Lajmet

​Pediatria në kushte të vështira në Mitrovicë, spitali i ri për shkak të mosmarrëveshjeve mbetet i pashfrytëzueshëm

Qenan Qabra, shef i Repartit të Pediatrisë, ka bërë të ditur se sfidat në këtë repart janë të shumta.

Published

5 years ago

on

Reparti i pediatrisë në qytetin e Mitrovicës po ballafaqohet me kushte të vështira. Objekti është i vjetër dhe numri i mjekëve është i pamjaftueshëm për t’i trajtuar fëmijët të cilët bëjnë vizita në këtë repart, ndërsa spitali i ri i pediatrisë që është ndërtuar para pesë vjetësh, mbetet i pashfrytëzueshëm për shkak të mosmarrëveshjes mes donatorit dhe punëkryesit.

Qenan Qabra, shef i Repartit të Pediatrisë në Mitrovicë, ka bërë të ditur për KosovaPress se sfidat në këtë repart janë të shumta. Ai përmend objektin e vjetër dhe kushtet e rënda për punë, numrin e vogël të mjekëve, distancën nga spitali regjional që pamundëson trajtim të mirëfilltë, si sfida të mëdha në ofrimin e shërbimeve cilësore për pacientët.

Sipas tij, në këtë repart, i cili nuk i plotëson kushtet për punë, ndodhet vetëm një dhomë me shtatë shtretër, ku është e pamundur të bëhet trajtimi i fëmijëve me shërbime cilësore 24-orëshe. Ai thotë se spitali i ri i pediatrisë ka përfunduar para pesë vjetësh, por nuk e di arsyen pse akoma nuk po funksionalizohet.

“Sfidat e repartit të pediatrisë janë shumë të mëdha. Së pari, në problemin e kuadrove kemi pasur vështirësi për arsye se kemi qenë numër shumë i vogël sepse pediatërit e mëhershme kanë dalë në pension, brenda një viti pesë pediatër janë pensionuar përnjëherë dhe kemi mbetur një numër shumë i vogël… Sfidë tjetër me rëndësi është objekti në të cilin ne funksionojmë. Ky objekt nuk i plotëson kushtet për punë. Kemi një dhomë ku ndodhen shtatë shtretër që nuk janë të ndarë, dhe trajtimin e fëmijëve këtu nuk e bëjmë në mënyrë të vazhdueshme. Do të thotë nëse ka nevojë për trajtim hospitalor, por vetëm trajtim njëditor. Problemi tjetër është sepse jemi larg objektit spitalor dhe meqë kështu, ne nuk mund të kërkojmë në çdo kohë shërbime konsultative, të cilat na duhen, radiologjinë, laboratorin, konsultat me kirurgë, konsultat me mjekë të profileve të ndryshme, kështu që e kemi shumë të vështirë në kushtet në të cilat funksionojmë… Me shtatë pediatër ne jemi prapë të kënaqur në krahasim me numrin e mëparshëm. Mjekët pediatër në Mitrovicë të cilët shërbejnë janë shumica prej Prishtinës dhe ata udhëtojnë. Kushtet e vështira të udhëtimit, rruga e keqe, vonesat, mos stimulimi i udhëtimit dhe krejt këto ndikojnë që në të ardhmen mjekët mendojnë të shkojnë për të punuar ë Prishtinë nëse gjejnë ofertë më të mirë. Objekti i ri është ndërtuar para pesë vjetësh, donator ka qenë shoqata “Nënë Terezë” me seli në Gjermani. Nuk e di arsyen pse ne nuk kemi kaluar atje”, ka thënë Qabra.

Ndërkaq, Luljeta Zhubi, drejtoreshë e spitalit regjional ‘Sami Haxhibeqiri’ në Mitrovicë, thotë se një mosmarrëveshje mes donatorit dhe punëkryesit ka pamundësuar deri tash funksionalizimin e spitalit të ri të pediatrisë. Ajo theksoi se pavarësisht kostos financiare që kap kjo mosmarrëveshje, ajo është shumë më e vogël në krahasim me objektin dhe shfrytëzueshmërinë e tij.

Zhubi ka potencuar nevojën e madhe për pediatër të rinj në Mitrovicë, duke thënë se kushtet e vështira të punës, sikur zbehin interesimin e tyre për të punuar këtu.

