Lajmet

​Lufta hibride, rreziku real që paraqet për Kosovën

Published

5 years ago

on

Shtete të ndryshme përdorin mjete të ndryshme për shtrirjen e ndikimit të tyre ideologjik, politik e ekonomik. Jemi në shekullin ku betejat për ndikim nuk zhvillohen në fushën e dyluftimit, por me anë të metodave të ndryshme.

Dezinformimi, propaganda, kërcënimet kibernetike, fushatat e egra diplomatike, sabotimet e shantazhet, e një mori metodash të tjera që njihen ndryshe si “lufta hibride”, kanë zënë vendin e përplasjes ballë për ballë, duke zënë vendin e konfrontimit fizik, por me qëllimin e njëjtë për dominim.

Edhe Kosova, sikurse të gjitha vendet e tjera, nuk është imune ndaj kësaj dukurie andaj për ballafaqimin sa më efikas të kësaj lufte, ajo shfrytëzon mekanizmat e saj të sigurisë, e në veçanti Agjencinë e Kosovës për të Inteligjencë – AKI.

Njohës të fushës së sigurisë thonë për KosovaPress se Kosova ka kapacitete për frenimin e luftës hibride, porse si shtet i ri nevojitet investim më i madh në këtë aspekt. E krejt kjo duke marrë parasysh tendencat serbo-ruse për dominim në Ballkan, e sidomos në Kosovë.

Eksperti i çështjeve të sigurisë, Agim Musliu thotë se Kosova është e kompletuar në segmentin e sigurisë. Porse, tërheq vëmendjen se nuk ka segmente të identifikimit të luftës hibride në të gjitha institucionet.

Sipas Musliut, në çdo institucion të Republikës të Kosovës duhet të ekzistojë një bërthamë e cila identifikon sulmet hibride, por gjithmonë në koordinim me segmentin e sigurisë e nëpërmjet të cilës zhvillohet aksioni i kundërmasave.

“Kosova është e kompletuar sipas mendimit tim në segmentin e sigurisë, por ka një segment të luftës kibernetike në të gjitha institucionet, po ashtu edhe në institucionet e sigurisë. Por, ekskluzivisht për atë që po më pyesni ju (lufta hibride), institucioni më përgjegjës është ai i shërbimit sekret apo AKI. Dhe me një siguri të plotë ju them se kapacitetet brenda AKI-së janë të përmbushura dhe me efikasitet të plotë aq sa i duhet Kosovës, institucioneve të saj më një saktësi dhe një përgjegjësi optimale gjer më sot. Sa i përket institucioneve të tjera, nuk mund të them se kanë institucione të ngritura ose kapacitete të ngritura brenda institucionit përkatës. Por, atë që kemi parë deri më sot, në Kosovë nuk ka mundur të depërtojë kjo luftë speciale, sigurisht e udhëhequr nga Rusia dhe Serbia në këtë rajon, në këtë pjesë të Evropës dhe Ballkanit, që do të thotë në Kosovë më së paku është prezente kjo luftë sa i përket dëmtimit të imazheve apo të institucioneve”, thotë ai.

I të njëjtit mendim është edhe Mentor Hoxhaj, kryesues i Komunitetit për Siguri Kibernetike dhe Privatësisë, sipas të cilit, Kosova ka institucionet e saj që merren dhe e trajtojnë në mënyrë profesionale luftën hibride.

Ai thekson për KosovaPress se institucionet e Kosovës që merren me parandalimin e luftës hibride duhet të pajisen dhe të mbështeten me kapacitete teknike, njerëzore dhe materiale.

