Lajmet

​Kosova dhe Shqipëria nisin planin operacional për adresimin e barrierave ekonomike

Hajdari tha se pikërisht për këtë qëllim, kanë ngritur Sekretariatin për adresimin e barrierave tregtare Kosovë-Shqipëri.

Published

on

Si rezultat i arritjes së disa marrëveshjeve ndërmjet Kosovës dhe Shqipërisë, ka nisur së zbatuari plani operacional për adresimin e barrierave ekonomike e tregtare midis këtyre dy shteteve. Kështu bëri të ditur ministrja e Industrisë, Ndërmarrësisë dhe Tregtisë, Rozeta Hajdari gjatë raportimit në Komisionin për Ekonomi.

Ndërsa, kryetari i Komisionit, Ferat Shala ka pyetur ministren Hajdari për mundësinë e krijimit të lehtësirave për regjistrimin e bizneseve të Shqipërisë në Kosovë.

“Ka qenë e rekomanduar për fillimin e një procesi të lehtësimit të bizneseve nga Shqipëria që regjistrohen në Kosovë dhe të vendit tonë në Shqipëri. Për këtë çka keni ndërmarrë që numri i regjistrimit të bizneseve ose lehtësitë procedurale që bizneset e këtyre dy vendeve të kenë një ngritje në këtë relacion?”, ka pyetur Shala.

Ministrja Hajdari tha se pikërisht për këtë qëllim, kanë ngritur Sekretariatin për adresimin e barrierave tregtare Kosovë-Shqipëri, edhe sa i përket regjistrimit të bizneseve.

“Për këtë qëllim ne si Qeveri kemi pasur takim ndërqeveritar me Republikën e Shqipërisë dhe së bashku me ministren e Ekonomisë, jemi në plan operacional për lehtësimin e të bërit biznes në të dy shtetet, në Kosovë dhe Shqipëri. Dhe një ndër to është që të kemi edhe lehtësi për regjistrime të bizneseve. Përpos barrierave tregtare që kanë qenë të shprehura aty këtu në kufi dhe është ngritur sekretariati për këtë çështje mes Shqipërisë dhe Kosovës për të rritur bashkëpunimin ekonomik dhe në fushat e tjera si në arsim dhe të tjera mes dy republikave. Pra, ne kishim pas disa marrëveshje të bashkëpunimit shumë të mira, por nuk ka pasur plane operative konkrete si të veprojmë”, theksoi Hajdari.

Komisioni për Ekonomi, Industri, Ndërmarrësi dhe Tregti në mbledhjen e sotme ka miratuar në parim Projektligjin për Turizmin.

Këtë Projektligj e ka arsyetuar ministrja e Industrisë, Ndërmarrësisë dhe Tregtisë, Rozeta Hajdari, e cila theksoi se ky projektligj është i rëndësisë së veçantë dhe me interes kombëtar.

“Ligji për turizmin synon të vendos bazën ligjore për zhvillimin e turizmit konkurrues dhe të qëndrueshëm në Republikën e Kosovës, duke shfrytëzuar burimet natyrore, kulturore, njerëzore e financiare. Po ashtu, është në harmoni me legjislacionin e Bashkimit Evropian dhe standardet bashkëkohore… Jemi duke punuar po ashtu edhe për strategjinë për turizmin dhe besoj se ky ligj do ta ndihmojë po ashtu në zbatimin e planeve vjetore për turizmin. Andaj, ju ftoj për përkrahjen e këtij projektligji, sepse është me rëndësi të veçantë dhe interes kombëtar”, u shpreh ajo.

Në këtë Komision është shqyrtuar edhe Plani i performancës së Agjencisë Kosovare të Privatizimit për vitin 2022.

Zëvendësuesi i drejtorit menaxhues të Agjencisë Kosovare të Privatizimit (AKP), Avni Jashari tha se Fondit Sovran pritet t’i barten 41 mijë hektarë tokë, 24 objekte administrative dhe 70 asete të tjera të ndërmarrjeve.

Jashari duke treguar se e gjithë vlera aktuale e shpronësimeve është rreth 80 milionë euro, theksoi se transformimi i pronave do të ndodhë vetëm atëherë kur të miratohet Ligji për krijimin e Fondit Sovran.

