Lajmet

​Gjashtë muaj nga vërshimet, qytetarët në veri ende pa kompensim

Disa prej familjeve janë kthyer në shtëpitë e tyre ku po vazhdojnë të jetojnë në kushte jashtëzakonisht të rënda.

Published

on

Edhe pse kanë kaluar gjashtë muaj prej kur vërshimet ua dëmtuan shtëpitë dhe bizneset, banorët e veriut të Mitrovicës ende po presin kompensim për dëmet.

Disa prej familjeve janë kthyer në shtëpitë e tyre ku po vazhdojnë të jetojnë në kushte jashtëzakonisht të rënda, ndërsa shumë të tjera akoma nuk po mund të kthehen dhe po jetojnë te familjarët në jug të qytetit dhe gjithandej.

Të prekurit e “Lagjes së boshnjakëve”, ku dëmet edhe sot janë të dukshme, thonë se po ballafaqohen me gjendje të rëndë, ndërsa ankohen në institucione për mos interesim total ndaj tyre.

Avni Peci, përfaqësues i “Lagjes së boshnjakëve” në veri të Mitrovicës, njëherësh anëtar i komisionit vlerësues për dëmet nga vërshimet, është njëri prej atyre, shtëpia e të cilit pësoi dëme të mëdha dhe i cili nuk po mund të kthehet ende në shtëpinë e tij. Ai bën të ditur se me njëmbëdhjetë anëtarë të familjes jeton në banesën e dhëndrit në jug të qytetit, i cili këto ditë kthehet nga diaspora për pushime dhe duhet ta lirojë banesën, ndërkohë që thotë se nuk di nga t’ia mbajë.

Sipas tij, janë 67 familje të cilat janë detyruar të shpërngulen nga shtëpitë e tyre për shkak të dëmeve të pësuara dhe të cilat akoma nuk po mund të kthehen. Ai thotë se në mesin e të shpërngulurve ka të sëmurë kronikë, ndërsa potencon se janë drejtuar për ndihmë tek të gjitha institucionet lokale e qendrore, por deri tash nuk kanë marrë ndonjë përgjigje.

Peci thotë se në rast se shqiptarët e veriut janë peng të politikës, të paktën të informohen, në mënyrë që banorët të vendosin nëse duan të vazhdojnë të jetojnë në veri, ose ta braktisin atë pjesë përgjithmonë.

“I kemi 97 shtëpi së bashku me biznese të cilat janë të dëmtuara. Ka prej tyre që janë kthyer nëpër shtëpi, por e kanë gjendjen të mjerueshme… Edhe më e dhimbshme është se ka të shpërngulur në jug, ku tash kemi ardhur në fazën e pushimeve… kanë me ardh familjarët (nga diaspora) dhe ka me ardh në pikëpyetje edhe banimi i tyre tash, atyre duhet me ua liru banesat dhe ku me u sistemu tash…Unë jam 11 anëtarë, me dy vëllezër dhe fëmijët e tyre, si dhe nëna. Jetojmë në jug… në banesën e dhëndrrit…. Ka shtëpi… të cilat janë konstatuar se nuk guxojmë me u kthy sepse shtëpitë kanë ‘fjetë’, janë qarë dhe ka rrezik për anëtarët e familjes… 67 familje i kemi të shpërngulura nga veriu i Mitrovicës, dhe tash nuk po e di a jemi ne peng i një politike të gabuar, apo jemi të shfrytëzuar për një politikë të gabuar si peng. Thjesht këtu janë të dëmtuara të gjitha komunitetet… Është e mjerueshme sepse prej të dëmtuarve kemi njerëz me sëmundje kronike, janë në dializë, me diabet etj… Kemi kontaktuar me pushtetin lokal, Ministrinë e Administrimit dhe Pushtetit Lokal, Agjencinë për Menaxhimin e Emergjencave, veç në Ministrinë e Financave nuk kemi arritur për me i drejtu problemet tona… Në qoftëse ne jemi peng i politikës, të paktën me na informu në mënyrë që ne të vendosim nëse do të vazhdojmë të jetojmë në veri të Mitrovicës dhe me u sakrifiku, apo me gjetë një zgjidhje të dytë”, thotë Peci.

Bajram Kuçi, banor i veriut të Mitrovicës, tha se së bashku me katër anëtarët e familjes jeton në shtëpinë e kushëririt në jug të qytetit, sepse shtëpia e tij ka pësuar dëme të mëdha nga vërshimet dhe nuk është e sigurtë për banim.

Nuk ka mundësi për ta rregulluar vetë shtëpinë, vazhdoi ai, ndërsa tha se ka tentuar ta takojë kryetarin e ri të Mitrovicës Veriore për këtë cështje, por sic tha, ai nuk ka dashur ta takojë.

