Lajmet

Lajçak nga veriu: Nuk mund të ketë më barrikada dhe trazira

Takimin me serbët lokalë Lajçak e vlerësoi si të mirë.

Published

4 years ago

August 25, 2022

Betim Gashi

Përfaqësuesi special i Bashkimit Evropian për dialogun Kosovë-Serbi, Miroslav Lajçak ka deklaruar se nuk mund të ketë më barrikada dhe trazira në Mitrovicën e Veriut.

Pas takimit të enjten me përfaqësuesit serbë në veri të Kosovës, Lajçak tha se nuk mund të ketë situatë të njëjtë sikur më 31 korrik dhe 1 gusht, kur përfaqësuesit serbë lokal ngritën barrikada për të penguar Qeverinë e Kosovës për të zbatuar dy vendimet e saj për reciprocitetin në dokumente të udhëtimit dhe për targat ilegale.

“Një mesazh shumë i fortë nga Bashkësia Evropiane është se ne nuk mund të jemi në të njëjtën situatë më 31 gusht si në 31 korrik. Kjo është arsyeja pse ne e kërkuam dhe e morëm atë shtyrje dhe për këtë arsye organizuam takimin në Bruksel javën e kaluar dhe kjo është arsyeja pse jemi këtu sot që njerëzit të mos kenë frikë, që njerëzit s’kanë pse, që të mos kenë frikë për jetën e tyre, për një jetë normale, kështu që ne po bëjmë gjithçka që të mos ketë barrikada…Unë jam këtu për të bërë gjithçka së bashku me miqtë tanë amerikanë në mënyrë që të mos ketë barrikada, të mos ketë trazira dhe të mos ketë lëndime dhe që njerëzit të jetojnë të qetë… Duam që 1 shtatori të jetë një ditë normale, një ditë e zakonshme”, tha ai.

Takimin me serbët lokalë Lajçak e vlerësoi si të mirë dhe tha se do të angazhohet që të gjendet një zgjidhje që mos të përkeqësojë jetën e tyre.

“Jemi me përfaqësuesit e serbëve në Kosovë, natyrisht që ata dëgjojnë nga ne se cili është qëllimi i misionit tonë, që ne dëgjojmë nga dora e parë, si është atmosfera, cilat janë pritshmëritë dhe mendoj se çfarëdo vendimi të merret, serbët që jetojnë atje janë në qendër të atij vendimi, kështu që çdo vendim i keq përkeqëson jetën e tyre dhe një vendim i mirë e përmirëson atë, kështu që ishte e rëndësishme për mua që ata të mos mësojnë për ato proceset në mënyrë indirekte, por edhe të bisedojmë . Kemi kaluar gati dy orë, kemi pasur shumë mundësi të flasim për gjërat dhe sigurisht që misioni ynë vazhdon, tani po shkojmë nga këtu në Beograd ku kemi një takim me presidentin Vuçiq dhe pastaj të shohim nëse ia dolëm dhe ku jemi”, shtoi ai.

Në takim ishte edhe i dërguari i ShBA-së për Ballkanin Perëndimor, Gabriel Escobar, dhe ambasadori amerikan në Kosovë, Jeffrey Hovenier.

Lajçak tha se duhet të gjendet një zgjidhje për të shmangur krizën dhe përshkallëzimin.

“Unë jam në mes të misionit dhe definitivisht nuk dua të flas për opsionet që janë në tavolinë sepse kjo do të ishte e dëmshme për suksesin e misionit… Opsionet janë opsione që ruajnë paqen dhe atmosferën normale në terren. Këto janë lajmet e mira. Nuk ka të bëjë me fitues apo humbës, ka të bëjë me njerëzit që jetojnë këtu… Nuk dua të spekuloj për këtë. Ne jemi këtu për të gjetur zgjidhje, për të shmangur krizën dhe për të shmangur përshkallëzimin, pra mos të spekulojmë për situata krize”, tha ai.

Lajçak dhe Escobar gjatë vizitës në Kosovës takuan edhe krerët institucionalë dhe opozitarë në vend. Pas vizitës në veri, dy emisarët euro-amerikan udhëtuan për në Beograd, ku do të zhvillojnë takime me presidentin serb, Aleksandër Vuçiq.

Lajmet

Më 24 dhe 25 tetor mbahet Konferenca Ndërkombëtare e Shkencave Mjekësore në UBT

Published

7 seconds ago

October 5, 2026

UBTNews

Parku Inovativ i UBT-së në Lipjan do të jetë mikpritës i Konferencës Ndërkombëtare për Mjekësi, Infermieri dhe Shkenca Teknike Mjekësore, e cila do të zhvillohet më 24 dhe 25 tetor.

Ngjarja është akredituar zyrtarisht si aktivitet i Edukimit të Vazhdueshëm Profesional (EVP), duke u ofruar profesionistëve shëndetësorë mundësinë e marrjes së pikëve kredituese.

