Lajmet

Gjykimi ndaj Salih Mustafës mund të mos fillojë deri verën e këtij viti

Published

5 years ago

February 1, 2021

Betim Gashi

Mbrojtja e Salih Mustafës, avokati Julius Von Bonne ka thënë se një palë e tretë në këtë çështje i ka vështirësuar punën mbrojtjes duke i marrë më shumë kohë. Në konferencën e sotme mbi ecurinë e çështjes së Mustafës, avokati ka thënë se nuk mund t’i përfundojnë hetimet para verës së këtij viti. Ndërkohë, prokuroria e ka konsideruar të papranueshme kohën e kërkuar nga mbrojtja, duke insistuar që gjykimi të fillojë në muajin mars.

Pas diskutimit në mes të palëve, të cilët nuk u pajtuan rreth kohës se kur duhet të fillojë gjyqi, seanca ka shkuar në pauzë, e pastaj në diskutim të mbyllur në mes të gjyqtarit të procedurës paraprake dhe mbrojtjes.

“Është çështje e një pale të tretë që është përfshirë që e bënë shumë të vështirë punën e mbrojtjes, kjo na ka marrë shumë kohë, shumë më tepër kohë sesa duhet dhe shpresoj që gjatë këtij muaji me këtë palë të tretë do të kemi një diskutim në mënyrë që mbrojtja të mund të eci përpara, kjo ka qenë një nga çështjet që ka paraqitur vështirësi për mbrojtjen. Vazhdoj të flas në mënyrë të mjegullt këtu sepse nuk dua të hyjë në hollësitë e kësaj çështje, por u siguroj që kjo na i ka bërë punën më të ndërlikuar dhe gjithashtu, në fillim të kësaj çështje mbrojtja nuk kishte mundësi të ecte përpara në hetime”, ka thënë Bonne.

Në seancën e sotme, avokati vazhdimisht ka theksuar se kanë nevojë për disa muaj kohë për të kryer hetimet e tyre, diçka që për Prokurorinë ka qenë e papranueshme.

Pas gushtit, Bonne ka deklaruar si mundësi edhe muajin korrik, për të përfunduar hetime.

“Do të ishte e dobishme që gjykimi të fillojë pasi mbrojtja të ketë përfunduar hetimet e veta, duke pasur parasysh numrin e dëshmitarëve që parashikojmë t’i thërrasim, diku nga korriku, në atë periudhë kohore, ndoshta nuk do të kemi përfunduar plotësisht hetimet tona, por kjo është një kohë e përafërt që mund të jap. Jemi në një presion shumë të madh të dorëzojmë dokumente për protokollim shumë shpejtë e të ecin çështjet përpara, por nuk është balanca e duhur, është shumë e rëndësishme që mbrojtja të ketë kohën që i nevojitet në mënyrë që t’i përfundojë hetimet e veta”, tha ai.

Por, sipas Prokurorisë, ka pasur kohë të mjaftueshme për mbrojtjen që të kryhen hetimet, dhe deri në verë është periudhë e papranueshme për ta.

“Mendoj që ky është një agrumet fals, ne nuk kemi pasur vite, ne kemi punuar për vite, por kemi pasur shumë çështje për të hetuar dhe jo vetëm këtë, detyrimi ynë është ndryshe nga ai i mbrojtjes ne duhet të vërtetojmë çështje përtej dyshimit të arsyeshëm dhe të bëjmë akuza mbi bazën e kësaj, mbrojtja nga ana tjetër e ka çështjen ndryshe, ata kanë një aktakuzë të përcaktuar dhe i jepen materiale dhe duhet t’i përgjigjet asaj çështje”, tha ai.

Sipas ZPS, gjyqi duhet të fillojë sa më shpejtë që të jetë e mundur gjykimi të fillojë sa më shpejtë të jetë e mundur, dhe nëse i ipet kohë shtesë mbrojtjes, atëherë gjyqtari duhet ta bëjë këtë me një vendim.

Në këtë seancë u diskutua edhe mundësia e mbajtjes së seancave për diskutim, në mes të mbrojtjes dhe prokurorisë, në mënyrë që të qartësohen çështjen e dokumenteve që posedojnë.

Konferenca e sotme mbi ecurinë e çështjes është mbyllur tre herë për publikun, e në fund të saj mbrojtja ka deklaruar që ajo e radhës të mbahet pas dy muajsh, meqë sipas tij, deri atëherë do të dinë qartë rrjedhën e hetimeve, ndërsa sipas prokurorisë nuk ka nevojë të mbahet një e tillë, por nëse këtë e cakton gjyqtari, ZPS kërkoi që të mbahet jo më vonë se fundi i muajit shkurt.