“Unë vlerësoj në bazë të asaj që e kam parë edhe në media, edhe në aktivitete, Kosova ka institucione të sigurisë, të cilat merren në mënyrë të përkushtuar dhe profesionale me luftën hibride. Normalisht që kjo kërkon punë, mundim dhe në nivele të ndryshme, ndoshta edhe nuk mjafton. Prandaj, edhe shoqëria civile, televizionet, edhe ju momentalisht jeni duke kontribuar në ndërgjegjësimin e qytetarëve dhe ngritjen e vetëdijes sa i përket sulmeve të mundshme të luftës hibride, të cilat e kanë si qëllim qytetarin e Republikës të Kosovës për të pasur dhe krijuar opinione të ndryshme”, thotë Hoxhaj.

Analisti Ramush Tahiri thotë se pavarësisht se vendi ka shumë mekanizma të sigurisë, ende ka hapësirë për përmirësim në këtë fushë.

Duke marrë parasysh vendet e tjera kanë krijuar zyra të veçanta për t’u përballur me luftën hibride si dhe strategjinë BE-së që ka të bëjë me luftën hibride që përdorë Rusia dhe ISIS-i, Tahiri thotë se edhe Kosova mund të bëjë më shumë.

“Kosova i ka institucionet e sigurisë, edhe në kuadër të Policisë edhe AKI. Kosova ka edhe institucione të tjera në formën e OJQ-ve, që bëjnë herë pas here publikime në fushën e sigurisë, por edhe të propagandës. Duket se jemi në fillet e demokracisë dhe të ndërtimit të shtetit, që në këtë kohë vendet e tjera ecin shumë më shpejtë dhe e kemi shumë vështirë për t’i zënë. Do të kisha pasur shumë dëshirë që qeveria në bashkëpunim me presidentin ose me Këshillin e Sigurisë Kombëtare të krijojnë mekanizmat në secilën fushë ose pas secilës ministri sepse lufta hibride do të jetë domethënëse në vitet e ardhshme dhe Kosova duhet të mbrohet”, thotë ai.

Tahiri merr dy shembuj përmes të cilave shpjegon arsyen pse Kosova duhet të rrisë kapacitetet e saj për të frenuar luftën hibride që bëhet ndaj vendit sidomos nga Rusia dhe Serbia. Ai fillimisht ndalet te pjesa e të zhdukurve nga lufta e fundit në Kosovë ku zakonisht iu referohet me “të pagjetur” që sipas Tahirit e zhvlerëson krimin e bërë nga aparati shtetëror i Serbisë.

“Kur kemi të bëjmë me ata që janë kidnapuar nga Kosova, domethënë janë marrë peng njerëzit e gjallë ose njerëzit e vdekur dhe nuk kthehen në Kosovë, ne e kemi termin neutral që përdorin edhe ata serbët ‘të pagjeturit’, dhe me këtë zhvlerësojmë edhe veten, edhe viktimat. Ndërsa krejt kuptim tjetër ka nëse themi: ‘janë marrë peng nga ushtria dhe policia serbe’, sepse ajo është bërë me politikë shtetërore, me qëllim të rritjes së dhimbjes te qytetarët”, deklaroi Tahiri për KosovaPress.

Sipas tij, edhe reagimet që erdhën pas arrestimit të ish-pjesëtarëve të Ushtrisë Çlirimtare të Kosovës nga Gjykata Speciale janë pjesë e propagandës serbo-ruse.

“Është një propagandë e luftës hibride tash që kemi të bëjmë me njerëzit që kanë shkuar në Hagë dhe që po përballen me gjykim. Dhe, e dëgjon në opinion: ‘boll ju kemi duruar 20 vjet, kanë bërë gjithçka, krejt të zezat ia kanë sjellë Kosovës’, dhe e krahasojnë: ‘as regjimi serb nuk ka bërë çka kanë bërë këta’. Kjo është propagandë e ndyrë ruse dhe serbe për të zhvlerësuar vlerat e UÇK-së, ose thuhet ‘përballja është individuale dhe nuk dëmtohet UÇK-ja, mirëpo çka ndodhet nëse mbetet kjo aktakuzë, nëse fillon gjykimi me detyrë zyrtare ose me vijë komanduese, atëherë aty nuk ka përgjegjësi individuale, atëherë aty gjykohet UÇK-ja”, thekson Tahiri.

