Në prag të samitit të krerëve të shteteve dhe qeverive të Bashkimit Evropian, tensionet brenda unionit për shprehjen e një qëndrimi të përbashkët ndaj krizës në Lindjen e Mesme po bëhen të dukshme. Sipas burimeve diplomatike, disa vende anëtare kanë rezerva për ligjshmërinë e sulmit të Izraelit ndaj Iranit sipas së drejtës ndërkombëtare.

Një nga pikat kyçe të debatit është interpretimi i së drejtës për vetëmbrojtje, e cila sipas Kartës së OKB-së lejohet vetëm në raste sulmesh të armatosura, me masa proporcionale dhe të domosdoshme. Disa shtete, si Austria, Franca, Gjermania, Italia dhe Holanda, mbështesin përfshirjen e një formulimi që thekson këtë të drejtë për Izraelin, por mungesa e konsensusit ka penguar miratimin e tij në qëndrimin zyrtar të BE-së.

Në anën tjetër, vende të tjera anëtare kanë shprehur rezervat e tyre, duke vënë në dyshim bazat ligjore të ofensivës izraelite dhe duke kërkuar respektimin strikt të së drejtës ndërkombëtare.

Në këtë sfond, deklarata e Presidentes së Komisionit Evropian, Ursula von der Leyen, e cila u shpreh në rrjetin social X për të drejtën e Izraelit për t’u mbrojtur, është kritikuar nga disa diplomatë si tejkalim i gjuhës zyrtare të dakorduar nga Këshilli i BE-së.

Mungesa e një pozicioni të qartë nga BE-ja në këtë çështje vjen në një moment kur tensionet në Lindjen e Mesme janë në rritje, duke rrezikuar të minojnë rolin diplomatik të Bashkimit Evropian në arenën ndërkombëtare.

Çështja do të jetë në fokus të takimit të ambasadorëve të BE-së këtë të enjte në Bruksel, ku pritet të bëhet përpjekje për të kapërcyer këto dallime para samitit të ardhshëm të liderëve të unionit.

Në Ditën Ndërkombëtare për Eliminimin e Dhunës Seksuale në Konflikt, ministrja në detyrë e Drejtësisë, Albulena Haxhiu tha se përdorimi i dhunës seksuale si mjet lufte nga ana e Serbisë është një krim i rëndë i cili nuk përshkruhet.

Haxhiu përmendi edhe veprimet qe kanë ndërmarrë si ministri e Drejtësisë.

“Është një krim i rëndë, një mjet lufte që Serbia e ka përdorur gjatë periudhës së luftës dhe në këtë drejtim sipas raporteve vendore dhe ndërkombëtare është konsideruar që rreth 20 mijë persona janë dhunuar seksualisht gjatë luftës në Kosovë. Si qeveri që nga fillimi i mandatit kemi ndërmarrë veprime konkrete për të adresuar krimet e luftës siç jeni në dijeni, qeveria e ka themeluar Institutin për Krimet e Luftës ku do të dokumentohen dhe identifikohen dhe hulumtohen të gjitha krimet që kanë ndodhur në Kosovë… Kemi mundësuar rritjen e kapaciteteve në Prokurori Speciale për adresimin e krimeve të luftës dhe kemi mundësuar gjykimin në mungesë duke pasur parasysh që Serbia nuk i dorëzon kriminelët e luftës”, tha Haxhiu.

Ndërsa, kryeshefja e Agjencisë për Barazi Gjinore, Edi Gusia tha se Kosova në nivel global jep një model të veçantë të reputacionit administrativ për të mbijetuarit.

Gusia bën thirrje për të gjithë liderët e botës qe të parandalohen dhunimet seksuale si mjet lufte.

“Kosova jep një kontribut të veçantë kjo është një ditë ku respektojmë memorien kolektive për atë çka ka ndodh në Kosovë mbi 1 mijë e 700 të mbijetuara dhe të mbijetuar tashmë i është mohuar statusi i të mbijetuarve dhe Kosova në nivel global jep një model të veçantë të reputacionit administrativ për të mbijetuarat. Ngrit zërin për të gjitha ato dhunime seksuale që aktualisht janë duke u përdorur si mjet lufte në të gjitha vatrat e luftës në mbarë botën. Bëjmë thirrje të gjithë liderëve botëror për të parandaluar dhunimet seksuale si mjet lufte”, shtoi Gusia.

Ndërsa, kryeministri në detyrë, Albin Kurti ani se bëri homazhe në parkun memorial “Heroinat”, nuk u prononcua për media për rreth shënimit të kësaj dite.

Kryetari i Aleancës për Ardhmërinë e Kosovës, Ramush Haradinaj, ka pritur në takim Z. Z. Gerard McGurk, udhëheqësin e ri të Misionit të OSBE-së në Kosovë.

Gjatë takimit, Haradinaj i uroi mirëseardhje Ambasadorit McGurk dhe i dëshiroi suksese në detyrën e tij të re.

Në fokus të bisedës ishte vazhdimi i bashkëpunimit me OSBE-në në funksion të forcimit të demokracisë, të drejtave të njeriut dhe sundimit të ligjit në Kosovë.

Haradinaj kërkoi mbështetjen e mëtejshme të misionit, duke shprehur gatishmërinë e tij dhe të Aleancës për të bashkëpunuar ngushtë me OSBE-në.