Lajmet

​Kërkohet suspendimi i kryeprokurorit të Prokurorisë Themelore dhe prokurorit në rastin e Sebahate Sopit

Publikuar

3 vjet më parë

më

Instituti i Kosovës për Drejtësi (IKD) dhe Rrjeti i Grave të Kosovës (RrGK) po kërkojnë suspendimin e kryeprokurorit të Prokurorisë Themelore dhe prokurorit në rastin Sebahate Sopit. Sipas tyre, këto institucione nuk kanë përmbushur obligimet ligjore në rastet ku cenohet integriteti i grave tek veprat penale të dhunës në familje. Për më tepër, IKD dhe RrGK po thonë se këto institucionet kanë bërë shkelje të së drejtës elementare për jetë.

Të dy këto organizata kanë reaguar ndaj neglizhencës që sipas tyre ka treguar Prokuroria Themelore në Prishtinë dhe Policia e Kosovës në rastin e Sebahate Sopit.

Dyshohet se me 14 mars, L.S se në lagjen “Emshir” në Prishtinë me armë zjarri ka vrarë fillimisht bashkëshorten e tij Sebahate Sopi, e më pas e ka vrarë edhe vetën.

IKD dhe (RrKK) kanë publikuar gjetjet preliminare të hulumtimit të rastit të vrasjes së Sebahate Sopit: “Shteti me mos veprim, privon nga jeta Sebahate Sopin”.

Ehat Miftaraj nga IKD tha se me kushtetutë e drejta për jetë është elementare dhe duhet të garantohet nga shteti, por që një gjë e tillë nuk është përfillur në rastin e Sopit.

“Prokuroria Themelore në Prishtinë ka dështuar të ushtrojë kompetencat dhe detyrat e saj për t’i ofruar mbrojtje në këtë rast viktimës Sebahate Sopit. Çka ishte edhe më e ndjerë ishte fakti që Prokuroria Themelore në Prishtine dje dërgoi një komunikatë për media përmes së cilës u mundua fatkeqësisht në mënyrë amatoreske dhe aspak njerëzore t’i ikë përgjegjësisë dhe të gënjejë publikisht se kjo prokurori ka ndërmarrë të gjitha veprimet në lidhje me këtë rast”, theksoi ai.

Ai ka njoftuar se e ndjera ka qenë viktimë e dhunës në familje në vitin 2019, dhe si rezultat i saj kishte një urdhër-mbrojtje të lëshuar nga Gjykata Themelore në Gjilan. Urdhri për mbrojtje kishte skaduar në vitin 2020. Vajza e Sebahate Sopit më 3 mars kishte raportuar dhunën në familje ndaj nënës së saj. Miftaraj theksoi se Prokurori i Shtetit vetëm me një intervistim ishte mjaftuar që të mos ndërmarrë veprime shtesë.

“Prokurorët e shtetit në Republikën e Kosovës duhet të kuptojnë se pozita e prokurorit nuk është privilegj për të marrë në fund të muajit 20 mijë euro, 30 mijë euro deri në 60 mijë euro në muaj që marrin disa prokurorë. Por, pozita e prokurorit është përgjegjësi para kushtetutës, është përgjegjësi para ligjit, është përgjegjësi në raport para sistemit prokurorial dhe qytetarëve. Fatkeqësisht sot prokurorët e shtetit po i shfrytëzojnë privilegjet, por nuk po i ushtrojnë përgjegjësitë e tyre që ua kanë caktuar kushtetuta dhe ligji”, shtoi ai.

E Adelinë Berisha nga Rrjeti i Grave të Kosovës theksoi se gratë për vjet me radhë po e raportojnë dhunën, por që institucionet gjegjëse po refuzojnë të ofrojnë mbështetje, çka po rezulton me përfundim të jetës me fatalitet.

“Ne do të kërkojmë që të gjenden edhe prokurorët, të cilët e që e dimë cilët janë edhe të tjerë të cilët nuk po e zbatojnë punët dhe detyrën e tyre ashtu siç duhet. Dhe do të kërkojmë shkarkimin e tyre dhe masat e tjera të cilat janë ndëshkuese për këta ushtrues detyre në institucionet zyrtare”, tha ajo.

Hulumtuesi Shala nga IKD shtoi se prokurori i shtetit në komunikatën e djeshme duke u munduar ta mbulojë fajin e vet, ka dëshmuar neglizhencën e treguar.

