

Lajmet
Komisioni voton strategjinë për energji, kundërshtohet nga PDK-ja
PDK-ja vlerëson se ky dokument i sjellë nga qeveria është i dëmshëm për vendin.
Published
2 years agoon
By
Betim GashiKomisioni parlamentar për Ekonomi me vota të pozitës ka miratuar të martën strategjinë për energji 2022-2031. Kundër kësaj strategjie ishte partia më e madhe opozitare, Partia Demokratike e Kosovës, e cila ka vlerësuar se ky dokument i sjellë nga qeveria është i dëmshëm për vendin.
Me kërkesë të shefes së Grupit Parlamentar të Vetëvendosjes, Mimoza Kusari-Lila, Komisioni ka vendosur që sot të shqyrtohet kjo strategji, e cila nuk ka qenë në agjendë për diskutim.
Ministrja e Ekonomisë, Artane Rizvanolli, gjatë arsyetimit të kësaj strategjie në komisionin parlamentar ka thënë se vizioni i strategjisë është që të zhvillohet një sektor energjetik i qëndrueshëm, të integruar në tregun pan-evropian që garanton siguri të furnizimit me energji elektrike dhe përballueshmëri për qytetarët.
“Dokumenti paraqet një balancim të mirë në mes të kërkesave të qytetarëve, nevojave të sektorit për energji dhe për siguri të furnizimit ashtu edhe për të pasur një sektor energjetik më të pastër në të ardhmen. Në masë të madhe kemi një konsensus sa i përket vizionit të strategjisë dhe objektivave. Mendoj se kjo është një bazë e mirë që strategjia të jetë e realizueshme në të ardhmen, duke qenë se ka një pajtueshmëri të lartë në mes të të gjithë akterëve për atë se ku dëshirojmë të arrijmë. Vizioni i strategjisë së energjisë është që të zhvillojmë një sektor energjetik të qëndrueshëm, të integruar në tregun pan-evropian që garanton siguri të furnizimit me energji elektrike dhe përballueshmëri për qytetarët”, theksoi ajo.
Kryetari i Komisionit nga radhët e PDK-së, Ferat Shala, pati vërejte për strategjinë e energjisë, dhe pati kritika për partinë në pushtet që me urgjencë të shqyrtohet ky dokument në kuvend. Deputeti Shala ka thënë se strategjia ka dhjetëra shkelje procedurale dhe profesionale. Për këto arsye ai tha se do të jenë kundër kësaj strategjie.
“Është e pakuptimtë dhe jo serioze ftesën që na e keni bërë për një debat në institucionet e qeverisë. Dhe në të njëjtën kohë ju na ftoni për debat, për analizë, për diskutim, në anën tjetër kolegët e subjektit tuaj na propozojnë me procedurë të jashtëzakonshme futjen në rend dite për ta përcjellë në seancën e radhës. Pra, definitivisht është sjellje jo serioze institucionale, sepse ne parimisht kishim pasur vullnet që të kontribuojmë, por kështu po na jepni mundësinë zero për të komunikuar dhe kontribuar. Andaj, edhe qëndrimi ynë do të jetë kundër kësaj, sepse ka dhjetëra shkelje procedurale, profesionale, e strategjike të dëmshme dhe mbi të gjitha është një strategji që nuk ia kisha dëshiruar Kosovës në asnjë situatë kështu siç është dhe me procedurë siç po pretendohet të arrihet. Ne nuk kemi asnjë studim çka do të ndodhë me bateritë pas 5 vjetëve në fushën e mjedisit. Strategjia do të duhej të ishte kompatibile me projekte që ju keni nënshkruar tashmë”, tha ai.
Ndërsa, gjatë raportimit për nivelin e zbatimit të Ligjit për komunikimet elektronike në Komisionin për ekonomi, ministrja e Ekonomisë, Rizvanolli, ka thënë se shërbimet e komunikimeve elektronike të operatorit të telefonisë “Vala” janë duke mbuluar të gjitha pikat kufitare të vendit, përfshirë edhe dy pikat kufitare në veri të vendit.
Rizvanolli ka folur edhe për përpjekjet e qeverisë për përmirësimin e infrastrukturës së shërbimeve të komunikimeve edhe në katër komunat veriore të vendit.
“Tani më “Vala” është prezentë në të gjitha pikat kufitare të vendit, duke i përfshirë edhe ato në komunat veriore të vendit. Telekomi është duke bërë investime në komunat veriore për aq sa ka mundësi financiare, duke i marrë parasysh të gjitha vështirësitë me të cilat jemi të njohur të gjithë. Ndërsa, ne si qeveri do t’i ndajmë 1 milion euro për Telekomin për të zhvilluar infrastrukturën në komunat veriore të vendit. Duhet thënë se ky investim do të bëhet, në mënyrë të tillë që të mund të përdoret edhe nga operatorët e tjera, pra nuk është ekskluziv për Telekomin”, theksoi ajo.
Deputeti i Lëvizjes Vetëvendosjes, Driton Hyseni, ka theksuar se edhe pse ka ngritje të cilësisë së shërbimeve elektronike për qytetarët, ka ende telashe ose sfida për mbulimin e tërë vendit me shërbime telefonike dhe internetit.
Hyseni ka potencuar se ka një angazhim të Autoritetit Rregullativ të Komunikimeve Elektronike dhe Postare (ARKEP), për rritjen e shërbimeve të komunikimeve elektronike, por ka shtuar se nxitja e konkurrencës në këtë fushë është e nevojshme.
