Lajmet

​KQZ certifikon rezultatet e zgjedhjeve në Ferizaj, Shtime e Podujevë

Në Ferizaj ka fituar Agim Aliu nga Partia Demokratike e Kosovës, ndërsa në dy komunat tjera do të garohet për herë të dytë më 14 nëntor.

Published

on

Komisioni Qendror i Zgjedhjeve (KQZ) ka certifikuar sot rezultatet e zgjedhjeve në Ferizaj, Shtime dhe Podujevë.

Në Ferizaj ka fituar Agim Aliu nga Partia Demokratike e Kosovës, ndërsa në dy komunat tjera do të garohet për herë të dytë më 14 nëntor.

Në mbledhjen e sotme, KQZ ka shpallur zgjedhjet për 38 kuvende komunale. LDK e PDK janë partitë me më së shumti këshilltarë komunalë në tërë vendin – 206. Ndërkaq, LVV ka siguruar 193 ulëse në Kuvendet Komunale me mbi 168 mijë vota.

Kryesuesi Kreshnik Radoniqi tha se fitues i zgjedhjeve në komunën e Ferizaj është Agim Aliu nga PDK-ja.

“Kemi certifikimin e rezultateve për kryetar komune në Ferizaj, kryetar është zgjedhur Agim Aliu nga PDK-ja me 30 mijë e 627 vota ose 62.38 për qind. Me vota unanime certifikohet rezultati për kryetar komune në Ferizaj, me fitues Agim Aliu. Për kryetar të Shtimes, në raundin e dytë shkojnë kandidatët Qemajl Aliu nga LVV me 45.29 për qind dhe Naim Ismajli nga PDK me 44.23 për qind”, tha Radoniqi.

Edhe në Podujevë do të garohet për herë të dytë mes Lëvizjes Vetëvendosje dhe Lidhjes Demokratike të Kosovës.

“Në raundin e dytë do të shkojnë kandidatët Ekrem Hyseni nga Lidhja Demokratike e Kosovës me 44.20 për qind dhe Shpejtim Bulliqi nga Lëvizja Vetëvendosje me 44.16 për qind… për komunën e Kllokotit do të presim ose gjatë ditës ose në mbledhjen e radhës”, ka thënë ai.

Por, për votat në Shtime ka pasur ankesa anëtari i PDK-së, Arianit Elshani.


“PZAP ka hedhur poshtë kërkesën e kandidatit të PDK-së, në këtë rast shefit të shtabit që ka qenë kërkesë e tij. Me arsyetimin se KQZ-ja ka bërë përmirësimet dhe këtë përmirësim. Dhe këtë përmirësim unë nuk e pash në vendim. Kjo është arsyeja pse e ngrita këtë çështje. Pra, ne kemi një vendim të PZAP-së, e cila thotë se KQZ-ja ka bërë përmirësimet. Kurse në rekomandimin që vjen sot në vendim nuk evidentohet ky përmirësim”, ka thënë Elshani.

Më pas u tha se ky është një gabim teknik dhe se PDK në Shtime ka siguruar 44.54 për qind të votave. Megjithatë, Alim Rama nga LVV nuk ka pranuar të votojë për certifikimin e këtyre rezultateve.


“Raporti i sistemit nga QNR thotë Qemajl Aliu- pesë mijë e 964 vota, 45.29 për qind. Naim Ismajli, pesë mijë e 824 vota, 44.23 për qind. Bedri Zeqiri, një mijë e 361. Këto janë prej QNR-së. Ku e di unë kur janë nxjerrë. Unë i kam vetëm këto, nuk kam tjera. Nuk mund të votoj rezultate të tjera”, ka thënë ai.

Komisioni Qendror i Zgjedhjeve (KQZ) ka shpallur rezultatet përfundimtare për 1002 këshilltarë komunale. Sipas këtyre rezultateve, LDK dhe PDK kanë më së shumti asamblistë, nga 206 secila në tërë vendin.

Ndërkaq, LVV ka siguruar 193 ulëse në Kuvendet Komunale me mbi 168 mijë vota. Aleanca për Ardhmërinë e Kosovës në tërë vendin do të ketë 120 asamblistë. Nisma ka siguruar 21 ulëse, ndërsa Aleanca Kosova e Re do të ketë tetë asamblistë.

Lista e pavarur e kandidatit Bekim Jashari do të ketë në Skenderaj 10 ulëse, ndërsa Lista Serbe në komunat ku ka garuar do të ketë 147 këshilltarë komunalë.

Lajmet

​Ish-presidenti Nicolas Sarkozy zyrtarisht në burg, i pari në historinë e Francës

Published

on

Ish-Presidenti francez Nicolas Sarkozy është zyrtarisht në burg që nga mëngjesi i së martës për të vuajtur dënimin prej pesë vjetësh për konspiracion kriminal në një çështje që lidhet me financimin libian të fushatës së tij zgjedhore në vitin 2007.