Krejt në fund, Tahiri thotë se në Kosovë po depërton lufta hibride në mënyrë të paselektuar. E në këtë, sipas tij, po ndikon edhe mungesa e edukimit për luftën hibride dhe pasojat e saj.

Related Topics:
Continue Reading

Aktualitet

Kuçi: Për të ikur vëmendjen nga trazirat në Serbi, Vuçiq bën veprime agresive kundrejt Kosovës 

Published

29 minutes ago

on

August 18, 2025

By

Protestuesit në Serbi me revoltën e tyre kanë shprehur tendencën që kjo protestë të kalojë në luftë civile, nëse qeveria nuk realizon kërkesat e tyre. Kështu thotë hulumtuesi në Institutin për Studime të Luftës Hibride “Octopus”, Gurakuç Kuçi.

Ai thekson se rrahjet dhe incidentet e vazhdueshme ndaj protestuesve po ndodhin me urdhrin e presidentit serb Aleksander Vuçiq dhe i quan manipulime deklaratat e Vuçiqit, përmes së cilave ai akuzon Perëndimin se po ndihmojnë financiarisht protestuesit në Serbi.

“Atje (Serbi) protestuesit me revoltën që e kanë bërë ditëve të fundit kanë shprehur që mund të ketë tendenca të dukshme që nëse qeveria nuk merr masat e duhura për të realizuar kërkesat e tyre, atëherë mund të eskalojë edhe në një luftë civile. Por, akoma nuk mund të themi që Serbia është në luftë civile pasi nuk kemi protestues të armatosur, të cilët kanë armët e tyre e po ashtu kanë edhe një në thonjëza ‘regjiment sulmues’ dhe po ashtu nuk kemi edhe një qeveri e cila ka filluar të jetë në anarki të plotë në Serbi”, thotë Kuçi.

Kuçi potencon se presidenti serb po i përdor këto interesa për të ushtruar presion ndaj BE-së dhe Perëndimit, duke akuzuar këto vende për financim dhe mbështetje të protestuesve, gjë që, sipas tij, përbën manipulim dhe rrezik për përçarje.

Mbi thë gjitha ai thekson se për të larguar vëmendjen nga trazirat që po ndodhin në Serbi, presidenti Vuçiq vepron kundrejt Kosovës apo bën veprime agresive ndaj shteteve përreth saj.

Këtu, Kuçi përmend arrestimet e njëpasnjëshme kohëve të fundit të kosovarëve nga autoritetet serbe.

“E kemi parë që gjithmonë kur Vuçiqi ka një problem me çështje të brendshme, atëherë i sulen çështjes së Kosovës, vepron kundrejt Kosovës apo bën veprime agresive ndaj shteteve përreth saj. Edhe në rastet e më hershme Vuçiqi dhe BIA serbe në koordinim vepruan kundrejt Kosovës duke i arrestuar disa njerëz për shkak të çështjeve të hakmarrjes për shkak se u zbulua një rrjet i inteligjencës së Serbisë dhe tani po ashtu kur filluan të ndodhnin protestat në Serbi ai mori veprime të ngjashme. Ata dëshirojnë vazhdimisht ta mbajnë fokusin jashtë protestave në Serbi që po ndodhin atje dhe po ashtu ta ngrisin çështjen e problemit të Kosovës sa më lartë”, thotë Kuçi.

Ndërkaq, kujtojmë se protestat në Serbi kanë nisur në nëntor të vitit 2024 dhe janë shtrirë veçanërisht në Beograd dhe qytete të tjera kryesore.

Ato organizohen kryesisht nga studentë dhe qytetarë të pakënaqur me qeverisjen aktuale, duke kërkuar zgjedhje të parakohshme parlamentare, llogaridhënie për korrupsion dhe tragjedi të ndryshme, si dhe reforma në sistemin politik.