“Objekti është përfunduar në tërësi. Është një objekt shumë i bukur, modern, shumë funksional. Iniciativën për ta ndërtuar e ka pasur shoqata “Nëna Terezë” që vepron në Gjermani. Por, ka ndodhur një mosmarrëveshje si duket në mes të donatorit dhe kryesit të punimeve, është një problem për të cilin është njoftuar edhe SHSKUK-ja dhe Ministria e Shëndetësisë dhe presim shumë shpejt të zgjidhet kjo mosmarrëveshje dhe ta funksionalizojmë objektin… Nuk e di saktësisht shumën, nëse janë 50 mijë ose 100 mijë euro nuk e di saktësisht, por është një shumë që nuk e ka vlerën aq të madhe në krahasim me vlerën sa e ka objekti dhe shfrytëzueshmëria e saj… Nevoja për pediatër të rinj është shumë e madhe. Kemi hapur konkurs dhe kemi kërkuar katër nga ta, por në konkurs janë lajmëruar vetëm dy…Ndoshta është edhe mungesë, por unë për ta sensibilizuar gjendjen, e them gjithmonë se problemi është te kushtet ku punojnë. Secili doktor i do kushtet e mira, dhe ta afirmojë veten me mundësitë më të mira të punës. Objekti ku tani funksionon pediatria nuk i plotëson kushtet dhe si duket pediatrit nuk janë të inkurajuar të punojnë në kushte të tilla”, u shpreh për KosovaPress Zhubi.

Në anën tjetër, zëdhënësi i Ministrisë së Shëndetësisë, për disa herë rresht nuk është përgjigjur në thirrjet e KosovaPress-it rreth kësaj çështjeje.

Related Topics:
Continue Reading

Lajmet

Kurti i bën thirrje Hamzës për takim, do ta votojmë një deputet të PDK-së për nënkryetar të Kuvendit

Published

3 hours ago

on

September 11, 2026

By

Kryeministri në detyrë, Albin Kurti, ka thënë se Lëvizja Vetëvendosje do ta votojë një deputet të PDK-së për nënkryetar të Kuvendit.

Ai ka kërkuar që emrat e kandidatëve të diskutohen në takimet mes partive dhe ka thënë se ende nuk është tepër vonë për të arritur marrëveshje.

“Ne medoemos një deputet të PDK-së do ta votojmë për nënkryetar të Kuvendit. Ne medoemos një deputet ose deputete të LDK-së do ta votojmë për nënkryetar të Kuvendit”, ka deklaruar Kurti.

Kurti ka thënë se dëshiron të takohet me kryetarin e PDK-së, Bedri Hamza, për të diskutuar emrat e kandidatëve.

Ai e ka cilësuar si të keqardhshme braktisjen e procesit të konstituimit të Kuvendit, duke thënë se sot është humbur një mundësi për përmbylljen e tij.

“Jemi vonë, por nuk është tepër vonë. Nëse e bëjmë këtë të dielën, megjithatë do të konsiderojmë që përgjithësisht dhe së bashku ishim të suksesshëm”, ka deklaruar Kurti./A.K/

Continue Reading

Lajmet

Avokati: Kërkojmë shpalljen të pafajshëm të Fazliut, të akuzuarit s’u intervistuan nga ZPS-ja

Published

3 hours ago

on

September 11, 2026

By

Avokati i Fadil Fazliut, David Young ka kërkuar shpalljen të pafajshëm të Fadil Fazliut.

“Kërkojë me respekt që verdikti në këtë rast të korrigjohet dhe të jetë në përputhje me detyrën publike që është pafajësia e z.Fazliu”, tha Young.

Ai tha se gjatë ngritjeve të akuzave në këtë çështje, Prokuroria nuk ka intervistuar asnjëherë të dyshuarit.

 “Pjesa më e madhe e këtyre personave, e këtyre të akuzuarve nuk janë intervistuar asnjëherë. Besoj që z.Kilaj mund të ketë qenë para shumë shumë vitesh por pjesa më e madhe e të akuzuarve nuk janë intervistuar asnjëherë nga Prokuroria. Pra, mund të nxjerrim deduktimin nga kjo që Prokuroria ka marrë qasjen strategjike për të mos i intervistuar ata. Për të mos i intervistuar këta persona lidhur me pretendimet dhe a është kjo mënyrë  e drejtë për të filluar hetimet ap ngritur akuzat?! Unë besoj që jo. Unë thgem qartësisht që nuk është kështu”, tha David Young.

Young parashtroi se Fadil Fazliu duhej të paktën që të intervistohej por atij nuk iu dha mundësia të thoshte atë që kishte për të thënë.

“Nga përvoja juaj e gjerë i nderuar gjykatës ju e dini që normalisht ju jepet prokurorëve dhe hetuesve mundësia për pyetjet që do i bëjnë dëshmitarit për pretendimet dhe lidhur me provat. Në të njëjtën mënyrë, intervista I jep mundësinë të dyshuarit që të jep përgjigjet e tij ndaj pretendimeve që ngrihen kundër tij. Ndonjëherë është mënyrë e mirë për të vërtetuar provat dhe për të verifikuar pretendimet dhe për të parë se si personi përgjigjet”, tha ai.

David Young tha se kjo është mënyrë e duhur për të verifikuar provat nga mënyra se si përgjigjet I dyshuari.