Lajmet

Portieri i Kosovës Muriq huazohet te klubi italian

Published

11 hours ago

August 13, 2025

UBT News

Portieri i përfaqësueses së Kosovës, Arijanet Muriq do të nisë një aventurë të re në Itali në Seria A.

Ai është huazuar nga Ipsuiç te Sasuolo në Serinë A, ku vetë klubi italian i ka uruar mirëseardhjen gardianit 26-vjeçar.

Për portierin kosovar kjo është hera e parë që do të mbrojë në Itali, pasi ai më parë këtë e ka bërë në Angli, Turqi, Spanjë dhe Holandë.

Ai pritet të debutoj më 23 gusht në Serie A kundër kampionit në fuqi, Napolit.

Lajmet

Kushtetuesja kërkon nga qeveria ndryshimin e statutit të SHSKUK-së

Published

12 hours ago

August 13, 2025

UBTnews

Gjykata Kushtetuese ka marrë sot vendim rreth kërkesës së Institucionit të Avokatit të Popullit për statutin e Shërbimit Spitalor dhe Klinik Universitar të Kosovës (SHSKUK).

Avokati i Popullit kishte dërguar vitin e kaluar kërkesë në Kushtetuese pasi dyshonte se përmes këtij statuti, pikërisht paragrafit 1 të nenit 11, ishte paraparë mbyllja e shërbimeve shëndetësore në sektorit publik për ta favorizuar sektorin privat.

Kushtetuesja konsideron se paragrafi 1 i nenit 11, i miratuar përmes vendimit të Qeverisë më 27 dhjetor 2023, nuk është në pajtueshmëri me paragrafin 1 të nenit 51, në lidhje me paragrafin 1 të nenit 7 dhe paragrafin 4.

Gjykata njëzëri ka vendosur që kërkesa e Avokatit të Popullit është e pranueshme.

Avokati i Popullit kontestoi kushtetutshmërinë e paragrafit 1 të nenit 11 (Organizimi i shërbimeve shëndetësore në spitalet e përgjithshme) të Statutit (QRK) nr. 01/2023 të Shërbimit Spitalor dhe Klinik Universitar të Kosovës, i cili përcakton që spitalet e përgjithshme ofrojnë shërbimet shëndetësore: kirurgji e përgjithshme; interno; pediatri; gjinekologji dhe obstetrikë; dhe emergjenca mjekësore.

Avokati i Popullit pretendoi se kjo dispozitë e Aktit të kontestuar, pasi që nuk përcakton “kujdesin mendor” si shërbim dytësor shëndetësor që ofrohet nga spitalet e përgjithshme, “redukton” shërbimet shëndetësore për kujdes mendor për qytetarët; dhe stafin shëndetësor dhe administrativ në këto spitale, në kundërshtim me frymën e Ligjit për Shëndetësi, i ndryshuar dhe plotësuar me Ligjet Nr. 08/L-043 dhe Nr. 08/L-176 dhe Ligjin Nr. 05/L-025 për Shëndet Mendor; dhe se rrjedhimisht si akt i miratuar nga Qeveria kufizon të drejtat kushtetuese të përcaktuara në nenet 7, 24, 51 dhe 55 të Kushtetutës.

Pretendimet e Avokatit të Popullit u mbështetën nga deputeti i Kuvendit, Armend Zemaj, kryetarja e Federatës së Sindikatave të Shëndetësisë së Kosovës dhe kryetari i Odës së Mjekëve të Kosovës, ndërsa u kundërargumentuan nga kryeministri Albin Kurti.

Aktgjykimi i Gjykatës fillimisht sqaron që bazuar në nënparagrafin 1 të paragrafit 2 të nenit 113të Kushtetutës, Avokati i Popullit është i autorizuar të kontestojë kushtetutshmërinë e ligjeve, të dekreteve të Presidentit e të Kryeministrit dhe të rregulloreve të Qeverisë.

Gjykata në vlerësimin e pretendimeve të Avokatit të Popullit, iu referua parimeve të përgjithshme kushtetuese dhe atyre të Komisionit të Venecias për parimin e sundimit të ligjit dhe kufizimit të të drejtave dhe përcaktimit të detyrimeve me “ligj”.