 

 

Continue Reading

Aktualitet

Raporti 24 orësh nga Policia e Kosovës

Published

38 minutes ago

on

August 18, 2025

By

Në raportin e fundit 24 orësh nga Policia e Kosovës, në disa qytete të Kosovës ka pasur incidente kriminale dhe shifra të larta të gjobave të shqiptuara në kundërvajtje.

AKSIDENTE TRAFIKU DHE GJOBA

Gjatë 24 orëve të fundit janë shqiptuar 1942 tiketa trafiku, janë shkaktuar 45 aksidente me dëme materiale dhe 48 aksidente me të lënduar. Zyra e Informimit nga PK ka njoftuar se 40 persona janë arrestuar, kurse 28 janë dërguar në mbajtje.

INCIDENTET KRIMINALE- PRISHTINË

VDEKJE AKSIDENTALE

Lipjan / 17.08.2025-10:45– Është raportuar se viktima mashkull kosovar ka mbetur pa shenja jete pasi që dyshohet se i njëjti nga pakujdesia e ka ndezur traktorin në mënyrë të parregullt derisa ishte në shpejtësi, dhe si pasojë traktori ka lëvizur në mënyrë të pakontrolluar duke e goditur viktimën mashkull kosovar. Lidhur me rastin vdekja e viktimës është konstatuar në emergjencën e qytetit, ndërsa njësitet policore kanë dalë në vendin e ngjarjes. Me vendim të prokurorit trupi i pajetë është dërguar në IML për obduksion.

DHUNË NË FAMILJE

Fushë Kosovë/17.08.2025, 14:45- Është arrestuar i dyshuari mashkull kosovar pasi që i njëjti pas një mosmarrëveshje dyshohet se kishte sulmuar fizikisht viktimën femër kosovare. Viktima ka pranuar tretman mjekësor, ndërsa i dyshuari pas intervistimit me vendim të prokurorit është dërguar në mbajtje.

GRABITJE

Prishtinë / 17.08.2025-03:01- Janë arrestuar dy të dyshuar kosovarë pasi që dyshohet se duke kanosur viktimën mashkull kosovar i kanë grabitur para të gatshme dhe janë larguar. Lidhur me rastin njësitet policore kanë ndaluar të dyshuarit dhe tek të njëjtit kanë gjetur motoçikletën dhe mjetet tjera të cilat dyshohet se janë përdorur për të kryer veprën, si dhe kanë gjetur paratë e grabitura. Me vendim të prokurorit, të dyshuarit janë dërguar në mbajtje.

POSEDIM I PAAUTORIZUAR I NARKOTIKËVE

Rr. Mujë Krasniqi, Prishtinë / 17.08.2025-00:20.  Njësitet policore gjatë patrullimit në bodrumin e një ndërtese kanë hasur dy çanta krahu, në të cilat gjatë kontrollit kanë gjetur dhe konfiskuar disa qese me substancë të dyshuar narkotike të llojit marihuanë në peshë të përgjithshme 535.8 gramë,  një peshore digjitale, një palë dorëza dhe dhjetëra qese të thata për paketim të substancave narkotike. Lidhur me rastin, është informuar edhe prokurori, ndërsa njësitet policore janë duke hetuar rastin.

Rr.Bekim Lushaku, Podujevë 17.08.2025 21:30 Njësitet policore gjatë patrullimit kanë vërejtur një veturë të  dyshuar, në të cilin ishin dy persona dhe gjatë kontrollit tek të njëjtit është gjetur dhe sekuestruar  substancë e dyshuar narkotike e llojit marihuanë me peshë rreth 64.27 gr. Të dyshuarit janë arrestuar dhe pas intervistimit me vendim te prokurorit janë dërguar ne mbajtje.

Rr. Fontana, Prishtinë 17.08.2025, 23:50. Janë shoqëruar në stacionin policor dy të dyshuar meshkuj kosovarë pasi që gjatë kontrollit tek të njëjtit  është gjetur dhe sekuestruar substancë e dyshuar narkotike e llojit marihuanë me peshë rreth 8.01 gram. Me vendim të prokurorit rasti procedohet në procedurë të rregullt.

