Organizata turistike e Komunës së Ulqinit ka dhuruar sot një donacion të mandarinave, qendrës për pune sociale në shtëpinë e moshuarve dhe kuzhinës qendrore në Prishtinë.

Qëllimi i këtij donacioni është promovimi i frutit të sezonës që karakterizon Ulqinin.

Koordinatori për ngjarje dhe manifestime në organizatën turistike të Ulqinit, Arber Haxhibrahmi është shprehur se ky është një gjest bujar e human nga komuna e Ulqinit.

“Ky është një gjest bujar dhe human, një fondacion që kemi marrë ne përsipër si organizatë turistike e Ulqinit, të frutit tonë që karakterizon Ulqinin”, është shprehur Haxhibrahimi.

Ndërsa, drejtoresha e mirëqenies sociale në Komunën e Prishtinës, Adelina Sahiti ka thënë se ky gjest human, tregon për kujdesin ndaj personave të moshës së tretë, të cilët kanë nevojë për mirëqenie sociale.

“Ndihemi të nderuar që Ulqini, vendi jonë ku janë shqiptarët të cilët kanë dhënë shumë kontribut në periudha të ndryshme historike për Kosovën. Edhe sot kanë pasur një vizitë të tillë e cila ka simbolikën e saj sepse tregon për kujdesin për moshën e tretë, për këta persona të cilët kanë nevojë për kujdesje dhe mirëqenie sociale”, ka thënë Sahiti.

E udhëheqësi i departamentit ligjorë dhe administratës në ndërmarrjen publike lokale “Kuzhina”, Arbnor dreshaj ka shtuar se ky donacion ka qenë shumë i nevojshëm dhe si i tillë është i preferuari i fëmijëve.

“Ke shumë i mirëpritur dhe jemi shumë falënderues për një donacion të tillë. Është shumë i nevojshëm dhe për fëmijët është një nga frutat që më së shumti e preferojnë. Shpresoj që ky bashkëpunim të vazhdoj në forma si kjo apo dhe të tjera”, ka shtuar Dreshaj.

Përveç Komunës së Prishtinës, organizata turistike e Ulqinit ka dhuruar donacion edhe në Komunën e Pejës dhe Deçanit.

Kryetari i Aleancës për Shqiptarët, Ziadin Sela, ka shprehur kritika ndaj kryeministrit të Kosovës, Albin Kurti, për deklaratën e tij lidhur me statusin e gjuhës shqipe në Maqedoninë e Veriut.

Në një postim në rrjetin social “Facebook”, Sela ka theksuar se kjo deklaratë është tejet e dëmshme dhe shpreson që të ketë qenë një gabim momental. Ai e ka krahasuar situatën me periudhën e vështirë të pasviteve 1981, kur shqiptarët përballeshin me diferencime politike dhe përdorimin e një zhargoni denigrues nga elitat komuniste.

“Shumë shëmtuar dukej kur thuhej shqip dhe për shqiptarët nga elita politike komuniste shqiptare. Është më se e qartë se ky zhargon politik kontrollohej nga një qendër që kishte për qëllim satanizimin e viktimës, fillimisht spastrimin institucional të shqiptarëve e më pas edhe etnik të tyre”, ka shkruar Sela.

Duke iu referuar situatës aktuale, ai ka shtuar se e ndien të njëjtën ndjesi të keqe të asaj kohe, pasi gjuha shqipe dhe përpjekjet për barazinë e saj me gjuhën maqedonase në Maqedoninë e Veriut janë goditur.

“Uroj të jetë një lajthitje momenti…”, ka përfunduar Sela.

Kryeministri i Kosovës, Albin Kurti, ka deklaruar se gjatë mandatit të tij është dyfishuar punësimi i të rinjve në Kosovë.

Kreu qeveritar, gjatë prezantimit të studimit të rinisë 2024 nga Fondacioni Friedrich Ebert (FES), tha se të rinjtë janë prioritet i tij, derisa theksoi edhe ndarjen e bursave për studentë.

Sipas tij, në bazë të këtij studimi del në pah se të rinjtë i mbështesin politikat e majta, të cilat siç vlerësoi Kurti sigurojnë që përfitimet të shpërndahen gjerësisht.

Ndër gjetjet kryesore të studimit janë se të rinjtë si sfidë kryesore në dekadën e ardhshme kanë papunësinë, korrupsionin dhe emigrimin.

Forumi i Rinisë së Lidhjes Demokratike të Kosovës ka dorëzuar kallëzim penal ndaj ministrit të Bujqësisë, Faton Peci dhe deputetes së Lëvizjes Vetëvendosje, Fitore Pacolli.

Ky veprim vjen pas raportimeve se familjarët e deputetes Pacolli kanë përfituar grante në sektorin e bujqësisë, që sipas LDK-së, kjo është bërë bazuar në lidhjet familjare.

LDK ka kërkuar dorëheqjen e ministrit të Bujqësisë pasi sipas tyre është keqpërdorur para publike.

Zyrtarë të LDK-së, ditë më parë, akuzuan Pecin dhe Pacollin duke thënë se kanë ndikuar që vëllai i deputetes të fitojë grant në vlerë rreth 100 mijë euro.

Akuzat i mohoi Blerim Pacolli, vëllai i deputetes, duke thënë se i ka plotësuar të gjitha kriteret për ta fituar grantin.

Ndaj akuzave reagoi edhe deputetja Pacolli e cila është edhe kryetare e Komisionit parlamentar për Bujqësi, duke thënë se do të bëjë padi ndaj mediave që e kanë publikuar lajmin për grantin.

Të dielën, Partia Demokratike e Kosovës kërkoi nisjen e hetimeve ndaj ministrit të Bujqësisë.

Kërkoi, gjithashtu, shkarkimin e Pacollit nga pozita e kryetares së komisionit parlamentar.

PDK-ja kërkoi të verifikohet nëse ministri Peci ka ndikuar që vëllai i deputetes të përfitojë grantin në vlerë rreth 100 mijë euro.

Ndaj këtyre akuzave reagoi edhe ministri i Bujqësisë, i cili tha se nga tani e tutje nuk do ta kursejë gjuhën e tij.

PDK-në, ai e quajti kriminale.

Më vonë u raportua se përfitues i një granti është edhe daja i deputetes Pacolli.

Në anën tjetër, Agjencia për Zhvillim të Bujqësisë në Ministrinë e Bujqësisë i ka refuzuar Kooperativës Bujqësore “Krusha”, aplikimin për grantin bujqësor.

Sipas një reagimi të kooperativës, refuzimi është bërë me arsyetimin se mungonin dokumente plotësuese.

“Krusha” e quajti shqetësues dhe zhgënjyes këtë refuzim.