Aktualitet

​Mirëpritet kërkesa e PE-së për njohje reciproke, konsiderohet si ndryshim i kursit të BE-së për dialogun

Published

3 years ago

on

Spektri politik në Kosovë dhe shoqëria civile e kanë mirëpritur kërkesën e qartë të Parlamentit Evropian se marrëveshja përfundimtare, ndërmjet Kosovës dhe Serbisë duhet të përfundojë me njohje reciproke. Miratimi i sotëm i raportit nga Komisioni për Politikë të Jashtme të PE-së, shihet edhe si ndryshim i kursit të BE-së për dialogun. Kësisoj, i kërkohet Qeverisë së Kosovës që të shtyjë përpara këtë narracion të Parlamentit Evropian dhe të përfundojë dialogu me njohje të ndërsjellët.

Deputeti i Lëvizjes Vetëvendosje, i cili është edhe kryetar i Komisionit për Punë të Jashtme dhe Diasporë, Haki Abazi, se vetëm përmes një gjuhe të tillë duhet t’i bëhet e qartë Serbisë se pa njohjen e Kosovës s’ka integrim evropian.

“Pjesa tjetër e deklarimit në rezolutë për njohën e dyanshme dhe njohjen e Kosovës nga Serbia është zhvillim jashtëzakonisht i rëndësishëm, pasi për herë të parë në Parlamentin Evropian, dialogun e shohin si proces për përfundimin e njohjes së Serbisë për shtetin e pavarur të Kosovës. Kjo shënon një shkallë tjetër të vetëdijesimit dhe përcaktimit politik përbrenda Parlamentit Evropian, për atë se çfarë Serbia prezanton në këtë proces të dialogimit. Nëse do të lihej çfarëdo lloj mjegullie brenda gjuhës, sigurisht nuk do t’i kontribuonte asaj qartësisë së mesazhit që duhet të shkojë në Beograd, sidomos pas mos vendosjes së sanksioneve ndaj Rusisë dhe qëndrimit dual që Serbia po bënë karshi BE-së. Kosova është e patejkalueshme për Serbinë, mendoj se sa më shumë që kemi gjuhë të tillë eksplicite, aq më e qartë do të jetë për Serbinë që nuk do të ketë lëvizje drejt integrimit evropian pa njohjen e Kosovës”, deklaron Abazi.

Kërkesën për njohje reciproke e konsideron të mirëseardhur edhe deputetja e LDK-së, Rrezarta Krasniqi.

Krasniqi, e cila është edhe kryetare e Komisionit për Integrime Evropiane, thotë për KosovaPress se këto mesazhe Qeveria e Kosovës duhet t’i merr seriozisht në mënyrë që dialogu të përmbyllet me njohje reciproke.

“Është bërë e qartë se marrëveshja mes Kosovës dhe Serbisë duhet të jetë me njohje reciproke, edhe pse si vendim është i vonuar, mirëpo është në kohën kur i duhet më së shumti Kosovës. Gjithashtu, Qeveria duhet të merr punën e dialogut më seriozisht, gjithmonë duke qenë në koordinim me ShBA-të. Me këtë rast Serbia duhet të dijë se nuk ka zgjidhje dhe alternativë tjetër dhe se e vetmja rrugë e vetme është njohja reciproke”, shton ajo.

Nga ana tjetër, Arbër Fetahu nga Grupi për Studime Juridike dhe Politike, thotë se vendimi i sotëm i Parlamentit Evropian është një zhvillim shumë pozitiv, i cili mund të ndryshojë edhe kursin zyrtar të BE-së për dialogun Kosovë-Serbi.

“Është zhvillim mjaft pozitiv dhe është një zhvillim që e ndryshon edhe kursin në Bashkimin Evropian. Ndonëse nuk është zëri zyrtar i BE-së, Parlamenti Evropian, është një instancë e rëndësishme që e vë në fokus që njohja e ndërsjellët është rezultati përfundimtar ndërmjet Kosovës dhe Serbisë. Pra dialogu për normalizim të marrëdhënieve duhet të përfundojë me këtë epilog. Ky është një zhvillim pozitiv dhe mund të ngreh dinamike të reja, pasi s’kemi pasur përmendje kaq eksplicite që dialogu duhet të përfundojë me njohje ose të ketë në qendër njohjen reciproke. Kemi një shndërrim të narracionit dhe kursit të Bashkimit Evropian, i cili lë të nënkuptohet se kjo mund të jetë edhe qëndrimi i BE-së në të ardhmen, ose mes rreshtash mëtohet që dialogu të ketë si epilog njohjen reciproke mes dy vendeve. Kjo është një atribut shtesë që Qeveria e Kosovës të kapitalizojë dhe shtyjë përpara këtë narracion të PE-së dhe ushtrojë dialog direkt veç e veç që të bëjnë pjesë të narracionit të tyre se zgjidhja përfundimtare është njohja e ndërsjellët”, thotë ai.

Të martën, Komisioni i Parlamentit Evropian për Politikë të Jashtme (AFET) miratoi raportin për Kosovën, ku përveç kërkesës për njohje reciproke në dialog, bëri thirrje sërish për liberalizim të vizave.

Related Topics:
Continue Reading

Bota

Von der Leyen: Evropa duhet të forcojë mbrojtjen, të pranojë Ukrainën në BE

Published

2 days ago

on

May 30, 2025

By

Presidentja e Komisionit Evropian, Ursula von der Leyen, ka theksuar se Evropa duhet të mbrojë pavarësinë e saj duke rritur shpenzimet për mbrojtjen dhe duke integruar Ukrainën në Bashkimin Evropian.

