Shtetet e Bashkuara do t’u ofrojnë termine me përparësi për vizë tifozëve që kanë bileta për Kupën e Botës 2026, vendim ky që erdhi pas takimit midis presidentit amerikan, Donald Trump, dhe presidentit të FIFA-s, Gianni Infantino.

FIFA njoftoi krijimin e sistemit të ri FIFA PASS, i cili synon të thjeshtojë procesin e aplikimit për viza dhe të rrisë pjesëmarrjen ndërkombëtare në turneun që zhvillohet verën e ardhshme në SHBA, Kanada dhe Meksikë. Turneu do të mbahet në 16 qytete dhe do të marrë pjesë 48 ekipe.

Infantino tha se SHBA-të janë të gatshme të mirëpresin tifozët nga e gjithë bota dhe se interesi për bileta është i madh, me mbi një milion të shitura deri tani.

Sekretari amerikan i Shtetit, Marco Rubio, bëri të ditur se tifozët me bileta mund të marrin një intervistë për vizë brenda 6–8 javësh nga aplikimi. Ai u bëri thirrje tifozëve që të aplikojnë sa më shpejt.

Aktualisht, shumë vende kanë pritje të gjata për termine vizash. Në Kolumbi pritja arrin deri në 11 muaj, në Mexico City rreth 9 muaj e gjysmë, ndërsa në Toronto deri në 14 muaj për banorët jo-qytetarë.

Nuk dihet ende nëse lehtësimet vlejnë edhe për shtetasit e vendeve të ndaluara të udhëtojnë në SHBA sipas urdhrit ekzekutiv të qershorit, që përjashton vetëm atletët dhe stafet, por jo tifozët.

Shumë qytetarë nga Evropa, Japonia, Australia dhe vende të tjera që janë pjesë e programit të heqjes së vizave mund të hyjnë në SHBA deri në 90 ditë pa vizë.

Në Kupat e Botës në Rusi dhe Katar, një biletë shërbente si dokument hyrjeje për tifozët, ndërsa për turneun e vitit 2026 tifozët do të duhet të respektojnë rregullat e zakonshme të vizave të SHBA-së./S.K/KP/

Futbollisti i Kombëtares së Kosovës Albian Hajdari ka folur sërish për vendimin e tij për t’iu bashkuar Kosovës, ku në një intervistë ai theksoi se zgjedhja nuk ka qenë e lehtë dhe është marrë pas konsultimeve me familjen dhe miqtë.

22-vjeçari, i cili këtë verë kaloi te TSG Hoffenheim dhe u vendos shpejt si titullar i rregullt, përshkroi fillimin e tij në Bundesligë si jashtëzakonisht emocionuese dhe frymëzuese.

Ai shtoi se e vlerëson shumë mundësinë për të luajtur kundër talenteve më të mira evropiane, ndërsa pranoi se nga Zvicra i mungojnë disa gjëra:

“Më mungon dielli në Ticino dhe paqja dhe qetësia e shëtitjeve pranë liqenit. Por padyshim jo autostradat në Zvicër.”, tha ai.

Zgjedhja për të luajtur me Kosovën ka shkaktuar reagime të shumta në Zvicër, por Hajdari thotë se e kupton interesimin, dhe pos tjerash ai shpjegoi se vendimi ka qenë i menduar gjatë.

Ai mohoi gjithashtu se garancia për një vend titullari ka ndikuar në vendimin e tij:

“Absolutisht asnjë ndikim, nuk ishte një temë në procesin e vendimmarrjes.”, përfundoi Hajdari./S.K/KP/

Ministria e Industrisë, Ndërmarrësisë dhe Tregtisë, në bashkëpunim me KIESA-n, organizoi sot forumin “Kosova–Japan Business Forum”, me qëllim të zgjerimit të bashkëpunimit ekonomik ndërmjet dy vendeve.

Ministrja në detyrë Hajdari, theksoi se Japonia është një partner i rëndësishëm për Kosovën në fushën e ekonomisë dhe edukimit.

Ajo vuri në dukje rritjen e shpejtë ekonomike të vendit, përmirësimin në indeksin e korrupsionit, klimën e favorshme të biznesit dhe potencialin në rritje në inovacion dhe teknologji.

Sipas saj, pesë kompani japoneze tashmë veprojnë në Kosovë, ndërsa tregtia dypalëshe po rritet vazhdimisht.

“Ky forum synon forcimin e lidhjeve ekonomike ndërmjet vendeve tona dhe zhvillimin ekonomik. Japonia është një mik i rëndësishëm për Kosovën për ekonominë dhe edukimin. Tani në këtë forum me dy shtete synojmë të thellojmë këtë miqësi edhe në fushën e ekonomisë. Kosova është një ekonomi dinamike me një fuqi punëtore të re dhe konkurruese dhe me një klimë të favorshme për biznes. Vendi ynë ka shënuar rritje të shpejtë ekonomike me një mesatare 6,2 për qind, një nga më të lartat në rajon. Kemi përmirësuar dukshëm rezultatin në indeksin e korrupsionit. Kosova ofron edhe kushte fiskale, pozita jonë strategjike në Ballkan rrit potencialin logjistik. Kosova po shfaqet si qendra e inovacionit dhe teknologjisë. Bashkëpunimi ekonomik me Japoninë ka potencial më të madh për shfaqjen e potencialit për të dy vendet. Eksportet dhe importet tona po rriten në mënyrë të qëndrueshme, janë 5 kompani japoneze të regjistruara në Kosovë. Jam e bindur se prezantimet e sotme do të sjellin rezultate konkrete për bizneset e dy vendeve”, ka theksuar Hajdari.

Ambasadori i Japonisë në Kosovë, Kiminori Iwama, tha se Kosova dhe Japonia ndajnë vlera dhe respekt të ndërsjellë, duke theksuar se ky takim individual mes bizneseve të dy vendeve është një hap i rëndësishëm drejt thellimit të marrëdhënieve ekonomike.

Ai shprehu mirënjohje për KIESA-n dhe JETRO-n për organizimin e forumit.

“Ka kaq shumë aspekte që duhet t’i eksplorojmë në marrëdhëniet dypalëshe të biznesit, sepse Kosova dhe Japonia ndajnë vlera, ndajnë respekt të ndërsjellë dhe ndajnë përkushtimin ndaj zhvillimit të qëndrueshëm. Por njëkohësisht, dua të theksoj se kjo është hera e parë që takohemi individualisht, së bashku me partnerët e biznesit nga Japonia dhe partnerët nga Kosova. Dhe besoj fuqimisht se kjo duhet të vazhdojë të zhvillojë më tej marrëdhëniet midis dy sektorëve të udhëheqësve të biznesit. Duke shfrytëzuar këtë mundësi, dëshiroj të shpreh mirënjohjen time të sinqertë për KIESA-n dhe të gjitha institucionet e tjera përkatëse në Kosovë, si dhe për JETRO-n, për organizimin e këtij eventi të rëndësishëm”, theksoi ai./S.K/EO/

Moti i lig në Borizanë të Krujës, ka shkaktuar përmbytje të shumta në lagjen “Hima” pranë shkollës.

Banorët thanë se janë përmbytur shtëpi, toka, ullinj, duke sjellë kështu dëme të mëdha.

Sipas banorëve, përmbytja vjen si pasojë e inerteve të hedhura pa kriter dhe se kanë bllokuar grykën e përroit, i cili ka dalë nga shtrati si pasojë e shiut./S.K/EO/