 

ARMËMBAJTJE PA LEJE

Rr. Mursel Dabinovci, Podujevë  17.08.2025, 22:54. Është arrestuar i dyshuari mashkull kosovar pasi  që tek i njëjti është gjetur dhe sekuestruar një armë dhe një karikator pa fishekë. Në konsultim me prokurorin është bërë bastisja në shtëpinë e të dyshuarit ku në oborrin e tij janë gjetur dhe sekuestruar tri gëzhoja. Me vendim të prokurorit pas intervistimit i dyshuari është dërguar në mbajtje.

INCIDENTET KRIMINALE- GJILAN

ZJARRVËNIE

Gjilan / 17.08.2025-14:20.  Në rrethana të panjohura është përfshirë nga zjarri lokali pronë e ankuesit kosovar. Njësitet policore dhe zjarrfikësit kanë dalë në vendin e ngjarjes për të fikur zjarrin.  Nuk raportohet për të lënduar, ndërsa janë shkaktuar dëme materiale. Lidhur me rastin është informuar edhe prokurori dhe eksperti i zjarreve, ndërsa njësitet policore janë duke hetuar rastin.

Viti 17.08.2025, 09:53. Është arrestuar i dyshuari mashkull kosovar pasi që i njëjti është vërejtur përmes video incizimeve duke ndezur zjarr në afërsi të varrezave. Në vendin e ngjarjes kanë dal njësia e zjarrfikësve të cilët kanë arritur ta lokalizojnë zjarrin. I dyshuari pas intervistimit me vendim të prokurorit është liruar në procedurë të rregullt.

INCIDENTET KRIMINALE-FERIZAJ

POSEDIM I NARKOTIKËVE

Ferizaj /17.08.2025-05:50 –Është arrestuar i dyshuari kosovar pasi njësitet policore te i njëjti gjatë kontrollit në çantën e krahut i kanë gjetur dhe konfiskuar një pako me 13-qese plastike me substancë të dyshuar narkotike të llojit marihuanë, në peshë totale 7.34 gramë. Në konsultim me prokurorin, i dyshuari pas intervistimit është liruar në procedurë të rregullt.

Rr. Skenderbeu, Kaçanik /17.08.2025, 18:40- Janë arrestuar dy të dyshuar meshkuj kosovarë pasi që gjatë kontrollit tek të njëjtit janë gjetur dhe sekuestruar gjashtë paketime me substancë të dyshuar narkotike të llojit marihuanë. Pas intervistimit me vendim të prokurorit të dyshuarit janë liruar në procedurë të rregullt.

LËNDIM I LEHTË TRUPOR&ARMËMBAJTJE PA LEJE

Fsh. Dardani, Ferizaj  17.08.2025, 11:00- Është raportuar se pas një mosmarrëveshje ankuesja femër kosovare është sulmuar fizikisht nga të dyshuarit një mashkull dhe një femër kosovare. Viktima ka pranuar tretman mjekësor, ndërsa me vendim të prokurorit është bërë kontrolli në shtëpinë e të dyshuarit ku është gjetur dhe sekuestruar një armë automatike AK-47 me dy karikatorë. Të dyshuarit janë shoqëruar në stacionin policor dhe pas intervistimit me vendim të prokurorit rasti procedohet në procedurë të rregullt.

INCIDENTET KRIMINALE-PRIZREN

DHUNË NË FAMILJE

Dragash / 17.08.2025-13:15- Është arrestuar i dyshuari kosovarë nën dyshimin se i njëjti ka sulmuar fizikisht dy viktimat një mashkull dhe një femër kosovare. Viktimave u është ofruar tretman mjekësor, ndërsa i dyshuari pas tretmanit mjekësor, me vendim të prokurorit është dërguar në mbajtje.