“Kemi pasur takime konsultuese me kryesuesin e Grupit për themelimin e Fondit Sovran lidhur me asetet të cilat parashihen që të barten tek Fondi sovran me procedurë ligjore, ligj i cili duhet të miratohet në Kuvend. Në parim asetet të cilat janë paraparë të transferohen janë tokat e pa shitura, diku rreth 41 mijë hektarë tokë, 24 objekte administrative të cilat mund të përdoren për akomodimin e institucioneve publike, dhe rreth 70 asete të tjera, të cilat i përkasin ndërmarrjeve të ndryshme shoqërore, por që mund të kenë një potencial për zhvillim ekonomik. Informatën e vetme e kemi që është miratuar koncept-dokumenti prej Grupit Punues për themelimin e Fondit Sovran… Se sa është kostoja e atij procesi varet sa asete vendosin në fund t’i transferojnë në Fondin Sovran. Tash kostoja aktuale e shpronësimit është diku rreth 80 milionë euro, me ligjin e AKP-së paguhet 20 përqindëshi i kostos totale të shpronësimit”, theksoi ai.

Me tej Jashari tha se Agjencia ka miratuar strategjinë përmbyllëse të Agjencisë për tri vjetët e ardhshme, derisa u shpreh po ashtu se sfida më e madhe për vitin 2022 mbetet përgatitja e listave të punëtorëve nga ndërmarrjet.

Në këtë raportim ka marrë pjesë edhe Syzana Dautaj Surdulli zëvendëskryesuese e Bordit të AKP-së, e cila bëri me dije se për vitin 2022 kanë planifikuar t’i shkurtojnë shpenzimet për paga, mallra dhe shpenzime në vlerë prej 2.6 milionë euro.

Surdulli para Komisionit tregoi po ashtu se kur mund të nis procesin e privatizimit AKP-ja.

“Lista tjetër e aseteve është listë me të cilën ne synojmë të fillojmë me shitjen dhe privatizim, porsa të merret vendimi nga Qeveria. Aktivitet tjetër është edhe kursimi i mjeteve të konsiderueshme buxhetore, që kemi bërë gjatë këtyre pesë muajve… Andaj, ne kemi vendosur që t’i zbresim pagat duke filluar nga 30 deri 10 përqind. Ky lloj i kursimit në paga e arrin vlerën 1 milionë e 400 mijë euro. Përpos këtyre kursimeve kemi bërë edhe disa kursime të tjera në mallra dhe shërbime, që në total kursimet arrijnë në vlerë prej 2 milionë e 600 mijë euro në buxhetin për vitin 2022”, theksoi ajo.

Komisioni për Ekonomi miratoi në parim Projektligjin për Markat Tregtare, si dhe Projektligjin për Mbrojtjen e Sekreteve Tregtare.

Rajoni

Rektori Hajrizi mori pjesë në Konferencën CIGRE Kosova mbi “Formësimin e fuqisë punëtore të së ardhmes: Perspektiva e universitetit mbi tregun e punës”

Published

on

Rektori i UBT-së, Prof. Dr. Edmond Hajrizi, mori pjesë në konferencën e organizuar nga CIGRE Kosova, me temën “Formësimi i fuqisë punëtore të së ardhmes: Perspektiva e universitetit mbi tregun e punës në sektorin e energjisë”. Në këtë ngjarje u bashkuan ekspertë të energjisë, akademikë dhe përfaqësues të industrisë, për të diskutuar ndikimin e transformimeve teknologjike në zhvillimin e kapaciteteve profesionale dhe krijimin e vendeve të reja të punës.

Në fjalën e tij, Rektori Hajrizi theksoi se universitetet duhet të kenë një rol udhëheqës në përgatitjen e fuqisë punëtore të digjitalizuar, duke ndërtuar ura bashkëpunimi midis arsimit, inovacionit dhe industrisë. Ai nënvizoi rëndësinë e edukimit ndërdisiplinar dhe zhvillimin e programeve studimore që përfshijnë fusha si energjia e zgjuar, inteligjenca artificiale, teknologjia 5G dhe menaxhimi i qëndrueshëm i burimeve.

