Kreu i AAK-së, Ramush Haradinaj, ka kujtuar viktimat e Masakrës së Poklekut nga forcat serbe, duke shënuar 26-vjetorin e saj.

Ai ka përkujtuar tragjedinë që ndodhi më 17 prill 1999, kur mbi 54 anëtarë të familjeve Muqolli dhe Elshani u masakruan barbarisht nga forcat serbe në Poklek të Drenicës, shumica prej të cilëve ishin gra, pleq dhe fëmijë të pafajshëm, të cilët vetëm se ishin shqiptarë në trojet e tyre. Po në të njëjtën ditë, në Çikatovë, forcat serbe ekzekutuan 24 civilë shqiptarë pa mëshirë.

Haradinaj theksoi se, edhe pas 26 vjetësh, mungesa e drejtësisë vazhdon të mbetet një plagë e hapur. Ai shtoi se, pavarësisht kësaj, kujtimi për ata që humbën jetën në këtë masakër nuk mund të zbehet. “Drejtësia ende mungon, por ajo nuk e zbeh kurrë kujtimin për ata që u shuan nga regjimi serb, në përpjekje për të zhdukur ekzistencën tonë si popull. Lavdi e përjetshme të rënëve për liri!”, përfundoi Haradinaj.

Në Gjykatën Themelore të Prishtinës ka nisur seanca gjyqësore lidhur me rastin e sulmit terrorist në Banjskë të Zveçanit.

Dushan Maksimoviq, Blagoje Spasojeviq dhe Vladimir Toliq janë tre të dyshuarit që po mbahen në paraburgim dhe që janë paraqitur në seancë nën masa të rrepta sigurie. Gjatë seancës ishin të pranishëm edhe familjarët e të dyshuarve.

Më 11 shtator, kryeprokurori i Prokurorisë Speciale të Kosovës, Blerim Isufaj, ka konfirmuar aktakuzën e ngritur për rastin “Banjska”. Të dyshuarit janë arrestuar pas sulmit të armatosur në Banjskë, në veri të Kosovës, kur një grup i armatosur serb sulmoi Policinë e Kosovës dhe vrau policin Afrim Bunjaku. Gjatë shkëmbimit të zjarrit, tre sulmues të tjerë u vranë.

Përgjegjësinë për sulmin e shtatorit të vitit të kaluar e ka marrë Millan Radoiçiq, ish-nënkryetar i Listës Serbe, partisë më të madhe të serbëve në Kosovë, e cila mbështetet nga Beogradi zyrtar. Ndërkohë, besohet se ai dhe shumica e pjesëtarëve të grupit të armatosur ndodhen në Serbi.

Seanca përgatitore ishte paraparë për 25 shtator, por avokatët e të arrestuarve kërkuan shtyrje, duke theksuar se kishin marrë aktakuzën me vonesë dhe se kishin nevojë për më shumë kohë për t’u përgatitur. Nga ana tjetër, Prokuroria kërkoi që gjykimi të vazhdojë edhe për ata të dyshuar që janë në arrati, një kërkesë e cila u kundërshtua nga avokatët, të cilët theksuan se kjo nuk është e parashikuar në ligjet e Kosovës.

Në përfundim, gjyqtari i rastit, Arben Hoti, njoftoi se do të kërkojë një opinion juridik nga Gjykata Supreme për interpretimin e Ligjit lidhur me gjykimin në mungesë dhe shtoi se ka kushte për të gjykuar ata që ndodhen në paraburgim në Kosovë.

Një delegacion i Shteteve të Bashkuara, i udhëhequr nga dërguari i posaçëm i Donald Trump, Steve Witkoff, dhe senatori Marco Rubio, pritet të zhvillojë sot në Paris një raund bisedimesh me përfaqësues evropianë, me synimin për të diskutuar përpjekjet e përbashkëta drejt përfundimit të luftës në Ukrainë.

Takimi do të përfshijë gjithashtu Sekretarin e Jashtëm të Mbretërisë së Bashkuar, David Lammy, dhe përfaqëson një angazhim të nivelit të lartë transatlantik për paqen, që prej shpërthimit të konfliktit në vitin 2022. Bisedimet konsiderohen të një rëndësie të veçantë, veçanërisht në një periudhë kur Uashingtoni ka qenë më i rezervuar në konsultimet me aleatët e tij evropianë.

Delegacioni amerikan pritet të takohet me presidentin francez Emmanuel Macron dhe ekipin e tij për të diskutuar planet e ardhshme dhe strategjitë e mundshme që do të çonin drejt një armëpushimi të qëndrueshëm.

Pas këtij takimi, Sekretari i Shtetit i SHBA-së do të zhvillojë një raund të dytë bisedimesh me Lammy dhe homologët nga Franca dhe Gjermania. Në diskutime do të marrin pjesë edhe këshilltarë të lartë të sigurisë nga disa shtete evropiane, me fokus të veçantë mbi mënyrën më efikase për ndalimin e luftimeve dhe rivendosjen e paqes në Ukrainë.

Departamenti i Shtetit ka konfirmuar se Steve Witkoff do të informojë për takimin e tij të fundit me presidentin rus Vladimir Putin, i cili u zhvillua javën e kaluar. Ndërkohë, burime diplomatike evropiane kanë bërë të ditur se do t’i kërkojnë SHBA-së një qëndrim më të ashpër ndaj Moskës.

“Ne duam që SHBA të përdorin pak më shumë shkop,” tha një zyrtar evropian, duke nënvizuar nevojën për më shumë presion ndaj Rusisë, në mënyrë që të arrihet një marrëveshje paqeje pa kushte.

Policia e Kosovës ka bërë të ditur se të mërkurën mbrëma ka arrestuar një person të dyshuar për përfshirje në organizimin e skemave piramidale në qytetin e Podujevës.

I dyshuari, me inicialet E.M., është arrestuar në rrugën “Ali Ajeti”, ndërsa gjatë aksionit është kryer edhe kontroll në një lokacion të caktuar, ku janë sekuestruar një shtëpizë kompjuteri, një laptop, një shumë e konsiderueshme parash, si dhe dëshmi të tjera të mundshme.

“Pjesë e aksionit policor ka qenë edhe kontrolli i lokacionit, ku janë gjetur dhe sekuestruar një shtëpizë kompjuteri, një laptop, një shumë parash etj.”, thuhet në njoftimin zyrtar të Policisë së Kosovës.

Me urdhër të prokurorit kompetent, i dyshuari është dërguar në ndalim policor, ndërkohë që hetimet po vazhdojnë në bashkëpunim me Prokurorinë e Shtetit, me qëllim të ndriçimit të plotë të rastit.