Lajmet

Haxhiu: Vetingun e mbyllim këtë mandat, katër muaj kohë për koncept-dokumentin

Published

5 years ago

May 10, 2021

Betim Gashi

Grupi punues për hartimin e koncept-dokumentit për procesin e vetingut të enjten mbajti takimin e parë e i cili do të ketë afat katër muaj për ta përfunduar këtë dokument. Ministria e Drejtësisë, po edhe njohës të fushës së sistemit të drejtësisë, thonë se janë të mjaftueshëm katër muaj për të përfunduar një koncept-dokument që do të adresonte vetingun.

Ministrja e Drejtësisë, Albuena Haxhiu thotë se grupi punues i themeluar nga ajo do të ketë afat deri në katër muaj për të hartuar koncept-dokumentin për veting.

Ajo shprehet se grupi punues mund të përfundojë punën edhe më herët, por që deklaron se qëllimisht kanë lënë më shumë kohë që anëtarët e grupit të mos ndjehen nën presion.

“Unë besoj që për hartimin e koncept-dokumentit është i mjaftueshëm afati prej katër muajsh më së shumti, për faktin se tashmë ka pasur diskutime, tashmë ka dokumente ku vetëm duhet të dakordohen që të finalizohen ose të përfshihen në koncept-dokument. Prandaj, nëse do të ketë rrethana ku grupit punues patjetër i nevojiten edhe mandat shtesë padyshim që nuk do ta pengojë një gjë të tillë, sepse tek e fundit është interesi që ky proces të përmbyllet sa më shpejtë që është e mundshme. Mirëpo për aq sa unë mund të jem në dijeni, për sfidat që i kemi diskutuar katër muaj nëse punohet me intensitet dhe me vullnet padyshim që do të adresohet”, thotë ajo.

Pavarësisht sfidave që mund të kenë gjatë rrugës, Haxhiu shprehet optimiste se vetingu në sistemin e drejtësisë do të përmbyllet gjatë këtij mandati qeverisës.

“Unë jam shumë optimiste që vetingu në Republikën e Kosovës në sistemin e drejtësisë do të përmbyllet brenda këtij mandati dhe padyshim që do të punojmë në këtë drejtim. Pavarësisht sfidave që mund t’i kemi gjatë rrugës, sepse dikujt edhe mund t’i pengojë kjo çështje, por besoj që ky proces është në të mirë të qytetarëve të Kosovës. Qëllimi kryesor i tij është për ta kthyer besimin e qytetarëve dhe që Kosova të jetë shtet i së drejtës, prandaj edhe çfarëdo pengese që mund të na dalë në rrugë ne mund ta tejkalojmë me vullnet dhe profesionalizëm”, thotë Haxhiu.

Sa i përket grupit punues, Haxhiu thotë se është gjithëpërfshirës dhe se anëtarët aty janë propozuar nga vet institucionet që përfaqësohen në këtë grup. Po ashtu, ajo potencon se pjesë e grupit janë edhe përfaqësues të ambasadave të vendeve të huaja në Kosovë, për të cilët tha se kanë ofruar ndihmën e tyre edhe përmes ekspertëve.

Nisjen e punës për hartimin e koncept-dokumentit për veting e quan lajm shumë të mirë Ehat Miftaraj, drejtor i Institutit të Kosovës për Drejtësi, e i cili thotë se për hartimin e të njëjtit janë të mjaftueshëm katër muaj. Ai thotë se pas përfundimit të rishikimit funksional të sistemit të sundimit të ligjit ka analizë të mjaftueshme që mund të shërbejë për përfshirje në koncept-dokumentin për veting.

