Lajmet

​Peja e “mbuluar” nga mbeturinat, kompania paralajmëron shtrenjtimin e tarifave

Kompania paralajmëron shtrejtimin e tarifave nga 5 në 6 euro.

Published

on

Gati në çdo cep të qytetit të Pejës mund të hasësh në mbeturina, kjo pasiqë ato hidhen në mënyrë ilegale nëpër trotuaret e rrugëve të këtij qyteti. Përkundër kësaj dukurie, ndërmarrja publike për menaxhimin e mbeturinave po paralajmëron edhe rritjen e tarifave për shërbime nga 5 në 6 euro.

Nga partia opozitare Vetëvendosje në këtë komunë kanë kritikuar kompaninë për menaxhimin e mbeturinave dhe komunën për mosmirëmbajtjen e ambientit. Po ashtu edhe qytetarët ankohen për heqjen e disa kontejnerëve nëpër qytet nga kompania “Ambienti”.

Ndërsa, kryeshefi i ndërmarrjes publike “Ambienti” në Pejë, Diedon Berisha thekson për KosovaPress se kjo kompani po kryen shërbimin në mënyrën më të mirë të mundshme. Mirëpo, sfidë për këtë kompani mbeten deponitë e ilegale të mbeturinave. Megjithatë, Berisha thekson do të bëhet edhe rritja e tarifës për shërbimet.

“Ne si kompani jemi në angazhim 24 orë për qytetarët e Pejës…Ne mendojmë se jemi duke kryer shërbim aq mirë sa të jetë e mundur. Ne si kompani kemi marrë masa për të bërë një rregulluesi të shërbimit tonë, në qytetin e Pejës. Së pari kemi bërë eliminimin e pikave të kontejnerëve publikë të cilët janë. Që nga gushti i vitit të kaluar deri më tash i kemi bërë eliminimin e 15-të pikave, që mendoj se është diçka pozitive për Pejën dhe shihet se rrugët ose vendet ku kanë qenë të ekspozuara tash nuk janë më. Pastërtia është në nivel. Problem mbeten deponitë ilegale, të cilat janë në zona të caktuara. Ajo është vështirësi ose ta quajmë problem, sepse nuk mund t’i mbash nën menaxhim pa pasur kamera, pa pasur inspeksion dhe pa pasur polici aty, dhe për neve si kompani është e vështirë kjo punë”, tha Berisha.

Ndërkaq, zyrtari i subjektit politik LVV, Berat Ganiqi ka akuzuar partitë opozitare në lidhje me strategjitë që po përdorin për mirëmbajtjen e ambientit në këtë komunë. Ai tha se janë hequr të gjithë kontejnerët që kanë ekzistuar në qytetin e Pejës, siç tha ai me qëllim që t’i ikin asaj pamjes së shëmtuar me mbeturina që po bëhet në qytet.

“Deri më tani është duke u bërë një mirëmbajtje e keqe, sepse gjatë gjithë këtyre viteve që është në pushtet LDK-ja dhe PDK-ja, së bashku që po qeverisin komunën e Pejës, është duke u bërë një strategji e gabuar në mirëmbajtjen e ambientit për shkak se janë hequr të gjithë kontejnerët që kanë ekzistuar në qytetin e Pejës, me qëllim që t’i ikin asaj pamjes së shëmtuar që po e bëjnë në qytet. Por marrë shembull, ndërtesën më të lartë në Pejë, “Rokaqielli”, në të kaluarën i ka pasur së paku katër kontejnerë, tani nuk ka asnjë. Banorët e asaj ndërtese nuk kanë se ku t’i hidhen mbeturinat. Obligohen që çdo ditë të bartin mbeturinat poshtë dhe të hiqen. Zyrtarët në ambient të thirrur për këto çështje që janë duke e rregulluar këtë pjesë, por deri më tani nuk është parë ndonjë ndikim i tillë, përkundrazi mua më dhimbsen punëtorët të cilët çdo ditë torturohen, por nuk bëhet një zgjidhje adekuate as për banorët, por as për punëtorët që punojnë”, potencoi Ganiqi.

Sa i përket paralajmërimit për rritjen e tarifave, kryeshefi i kompanisë “Ambienti”, Berisha potencon se shtrenjtimi do ndodhë për shkak se kompania e tyre po operon me humbje financiare.

“Kompania që nga viti 2011/12 e ka çmimin e njëjtë, 5 euro për të kryer shërbim. Ne kemi bërë analizime se kompania jonë është duke operuar me 75 cent humbje për një klient. Kjo do të thotë që ne jemi të detyruar që të rrisim çmimin për mbledhjen e mbeturinave… Rritja e tarifave është e detyrueshme dhe e domosdoshme për qytetin e Pejës dhe gjithë qytetet e tjera të Kosovës… Ne do ta rrisim tarifën 6 euro, që është një tarifë jo fitimprurëse që sjell fitim për kompaninë, por është tarifë e cila mbulon pjesën më të madhe të kostove”, u shpreh Berisha.

