Lajmet

​Japonia i kërkon ndihmë Kanadasë për energji të pastër

Zoti Kishida ndodhet në Otavë për vizitën e tij të parë si kreu i qeverisë japoneze.

Published

4 years ago

on

Kryeministri japonez, Fumio Kishida i ka kthyer sytë nga Kanadaja për ta ndihmuar vendin e tij që të ulë ndërvarësinë nga burimet fosile të energjisë nga vende si Rusia.

Zoti Kishida ndodhet në Otavë për vizitën e tij të parë si kreu i qeverisë japoneze, ndërsa do të vazhdojë me turin e vizitave edhe në vende të tjera të G-7ës.

Japonia mban këtë vit kryesinë e Grupit të Shtatëshes dhe pritet të organizojë takime me udhëheqësit e disa prej vendeve më të pasura të botës. Në këtë grup marrin pjesë Britania, Kanadaja, Franca, Gjermania, Italia, Japonia dhe Shtetet e Bashkuara, plus Bashkimi Evropian.

Tokio pritet ta shfrytëzojë kryesimin për t’u koordinuar me vendet e tjera për sa i përket mbarëvajtjes ekonomike, si dhe për të ndëshkuar Rusinë për sulmin ndaj Ukrainës.

Vizita vjen në një kohë ravijëzimi gjeopolitik mes Japonisë dhe Kanadasë. Të dyja vendet e konsiderojnë Kinën një rrezik për stabilitetin në rajon.

Kjo është vizita e parë e një kreu qeverie nga vendet e Azisë që kur Otava prezantoi strategjinë e saj për rajonin Indo-Paqësor në muajin nëntor, ku bëhet thirrje për marrëdhënie më të ngushta mes vendeve, si një kundërpeshë ndaj influencës së Pekinit.

Një strategji e re mbrojtjeje e Japonisë e publikuar muajin e kaluar përfshin bashkëpunimin me aleatët përkundër rreziqeve nga Koreja e Veriut dhe Kina, dhe e konsideron si veprim të ligjshëm që Japonia të kryejë sulme ushtarake ndaj bazave të armikut. Brenda vetëm një viti, Tokio ka rritur shpenzimet ushtarake me 26%.

Ndërkohë, një marrëveshje tregtare rajonale që u prezantua në vitin 2018 i ka ndihmuar të dyja vendet të zgjerojnë tregtinë në tregjet reciproke. Kanadaja ka shtuar eksportet e mishit të derrit dhe të vajit drejt Japonisë, ndërsa ka importuar nga Japonia më shumë makineri dhe pjesë këmbimi automjetesh.

“Tregtia po lulëzon midis dy vendeve tona”, tha kryeministri Justin Trudeau në një drekë të enjten për nder të zotit Kishida dhe drejtuesit e korporatave.

“Ne ndajmë një vizion për paqe dhe prosperitet në të dy anët e Paqësorit”.

Zoti Kishida u tha të ftuarve se gazi natyror i lëngshëm (LNG) do të luajë një “rol vendimtar” në tranzicionin energjitik të Japonisë dhe se terminali i ardhshëm i eksportit të LNG-së i Kanadasë është një shembull i mënyrave të shumta që Otava mundet të ndihmojë.

“Për shkencën, teknologjinë dhe inovacionin, (transformimin dixhital) dhe kompanitë e reja, jam shumë i etur për të forcuar më tej bashkëpunimin midis industrisë, qeverisë dhe akademikëve në të dy vendet”, u tha zoti Kishida pjesëmarrësve në japonisht.

“Energjia bërthamore do të luajë gjithashtu një rol kyç dhe ne duam të punojmë së bashku për ta bërë zinxhirin e furnizimit bërthamor më elastik”.

Qeveria kanadeze do të drejtojë një delegacion tregtar në Japoni këtë vjeshtë, tha zoti Trudeau, dhe kompanitë japoneze të interesuara në miniera dhe komponentët e baterive të automjeteve elektrike synojnë të vizitojnë Kanadanë në pranverë.

Related Topics:
Continue Reading

Lajmet

Hamasi pranon marrëveshje për çarmatim, Trump e cilëson hap historik drejt paqes në Gaza

Published

47 minutes ago

on

July 31, 2026

By

Hamasi ka pranuar një marrëveshje për çarmatimin e plotë të tij dhe të grupeve të tjera të armatosura në Rripin e Gazës, sipas njoftimeve të presidentit amerikan, Donald Trump.

Trump e ka cilësuar marrëveshjen si një “hap historik” drejt paqes dhe sigurisë, duke bërë të ditur se zbatimi i saj do të zhvillohet në disa faza. Sipas tij, pas përfundimit të procesit të çarmatimit, forcat izraelite do të tërhiqen gradualisht nga territori palestinez.

Në bazë të planit, Hamasi dhe fraksionet e tjera do t’ia dorëzojnë armët një komiteti kombëtar palestinez, ndërsa procesi do të monitorohet nga një mekanizëm ndërkombëtar verifikimi.