“Prokuroria Themelore në Prishtinë përpos faktit që ka pasur të deponuar një rast, ka pasur edhe të dhëna kriminale që i njëjti paraprakisht për dhunë ndaj së njëjtës është mbajtur në paraburgim dhe ndaj së njëjtës ka pasur edhe një urdhër-mbrojtës. Bëhet fjalë për dhunë sistematike ndër vite dhe që rreziku i shpërthimit ka qenë evident, moment pas momenti. Mirëpo, përkundër kësaj prokuroria nuk ka marrë asnjë veprim në kuadër të kompetencave të saj. Sikur prokuroria të ndërmerrte veprime në kuadër të kompetencave të saj, arsyeshëm besohet se do të bëhej distancimi në mes dorasit dhe viktimës”, ka shtuar ai.

Tutje ai ka shtuar se institucionet gjegjëse ia kanë shkelur të drejtën për jetë Sebahate Sopit.

“IKD dhe RrGK kërkon nga sistemi prokurorial që urgjentisht ta trajtojë aspektin e llogaridhënies në lidhje me këtë rast. Dhe aspekti i parë që duhet është që të suspendohet kryeprokurori i Prokurorisë Themelore në Prishtinë, Kujtim Munishi dhe prokurori i këtij rasti. Dhe po ashtu kërkojmë që të formohet një grup punues që të zbardhet ky rast”, ka përfunduar ai.

Sipas Shalës, ky grup punues duhet të përfaqësohet nga një prokuror i cili nuk është nga Themelorja në Prishtinë, një përfaqësues i viktimës dhe dy përfaqësues të shoqërisë civile.

Në komunikatën e Prokurorisë Themelore në Prishtinë thuhet se më datën 4 mars ka ftuar në polici për deklaratë shtesë Sebahate Sopin, por e njëjta nuk është paraqitur Stacion Policor.

E njëjta dyshohet se është vrarë nga bashkëshorti i saj me 14 mars, i njëjti më pas ka vrarë edhe veten.

Etiketa
Vazhdo të lexosh

Lajmet

AUV: Mishi që shiste “Apetit” në Shqipëri ka patur origjinë nga Kosova ashtu siç edhe është deklaruar

Sipas AUV, bazuar në rezultatet e inspektimit, auditimit, gjurmimit dhe mostrimit, Agjencia e Ushqimit dhe Veterinës nuk është cënuar shëndeti i konsumatorit dhe se mishi dhe produktet e tij janë të përshtatshme për konsum.

Publikuar

1 orë më parë

më

24 Prill, 2024

nga

Agjencia e Ushqimit dhe Veterinarisë ka sqaruar se pas verifikimeve të kryera, është vërtetuar se kompania “Apetit SH.P.K”, mishin që e kishte shitur në Shqipëri ishte me origjinë nga Kosova.

“Me kërkesë të autoriteteve të Shqipërisë janë verifikuar Çertifikatat Veterinare Shëndetësore të eksportit dhe produkteve të mishit të gjedhit të cilat rezultuan të jenë në përputhshmëri, mbrenda standardardeve dhe të harmonizuara. Nga ky verifikim u vërtetua se produkti (mish gjedhi) ka patur origjinë nga Kosova ashtu siç edhe është deklaruar! Mostrat e marra dhe të testuara nga Autoriteti Kombëtar i Ushqimit të Republikës së Shqipërisë, kanë rezultuar në përputhshmëri dhe konform parametrave dhe standardeve të sigurisë ushqimore. Gjatë inspektimeve zyrtare për produktet me origjinë nga Kosova të subjektit ekonomik përkatës, nuk është gjetur ndonjë parregullsi e cila do të mund të kishte ndonjë ndikim në sigurinë ushqimore”, thuhet në reagimin e AUV-it.

Sipas AUV, bazuar në rezultatet e inspektimit, auditimit, gjurmimit dhe mostrimit, Agjencia e Ushqimit dhe Veterinës nuk është cënuar shëndeti i konsumatorit dhe se mishi dhe produktet e tij janë të përshtatshme për konsum.

“Sasia e mishit të freskët që është ekportuar në Shqipëri por edhe në tregun e brendshëm, rezulton se është gjeneruar nga therja e kafshëve në thertoren e subjektit të cilat janë nënshtruar kontrollit veterinar (para, gjatë dhe pas therjes). Kafshët e therura kanë rezultuar të përshtatshme për konsum human. Kafshët janë therur, copëtuar, kategorizuar dhe paketuar në thertoren e subjektit”, thuhet në reagim.