“Jemi katër anëtarë të familjes, në këtë shtëpi kemi jetuar, por tash pas vërshimeve askund nuk jemi… S’kemi para ta rregulluar shtëpinë… Jam duke jetuar tek një kushëri i imi në jug… Jam interesuar gjithkah, ‘sot’, ‘nesër bëhet’, ‘bëhet’, s’ka asgjë qe gjashtë muaj… Po, kemi provuar me fol (me kryetarin e Komunës), nuk ka dashtë me dalë”, thotë Kuçi.

Edhe banori tjetër i kësaj lagjeje, Halil Hakaj, thotë se ende nuk është kthyer në shtëpinë e tij të dëmtuar, ndërsa shton se nuk ka mundësi vetë ta rregullojë atë.

Duke treguar se është i sëmurë, nuk mund të ecë dhe se është operuar dy herë nga boshti kurrizor, ai ankohet në institucionet, për të cilat thotë se edhe pas gjashtë muajsh nuk ju kanë dalë në ndihmë.

“Po bëhen gjashtë muaj, sendet janë ende në oborr duke u pastruar… Dyert ende nuk i kam montuar, nuk kam të holla, nuk na kanë ndihmuar absolutisht as nga 2 mijë e 500 që kanë thënë komuna, as asgjë. Nuk po di pse po flejnë, nuk po di kujt me ju drejtu. Jam te vëllau duke banuar, vij shpesh herë këtu e ruaj shtëpinë mos po vjedhë dikush ndonjë gjë… Dy herë jam operuar prej kurrizit, s’mundem me lëvizë, nuk mundem me ecë…Ato të holla sado pak që na i premtuan, as ato nuk na i dhanë, kemi mbetur në mëshirën e askujt”, shprehet Hakaj.

Veton Syla, së bashku me bashkëshorten qe gjashtë muaj është duke jetuar te vjehrra në Vushtrri. Ai sqaron se përkundër dëshirës së madhe për t’u kthyer në shtëpinë e tij, një gjë e tillë është e pamundur për shkak të rrezikut nga dëmtimet e mëdha të mureve të cilat janë qarë.

“Për momentin jemi duke jetuar në Vushtrri te vjehrra, sepse shtëpia na është qarë që gjashtë muaj nga vërshimet dhe ende s’kemi pasur ndonjë ndihmë nga askush. Po presim çdo ditë… Dy anëtarë jemi, unë dhe shoqja, por s’kemi siguri këtu sepse shtëpia është qarë aq shumë sa është rrezik këtu me jetu. Prej Vushtrrisë vij këtu nganjëherë me u kujdes për shtëpi sepse po më kushton zemra, por me jetu nuk po guxoj se shtëpia është mjaft e dëmtuar”, tha ai.

Ndërkaq, një familje katër anëtarëshe e komunitetit serb e cila jeton poashtu në “Lagjen e boshnjakëve” në veri të Mitrovicës dhe shtëpia e tyre është prekur nga vërshimet, ka bërë të ditur se është kthyer para një muaji në shtëpi. Siç pretendon zonja e shtëpisë, kjo falë ndihmës që ju ka ofruar komuna paralele e Mitrovicës Veriore, e cila vepron sipas sistemit të Serbisë. Sipas saj, është dashur t’iu dalë në ndihmë edhe Qeveria e Kosovës ose Komuna.

“Jemi katër anëtarë të familjes, unë, bashkëshorti dhe dy fëmijë, ndërsa jemi kthyer në shtëpi para një muaji… Një shtrat e kemi blerë për fillim dhe bashkëshorti diçka po renovon, po lyen.. Akoma nuk kemi përfunduar, për çdo ditë ngapak po punojmë… Kam shkuar te kryetari i ri i komunës, por s’kam mundur ta gjej, nuk ka qenë aty… Ky është tash muaji i shtatë, dhe mendoj se është dashur ndonjë ndihmë të na jap Qeveria e Kosovës ose komuna këtu”, thotë ajo.

Në anën tjetër, i kontaktuar nga KosovaPress, kryetari i Komunës së Mitrovicës së Veriut, Erden Atiq, nuk ka pranuar të flasë për këtë çështje.

“Është temë e ndjeshme dhe nuk mund të deklarohem”, ka thënë shkurt Atiq prapa kamerës.

KosovaPress-i ka dërguar pyetje në adresë të MAPL-së dhe Ministrisë së Financave, për të marrë një sqarim rreth kësaj problematike, mirëpo deri në momentin kur po raportojmë ata nuk kanë kthyer përgjigje.

Ndryshe, vlera e dëmit nga vërshimet e janarit të këtij viti në veri të Mitrovicës, ku janë përfshirë 97 familje së bashku me biznese, llogaritet të ketë qenë mbi 800 mijë euro, ndërsa kompensimi i dëmit nuk është bërë as nga fondi komunal i destinuar për të prekurit, ku në muajin maj ishin ndarë 300 mijë euro. 