ARMËMBAJTJE PA LEJE

Fsh. Mazrek, Prizren  17.08.2025, 17:00– Është raportuar se një person i dyshuar ka shtënë me armë zjarri dhe ka ikur në drejtim të panjohur. Në vendin e ngjarjes janë gjetur dhe sekuestruar 36 gëzhoja dhe 4 predha. Rasti nën hetime.

AKSIDENT TRAFIKU ME DËME MATERIALE

PKK-Vërmicë / 17.08.2025-06:23- Ka ndodhur një aksident trafiku në mes një automjeti-kamioni dhe një veture. Si pasojë janë shkaktuar vetëm dëme të vogla materiale. Rasti në procedurë të rregullt.

INCIDENTET KRIMINALE-PEJË

ORGANIZIM I SKEMAVE PIRAMIDALE & ARMËMBAJTJE PA LEJE

Decan / 17.08.2025-01:05-Njësitet policore në koordinim me gjykatën kompetente dhe prokurorinë themelore, kanë arrestuar trembëdhjetë (13) të dyshuar kosovarë, pasi të njëjtit në një lokal janë kapur në flagrancë duke luajtur bixhoz. Gjatë kontrollit, tek të dyshuarit janë konfiskuar vlera monetare të ndryshme, ndërsa tek njëri nga të dyshuarit, gjatë kontrollit në veturë i është gjetur dhe konfiskuar edhe një pistoletë me 8-fishekë. Me vendim të prokurorit, të dyshuarit janë dërguar në mbajtje.

DHUNË NË FAMILJE

Istog / 17.08.2025-02:30- Është arrestuar i dyshuari kosovar nën dyshimin se i njëjti pas një mosmarrëveshje  ka ushtruar dhunë fizike ndaj viktimës femër kosovare. Viktimës i është ofruar tretman mjekësor, ndërsa i dyshuari pas intervistimit, në konsultim me prokurorin është liruar në procedurë të rregull

Peje 17.08.2025, 22:50 -Është shoqëruar në stacionin policor e dyshuara femër kosovare pasi që e njëjta pas një mosmarrëveshje kishte sulmuar fizikisht dy viktimat femra kosovare. Viktimat kanë pranuar tretman mjekësor, ndërsa pas intervistimit me vendim të prokurorit e dyshuara është liruar në procedurë të rregullt.

ARMËMBAJTJE PA LEJE

Pejë  17.08.2025, 16:05- Është raportuar se në një aheng familjar ka të shtëna me armë zjarri. Në vendin e ngjarjes janë gjetur dhe sekuestruar dhjetë gëzhoja të armës me gas. Gjatë kontrollit të veturës pronë e të dyshuarit është gjetur dhe sekuestruar një armë dhe një karikator.

DËMTIM PRONE

Rr. Ereniku, Junik 17.08.2025, 15:10-Është raportuar se persona të panjohur kanë thyer xhamat e disa  autobusëve që kanë qenë në parking. Rasti në procedurë hetimore.

INCIDENTET KRIMINALE-GJAKOVË

 KANOSJE NDAJ PERSONIT ZYRTAR

Rr. Avdullah Bablija, Gjakovë / 17.08.2025-12:23-Është arrestuar i dyshuari kosovar pasi i njëjti ka kanosur zyrtarin policor derisa ishte duke kryer detyrën zyrtare. Në konsultim me prokurorin, i dyshuari pas intervistimit është liruar në procedurë të rregullt.

DHUNË NË FAMILJE

Gjakovë / 17.08.2025-13:10-Është arrestuar e dyshuara kosovare nën dyshimin se e njëjta pas një mosmarrëveshje, me veturë e ka goditur veturën e viktimës mashkull kosovar. Si pasojë janë shkaktuar vetëm dëme materiale, ndërsa palët pas intervistimit janë liruar në procedurë të rregullt.