“Është evidente që një pjesë e madhe e territorit të Kosovës ka ende telashe bazike sa i përket pjesës së komunikimeve elektronike, respektivisht thirrjeve telefonike, por edhe shërbimeve të ofruara nga operatorët sa i takon shërbimeve me internet për qytetarët. Konsideroj që si ministri mund të keni një rol edhe më aktiv në drejtim të asaj se operatorët duhet të nxiten me masa konkrete sa i takon investimeve të mëtutjeshme në infrastrukturën e komunikimeve elektronike, sepse vetëm kjo siguron një shërbim edhe më cilësor për qytetarët e vendit… Shohim se ka një angazhim të ARKEP-it për monitorimin e brezave frekuencorë dhe për një qasje më të mirë për operatorët që i kemi në treg. Po ashtu, e konsideroj të nevojshme të kemi edhe një vlerësim nga e juaj për nxitje të konkurrencës që po bëhet në këtë fushë, sepse një konkurrencë e shëndoshë do të sjellë benefite të jashtëzakonshme për të gjithë shfrytëzuesit e shërbimeve”, theksoi Hyseni.
Lajmet
Protestë e re kundër shtrenjtimit të rrymës në Prishtinë
Published
2 days agoon
April 18, 2025By
UBTNews
Grupi “Asnjë cent më shumë” ka njoftuar se do të organizojë një protestë të re më 19 prill, kundër rritjes së çmimit të energjisë elektrike. Protesta do të mbahet në sheshin “Skënderbeu” në orën 12:00, dhe organizatorët kanë ftuar qytetarët të marrin pjesë në masë.
Besnik Shabiu, organizatori i protestës, ka deklaruar se protesta është një reagim ndaj vendimit të ZRRE-së për rritjen e çmimit të energjisë elektrike, duke theksuar se, nëse autoritetet nuk reagojnë, grupi nuk përjashton mundësinë e përshkallëzimit të aksioneve. Ai paralajmëroi se mund të ndodhin bllokime të rrugëve dhe institucioneve, për të siguruar që zëri i qytetarëve të dëgjohet.
Shabiu ka shtuar se protesta e nesërme vjen në një moment të rëndësishëm, pasi të njëjtën orë mbahet edhe vazhdimi i seancës konstituive të Kuvendit të Kosovës. Ai bëri thirrje për deputetët e zgjedhur që, sapo Kuvendi të konstituohet, të thirret komisioni për energji dhe ZRRE-ja për të raportuar mbi çështjen e rritjes së çmimit të energjisë.
“Zëri i qytetarëve duhet të dëgjohet pa ndërprerë. Ne do të vazhdojmë të jemi të zëshëm, dhe nëse pas kësaj proteste nuk ka reagim, do të jemi të detyruar të përshkallëzojmë aksionet”, tha Shabiu.
Ai gjithashtu njoftoi se po shqyrtohen mundësitë e pezullimit të pagesave për energjinë elektrike për qytetarët si një masë për të mbrojtur interesat e tyre. “Ky është një kërkesë legjitime e qytetarëve. Kur institucionet nuk punojnë për qytetarët, pse duhet të funksionojnë?”, shtoi ai.
Në anën tjetër, Ardian Bajraktari, një nga përfaqësuesit e grupit, ka bërë të ditur se ekipi i tij po punon për hartimin e padisë për anulimin e vendimit të aktit administrativ nga ZRRE. Sipas tij, ky vendim është marrë në shpërputhje me autorizimet e këtij institucioni dhe ka dëme të mëdha për qytetarët. Ai ka njoftuar se janë duke përgatitur gjithashtu një propozim për një masë të përkohshme, për të shtyrë ekzekutimin e vendimit derisa të shqyrtohet nga gjykatat.
Ky zhvillim vjen pas njoftimit të ZRRE-së për një rritje të çmimit të energjisë elektrike për 16%, që do të hyjë në fuqi nga muaji maj. Ky vendim ka shkaktuar reagime të shumta nga qytetarët, bizneset dhe subjektet politike, që po kundërshtojnë një rritje të tillë. Protesta të ngjashme janë mbajtur tashmë dhe grupet e aktivistëve po kërkojnë anulimin e këtij vendimi.
Për më shumë, grupi “Asnjë cent më shumë” ka paralajmëruar se do të vazhdojnë aksionet deri në arritjen e kërkesave të tyre dhe kanë ftuar qytetarët të bashkohen në protestën e nesërme për të shprehur pakënaqësinë e tyre ndaj shtrenjtimit të rrymës.
Lajmet
Osmani dekoron me medalje tre të mbijetuar të dhunës seksuale gjatë luftës
Published
2 days agoon
April 18, 2025By
UBTNews
Presidentja e Republikës së Kosovës, Vjosa Osmani, ka dekoruar me medaljen “Nderi i Republikës së Kosovës” tre të mbijetuar të dhunës seksuale gjatë luftës së fundit në Kosovë. Në një ceremoni të organizuar në Presidencë, medalja iu dorëzua Vasfije Krasniqi-Goodman, Shyrete Tahiri-Sylejmani dhe Ramadan Nishori, të cilët kanë folur publikisht për përvojat e tyre të dhunës nga forcat serbe gjatë luftës.
Në fjalimin e saj, Presidentja Osmani ka vlerësuar guximin e të mbijetuarve për të ndarë me publikun përvojat e tyre dhe ka theksuar rëndësinë e dëshmive të tyre për drejtësinë dhe të vërtetën historike të Kosovës. Ajo ka shtuar se këta individë janë dëshmi e gjallë e luftës për drejtësi dhe kanë kontribuar në ndriçimin e rrugës së drejtë të historisë së vendit.
“Ka momente ku fjalët nuk mjaftojnë për të shprehur mirënjohjen, siç ka edhe njerëz që me guximin e tyre të lënë pa fjalë. Sot jemi këtu për t’iu përulur me respektin më të thellë përballë tre individëve që janë më shumë se thjesht individë, sepse me dhimbjen e tyre kanë ndriçuar rrugën e drejtë së vërtetës, drejtësisë dhe shpresës. Ju jeni zëri që keni zgjedhur dinjitetin, jeni zëri i të mbijetuarve që kanë zgjedhur heshtjen. Ky është një premtim i gjallë se historia nuk do t’i harrojë,” tha Osmani.