Sarkozy mbërriti në burgun La Santé në Paris, duke u bërë presidenti i parë francez që përjetëshëm shkon në burg, raporton transmetuesi i BFM TV.

Më shumë se 100 vizitorë u mblodhën pranë shtëpisë së tij për të shprehur mbështetje, ndërsa avokati i Sarkozy¬s, Christophe Ingrain, i tha BFM TV-së se një kërkesë për lirimin e tij do të paraqitet shumë shpejt, duke theksuar se ai do të qëndrojë tre javë deri një muaj në paraburgim para se gjykata e apelit të vendosë.

Para se të largohej nga shtëpia, Sarkozy shpërndau një mesazh përmes kompanisë amerikane të mediave sociale X, duke u zotuar të vazhdojë të denoncojë skandalin gjyqësor.

“Do të vazhdoj të denoncoj këtë skandal gjyqësor, këtë përvojë që po përjetoj për më shumë se dhjetë vjet. Këtu kemi një rast financimi të paligjshëm pa asnjë financim! Një hetim gjyqësor që zgjat prej kohësh, nisur në bazë të një dokumenti që tani është vërtetuar se është i falsifikuar”, tha ai.

Sarkozy theksoi se nuk kërkon asnjë përfitim dhe asnjë favor.

“Këtë mëngjes ndjej një trishtim të thellë për Francën, e cila është poshtëruar nga një shprehje e hakmarrjes që ka ngritur urrejtjen në një nivel të paprecedentë. Nuk kam dyshim. E vërteta do të triumfojë. Por çfarë çmimi i tmerrshëm do të jetë paguar”, shtoi ai.

Ish-presidenti francez ishte shpallur fajtor muajin e kaluar me dënim pesë vjet për konspiracion kriminal, por u shpall i pafajshëm për korrupsion pasiv dhe për akuza të tjera për financim të paligjshëm zgjedhor.

Sarkozy ishte zgjedhur president i Francës në vitin 2007 dhe shërbeu deri në vitin 2012./S.K/KP/

Continue Reading

Lajmet

BE nën kritika për pezullimin e sanksioneve ndaj Izraelit

Published

on

Bashkimi Evropian është kritikuar për vendimin për të pezulluar sanksionet ndaj qeverisë izraelite, pas përpjekjeve të Donald Trump për paqe në Lindjen e Mesme, ndërsa armëpushimi mbetet i brishtë.

Pas takimit me ministrat e jashtëm të BE-së, shefja e politikës së jashtme, Kaja Kallas, njoftoi se BE do të ndalë përkohësisht planet për të pezulluar tregtinë preferenciale me Izraelin dhe për të vendosur sanksione ndaj personave përgjegjës për nxitjen e konfliktit.

Ajo tha se situata ka ndryshuar dhe se masat nuk hiqen nga tryeza, por nuk zbatohen tani.

Ish-përfaqësuesi i BE-së në territoret palestineze, Sven Kuhn von Burgsdorff, kritikoi vendimin duke thënë se sanksionet janë një mjet ligjor për t’iu përgjigjur shkeljeve të ligjit ndërkombëtar.

Sipas The Guardian, ai kujtoi se BE-ja kishte përfunduar në qershor se Izraeli kishte shkelur detyrimet për të drejtat e njeriut dhe duhet të respektojë opinionin e Gjykatës Ndërkombëtare që kërkon përfundimin e pushtimit të territoreve palestineze. 414 ish-diplomatë dhe zyrtarë të BE-së nënshkruan një deklaratë duke kërkuar veprim të fortë kundër ekstremistëve në të dyja anët.

Ish-këshilltarja e BE-së, Nathalie Tocci, paralajmëroi se heqja dorë nga sanksionet do të ishte “gabimi më i madh”, pasi është momenti për të mbajtur presionin, ndërsa plani i Trump është ende i pasigurt.

BE-ja mbetet e ndarë mes vendeve pro-palestineze, si Spanja e Irlanda, dhe atyre që mbështesin Izraelin, si Hungaria e Çekia. Megjithatë, protestat masive në Evropë kanë nxitur kërkesa për veprim më të ashpër kundër Izraelit.

Zyrtarët e BE-së duan që blloku të përfshihet në bordin e paqes të Trumpit dhe të ndihmojë në rindërtimin e Gazës, që mund të kushtojë rreth 70 miliardë dollarë.