Vazhdo të lexosh

Lajmet

Zgjedhjet në Maqedoninë e Veriut, voton Osmani

Kandidati për president i koalicionit që udhëhiqet nga Bashkimi Evropian për Integrim (BDI), kërkoi zgjedhje të lira, të drejta dhe demokratike.

Publikuar

1 orë më parë

më

24 Prill, 2024

nga

Kandidati i Frontit Evropian për president, Bujar Osmani, ka votuar për zgjedhjet presidenciale në Maqedoni të Veriut, duke thënë se beson në fitore të madhe të tyre. Kandidati për president i koalicionit që udhëhiqet nga Bashkimi Evropian për Integrim (BDI), kërkoi zgjedhje të lira, të drejta dhe demokratike.

Më tutje Osmani tha se: “Uroj zgjedhje të lira, fer dhe demokratike. Inkurajoj qytetarët që të dalin në numër sa më të madh. Të votojnë sipas bindjes së tyre, sipas vullnetit të tyre për një të ardhme më të mirë për vendin tonë. Unë mendoj se këto zgjedhje nuk janë të zakonshme, janë vendimtare për të ardhmen e vendit tonë, pasi shteti është në udhëkryq, dy opsione janë para nesh dhe qytetarët duhet të vendosin njërin prej këtyre opsioneve, integrimin apo izolimin…Besoj në fitore të madhe të Fronit për Evropë në këto zgjedhje vendimtare për të ardhmen e shtetit”.

Sipas Komisionit Shtetëror të Zgjedhjeve (KShZ) në Maqedoninë e Veriut deri në orën 9:00 kanë votuar vetëm 3.85 për qind e qytetarëve.

Sot qytetarët e Maqedonisë së Veriut vendosin për presidentin e tyre të ardhshëm. Këto zgjedhje janë të shtatat, ndërsa raundi i dytë i mundshëm pritet të mbahet së bashku me zgjedhjet parlamentare më 8 maj.

Kandidati tjetër shqiptar për president është Arben Traravari nga koalicioni VLEN, i cili përbëhet nga parti opozitare shqiptare në Maqedoni të Veriut.

Vazhdo të lexosh

Lajmet

​Deri në ora 09:00 në Tetovë kanë votuar mbi 2 mijë qytetarë

“Nga 117 vendvotime në kuadër të KKZ të Tetovës, të drejtën e tyre të votës e kanë shfrytëzuar 2 mijë e 300 qytetarë, apo në përqindje i bie 3.2%”, tha Dauti.

Publikuar

1 orë më parë

më

24 Prill, 2024

nga

Kryetari i Komisionit Komunal Zgjedhor në Tetovë, Nazmi Dauti tha se deri në ora 09:00 në Tetovë kanë votuar 2 mijë e 300 qytetarë.

“Nga 117 vendvotime në kuadër të KKZ të Tetovës, të drejtën e tyre të votës e kanë shfrytëzuar 2 mijë e 300 qytetarë, apo në përqindje i bie 3.2%”, tha Dauti.

Qytetarët e Maqedonisë së Veriut sot vendosin për presidentin e tyre të ardhshëm. Këto janë zgjedhjet e shtatë presidenciale, ndërsa raundi i dytë i mundshëm mbahet së bashku me zgjedhjet parlamentare më 8 maj. Vendvotimet janë hapur në orën 7:00, ndërsa votimi zgjatë deri në orën 19:00. Votohet në 3480 vendvotime në tërë Maqedoninë e Veriut. Ndërsa, numri i përgjithshëm i votuesve të regjistruar në Listën zgjedhore është 1 milion e 8 14 mijë e 317.

Në mënyrë teorike presidenti mund të zgjidhet edhe në rrethin e parë me atë kandidat i cili do të marrë shumicën e votave nga numri i përgjithshëm i votave, përkatësisht 50% plus një, gjë për të cilën ekzistojnë gjasa të vogla posaçërisht në këto zgjedhje kur votohet për shtatë kandidatë.

VMRO DPMNE-ja opozitare në zgjedhje do të garojë me deputetët aktuale Gordana Siljanovska*Davkovën. Lidhja Social Demokrate në pushtet do të garojë me presidentin aktual, Stevo Pendarovski. Në garën zgjedhore, Bashkimi Demokratik për Integrim do të garojë me ministrin e Punëve të Jashtme, Bujar Osmani, ndërsa opozita e bashkuar shqiptare me Arben Taravarin, kryetarin aktual të Gostivarit. Pjesë e garës zgjedhore do të jetë edhe Maksim Dimitrievski, kryetari i komunës së Kumanovës, Stevçe Jakimovski, kryetari i komunës së Karposhit në Shkup dhe Biljana Vankovska, kandidate e partisë “E Majta”.

