Sulmuesi i Kosovës, Vedat Muriqi, feston sot ditëlindjen e tij të 32-të. I lindur më 24 prill 1994 në Prizren, Muriqi është kthyer në një nga sulmuesit më të rëndësishëm shqiptarë në futbollin evropian, falë paraqitjeve të tij me RCD Mallorca në La Liga.

Klubi spanjoll e ka uruar sulmuesin me një mesazh të veçantë, duke e vlerësuar kontributin e tij historik.

“Sot ka ditëlindjen golashënuesi më i mirë i historisë sonë në LaLiga. Urime, pirate”, thuhet në urimin e Mallorcas për Muriqin.

Muriqi po vazhdon të jetë një nga lojtarët kyç të skuadrës, duke ndihmuar klubin në garën për mbijetesë në elitën e futbollit spanjoll.

Sipas statistikave të deritanishme në La Liga, ai renditet ndër golashënuesit më të mirë të sezonit me 21 gola të shënuar, vetëm tre më pak se Kylian Mbappé i Real Madrid.

Ndërkohë, në mediat sportive është raportuar se e ardhmja e tij mund të sjellë ndryshime, pasi interesim serioz për shërbimet e tij ka shprehur edhe Fenerbahçe S.K.

Dy talentët shqiptarë, Leon Avdullahu dhe Albian Hajdari, kanë vazhduar bashkëpunimin me klubin gjerman Hoffenheim, raporton “Sky Sport”.

Sipas këtij burimi, Avdullahu ka nënshkruar kontratë të re që e mban në klub deri në vitin 2031. Marrëveshja nuk përfshin klauzolë lirimi, çka tregon besimin e madh të klubit ndaj tij. Për mesfushorin thuhet se kishte interesim nga klube si Atletico Madrid dhe Atalanta, por Hoffenheimi ka vendosur ta mbajë si pjesë të rëndësishme të projektit.

Ndërkohë, edhe Albian Hajdari ka rinovuar kontratën me të njëjtin afat, deri në vitin 2031. Edhe marrëveshja e tij nuk përmban klauzolë lirimi, duke nënvizuar synimin e klubit për të ndërtuar të ardhmen rreth lojtarëve të rinj.

Rinovimi i kontratave për të dy lojtarët shihet si sinjal i qartë se Hoffenheimi ka plane afatgjata dhe besim të plotë në potencialin e tyre.

Në kuadër të “World Boxing Cup”, që po mbahet në Foz do Iguaçu nga 20 deri më 27 prill 2026, nesër  në ring do të ngjitet boksierja e njohur kosovare Donjeta Sadiku, medaliste botërore dhe evropiane.

Sadiku, e cila garon në kategorinë deri në 60 kilogramë, do të përballet me boksieren nga Polonia, Aneta Elżbieta Rygielska, në një duel vendimtar për sigurimin e medaljes në këtë kompeticion prestigjioz. Trajnerja e saj, Marjola Sallauka, është shprehur optimiste për paraqitjen e sportistes kosovare, duke besuar se Sadiku do të arrijë fitore dhe do të sigurojë medaljen. Megjithatë, synimi kryesor i ekipit mbetet medalja e artë.

Kjo Kupë Botërore ka rëndësi të veçantë në procesin e kualifikimit për Lojërat Olimpike Los Angeles 2028, pasi pikët e grumbulluara ndikojnë drejtpërdrejt në renditjen ndërkombëtare dhe rrugën drejt kualifikimit olimpik.