Një mandat i fortë i OKB-së pritet të mundësojë dërgimin e trupave ndërkombëtare, me Egjiptin në krye./S.K/KP/

Continue Reading

Lajmet

Ish-kryeministri Fatos Nano në gjendje kritike për jetën

Published

on

Gjendja shëndetësore e ish-kryeministrit Fatos Nano thuhet se prej afro dy javësh është në gjendje kritike për jetën. Ish-kreu i Partisë Socialiste pësoi një arrest kardiorespirator çka i shkaktoi edhe dëmtime në tru.

Ish-kryeministri Nano ndodhet në reanimacion, në një spital privat në kryeqytet.

Ai ka pësuar një arrest kardio-respirator në ambientet e shtëpisë së tij, por ndërhyrja e menjëhershme e mjekëve ka bërë të mundur kthimin e tij në jetë.

Dy vitet e fundit ish-kryeministri Nano i ka pasur të shpeshta kontrollet mjekësore në spitalin privat në Tiranë.

Më herët ai ka qenë i intubuar për shkak të një sëmundje kronike në mushkëri që mjekët e quajnë spok.

Pas rehabilitimit ai u rikthye në shtëpi, por sërish pati një problem shëndetësor duke iu nënshtruar një ndërhyrje ortopedike për shkak të thyerjes së një prej kockave të legenit.

73-vjeçari Fatos Nano u shkëput nga politika në vitin 2005.

Ai ka qenë kryeministër i vendit përgjatë viteve 1991, 1997-1998 dhe 2002-2005. Ai është themeluesi i Partisë Socialiste dhe kreu i parë i saj./S.K/EO/A2 CNN/

Continue Reading

Lajmet

Arsenal- Atletico Madrid, derbi i së martës në Champions

Published

on

Gara në Ligën e Kampionëve vazhdon me ndeshjet e xhiros së tretë të fazës së ligës, ku sot janë nëntë ndeshjet e para të xhiros së tretë, kurse vëmendja do të jetë në stadiumin “Emirates” në Londër.

Nga ora 21:00 takohen Arsenali dhe Atletico Madridi, në ndeshjen më interesante të së martës.

Arsenali ka fituar dy ndeshjet e para, njëjtë si Bayerni, Real Madridi, PSG-ja, Interi e Qarabagu. Skuadra e Mikel Artetas në xhiron e parë fitoi 2:0 në udhëtim tek Athletic Bilbao, ndërsa në të dytën fitoi po me 2:0 ndaj Olympiacosit.

Skuadra e Diego Simeones, Atletico Madridi, në xhiron e parë humbi 3:2 nga Liverpooli, ndërsa në të dytën e shkatërroi, 5:1, skuadrën gjermane, Eintracht Frankfurt.

Arsenali është në moment të mirë edhe në Premier League. Pas xhiros së tetë udhëheqë në tabelë me 19 pikë. Në fundjavë “topçinjtë” fituan 1:0 ndaj Fulhamit.

“Ishte një fillim i mahnitshëm i edicionit për ne. Por gjëja më e rëndësishme është se si përfundon kampanja. Është mirë që jemi në moment pozitiv. Ekipi është plot me besim dhe ne jemi në ecuri të mirë. Por na pret rrugë e gjatë. Gjëja e mirë është që në aspektin mental jemi gati për ndeshje dhe që të japim më të mirën”, ka thënë mesfushori i Arsenalit, Mikel Merino.

Trajneri i Arsenalit, Mikel Arteta, foli me respekt për Simeonen dhe punën që e ka bërë ai tek Atletico.

Ndërkohë, Simeone ka theksuar se në Londër kanë udhëtuar për fitore.

“Kemi ardhur me shpresë për ndeshje të madhe dhe për të siguruar fitoren që na duhet. Synojmë fitore në udhëtim në Ligën e Kampionëve. Do t’i qasemi ndeshjes me intensitetin që e meriton”, ka theksuar Simeone.

Të martën janë edhe disa ndeshje të tjera interesante:

Nga ora 18:45, Barcelona e pret Olympiacosin dhe llogarit në fitore tjetër.

Në termin të njëjtë zhvillohet ndeshja mes Kairat Almatyt dhe Pafosit qipriot.

Fituesi në fuqi i Ligës së Kampionëve, Paris Saint Germaini nuk pritet të ketë punë të lehtë ndaj Bayer Leverkusenit në Gjermani. Leverkuseni është nënkampion i Gjermanisë.

Fitore në udhëtim synojnë edhe dy skuadrat e mëdha italiane.

Kampioni i Italisë, Napoli, luan në Holandë ndaj PSV-së, ndërsa Interi luan në Belgjikë ndaj Royale Union.

Ndërkohë Manchester City i Pep Guardiolas është mysafir i Villarrealit në Spanjë.

Copenhagen- Dortmund dhe Newcastle United-Benfica janë ndeshjet tjera sonte./S.K/EO/

Continue Reading

Të kërkuara