Pas kësaj, një Forcë Ndërkombëtare e Stabilizimit dhe një forcë e re policore palestineze pritet të marrin përgjegjësinë për sigurinë në Gaza.

Megjithatë, zyrtarët izraelitë kanë shprehur skepticizëm nëse Hamasi do ta zbatojë marrëveshjen, ndërsa përfaqësues të grupit palestinez kanë deklaruar se çarmatimi nuk do të nisë pa tërheqjen e ushtrisë izraelite dhe përmbushjen e detyrimeve të marrëveshjes.

Trump ka falënderuar Egjiptin, Katarin dhe Turqinë për rolin e tyre në ndërmjetësimin e bisedimeve, duke e përshkruar marrëveshjen si një pikë kthese në zbatimin e planit të tij 20-pikësh për paqen në Gaza./A.K/

Continue Reading

Lajmet

Abdixhiku: LDK-ja e gatshme të rikthehet në negociata me VV-në për formimin e institucioneve

Published

49 minutes ago

on

July 31, 2026

By

Kryetari i sapokonfirmuar i Lidhjes Demokratike të Kosovës, Lumir Abdixhiku, ka bërë të ditur se partia e tij është e gatshme të rikthehet menjëherë në negociata me Lëvizjen Vetëvendosje për formimin e institucioneve.

Procesi i bisedimeve ishte pezulluar për shkak të Kuvendit të jashtëzakonshëm të LDK-së, ku ishte iniciuar shkarkimi i Abdixhikut. Pas votimit, ai arriti të sigurojë mbështetjen e shumicës së delegatëve dhe të vazhdojë udhëheqjen e partisë.

Pas përfundimit të Kuvendit, Abdixhiku tha se pezullimi i negociatave hiqet dhe se LDK-ja është e hapur për diskutime lidhur me krijimin e institucioneve të reja.

Ai bëri të ditur se në takimin e parë me kryetarin e Vetëvendosjes, Albin Kurti, është diskutuar edhe për “balancën e pushteteve”, që sipas tij nënkupton se një parti e vetme nuk duhet t’i udhëheqë të gjitha institucionet.

Megjithatë, Abdixhiku mohoi se në atë takim ka pasur marrëveshje apo dakordime të tjera konkrete./A.K/

Continue Reading

Lajmet

Gjashtë trupa gjenden në gërmimet në Kalludër të Vogël, vazhdon kërkimi për varrezën masive

Published

51 minutes ago

on

July 31, 2026

By

Gjashtë trupa janë gjetur deri më tani gjatë gërmimeve në fshatin Kalludër e Vogël, në komunën e Zubin Potokut, ku dyshohet për ekzistimin e një varreze masive nga lufta e fundit në Kosovë.

Sipas burimeve të RTK-së, numri i mbetjeve mortore të gjetura është rritur në gjashtë, ndërsa punimet po vazhdojnë në zonën ku dyshohet se mund të ketë edhe trupa të tjerë.

Në vendin e ngjarjes ka qëndruar edhe kryeprokurori i Prokurorisë Speciale, Blerim Isufaj, i cili ka vizituar punimet dhe ka falënderuar Policinë e Kosovës, prokurorët e Prokurorisë Speciale dhe ekipet e Mjekësisë Ligjore për angazhimin në këtë proces.

Gërmimet po zhvillohen për të zbardhur rrethanat e rastit dhe për identifikimin e mbetjeve mortore, ndërsa dyshimet lidhen me një varrezë masive të personave të vrarë gjatë luftës në Kosovë./A.K/

Continue Reading

Lajmet

VV dorëzon kallëzim penal ndaj Përparim Ramës për pretendime mbi legalizime të kundërligjshme

Published

53 minutes ago

on

July 31, 2026

By

Lëvizja Vetëvendosje ka dorëzuar kallëzim penal në Prokurorinë Speciale ndaj kryetarit të Prishtinës, Përparim Rama, dhe disa zyrtarëve të kabinetit të tij, nën dyshimet për legalizime të kundërligjshme të objekteve.

Asamblistja e VV-së në Kuvendin Komunal të Prishtinës, Berita Abazi, tha se kallëzimi bazohet në një sinjalizim anonim, i cili përmban pretendime për përfshirjen e disa kompanive të ndërtimit, legalizime të paligjshme dhe shuma parash që dyshohet se lidhen me këto raste.

Sipas saj, Prokuroria duhet të hetojë dhe të vërtetojë nëse pretendimet e sinjalizuesit janë të bazuara.

Ndërkohë, Komuna e Prishtinës, zyrtarët e përmendur dhe kompanitë e apostrofuara nuk kanë reaguar ndaj këtyre pretendimeve.

Nga ana tjetër, kryetari i Prishtinës, Përparim Rama, i ka cilësuar akuzat si pjesë e një fushate propaganduese të Vetëvendosjes kundër tij, duke theksuar se ato janë bërë publike në ditën e mbajtjes së Kuvendit të LDK-së, ku emri i tij është përmendur si kandidat i mundshëm për kryetar të partisë./A.K/

Continue Reading

Të kërkuara