Përzgjedhja e shefit të shtetit duhet të ndodh në rrethin e dytë kur do të vendoset për dy kandidatë të cilët në rrethin e parë kanë marrë më së shumti vota. Megjithatë edhe për përzgjedhjen e tyre nevojitet plotësimi i censusit, përkatësisht në zgjedhje të dalin më së paku 40% të votuesve të regjistruar. Rezultatet e zgjedhjeve nga rrethi i parë i zgjedhjeve presidenciale, KSHZ duhet t’i publikojë para mesnatës së 24 prillit. Ndërkohë janë gjithsej 942 vëzhgues, gazetarë dhe përkthyes të huaj janë të akredituar për monitorimin e zgjedhjeve presidenciale.

Vazhdo të lexosh

Lajmet

Zgjedhjet në RMV, deri në orën 09:00 kanë votuar 3.85 për qind e qytetarëve

Probleme janë paraqitur në disa vendvotime në qytetin e Kumanovës.

Publikuar

2 orë më parë

më

24 Prill, 2024

nga

Komisioni Shtetëror i Zgjedhjeve (KShZ) në Maqedoninë e Veriut ka njoftuar se deri në orën 09:00 kanë votuar 3.85 për qind e qytetarëve për zgjedhjet presidenciale.

Kryetari i KShZ-së, Aleksandar Dashtevski, tha se të gjitha vendvotimet janë hapur dhe se procesi po shkon pa parregullsi. Sipas tij në disa qendra janë paraqitur disa probleme teknike, por që do të zgjidhen shumë shpejt. Probleme janë paraqitur në disa vendvotime në qytetin e Kumanovës.

“Siç thashë kemi filluar me kohë në orën 9:30. Në 1480 vendvotime në 80 komuna në territorin e Maqedonisë së Veriut të drejtën për të votuar e kanë gjithsejtë 1814,317 qytetarë, dy orë e gjysmë që kur ka filluar votimi, në të gjitha vendvotimet, procesi zgjedhor po rrjedh pa parregullsi. Deri në orën 09:00 kanë arritur të dhëna për daljen e votuesve në 832 vendvotime nga gjithsejtë 402 748 votues të regjistruar në këto vendvotime, kanë votuar 15487apo 3.85 për qind e votuesve. Deri në këtë moment në KSHZ janë dorëzuar 12 parashtresa që kanë të bëjnë me mbrojtjen e të drejtës zgjedhore të cilat janë lëndë e përpunimit. Këtë proces zgjedhor janë duke e përcjellë 915 mbikëqyrës vendor dhe 544 ndërkombëtar dhe 58 gazetar të huaj”, tha ai në konferencë për medie.

Krahas kësaj, ai bëri të ditur se konferenca e radhës e KShZ-së do të mbahet në orën 13:00.

Qytetarët e Maqedonisë së Veriut sot vendosin për presidentin e tyre të ardhshëm. Këto janë zgjedhjet e shtatë presidenciale, ndërsa raundi i dytë i mundshëm mbahet së bashku me zgjedhjet parlamentare më 8 maj. Vendvotimet është paraparë të hapen në orën 7:00, ndërsa votimi zgjatë deri në orën 19:00. Votohet në 3480 vendvotime në tërë Maqedoninë e Veriut. Ndërsa, numri i përgjithshëm i votuesve të regjistruar në Listën zgjedhore është 1.814.317.

VMRO DPMNE-ja opozitare në zgjedhje do të garojë me deputetët aktuale Gordana Siljanovska*Davkovën. Lidhja Social Demokrate në pushtet do të garojë me presidentin aktual, Stevo Pendarovski. Në garën zgjedhore, Bashkimi Demokratik për Integrim do të garojë me ministrin e Punëve të Jashtme, Bujar Osmani, ndërsa opozita e bashkuar shqiptare me Arben Taravarin, kryetarin aktual të Gostivarit. Pjesë e garës zgjedhore do të jetë edhe Maksim Dimitrievski, kryetari i komunës së Kumanovës, Stevçe Jakimovski, kryetari i komunës së Karposhit në Shkup dhe Biljana Vankovska, kandidate e partisë “E Majta”.

Vazhdo të lexosh

Të kërkuara