Ndërkaq, Ganiqi i VV-së, ka kritikuar edhe vendimin për rritjen e tarifave të faturave për mbeturina. Sipas Ganiqit, në këtë krizë ekonomike, nuk është koha e duhur për një ngritje të tillë.

“Ne si Lëvizje Vetëvendosje, pa dyshim se do jemi kundër shtrenjtimit, për shkak se qytetarët janë duke u ballafaquar me një inflacion të lartë dhe nuk është koha të rriten faturat. Më mirë kishte me qenë të ndalen shpenzimet e bordit të KRM ambientit, të cilët edhe në të kaluarën janë denoncuar nga punëtorët e asaj ndërmarrje, sepse keqpërdorin veturat zyrtare, naftën dhe të mira të tjera, ku me të hollat të ndërmarrjes kanë shkuar edhe në pushime të tyre private”, theksoi Ganiqi.

Qytetarët shprehën të kënaqur me punën e komunës, mirëpo ankohen për rritjen e çmimit të tarifës. Qytetari Jusuf Zekaj tha se në krahasim me komunat e tjera nuk qëndrojnë keq nga ana e mirëmbajtjes së ambientit.

“Në krahasim me komunat e tjera nuk jemi keq. Kryetari Muhaxheri po interesohet më tepër por duhet të vetëdijesohen njerëzit më tepër. Kjo na mungon më së shumti, kultura… Nuk është mirë akoma as kjo komunë por në krahasim me komunat e tjera, unë po shëtis, e kam vërejtur që nuk është dhe aq keq, mirëpo mundet me qenë më mirë gjithmonë. Aty ka vërejtje edhe prej qytetarëve, sepse po i shkatërrojnë kontejnerët. Ata duhet t’i ruajnë dhe duhet të vijnë kontingjent të ri. Komuna duhet të angazhohet më tepër në këtë drejtim”, u shpreh Zekaj.

Lëvdata mbi punën e kryetarit të kësaj komune, pati qytetari Ali Shabanaj. Ai tha se kryetari, nuk ka mundësi që t’i vetëdijësojë njerëzit për veprimet e tyre. Por, sipas tij, largimin e kontejnerëve, e cilëson si një veprim që nuk duhej të merrej.

“Këtu vetë popullata e bën ambientin e ndotur dhe jo që ka faj diçka komuna, aspak komuna nuk ka faj për ambientin. Këtu përsipër për ta shikuar ambientin, e ka “Ambienti”. Është një organizatë, edhe ajo është në kuadër të komunës. Nuk mundet kryetari të shikojë në çdo cep të ambientit. Kryetar më të mirë Peja nuk ka pasur kurrë, kryetari ka punuar jashtëzakonisht mirë dhe punon shumë mirë, për secilin qytetarë pa dallim partie politike… E sa i përket heqjes se kontejnerëve, thotë se është vendim jo i mirë, sepse ka nevojë të ketë dhe më shumë kontejnerë, mbeturinat duhet të hedhën diku. E nëse e bën zvogëlimin atëherë është gabim i madh, nuk është në rregull kjo. Sa më shumë kontejnerë është më mirë për qytetarin, sepse e din se ku duhet të vendoset dhe jo të hedhet në rrugë, por te mbeturinat”, tha Shabanaj.

Edhe qytetarë të tjerë prapa kamerave kanë thënë se qyteti i Pejës nuk ka qenë asnjëherë më parë më i papastër.

Lajmet

​Skëndërbeu luan në Europë, por me të rinjtë

Published

on

Skënderbeu U-19 ka regjistruar një rezultat historik ndaj Aston Vilës U-19, ku ndeshja e vlefshme për fazën gjysmëfinale të kualifikueseve të “UEFA Youth League”, u mbyll me barazim 1-1.

Sfida e parë u luajt në Korçë, ndërsa filloi në orën 16:00 dhe ishin miqtë që kaluan të parët në avantazh, pasi kishin humbur një penallti ndërsa autori I golit mbetet Uilson.

Skënderbeu nuk i la të festonin shumë gjatë, pasi 3 minuta më vonë Ensar Beqiri vendosi baraspeshën ndëerkohë në pjesën e dytë nuk ndryshoi asgjë.

Takimi i kthimit do të luhet më 5 nëntor në Angli. Korçarët janë gati të shkruajnë historinë në Europë me të rinjtë, pasi fillimisht eliminuan Inter D’Eskaldes, shkruan TCh.

Si për ironi të fatit ekipi i parë i Skëndërbeut është i dënuar nga UEFA për 10 vite dhe në edicionin pasardhës pritet të përfundojë periudhën e dënimit I cili nga 10 kualifikime ju shndërruar në 10 vite.