Rektori Hajrizi po ashtu theksoi rëndësinë e studimeve të doktoratës dhe akreditimit të programeve në këtë nivel, si domosdoshmëri për zhvillimin e kërkimit shkencor të avancuar dhe përgatitjen e ekspertëve të nivelit të lartë që i nevojiten tregut të punës. Ai potencoi se akreditimi i doktoraturave në fushat e energjisë, teknologjisë dhe inovacionit është një hap i rëndësishëm për të forcuar lidhjen mes universiteteve dhe industrisë, si dhe për të krijuar një bazë të qëndrueshme të zhvillimit akademik dhe profesional.

Gjithashtu, Rektori prezantoi arritjet e UBT Smart City, e cila ka integruar teknologjinë 5G dhe sistemet e mençura të energjisë, duke e bërë UBT-në një ndër institucionet e para në rajon që po e zbatojnë në praktikë konceptin e qytetit të mençur (Smart City). Këto zhvillime lidhin drejtpërdrejt kërkimin shkencor me nevojat e ekonomisë moderne dhe krijojnë terren të përshtatshëm për përfshirjen e studentëve dhe stafit akademik në projekte të avancuara.

Rektori theksoi se sektori i energjisë është ndër më dinamikët në procesin e digjitalizimit dhe zhvillimit të qyteteve të mençura, duke hapur mundësi të reja për bashkëpunim ndërmjet universiteteve dhe industrisë, si dhe për krijimin e vendeve të punës të orientuara drejt inovacionit, qëndrueshmërisë dhe kërkimit shkencor të avancuar.

Konferenca CIGRE Kosova shërbeu si një platformë e rëndësishme për shkëmbimin e ideve, nxitjen e kërkimit shkencor dhe forcimin e partneriteteve ndërmjet akademisë dhe sektorit energjetik, në funksion të përgatitjes së brezave të rinj për tregun dinamik të punës së së ardhmes.

Continue Reading

Aktualitet

Studim i përbashkët UBT – Universiteti i Mynhenit publikohet në revistë ndërkombëtare shkencore

Published

on

Një bashkëpunim i rëndësishëm ndërmjet UBT-së dhe Universitetit Teknik të Mynhenit (Technical University of Munich) ka rezultuar me publikimin e një punimi shkencor në një revistë prestigjioze ndërkombëtare të indeksuar në Scopus dhe Web of Science, me faktor impakti 2.2.

Punimi me titull “Microbiological Analysis of Traditional Sausage in Prishtina, Republic of Kosovo, During Production and Storage”, është publikuar në revistën Microbiological Research (MDPI) dhe përfaqëson një nga studimet e para të këtij lloji në Kosovë, duke analizuar aspektet mikrobiologjike dhe të sigurisë ushqimore të suxhukut tradicionalë kosovarë gjatë prodhimit dhe ruajtjes.

Studimi është realizuar nga një ekip ndërdisiplinar studiuesish, përfshirë:

Prof. Dr. Flutura C. Ajazi – UBT, autore e parë dhe correspondent e punimit

Prof. ass. Veton Haziri-UBT, autorë correspondent

Bashkëautorët: Rreze M. Gecaj, Sarah Shaqiri, Idriz Vehapi, Namik Durmishi, Xhavit Bytyçi dhe Violeta Lajqi-Makolli, në bashkëpunim me Prof. Dr. Matthias A. Ehrmann nga Universiteti Teknik i Mynhenit, Gjermani.

Qëllimi i studimit ka qenë vlerësimi i ndryshimeve mikrobiologjike gjatë fazave të fermentimit dhe ruajtjes së suxhukut tradicional të prodhuar në Prishtinë, me fokus në bakteret e acidit laktik (LAB) dhe familjen Micrococcaceae, të cilat kanë rol kyç në sigurinë dhe cilësinë e produktit.

Rezultatet treguan se gjatë procesit të ruajtjes ndodh një ulje e ndjeshme e baktereve patogjene si Enterobacteriaceae, ndërsa bakteret e dobishme (LAB) dhe Micrococcaceae mbeten stabile, duke dëshmuar se produktet tradicionale të prodhuara sipas metodave lokale ruajnë cilësi dhe siguri të lartë mikrobiologjike.