“Por pas intervistave, është praktikë e zakonshme për prokurorët në nivel kombëtar dhe ndërkombëtarë që të marrin vendimin se nëse do të vazhdojnë më tej ndjekjen kundër të dyshuarit, të ngrenë akuza ndaj tij dhe kjo mund të varet nga ajo që është thënë gjatë intervistës apo jo”, tha ai.

Me kaq përfundoi fjalën përfundimtare mbrojtja e Fadil Fazliut për të vazhduar më pas me mbrojtjen e Hajredin Kucit e përfaqësuar nga avokati Alexander Admiral./A.K/

Continue Reading

Lajmet

Avokati i Kuçit: ZPS-ja ndërtoi teorinë e saj mbi gabime në përkthim

Published

3 hours ago

on

September 11, 2026

By

Alexander Admiral, avokat i Hajredin Kuçit, tha se Prokuroria ka ndërtuar teorinë e saj për Hajredin Kuçin mbi transkripta të përkthyera gabim dhe sipas tij versioni i korrigjuar dëshmon tjetër gjë.

Ai tha se Prokuroria ka hetuar Kuçin për më shumë se dy vjet duke kontrolluar shtëpinë e tij, telefonin, kompjuterin dhe mesazhet e tij. 

Ai tha se pas gjithë kësaj, provat e Prokurorisë mbështetën vetëm në një mesazh dhe në një bisedë e regjistruar pas të cilës asnjë dëshmitar nuk është kontaktuar dhe asgjë nuk është ndërmarrë si veprim.

Admiral tha se Prokuroria i ka thënë gjyqtarit të procedurës paraprake se Kuçi i kishte shkruar këto fjalë “Mik, ai të përgëzon për profesionalizimin, idetë e qarta, për vendin, luftën dhe guximin tënd! Bravo!”.

Sipas avokatit, me frazën “ai”, Prokuroria e ndërtoi teorinë e saj dhe në fjalën hyrëse kishte thënë që Kuçi i kishte përcjell përgëzimet e një personi të paemëruar duke shtuar se idetë e atij personi të paemëruar ishin të Fazliut.

“Kjo teori ishte e gabuar. Njësia e përkthimit tani ka dhënë përkthimin e duhur. Mesazhi lexon: Mik, ju përgëzoj unë (veta e parë). Z. Kuçi pra vetë. Nuk ka person të emëruar. Nuk ka mesazh nga askush”, tha Admiral.

Admiral tha se mbrojtja nuk e mohon faktin që është dërguar një mesazh por korrigjimi i përkthimit e ndryshon kuptimin e atij mesazhi.

“Hiqet pretendimi se z.Kuci ka shërbyer si lajmës. Gjithashtu nuk është më e vlefshme baza mbi të cilën është mbështetur Prokuroria për të thënë se ka pasur një plan më të gjerë për të ndërhyrë ndaj dëshmitarëve. Ky nuk është një ndryshim i vogël. Ndryshon kuptimin dhe peshën e mesazhit”, tha ai.

Admiral tha se ky mesazh ishte dërguar nga Kuçi tek Mustafa dhe se ky i fundit e kishte dhënë intervistën përpara se t’i dërgohej mesazhi.

 Sipas tij, deklaratat e Mutafës në Hagë ishin paraqitur në media dhe se Kuçi e pa se çfarë u tha dhe thjesht ia dërgoi dy fjali shokut të tij prej 30 vjetësh./A.K/

Continue Reading

Lajmet

“Liria ka Emër” fton qytetarët në “Marshin për Liri” më 12 shtator

Published

4 hours ago

on

September 11, 2026

By

Platforma qytetare “Liria ka Emër” u ka bërë thirrje qytetarëve që t’i bashkohen “Marshit për Liri”, i cili do të mbahet të shtunën, më 12 shtator, në orën 14:00 në sheshin “Skënderbeu” në Prishtinë, në mbështetje të ish-krerëve të UÇK-së, Hashim Thaçit, Kadri Veselit, Jakup Krasniqit dhe Rexhep Selimit.

Përfaqësuesit e platformës, Eliza Hoxha dhe Ismail Tasholli, kanë bërë të ditur se në marsh janë ftuar liderët e katër partive parlamentare shqiptare. Sipas tyre, pozitivisht janë përgjigjur vetëm kryetari i PDK-së, Bedri Hamza, dhe ai i AAK-së, Ardian Gjini.

Në aktivitet pritet të ketë edhe fjalime nga përfaqësues të shoqatave të dala nga lufta, familjarë të dëshmorëve dhe këngë patriotike.

Organizatorët kanë njoftuar gjithashtu se është siguruar transport me autobusë nga qytete të ndryshme të Kosovës dhe kanë bërë thirrje që qytetarët të marrin pjesë së bashku me familjet.

Marshi zhvillohet pak ditë para shpalljes së vendimit të Gjykatës Speciale ndaj ish-krerëve të UÇK-së, më 16 shtator në Hagë./A.K/

Continue Reading

Të kërkuara