Zëvendësministri i Arsimit, Shkencës, Teknologjisë dhe Inovacionit, Dukagjin Pupovci, ka deklaruar se SBAShK-u duhet të tregohet i duruar sa i përket paralajmërimit të tyre se do të futen në grevë nëse nuk miratohet ligji për paga. Ai tha se sipas informacioneve që kanë ky ligj deri në fund të vitit do të ketë disa rezultate.

Pupovci tha se adresa e SBAShK-ut për të komunikuar me qeverinë është përmes Ministrisë së Arsimit, e që në funksion të kësaj, ai shtoi se kanë takime të rregullta me SBAShK-un.

“Adresa e SBAShK-ut për komunikim me qeverinë është Ministria e Arsimit, ajo është shumë e qartë edhe nga natyra e punës që bënë SBAShK-u edhe nga kontrata kolektive, pra ne kemi takime të rregullta me SBAShK-un. Ata kanë shprehur pakënaqësi rreth ligjit të pagave sa po mund të kuptojë që është diçka që vlen për të gjithë sektorin publik dhe nuk ka të bëjë vetëm me arsimin. Sipas informacioneve që kam është duke u punuar në këtë ligj dhe besoj që deri në fund të këtij viti do të ketë edhe disa rezultate fillestare dhe disa afate brenda të cilave do të mund të aprovohet ligji. Të gjithë e dimë fatin e ligjit të kaluar, i cili është aprovuar në Kuvend, por pastaj është shfuqizuar nga Gjykata Kushtetuese dhe nuk do të duhej që edhe ligji tjetër të jetë i tillë që të shfuqizohet nga Gjykata. Prandaj, në këtë aspekt besoj që edhe SBAShK-u duhet ta tregojë durimin e duhur”, tha ai.

Pupovci tha se mbajtja e grevës është e rregulluar me anë të ligjit në Kosovë, por që tha se nuk dëshiron ta paragjykojë se do të vije deri te një skenar i tillë. Ai tha se Kosova duhet ta ketë një ligj të pagave, por që u shpreh se kjo çështje po merr kohë të përfundojë edhe për shkak të mospajtimeve nga ana e sindikatave të ndryshme.

“Nuk dua ta paragjykojë se do të ndodh skenari i grevës, natyrisht edhe ne edhe SBAShK-u besoj se do të bëjmë çmos që të mos vije deri tek një situatë e tillë. Pra, sa po kuptoj prej kësaj nëse bëhet fjalë për ligjin për pagat nëse bash vjen puna deri tek greva nuk do të jetë vetëm SBAShK-u që do të bëjë grevë, por do të mund të ndodhë që edhe sindikatat e tjera mund t’i kenë kërkesat e tyre. Prandaj, edhe ekziston dialogu social, ne duhet të ulemi bashkë me sindikatat edhe ta shohim cilat janë mundësitë buxhetore të shtetit dhe cilat janë kërkesat e tyre dhe aty të gjendet një harmoni. Do të thotë askush nuk po i ik realitetit që Kosova duhet ta ketë një ligj të pagave, mirëpo kjo çështje po merr kohë pikërisht për shkak që nuk po arrihen pajtime. Juve ju kujtohet që vitin e kaluar kur ka qenë ligji i pagave vet SBASHK-u ka kundërshtuar mjaftë shumë koeficientet të cilët janë përcaktuar për kategori të mësimdhënësve”, tha ai.

Në konferencën e rregullt për media të MAShTI, zëvendësministri bëri të ditur se procesi mësimor në të gjitha shkollat është duke u zhvilluar në skenarin e rikthimit.

Pupovci u shpreh se mësimi ditën e hënë do të mbahet online në ato shkolla që do të përdoren si qendra të votimi për balotazhin e të dielës.

“Në ato shkolla ku do të bëhet votimi, pra që janë qendra votimi të hënën me datën 15 nëntor mësimi mbahet me skenarin C, do të thotë mësimi mbahet nga distanca për shkak që nevojitet që të sigurohet dezinfektimi dhe ajrosja e lokaleve gjë të cilën do ta bëjnë autoritetet komunale”, tha ai.

Zëvendësministri Dukagjin Pupovci, ka konfirmuar se studentët do të paguajnë paraqitjen e provimit për herën e dytë, e kjo sipas tij ka ndodhur për qëllim që studentët të mos paraqesin provimet vetëm për ta provuar fatin.

“Kjo është shumë zyrtare sepse në udhëzimin administrativ të fundit për pagesat e studentëve është vendosur kjo normë, do të thotë që të gjitha provimet me rastin e paraqitjes së parë janë pa pagesë për të gjitha nivelet, bachelor, master dhe doktoratë. Mirëpo, në rastin kur përsëritet provimi atëherë aplikohen në këtë rast disa tarifa të vogla sa e di unë për bachelor është 1 euro, për master mund të jetë 1.50 euro nuk më kujtohet dhe për doktoratë mund të jetë pak më shtrenjtë por nuk është më shumë se 3 ose 4 euro. Qëllimi i kësaj është që studentët të mos paraqesin provime veç sa për ta sprovuar fatin”, tha ai.

Sa i përket deklarimit të Qendrës NARIC se janë mbi 20 mijë diploma të pavlefshme të lëshuara nga kolegjet private, Pupovci tha se nuk kanë informacione që është ky numër i diplomave të pavlefshme.

“Të gjitha ato diploma që janë lëshuar nga institucionet e akredituara dhe licencuara janë diploma të vlefshme aty nuk kemi çka të flasim. Tani paraqitet problemi kur kërkohet që studenti të shkojë jashtë vendit, atëherë parashihet një procedurë që MASHTI dhe ajo e Punëve të Jashtme duhet ta verifikojnë diplomën dhe shpesh herë këto diploma nuk mund të verifikohen për shkak të lëshimeve që janë bërë gjatë procesit. Për shembull nuk janë dorëzuar me kohë librat amëz ose nuk janë dorëzuar fare dhe kjo ka ndodhur si në institucionet private ashtu edhe në publike. Në raste të tilla qendra NARIC nuk mund ta verifikojë diplomën sepse nuk e di nëse studenti ka qenë e regjistruar në mënyrë legjitime, kjo nuk do të thotë që diploma është e pavlefshme, kjo do të thotë se dokumentacioni i studentit nuk është në rregull. Për ta zgjidhur këtë problem ne jemi në proces të formimit të një komisioni i cili do t’i shqyrtojë kërkesat individuale të studentëve në mënyrë që të adresohet ky problem”, tha ai.

Në fushën e arsimit të lartë, Pupovci tha se dje kanë dalë rezultatet për bursat STEM që u dedikohen grave dhe vajzave, për çka tha se janë 812 vajza dhe gra që kanë përfituar nga 1000 euro bursë.

Po ashtu, ai bëri të ditur se më 5 nëntor ka përfunduar konkursi për ndarjen e bursave për nxënësit e komuniteteve rom, ashkali dhe egjiptian, ku do të përfitojnë 500 nxënës të shkollave të mesme.