Gjithësesi për të qenë sërish pjesë e kupave të Europës me ekipin A do të duhet si fillim të rikthehen në Kategorinë Superiore e më pas brenda Final Four./S.K/KP/

Continue Reading

Lajmet

​Basha: Do të ishte antikushtetuese nëse nuk do t’i jepja mundësinë Rashiqit për nënkryetar

Published

on

Kryetari i Kuvendit të Kosovës, Dimal Basha ka deklaruar se e drejta për t’u ankuar në Gjykatën Kushtetuese ekziston por e drejta ligjore për të fituar në këtë rast nuk ekziston. Ky deklarim erdhi duke komentuar ankesën e fundit të Listës Serbe për zgjedhjen e Nenad Rashiqit si nënkryetar i Kuvendit.

Basha tha se për atë si kryetar Kuvendi edhe në seancën e parafundit ka konstatuar se Kuvendi ishte konstituar për shkak se u ekzagjeruar mundësia duke ua dhënë nga tri herë secilit mundësinë.

“Në seancën e fundit i ofrova mundësinë shumicës serbe që t’i ofrojnë emrat, nëntë prej tyre nuk i morën votat e mjaftueshëm. Do të ishte antikushtetuese nga unë nëse nuk do t’i jepja mundësinë Nenad Rashiqit. Ky ishte deputeti i dhjetë serb. Unë e hedha votim sepse në të kundërtën do të ishte diskriminim”, tha ai.

Ai shtoi se e drejta për t’u ankuar në Gjykatën Kushtetuese ekziston por e drejta ligjore për të fituar nuk ekziston.

Sipas tij, zgjedhja e Rashiqit është në harmoni të plotë me Kushtetutën, ligjet dhe rregulloren e Kuvendit, ka thënë ai.

“Nuk mendoj që gjykata kushtetuese ka rast. Unë nuk besoj që do të ketë masë ndalese nga Kushtetuesja për shkak se iu është dhënë mundësia nëntë deputetëve, nuk ka marë votat, i dhjeti i ka marrë”, tha Basha./S.K/KP/

Continue Reading

Lajmet

​Ari bie nga nivelet e tij më të larta

Published

on

Çmimet e arit kanë ranë ndjeshëm në tregjet e mallrave. Vlera e arit ra me më shumë se 5%, duke shënuar atë që do të ishte rënia më e madhe ditore e metalit në më shumë se një dekadë, duke çuar në një shitje më të gjerë të metaleve.

Sipas analistes së Goldman Sachs, Lina Thompson, metalet janë rritur deri më tani këtë vit gjatë periudhave të pasigurisë së lartë ekonomike dhe politike, të kryesuara nga tarifat e përhapura të Presidentit Donald Trump dhe inflacioni në rritje.

Metali i çmuar për dorëzim të menjëhershëm (ari spot) ra me 3.9% nga niveli i tij i fundit historik prej 4,114 dollarësh pas mbylljes së tregjeve evropiane të aksioneve.

Ari për dorëzim në dhjetor (Comex) u tregtua me 4,131 dollarë, duke rënë me më shumë se 5%./S.K/KP/Forbes/

 

Continue Reading

Lajmet

​Rënie dramatike e pensioneve invalidore në Kosovë, 26.8% më pak përfitues

Published

on

Agjencia e Statistikave të Kosovës ka njoftuar se numri i përfituesve nga disa skema pensionale dhe të mirëqenies sociale ka pësuar rënie në muajin shtator 2025, krahasuar me të njëjtën periudhë të vitit të kaluar.

Sipas të dhënave zyrtare, rënia më e theksuar është shënuar te përfituesit e pensioneve invalidore të punës, ku numri ka rënë për -26,8%, krahasuar me shtatorin e vitit 2024.

Në raportin e publikuar nga Agjencia e Statistikave të Kosovës theksohet se përveç kësaj skeme, rënie është regjistruar edhe në këto kategori pensionet e Trepçës: -19,7%, skema e ndihmës sociale: -12,1%, pensionet familjare: -10,7%, familjet e dëshmorëve dhe invalidët e luftës: -2,2%, pensionet kontribut-pagues të moshës: -1,7% dhe veteranët e luftës: -0,7%

Megjithatë, në disa skema të tjera është vërejtur rritje e numrit të përfituesve.

Kategoritë me rritje më të madhe përfshijnë pensionet për persona paraplegjikë dhe tetraplegjikë: +9,0%, përkrahja financiare për familjet me fëmijë me aftësi të kufizuara: +8,5%, pensionet e Forcës së Sigurisë së Kosovës: +8,2%, pensionet bazike të moshës: +6,7%, kompensimi për punëtorët e arsimit të viteve ’90: +4,9%, pensionet për persona me aftësi të kufizuara: +4,0, kompensimi për personat e verbër: +1,9%, pensionet e Trupave Mbrojtëse të Kosovës (TMK): +1,3%.

Këto të dhëna pasqyrojnë një dinamikë të ndryshueshme të përfitimeve sociale në vend, me ulje të përfituesve në disa skema tradicionale dhe rritje në skemat që adresojnë nevoja specifike, sidomos për personat me aftësi të kufizuara./S.K/KP/

Continue Reading

Të kërkuara