Aktiviteti u dedikohet infermierëve, biokimistëve, teknikëve të radiologjisë, anesteziologjisë, farmacisë, si dhe profesionistëve të tjerë të fushës. Sipas vendimit të akreditimit, pjesëmarrësit aktivë do të shpërblehen me 20 pikë EVP, ndërsa ata pasivë me 15 pikë.

Kostoja e pjesëmarrjes është 20 euro. Të gjithë të interesuarit duhet të kryejnë pagesën në llogarinë bankare të UBT-së në BPB, ta dërgojnë dëshminë me e-mail në [email protected] dhe ta paraqesin atë fizikisht ditën e ngjarjes për të konfirmuar pjesëmarrjen.

Lajmet

Protesta vazhdon para Kuvendit, hidhen mjete piroteknike

Published

4 minutes ago

October 5, 2026

UBT News

Protesta para Kuvendit të Kosovës po vazhdon edhe pas miratimit në lexim të parë të Projektligjit për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar.

Protestuesit vazhdojnë të qëndrojnë në hapësirat përreth Kuvendit, ndërsa gjatë protestës janë hedhur mjete piroteknike në drejtim të objektit. Si pasojë, është thyer edhe një dritare e Kuvendit.

Situata është tensionuar edhe më tej me ardhjen e ministres në detyrë të Drejtësisë, Donika Gërvalla, e cila është pritur me thirrje nga protestuesit, ndërsa gjatë hyrjes së saj në Kuvend janë hedhur mjete piroteknike në drejtim të saj.

Gjatë protestës ka pasur edhe përplasje fizike me antarin e VV Sami Kurteshi. Sipas raportimeve, Kurteshi është përplasur me disa protestues, pas një konflikti në mesin e turmës.

Sulm fizik është raportuar edhe ndaj gazetarit Jeton Sopa, i cili po raportonte nga protesta.

Projektligji për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar është miratuar në lexim të parë nga Kuvendi i Kosovës.

Megjithatë, miratimi në lexim të parë nuk e përfundon procesin parlamentar. Protestuesit po kërkojnë që ndryshimet ligjore të kalojnë edhe në leximin e dytë, në mënyrë që procedura të përfundojë./A.K/

Lajmet

PDK kërkon votimin e dytë për Specialen sot në orën 17:30

Published

15 minutes ago

October 5, 2026

UBTNews

Pasi projektligji për ndryshimin e Ligjit për Dhomat e Specializuara kaloi në lexim të parë me 91 vota për, Partia Demokratike e Kosovës ka kërkuar që procedura ligjvënëse të mos vonohet dhe akti normativ të miratohet përfundimisht po gjatë ditës së sotme.

Në emër të grupit parlamentar të PDK-së, deputeti Arian Tahiri ka paraqitur zyrtarisht një mocion përmes të cilit i kërkohet parlamentit që shqyrtimi i dytë dhe votimi final i këtij projektligji të caktohet për në orën 17:30.

Gjatë replikës së tij me kryetaren e Kuvendit, Albulena Haxhiu, deputeti Tahiri theksoi se situata kërkon përgjegjësi të lartë politike dhe reagim të shpejtë institucional, duke sjellë në vëmendje edhe protestën e veteranëve e qytetarëve që po zhvillohet jashtë ndërtesës së Kuvendit.

“Kuvendi i Kosovës është i rrethuar me qytetarë që kanë ndjeshmëri për këtë temë, andaj nuk duhet të veprojmë sikur nuk po ndodh asgjë. UÇK-ja është mbi secilën parti politike dhe është e të gjithëve. Të gjithë duhet ta mbrojmë dhe të vazhdojmë të jemi krenarë me të”, u shpreh Tahiri në foltoren e Kuvendit.

Nisma e PDK-së për përshpejtimin e procedurave pritet të hidhet në votim nga kryesia e Kuvendit, në kohën kur grupet parlamentare po përpiqen të koordinojnë hapat e mëtejshëm për këtë projektligj. /E.A/

Lajmet

BE-ja dhe Gjermania paralajmërojnë për rritje të sulmeve hibride ruse në Evropë

Published

28 minutes ago

October 5, 2026

UBTNews

Shefja e politikës së jashtme të Bashkimit Evropian, Kaja Kallas, ka deklaruar se Rusia po rrezikon drejtpërdrejt jetët e qytetarëve në Evropë përmes sulmeve hibride, sabotimeve dhe shkeljes së hapësirave ajrore.

E shoqëruar nga kryeministri moldav Vasile Tofan në Bruksel, Kallas dënoi shkeljen e fundit të hapësirës ajrore të Moldavisë nga raketat dhe dronët rusë gjatë fundjavës, duke e cilësuar atë si plotësisht të papranueshme.

Në të njëjtën linjë, kancelari gjerman Friedrich Merz paralajmëroi për intensifikim të fushatave hibride ruse, përfshirë sulmet kibernetike dhe fluturimet e paautorizuara të dronëve. Merz rikonfirmoi mbështetjen e Berlinit për Ukrainën përballë goditjeve ndaj infrastrukturës energjetike, ndërsa Moska vazhdon t’i mohojë të gjitha akuzat e Perëndimit. /BBC/