Pesë persona janë qëlluar në një qendër edukimi për të rritur në Suedi, tha policia më 4 shkurt.

Agjencia suedeze e lajmeve, TT, raportoi, pa specifikuar burimet, se sulmuesi ka bërë vetëvrasje. Policia nuk ka konfirmuar këto raportime, por pritet të mbajë një konferencë për media.

Qendra e edukimit për të rritur gjendet në qytetin Orebro, rreth 200 kilometra në perëndim të Stokholmit.

Ende nuk është e qartë nëse policia e ka përfshirë edhe keqbërësin në mesin e pesë personave të qëlluar.

Videot nga vendi i ngjarjes kanë shfaqur prani të madhe policore dhe të autoambulancave. Shkalla e lëndimeve që kanë pësuar viktimat po ashtu ende nuk është e qartë.

Studentët po strehohen në ndërtesat afër. Pjesë të tjera të shkollës janë evakuuar pas dhunës.

“Raportimet për dhunë në Orebro janë shumë serioze. Policia gjendet në vendin e ngjarjes dhe operacioni është duke u zhvilluar. Qeveria është në kontakt të ngushtë me policinë dhe po përcjell nga afër zhvillimet”, tha për agjencinë e lajmeve TT ministri i Drejtësisë, Gunnar Stormmer./REL/

Shtëpia e Bardhë ka mbështetur qëndrimin e Elon Musk për mbylljen e Agjencisë për Zhvillim Ndërkombëtar (USAID), duke denoncuar abuzimet dhe shpërdorimet që janë bërë me paratë e taksapaguesve amerikanë. Zëdhënësja e Shtëpisë së Bardhë, Karoline Leavitt, theksoi disa nga shpenzimet e diskutueshme të USAID, si investimet për projekte që ajo i konsideroi qesharake dhe në disa raste, dashakeqe.

Një nga këto projekte përfshinte 1.5 milionë dollarë për avancimin e diversitetit, barazisë dhe përfshirjes në vendet e punës në Serbi, si dhe shpenzime për projekte të tjera të ngjashme në vende të ndryshme, si Irlandë, Kolumbi dhe Peru.

Leavitt shprehu shqetësimin se këto projekte ishin jashtë çdo logjike dhe se si taksapaguesja amerikane nuk dëshironte që paratë e saj të shpenzoheshin për këtë lloj aktiviteti. Ajo gjithashtu përmendi se Elon Musk, i ngarkuar nga Presidenti Trump, kishte si qëllim largimin e mashtrimit dhe shpërdorimit nga qeveria federale amerikane.

Ndërkohë, Kreu i Departamentit për Efiçencë Qeveritare, Elon Musk, ka akuzuar USAID si një organizatë të kalbur dhe kriminale, duke pohuar se presidenti Trump ka shprehur dëshirën për mbylljen e saj. Nga ana tjetër, Sekretari i Shtetit, Marco Rubio, theksoi se disa funksione të USAID do të vazhdojnë të operojnë si pjesë e politikës së jashtme të SHBA-së, por ato duhet të jenë në linjë me programin qeveritar. Ai theksoi gjithashtu se USAID ka pasur shqetësime për një periudhë të gjatë dhe duhet të merrte udhëzime më të qarta nga Departamenti i Shtetit.

Ligjvënësit demokratë, nga ana tjetër, kundërshtuan përpjekjen për mbylljen e USAID, duke e quajtur atë një veprim të paligjshëm dhe antikushtetues, që mund të dëmtonte sigurinë kombëtare dhe ndikimin e SHBA-së në nivel global./UBTNews/

Agjencia Ndërkombëtare për Kërkimin e Kancerit (IARC) në kuadër të Organizatës Botërore të Shëndetësisë (OBSH) ka publikuar një studim shqetësues mbi rritjen e rasteve të kancerit të mushkërive, veçanërisht te individët që nuk kanë pirë kurrë duhan. Sipas këtij studimi, kanceri i mushkërive te ata që nuk janë duhanpirës tashmë është shkaku i pestë më të madh i vdekjeve nga kanceri në botë.

Një nga faktorët kryesorë që po kontribuon në këtë rritje është ndotja e ajrit. Studimi tregon se kanceri i mushkërive, i njohur si adenocarcinoma, ka shfaqur një rritje të dukshme, duke u bërë forma më dominueshëm e sëmundjes tek meshkujt dhe femrat globalisht. Në vitin 2022, rreth 200,000 raste të adenocarcinomës ishin të lidhura me ekspozimin ndaj ndotjes së ajrit.

Studimi, i botuar në revistën Lancet Respiratory Medicine, ka identifikuar Azinë Lindore, veçanërisht Kinën, si rajonin me numrin më të lartë të rasteve të adenocarcinomës të shkaktuara nga ndotja e ajrit. Dr. Freddie Bray, autori kryesor i studimit, theksoi nevojën urgjente për monitorim të rrezikut në ndryshimin e formave të kancerit të mushkërive dhe përpjekje të mëtejshme për kontrollimin e ndotjes./UBTNews/

Richard Grenell ka marrë zyrtarisht detyrën e emisarit për misione të posaçme të Shteteve të Bashkuara të Amerikës.

Urdhrin ekzekutiv e nënshkroi presidenti amerikan Donald Trump të hënën në mbrëmje, sipas kohës lokale në SHBA. Ai e lavdëroi Grenellin për rolin që pati në vendimin për shuarjen e zjarrit në Los Angeles.

“Unë e dërgova Grenell në Kaliforni me një mision të qartë—të ndizte ujin. Nuk ishte e lehtë, duhej të kalonim përmes shumë ambientalistëve që po shkaktonin probleme, por e bëmë. Tani, Kalifornia ka ujë praktikisht të pakufizuar, diçka që ata duhej ta kishin pasur vite më parë. Fola me Guvernatorin Neësom, dhe ai është shumë i kënaqur me rezultatet. Është fatkeqësi që nuk e kishim këtë ujë dy muaj më parë, por është një hap i madh, dhe puna e Grenell ka luajtur një rol thelbësor në realizimin e tij”, ka thënë Trump.

Në administratën e shkuar të Trumpit, Grenelli ishte emisar i posaçëm për dialogun Kosovë-Serbi.

Nën ndërmjetësimin e tij Kosova dhe Serbia më 4 shtator 2020 patën nënshkruar marrëveshjen e ashtuquajtur për normalizim ekonomik. Kjo marrëveshje përfshiu edhe njohjen e pavarësisë së Kosovës nga Izraeli.

Pas rikthimit në Shtëpinë e Bardhë, Trump ka emëruar disa personalitete në pozita të ndryshme, por jo edhe një emisar të posaçëm për dialogun Kosovë-Serbi. Grenell është emëruar emisari për Misione të Posaçme i SHBA-së, që mund të përfshijë edhe Kosovën.

E një ditë më parë, Grenell ka thënë se bashkësia ndërkombëtare është e bashkuar kundër Kurtit. Këto deklarata të tij erdhën pas atyre të kryeministrit Albin Kurti, i cili ka thënë se Kosova ka marrëdhënie të shkëlqyera me ShBA-në.