Gjetjet e këtij studimi ofrojnë dokumentacion të vlefshëm të praktikave lokale që mund të ndikojnë në cilësinë e produktit dhe afatin e ruajtjes. Në kontekstin e këtij studimi, autoret bejne thirrje tek autoritetet e sigurisë ushqimore të Kosovës qe të zbatojnë programe ndërgjegjësimi për prodhuesit e produkteve tradicionale të mishit, për të promovuar praktikat më të mira dhe për të siguruar prodhimin e produkteve të sigurta dhe me cilësi të lartë. Kjo është e nevojshme për të rritur cilësinë e suxhukut dhe produkteve të tjera të mishit të prodhuara me metoda tradicionale, përmes përmirësimit të parametrave të tyre higjienikë, etiketimit dhe paketimit, të cilat mund të ndikojnë në rritjen e eksportit dhe të vlerës së produktit.

Punimi është pranuar më 26 gusht 2025 dhe publikuar më 3 shtator 2025, nën redaktimin akademik të Prof. Dr. Beniamino T. Cenci-Goga.

Continue Reading

Rajoni

UBT organizon ligjëratë ndërkombëtare dhe hap Panairin e Materialeve në Arkitekturë dhe Konstruksione

Published

on

UBT njofton se të premten, më 24 tetor 2025, duke filluar nga ora 09:00, në Kampusin Inovativ të UBT-së në Lipjan (Objekti I), do të mbahet një ligjëratë tematike ndërkombëtare me titull: “Environmental Sustainability of Concrete Structures”, që do të udhëhiqet nga Prof. Bruno Dal Lago nga Universiteti i Insubrias dhe Politekniku i Milanos, Itali.

Ligjërata do të trajtojë praktikat bashkëkohore të qëndrueshmërisë mjedisore në ndërtimet prej betoni, duke sjellë njohuri shkencore dhe përvoja profesionale nga universitetet më prestigjioze evropiane.

Pas ligjëratës, nga ora 10:00, do të zhvillohet Ceremonia e Hapjes së “Panairit të Materialeve”, që do të mbahet në hollin e Objektit I, dhe do të vazhdojë deri në ora 14:00.

Ky panair do të prezantojë materiale dhe teknologji inovative në fushën e arkitekturës, inxhinierisë dhe ndërtimtarisë, si dhe do të shërbejë si platformë për ndërveprim ndërmjet studentëve, profesorëve dhe kompanive bashkëpunëtore.

Gjithashtu, në të njëjtën ditë, nga ora 12:40, do të mbahet prezantimi i kompanisë ndërkombëtare “PENETRON”, e cila do të paraqesë materiale inovative që lidhen me ndërtimet prej betoni, arkitekturën dhe qëndrueshmërinë strukturore.

Ky prezantim do të zhvillohet po ashtu në Objektin I të Kampusit të UBT-së në Lipjan.

Ligjërata është obligative për studentët e programeve “Materialet në Arkitekturë” dhe “Konstruksionet e Betonit” (niveli Bachelor), ndërsa janë të ftuar të marrin pjesë edhe studentët e lëndës “Bazat e Konstruksioneve të Betonit” në Arkitekturë dhe të gjithë studentët e interesuar nga vitet tjera të studimeve.

Kjo ngjarje përfaqëson një mundësi unike për studentët dhe profesionistët e rinj që të njihen nga afër me risitë bashkëkohore të qëndrueshmërisë në ndërtim, materialet inteligjente dhe zhvillimet më të fundit teknologjike në këtë fushë.

Continue Reading

Lajmet

Përfundon rinumërimi i 16 kutive të votimit nga 12 vendvotime

Published

on

By

Në Qendrën e Numërimit dhe Rezultateve është përmbyllur procesi i rinumërimit të kutive të votimit, për rinumërimin e të cilave mori vendim Komisioni Qendror Zgjedhor (KQZ) në mbledhjen e ditës së mërkurë, raporton KosovaPress.

Nga pasditja e ditës së mërkurë dhe deri në orën 15:30 të ditës së enjte, janë rinumëruar 16 kuti të votimit.

Rezultatet nga rinumërimi pasqyrohen platformën https://resultslocal2025.kqz-ks.org/, në rubrikën “Rezultatet QNR – Rinumëruara”.

Gara e balotazhit në Kosovë për kryetar të komunave ku në raundin e parë nuk kishte fitues mbahen më 9 nëntor./KP

Continue Reading

Të kërkuara