SHKAKTIM I RREZIKUT TË PËRGJITHSHËM

Gjakovë / 17.08.2025-01:30- Njësitet policore pas pranimit të informatës për të shtëna me armë zjarri kanë dalë në vendin e ngjarjes ku në një aheng familjar janë gjetur dhe konfiskuar 49-gëzhoja kalibër i ndryshëm të cilat dyshohet se janë shkrepur nga gjatë ahengut. Lidhur me rastin është informuar edhe prokurori, ndërsa njësitet policore janë duke hetuar rastin.

 

INCIDENTET KRIMINALE-MITROVICË JUG

 POSEDIM & PËRDORIM I PAAUTORIZUAR I ARMËS

Vushtrri / 17.08.2025-14:45- Është  arrestuar i dyshuari  mashkull kosovar për shkak se në një aheng kishte shtënë me armë zjarri. Njësiti policor në vendin e ngjarjes ka gjete dhe konfiskuar një gëzhojë fisheku, kurse nga i dyshuari ka konfiskuar një pistoletë me gas. Pas intervistimit me urdhër të prokurorit i dyshuari është liruar në procedurë të rregullt.

Skenderaj 17.08.2025  23:45-Është shoqëruar në stacionin policor i dyshuari mashkull kosovar pasi që gjatë kontrollit në veturën e tij janë gjetur dhe sekuestruar një armë pistoletë me gas me një karikator të zbrazët si dhe një mjet i mprehtë (thikë). Me vendim të prokurorit pas intervistimit i dyshuari është liruar në procedurë të rregullt.

SHKAKTIM I RREZIKUT TË PËRGJITHSHËM

Fsh. Polac, Skenderaj  17.08.2025, 17:30- Është raportuar se ankuesi mashkull kosovar derisa ishte duke lëvizur me veturën e tij, një plumb qorr e kishte goditur veturën e cila është dëmtuar nga predha. Në vendin e ngjarjes është gjetur dhe sekuestruar një predhë. Rasti nën hetime.

INCIDENTET KRIMINALE- MITROVICË VERI

VJEDHJE E RËNDË

Fsh. Prelez, Zubin Potok / 16.08.2025-22:15- Është arrestuar i dyshuari kosovar, nën dyshimin se i njëjti edhe me dy të dyshuar tjerë kanë dëmtuar një kabllo të ndriçimit të rrugës. Njësitet policore në vendin e ngjarjes kanë gjetur e konfiskuar edhe darët-danat  dhe dy pajisje metalike për ngjitje në shtylla, të cilat dyshohet se i kanë përdorur të dyshuarit. Me vendim të prokurorit, i dyshuari është dërguar në mbajtje, ndërsa rasti vazhdon të hetohet.

SHKAKTIM I RREZIKUT TË PËRGJITHSHËM

Fsh. Uglar, Zubin Potok / 17.08.2025-03:30- Në rrethana të panjohura është përfshirë nga zjarri objekti pronë e ankuesit kosovar. Njësitet policore dhe zjarrfikësit kanë dalë në vendin e ngjarjes dhe kanë lokalizuar dhe fikur zjarrin. Të lënduar nuk ka, lidhur me rastin, është informuar edhe eksperti i zjarreve, ndërsa njësitet policore janë duke hetuar rastin.

INCIDENTET KRIMINALE

DEPARTAMENTI I POLICISË KUFITARE

 ARMËMBAJTJE PA LEJE

PKK. Vermicë 17.08.2025, 20:30- Është arrestuar i dyshuari mashkull kosovar pasi që gjatë kontrollit të veturës së tij janë gjetur dhe sekuestruar  një pushke automatike, me 3 karikatorë me 68 copa municion, një pistoletë me karikator me 20 fishekë, një pushke ajrore me 10 fishekë, dy thika, një palë rroba ushtarake pa shenja(emblema), nje maskë ushtarake, një çantë ushtarake. Me vendim të prokurorit pas intervistimit i dyshuari dërgohet ne mbajtje.