“Për koncept-dokument unë besoj që janë të mjaftueshme (4 muaj), sepse fatmirësisht Ministria e Drejtësisë e ka përfunduar tanimë rishikimin funksional të sektorit të sundimit të ligjit, vetëm ky rishikim i sektorit të sundimit të ligjit ka bërë një analizë të thuktë pothuajse të të gjitha fushave që lidhen me sistemin gjyqësor dhe sistemin prokurorial, duke përfshirë prej integritetit, profesionalizmit, qasjes në drejtësi, llogaridhënies, transparencës, luftës kundër krimit të organizuar, korrupsionit, pothuajse të gjitha fushave që kanë të bëjnë me sistemin e drejtësisë në Kosovë. Kështu që nuk është që grupi i vetingut do ta fillojë punën nga zero, ka materiale, ka analiza, ka rekomandime konkrete, kështu që krejt çka i nevojitet është që këtë dokumentacion të bollshëm që e ka ta analizojë dhe të dalin me qëndrime konkrete se si do të duhej të përfundonte procesi i vetingut”, thotë ai.

Grupi punues për hartimin e koncept-dokumentit për veting do të drejtohet nga Ministria e Drejtësisë, e që ka përfaqësues edhe nga Këshilli Gjyqësor, Këshilli Prokurorial, Ministria e Punëve të Brendshme dhe institucione të tjera publike, shoqëria civile. Një anëtarë në këtë grup punues do të jetë edhe nga Komisioni Parlamentar për Legjislacion, por që ende nuk është emëruar asnjë anëtar.

Up Next

Gjenden kafkat e dy personave në Kizhevak të Serbisë

Don't Miss

Një burrë qëlloi për vdekje gjashtë persona, pastaj edhe veten në një festë ditëlindjeje

Vendi

Lipjan: Arrestohen dy prindër, nuk u kujdesën për fëmijën e tyre të sëmurë

Published

1 minute ago

March 17, 2026

UBTNews

Dy prindër nga Lipjani janë arrestuar nga Policia e Kosovës nën dyshimin për “shkelje të detyrimeve familjare”.

Sipas raportit 24-orësh të policisë, rasti u zbulua pasi fëmija i tyre i mitur u dërgua në gjendje të rëndë shëndetësore në QKUK për trajtim mjekësor.

Hetimet e para tregojnë se gjendja e rënduar e të miturit ka ardhur si pasojë e mospërkujdesjes dhe mos-trajtimit të duhur nga ana e prindërve.

Me vendim të prokurorit, të dyshuarit janë dërguar në mbajtje, ndërsa rasti po vazhdon të trajtohet nga organet e drejtësisë.

“Është raportuar se është sjellë në QKUK- Prishtinë viktima mashkull kosovar i mitur, për shkak të gjendjes së tij jo të mirë, për shkak të mos trajtimit nga ana e prindërve të tij. Të dyshuarit janë arrestuar dhe pas intervistimit me vendim të prokurorit janë dërguar në mbajtje”, thuhet në raport.

Lajmet

Kurti pret në takim lamtumirës ambasadorin e BE-së, Aivo Orav

Published

17 hours ago

March 16, 2026

UBTNews

Kryeministri i Republikës së Kosovës, Albin Kurti, ka pritur sot në një takim lamtumirës Shefin e Zyrës së Bashkimit Evropian në Kosovë, ambasadorin Aivo Orav.

Gjatë këtij takimi, kreu i qeverisë shprehu mirënjohje të thellë për angazhimin dhe shërbimin e diplomatit evropian në Kosovë, që nga marrja e detyrës së tij më 1 shtator 2024.

Kryeministri Kurti e falënderoi ambasadorin Orav për bashkëpunimin korrekt, duke vlerësuar se përgjatë mandatit të tij, raportet ndërmjet Kosovës dhe Bashkimit Evropian janë fuqizuar ndjeshëm, përkundër sfidave të shumta të periudhës.

Në mënyrë të veçantë, kryeministri potencoi përkushtimin e ambasadorit në procesin e lansimit të Instrumentit për Reforma dhe Rritje, si një hap kyç në rrugëtimin integrues të vendit.

Më tej, në fokus të bisedës ishin hapat e radhës që priten nga Brukseli në raport me Prishtinën zyrtare. Kryeministri Kurti theksoi rëndësinë që Bashkimi Evropian të vlerësojë progresin e arritur dhe të mundësojë marrjen e statusit të merituar të vendit kandidat për anëtarësim.