Pas dekoratës, Ramadan Nishori shprehu mirënjohjen për përkrahjen nga populli, duke theksuar se ndihej mirë që kishte marrë mbështetje në këtë rrugëtim të vështirë. “E përshëndes gjithë popullin tonë që më ka përkrahur këto ditë,” tha ai shkurt.
Vasfije Krasniqi, një tjetër e dekoruar, bëri thirrje që viktimat e dhunës seksuale të flasin hapur dhe të kërkojnë drejtësi. “Dua të falënderoj për qasjen, angazhimin. Të dashura viktima, ju lutem, ku do që jeni, ka ardhur koha të kërkojmë drejtësi. Lirojeni shpirtin që të mos ia falim Serbisë krimin që ka kryer,” tha Krasniqi.
Shyrete Tahiri-Sylejmani, gjithashtu e dekoruar, theksoi rëndësinë e drejtësisë për arritjen e paqes. “Kur të kemi drejtësi, kemi paqe. Faleminderit për kurajën që na jepni,” përfundoi ajo.
Lajmet
Prokuroria kërkon vazhdimin e paraburgimit për Selimin dhe Krasniqin
Published
2 days agoon
April 18, 2025By
UBTNews
Prokuroria në Hagë ka kërkuar vazhdimin e paraburgimit për Rexhep Selimin dhe Jakup Krasniqin edhe për dy muaj të tjerë.
Në kërkesën për Krasniqin e ngjashëm edhe për Selimin, Prokuroria thotë se përfundimi i paraqitjes së provave nga ana e tyre rrit rrezikun e pengimit të drejtësisë dhe kryerjes së krimeve të tjera.
Veç kësaj, ZPS ka thënë se kjo justifikon edhe rishqyrtimin e rrezikut të arratisjes në vendimet për vazhdimin e paraburgimit. E njëjta gjë është theksuat edhe tek vendimi për Rexhep Selimin.
Sipas tyre vazhdon të ekzistojnë dyshime të bazuara se Jakup Krasniqi ka kryer një ose më shumë prej krimeve që bien në jurisdiksiomin e DHSK-së. Madje, Prokuroria thotë se ky dyshim është përforcuar edhe nga provat e ZPS-së që tashme janë përfshirë në dosjen e gjykimit.
Ata thonë se, fakti që Krasniqi dhe Selimi tani kanë njohuri të veçantë mbi rastin dhe provat kundër tij e rrit rrezikun që ai mund të kryejë krime të tjera, përfshirë kundër dëshmitarëve që kanë dhënë ose mund të japin dëshmi në çështje dhe/ose që mund të paraqiten para këtij Paneli në faza të ardhshme të procedurave.
“Për më tepër, Selimi tashmë është në dijeni të identitetit të të gjithë dëshmitarëve të ZPS-së dhe të provave të tyre. Përfundimi i çështjes së ZPS-së nuk e zvogëlon rrezikun e pengimit, por e rrit atë, pasi i akuzuari tashmë ka njohuri të plotë për përmbajtjen e çështjes ndaj tij. Siç është theksuar nga Trupi Gjykues, ekziston rreziku që ndërhyrjet me qëllim për të siguruar tërheqje të dëshmive dhe/ose për të dekurajuar dëshmitarët e ardhshëm nga dhënia e dëshmive mund të pengojnë përparimin e procedurës. Më tej, ekziston mundësia që dëshmitarët të thirren sërish, duke i bërë ata të cenueshëm ndaj përpjekjeve për ndërhyrje”, thuhet në kërkesën e Prokurorisë për Selimin.
Përveç rrezikut të arratisjes dhe pengimit të procedurave, Prokuroria ka thënë se masat e vendosura ne objektet e paraburgimit kanë ofruar garanci kundër vizitave dhe komunikimeve të pa-monitoruara si masa për të minimizuar rreziqet përkatëse.
Ata thonë se paraburgimi mbetet proporcional dhe i arsyeshëm veçanërisht që procedurat tashmë kanë përparuar.
Ndryshe, Prokuroria më 15 prill 2025 ka njoftuar se ka përfunduar paraqitjen e provave në këtë rast.
Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.
Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.
Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.
Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020. /Betimi për Drejtësi/
Lajmet
Rama: Vendimi për ndërprerjen e projektit në shesh nuk është i mbështetur ligjërisht
Published
2 days agoon
April 18, 2025By
UBTNews
Kryetari i Prishtinës, Përparim Rama, ka deklaruar se vendimi për ndalimin e punimeve në sheshin “Xhorxh Bush” është i paligjshëm dhe i pambështetur në argumente juridike. Ai tha se institucionet që morën këtë vendim po ndikohen nga qëllime politike, edhe pse duhet të veprojnë në mënyrë të pavarur.
“Për herë të dytë janë ndërprerë punimet në një projekt të planifikuar për transformimin e hapësirës publike. Arsyetimet për këtë ndërhyrje nuk qëndrojnë në bazë ligjore dhe nuk janë ngritur nga palët përkatëse,” tha Rama në një konferencë për media.
Ai theksoi se projekti ka për qëllim përmirësimin e hapësirës publike dhe integrimin e trashëgimisë kulturore në zhvillimin urban të qytetit.
“Ka munguar përgjigjja nga Ministri për një debat publik për këtë çështje, edhe pse kemi qenë të hapur për diskutim,” shtoi ai.
Rama njoftoi se Komuna e Prishtinës do të ndjekë rrugë ligjore ndaj veprimeve që, sipas tij, bien ndesh me ligjin.
“Kryeqyteti do të vazhdojë procedurat ligjore ndaj të gjithë atyre që shkelin ligjin,” përfundoi ai.