KALIM I PAAUTORIZUAR I KUFIRIT

Fsh. Dimcë, Hani i Elezit / 17.08.2025-14:25- Njësitet policore gjatë patrullimit kanë ndaluar të dyshuarin shtetas i RMV-së, nën dyshimin se i njëjti ka kryer veprën e cekur. Në konsultim me prokurorin, i dyshuari pas intervistimit është liruar në procedurë të rregullt.

ARMËMBAJTJE PA LEJE

PKK. Glloboqicë  17.08.2025, 17:15- Është shoqëruar në stacionin policor i dyshuari mashkull shtetas i Maqedonisë së Veriut pasi që gjatë kontrollit të veturës së tij janë gjetur dhe sekuestruar shtatë fishekë, një sprej dhe një radio lidhje. Me vendim të prokurorit pas intervistimit rasti procedohet në procedurë të rregullt.

Continue Reading

Aktualitet

Sot nis Seminari i 43-të për Gjuhë, Letërsi dhe Kulturë Shqiptare

Published

2 hours ago

on

August 18, 2025

By

Seminari Ndërkombëtar i Gjuhës, Letërsisë dhe Kulturës Shqiptare do të nisë punimet nga sot deri më 29 gusht në Prishtinë ku sot në orën 11:00, në amfiteatrin e Bibliotekës Qendrore Universitare, do të bëhet hapja solemne e punimeve.

“Seminari i 43-të, do t’i zhvillojë punimet në sallën ‘Idriz Ajeti’ të Fakultetit të Filologjisë në Prishtinë. Në këtë edicion të Seminarit, përpos studiueseve, studiuesve nga Kosova dhe Shqipëria, do të marrin pjesë edhe albanologë nga shumë vende të botës, për t’i shpalosur dhe për të diskutuar rreth arritjeve e rezultateve të tyre të fundit shkencore”, ka njoftuar drejtoria e seminarit të Univerisitetit të Prishtinës.

Ndërkaq në fund të Seminarit do të mbahet sesioni shkencor me këto tema bosht “Zhvillime aktuale lidhur me leksikun e shqipes, Shqipja në rrjetet sociale dhe Postmodernizmi në letërsinë shqipe”.

Njëherësh, në programin bazë të Seminarit 43 përfshihen kurse intensive të mësimit të shqipes, ligjërata të veçanta të gjuhësisë, ligjërata për letërsinë shqiptare dhe referime shkencore.

Po ashtu është bërë me dije se ashtu si edhe në edicionet paraprake, Seminari ofron program kulturor plotësues për t’i njohur seminaristët me bukuritë natyrore, me veprimtaritë kulturore, si dhe me zhvillime të tjera pozitive.

Seminari Ndërkombëtar për Gjuhën, Letërsinë dhe Kulturën Shqiptare është themeluar në vitin 1974 në Fakultetin e Filologjisë dhe oorganizohet për studentë e studiues që merren me çështje të gjuhës, të letërsisë e të kulturës shqiptare, por edhe me albanologjinë përgjithësisht.

Deri më tani, seminari ka zhvilluar gjithsej 42 sesione.

Continue Reading

Aktualitet

​Aksident me të lënduar në rrugën Dragash-Prizren

Published

2 hours ago

on

August 18, 2025

By

Dy persona kanë pësuar lëndime dhe janë shkaktuar dëme të konsiderueshme materiale si pasojë e një aksidenti ndërmjet dy veturave në rrugën Dragash-Prizren.

Shaqir Bytyqi nga policia rajonale Prizren tha se aksidenti ka ndodhur rreth orës 18:20, dhe si pasojë e aksidentit janë lënduar dy persona.

“Si pasojë e aksidentit së paku dy persona kanë pësuar lëndime trupore si dhe janë shkaktuar dëme të konsiderueshme materiale si dhe përkohësisht rruga ka qenë e mbyllur derisa policia ka kryer procedurat e nevojshme dhe ka liruar rrugën”, ka thënë ai.

Continue Reading

Të kërkuara