Ajo ka përmendur katër detyrat kryesore që BE-ja duhet të realizojë për të arritur këto synime, duke përfshirë forcimin e kapacitetit të mbrojtjes, rritjen e inovacionit për rritjen ekonomike, zgjerimin e BE-së dhe forcimin e demokracisë për të mbrojtur shtetet anëtare nga kërcënimet e brendshme dhe të jashtme.

Sipas von der Leyen, një nga arritjet më të mëdha është angazhimi për të ofruar deri në 800 miliardë euro fonde për mbrojtjen, një veprim që, siç tha ajo, ishte i pamundur vetëm pak vite më parë.

“Fakti që tani po ofrojmë deri në 800 miliardë euro fonde për mbrojtjen ishte i pamundur vetëm pak vite më parë,” theksoi Presidentja e Komisionit Evropian. “Po e bëjmë këtë sepse duam të mbrojmë paqen me të gjitha forcat tona.”

Von der Leyen paralajmëroi gjithashtu se një rend i ri ndërkombëtar do të shfaqet deri në fund të kësaj dekade, dhe se Evropa duhet të luajë një rol aktiv në formësimin e këtij rendi të ri për të shmangur pasojat e tij për kontinentin dhe për botën.

Ajo theksoi se zgjerimi i BE-së është një detyrë kyçe, duke e konsideruar anëtarësimin e Ukrainës, Moldavisë, vendeve të Ballkanit Perëndimor dhe Gjeorgjisë si një hap të rëndësishëm për forcimin e Bashkimit Evropian.

“Jam thellësisht e bindur se historia tani po na thërret. Ashtu si në vitin 1989, kur era e ndryshimit përfshiu Evropën,” përfundoi von der Leyen, duke sugjeruar se momenti aktual është një mundësi për ndryshime thelbësore në rajon.

Continue Reading

Bota

Meloni vizitë në Kazakistan, nënshkruhen marrëveshje në vlerën 4 miliardë euro

Published

2 days ago

on

May 30, 2025

By

Italia dhe Kazakistani kanë nënshkruar një sërë marrëveshjesh me vlerë 4 miliardë euro gjatë një vizite të kryeministres italiane Giorgia Meloni në Astana.

Marrëveshjet ishin në një sërë sektorësh, duke përfshirë naftën dhe gazin, energjinë e rinovueshme dhe menaxhimin e ujit.

Meloni tha se nuk e konsideronte vizitën e saj “thjesht një formalitet, por thelbësor”.

“Italia ishte vendi i parë i BE-së që vendosi të investonte në marrëdhëniet me Azinë Qendrore dhe shtetet anëtare të saj individuale, duke krijuar një format të qëndrueshëm për shkëmbimin e ideve”, vazhdoi Meloni.

Kryeministrja italiane shtoi se Samiti BE-Azi Qendrore i mbajtur në prill kishte rritur marrëdhëniet midis rajoneve.

Continue Reading

Bota

Kina: SHBA të shmangë tensionet dhe të ndalojnë shitjen e armëve Tajvanit

Published

2 days ago

on

May 30, 2025

By

Çështja e Tajvanit është në thelb të interesave themelore të Kinës dhe është vija e parë e kuqe që nuk duhet të kalohet në marrëdhëniet Kinë-SHBA, deklaroi zëdhënësi i Ministrisë së Jashtme kineze, Lin Jian.

Jiang komentoi mbi disa raporte të mediave ndërkombëtare se Uashingtoni synon të rrisë shitjet e armëve në Taipei përtej 18,3 miliardë dollarëve të arritur gjatë mandatit të parë të presidentit Donald Trump.

”Pekini kundërshton fuqimisht shitjet e armëve amerikane në rajonin e Tajvanit pasi kjo çon në një përshkallëzim”, theksoi ai.

”Shtetet e Bashkuata të Amerikës duhet të shmangin faktorët e rinj të tensionit me ne”, theksoi Jiang./atsh

Continue Reading

Bota

Kina do të rifillojë importet e produkteve të detit nga Japonia

Published

2 days ago

on

May 30, 2025

By

Kina ka rënë dakord të fillojë procedurat për të rifilluar importet e produkteve të detit nga Japonia, tha një zyrtar japonez të premten, sipas raporteve të mediave lokale.

“Të dy vendet kanë rënë dakord për ‘kërkesat teknike për rifillimin e eksporteve të produkteve të detit’ drejt Kinës“, citoi Agjencia e Lajmeve Kyodo Sekretarin e Përgjithshëm të Kabinetit, Yoshimasa Hayashi.

Sipas saj, pritet që Kina të lëshojë gjithashtu një njoftim për lehtësimin e ndalimit të përgjithshëm, i cili është në fuqi që nga viti 2023.

Kina vendosi një ndalim të plotë të importeve të produkteve të detit nga Japonia menjëherë pasi filloi lëshimi i ujit radioaktiv të trajtuar nga centrali bërthamor i dëmtuar në Fukushima, në gusht të vitit 2023.

Ndalimi u vendos për të mbrojtur shëndetin e konsumatorëve dhe për të parandaluar ndotjen e mundshme, shkruan Anadolu.

Në shtatorin e kaluar, Kina ra dakord të rifillojë importet e produkteve të detit nga Japonia me kusht që vende të treta, përfshirë edhe vetë Kinën, të marrin pjesë në monitorimin e shkarkimit të ujit të trajtuar radioaktiv nga centrali i Fukushima-s në det./kosovapress

Continue Reading

Të kërkuara