Në përmbyllje të takimit, Kurti i uroi ambasadorit Orav suksese në angazhimet e tij të ardhshme profesionale, duke e falënderuar sërish për kontributin e dhënë në avancimin e agjendës evropiane të Kosovës.

Lajmet

Interesim i jashtëzakonshëm për UBT International Smart Schools në Open Day – vazhdojnë regjistrimet e hershme

Published

18 hours ago

March 16, 2026

ubtnews

Qindra nxënës dhe prindër nga e gjithë Kosova morën pjesë në aktivitetet Open Day të organizuara nga UBT International Smart Schools në kampusin e Lipjanit dhe në Gjimnazin TIK në Prizren, duke treguar interesim të jashtëzakonshëm për edukimin modern dhe inovativ.

Vizitorët patën mundësinë të eksplorojnë ambientet bashkëkohore të mësimit, të njihen me drejtimet arsimore dhe metodologjitë që ndërthurin teknologjinë dhe zhvillimin e aftësive praktike. Në të njëjtën kohë, u njoftua se regjistrimet e hershme tashmë janë hapur, duke i ofruar nxënësve mundësinë të sigurojnë vendin e tyre në drejtimet më inovative dhe të kërkuara.

Interesim i veçantë u shfaq edhe për metodologjinë moderne të mësimdhënies, e cila ndërthur njohuritë akademike me përdorimin e teknologjisë dhe aftësitë praktike të nevojshme për të ardhmen.

Pjesëmarrësit patën gjithashtu mundësinë të marrin informacione rreth bursave që janë përfituar përmes Testit Provues të Arritshmërisë, si dhe për mundësitë e shumta që ofron ky institucion për zhvillimin personal dhe profesional të nxënësve.

Të gjithë të interesuarit mund të aplikojnë për t’u bërë pjesë e UBT International Smart Schools, përmes platformës së aplikimit online: Linku i Aplikimit Online

Vendi

Aksion kundër fajdesë në Prizren: Një i arrestuar dhe katër në kërkim për zhvatjen e mbi 1 milion eurove

Published

19 hours ago

March 16, 2026

UBTNews

Policia e Kosovës, në bashkëpunim me Prokurorinë Themelore në Prizren, ka realizuar sot një operacion të gjerë policor të fokusuar në arrestimin e disa personave si të dyshuar për fajde, detyrim dhe privim të kundërligjshëm të lirisë.

Gjatë këtij aksioni, i cili përfshiu kontrolle në pesë lokacione të ndryshme në qytetin e Prizrenit, është arrestuar një person me inicialet B.K., ndërsa katër të dyshuar të tjerë (GJ.K., E.K., E.K. dhe E.R.) ndodhen ende në kërkim policor.

Sipas hetimeve të Drejtorisë për Hetimin e Krimit të Organizuar, ky grup dyshohet se ka shkaktuar një dëm fillestar prej rreth 700,000 eurosh ndaj viktimës, duke kërkuar edhe 450,000 euro të tjera në emër të kamatave të larta.

Në komunikatën zyrtarë thuhet se: “Të dyshuarit në mënyrë të vazhdueshme kanë detyruar viktimën të paguajë shuma të ndryshme parash si interes për fajde, duke përdorur forma të ndryshme të presionit dhe dhunës. Po ashtu, ata dyshohet se në raste të caktuara e kanë privuar viktimën edhe nga liria, me qëllim që ta detyrojnë të paguajë kamata të larta të fajdesë”.

Me vendim të prokurorit të shtetit, ndaj të arrestuarit është lëshuar masa e ndalimit prej 48 orësh, ndërkohë që operacioni për lokalizimin e personave të tjerë po vazhdon me intensitet të lartë.

Policia e Kosovës ka bërë të ditur se: “Aktualisht po ndërmerren veprimet e nevojshme hetimore me qëllim të arrestimit të të dyshuarit dhe zbardhjes së plotë të rrethanave të ngjarjes”.