Protestë e re kundër shtrenjtimit të rrymës në Prishtinë

Osmani dekoron me medalje tre të mbijetuar të dhunës seksuale gjatë luftës

Prokuroria kërkon vazhdimin e paraburgimit për Selimin dhe Krasniqin

Rama: Vendimi për ndërprerjen e projektit në shesh nuk është i mbështetur ligjërisht

Avokati Rodney Dixon: Trupi gjykues po sfidon padrejtësisht dëshmitarin

Van Damme thotë se ka simpati për Putinin: Dua të shkoj në Rusi dhe të bëhem ambasador i paqes atje

Kryetari i Prishtinës mirëpret Vasfije Krasniqin në Odën e Kryeqytetit

Rama: Sot kujtojmë sakrificën për liri dhe demokraci

Sporti ndihmon edhe në përmirësimin e shikimit
Të kërkuara
-
Bota3 months ago
Marrëveshja për pranimin e pakufizuar të emigrantëve, Shtëpia e Bardhë tërhiqet nga tarifat ndaj Kolumbisë
-
Bota3 months ago
Fluturimet e dëbimit kanë filluar, thotë Shtëpia e Bardhë
-
Bota3 months ago
Shtëpia e Bardhë: Armëpushimi në Liban do të zgjatet deri më 18 shkurt
-
Lajmet nga UBT2 months ago
Përgatituni për të udhëhequr politikën e të ardhmes me Fakultetin e Shkencave Politike në UBT