamurit serb për këtë rast, duke vlerësuar se një veprim i tillë ishte në kundërshtim me legjislacionin në fuqi, pasi Vidovdani nuk është festë zyrtare në Kosovë.

Vidovdani lidhet me Betejën e Kosovës të vitit 1389, ku princi serb Lazar humbi jetën. Në diskursin historik serb, kjo betejë përshkruhet si një humbje ushtarake por një fitore shpirtërore.

Gazimestani është gjithashtu një vend me ngarkesë historike dhe politike, pasi aty presidenti i atëhershëm i Serbisë, Slobodan Millosheviq, mbajti një fjalim të njohur në vitin 1989, i cili shpesh shihet si paralajmërim i konflikteve që pasuan në Ballkan.

Lajmet

PDK me kërkesë të qartë, zhbllokimi i Kuvendit sipas Kushtetueses

Published

8 hours ago

June 28, 2025

UBTNews

Deputeti i Partisë Demokratike të Kosovës, Përparim Gruda tha se në takimin e sotëm të partive politike me kryeministrin në detyrë, Albin Kurti do të diskutohet dalja nga situata e krijuar në Kuvendin e Kosovës.

Gruda tha se kryetari i PDK-së, Memli Krasniqi do të shpreh qëndrimet e kësaj partie se si të zhbllokohet Kuvendi i Kosovës, bazuar në aktgjykimin e Gjykatës Kushtetuese.

Ndërkaq, se a do të arrihet ndonjë marrëveshje apo çështje të tjera siç tha Gruda, do të përgjigjet vetë Krasniqi.

Këtë deklarim Gruda e bëri pas pyetjeve të gazetarëve në konferencën e thirrur nga PDK.

Lajmet

Trump flet sërish për Kosovën e Serbinë: Ishin gati për luftë të madhe, unë e ndala

Published

11 hours ago

June 28, 2025

UBTnews

Presidenti Amerikan Donald Trump për të tretën herë në vetëm një javë është rikthyer të flasë për çështjen e raporteve të tensionuara midis Kosovës dhe Serbisë, teksa bën pasqyrën e konflikteve globale që ai pretendon se ka zgjidhur.

Gjatë një konference për shtyp në Shtëpinë e Bardhë, Trump sërish tha se Serbia dhe Kosova ishin gati të përplaseshin ushtarakisht, madje sipas tij në një luftë të madhe.

“Serbia dhe Kosova ishin gati të përplaseshin. Po shkonin drejt një lufte të madhe”, tha Trump.

Më tej ai zbuloi formulën e tij të suksesit, me të cilën e ndali shpërthimin e një lufte mes dy shteteve në Ballkan, shkruan A2 CNN.

Trump vazhdimisht gjatë javës së fundit, nga momenti kur vendosi armëpushimin midis Izraelit e deri tek samiti i NATO-s në Hagë, i është referuar marrëveshjes Kosovë-Serbi, të arritur në Uashington më 2020 si histori suksesi e ndërmjetësimit të tij.

“Ne e ndalëm Serbinë, e cila ishte gati të fillonte një përplasje”, deklaroi dy ditë më parë Trump.

Ai i referohet marrëveshjes së nënshkruar nga Presidenti i Serbisë, Aleksandër Vuçiq dhe kryeministri i Kosovës, Avdullah Hoti në Zyrën Ovale, më 04.09.2020 të ndërmjetësuar nga Donald Trump.