Në kontekst të kompetencave të Qeverisë, si organ që ushtron pushtetin ekzekutiv, Aktgjykimi sqaron se kompetenca e saj për “nxjerrjen e akteve juridike ose rregulloreve” kufizohet në përcaktimet kushtetuese: “pajtueshmërinë me Kushtetutën dhe ligjet”, të përcaktuar në paragrafin 4 të nenit 92 të Kushtetutës; dhe “të nevojshme për zbatimin e ligjeve”, të përcaktuar në paragrafin 4 të nenit 93 të Kushtetutës.

Rrjedhimisht, Gjykata konstatoi se paragrafi 1 i nenit 11 Organizimi i shërbimeve shëndetësore në spitalet e përgjithshme të Aktit të kontestuar është në kundërshtim me paragrafin 1 të nenit 51 Mbrojtja Shëndetësore dhe Sociale, në lidhje me paragrafin 1 të nenit 7 Vlerat dhe paragrafin 4 të nenit 92 Parimet e Përgjithshme të Kushtetutës.

Lajmet

Miliona të shpenzuara për mbijetesë në Premierligë, Sunderlandi i Xhakës i dyti në listë

Published

12 hours ago

August 13, 2025

UBT News

Sunderland që fitoi promovimin në maj të vitit të kaluar pas fitoreje në play-off ndaj Sheffield United, ka shpenzuar shumë gjatë merkatos verore, duke sjellë në skuadër emra të mëdhenj si mesfushori i Arsenalit, Granit Xhaka, dhe talentin e ri Habib Diarra.

Sipas analizës së Transfermarkt, skuadra që ka shpenzuar më shumë në merkato pas promovimit është Nottingham Forest, e cila në verën pas ngjitjes në sezonin 2021/22 shpenzoi plot 155.2 milionë euro për 13 lojtarë, duke arritur të mbijetojë me mund në Premierligë, duke përfunduar në vendin e 17-të.

Në vend të dytë është Sunderland me 153 milionë euro, dhe me një transferim të ri mund t’i kalojë Forest.

Në vend të tretë renditet Aston Villa, promovuar në sezonin 2019/20, që shpenzoi 148.6 milionë euro dhe gjithashtu arriti të mbijetojë. Burnley, që u promovua këtë sezon, ndodhet në vend të katërt me shpenzime prej 125.7 milionë eurosh.

Në vend të pestë dhe të gjashtë janë Ipswich dhe Southampton, të cilët shpenzuan shumë para sezonin e kaluar por u rrëzuan.

Fulham dhe Burnley kanë shpenzuar gjithashtu shifra të mëdha në sezonet kur u promovuan, por nuk arritën të mbijetonin.

Wolves dhe Leeds, me buxhete më të ulëta, kanë arritur të qëndrojnë në Premierligë.

Megjithëse shpenzimet e mëdha nuk garantojnë gjithmonë mbijetesën, Sunderland po tregon ambicie të madhe në rikthimin e saj në elitën e futbollit anglez.

Lajmet

Komuna e Prishtinës: Punimet rreth Katedrales nuk ndërhyjnë në zonën e mbrojtur

Published

13 hours ago

August 13, 2025

UBTnews

Punimet, që sot filluan rreth Katedrales “Nëna Terezë” në Prishtinë, nuk kanë të bëjnë me zonën e mbrojtur në Sheshin “Xhorxh Bush”, e cila një kohë të gjatë ishte shkas përplasjesh midis pushtetit komunal të Prishtinës dhe Ministrisë së Kulturës.

Drejtori i Transformimit në Komunën e Prishtinës, Gëzim Kastrati, tha se punimet që po zhvillohen janë pjesë e fazës së dytë dhe nuk ndërhyjnë në zonën që Ministria e Kulturës pretendon se është e mbrojtur.

“Këtë pjesë ku jemi duke punuar tash është një zonë, e cila nuk ka kurrfarë interferimi me zonën mbrojtëse, në të cilën thirret Ministria e Kulturës ose Inspektorati. Për këtë arsye kjo pjesa rreth Katedrales, një pjesë e Sheshit ‘Xhorxh Bush’ dhe rruga ‘Mark Sopi’, aty mundemi të punojmë në çdo kohë. Tash është faza e dytë, ku është duke u bërë ndërrimi i infrastrukturës nëntokësore. Do të thotë përreth Katedrales edhe rruga ‘Mark Sopi’ me një pjesë të sheshit ‘Xhorxh Bush” ato nuk interferohen në këtë zonën, në të cilën po pretendohet se është e mbrojtur. Ne po punojmë brenda mundësive tona aq sa po kemi mundësi t’i kryejmë punët tona”, tha Kastrati.