Aktualitet

Piloti kroat i KFOR-it dhe partnerja e tij nga Mitrovica arrestohen për spiunazh në favor të Listës Serbe

Published

on

Një serbe nga Mitrovica, A. M., dhe partneri i saj, J. I., pilot në Forcat Ajrore të Kroacisë, janë arrestuar më 25 korrik në ishullin Vis, nën dyshimin për spiunazh në favor të Serbisë dhe Listës Serbe. Hetimi ndaj tyre është kryer nga policia kroate në bashkëpunim me Europolin.

Sipas burimeve të gazetës kroate Index, dyshohet se piloti kroat i ka siguruar partneres së tij informacione konfidenciale, të cilat ajo më pas i ka përcjellë tek Lista Serbe. Hetuesit po ashtu dyshojnë se informacionet përfshinin detaje mbi lëvizjet e trupave ndërkombëtare dhe të komunitetit serb në veri të Kosovës që nga fundi i vitit 2022, si dhe të dhëna të ndjeshme lidhur me komunën e Zubin Potokut.

Çifti akuzohet gjithashtu për shkëmbim informacionesh lidhur me transferimin e ish-policit të Kosovës, Dejan Pantiq, i arrestuar në dhjetor 2022 për sulme ndaj zyrave të Komisionit Qendror Zgjedhor në Mitrovicën e Veriut.

A. M., e cila ka punuar më parë për kompani private në Serbi dhe si reportere nga Mitrovica, dyshohet të ketë vepruar si ndërmjetëse në përcjelljen e informacionit tek Lista Serbe. Partneri i saj, J. I., ka shërbyer si pilot helikopteri edhe në misionin e KFOR-it në Kosovë dhe dyshohet se ka zbuluar informacion të klasifikuar lidhur me lëvizjet e trupave ndërkombëtare dhe të komunitetit serb në veri.

Pas arrestimit, piloti kroat është vendosur në paraburgim, ndërsa ndaj A. M. është marrë vendim për dëbim nga Kroacia dhe ajo ndodhet aktualisht në qendrën për të huaj në Trilje. Hetuesit kanë siguruar komunikime të shumta në telefonat e tyre që dyshojnë se lidhen me aktivitetet e spiunazhit dhe i kanë bashkëngjitur si prova në hetim.

Reagime politike në Kroaci

Rasti ka tronditur opinionin kroat dhe ka ngjallur shqetësime për sigurinë kombëtare. Kryetari i Komisionit Parlamentar për Mbrojtjen, Arsen Bauk, në mediumin kroat RTL, e cilësoi këtë si “një problem serioz sigurie” duke shtuar se hetimi do të tregojë përmasat e plota të rastit.

Ndërkohë, Sandra Bençiç, anëtare e Komisionit për Siguri Kombëtare, theksoi për mediumin Novu TV, se ky rast do të trajtohet patjetër nga institucioni që ajo përfaqëson:

“Po flasim për akuza shumë të rënda. Në këto kohë, pavarësisht ndasive politike, të gjithë kemi një qëllim të përbashkët: sigurinë e qytetarëve tanë, të vendit dhe të misioneve ku marrim pjesë”.

Continue Reading

Aktualitet

Studentët e Muzikës në UBT dhe profesori Blerim Emerllahu marrin pjesë në edicionin e 9-të të Festivalit të Klarinetës në Poloni

Published

on

Tre studentë të Fakultetit Muzika Moderne, Prodhimi Digjital dhe Menaxhmenti në UBT, Leona Ferati, Rinor Hasimi dhe Sunaj Qerimi, se bashku me profesorin Blerim Emërllahu, patën mundësinë të përfaqësojnë Kosovën në edicionin e 9-të të Festivalit Ndërkombëtar të Klarinetës, në Rubnej të Polonisë, një nga aktivitetet më të rëndësishme në skenën evropiane të muzikës klasike.

Gjatë festivalit, studentët ndoqën ligjërata të nivelit të lartë nga profesorë dhe artistë të njohur ndërkombëtarisht, bashkëpunuan me solistë të famshëm dhe interpretuan në koncertet kryesore së bashku me studentë nga e gjithë Evropa. Kjo përvojë u ofroi mundësinë të thellojnë njohuritë teknike, të rrisin aftësitë interpretative dhe të krijojnë kontakte profesionale me artistë ndërkombëtarë.

Në këtë edicion mori pjesë edhe Prof. Blerim Emerllahu si solist dhe ligjërues, duke ofruar mbështetje dhe mentorim për studentët gjatë aktiviteteve të festivalit.

Ky përfaqësim i studentëve tregon qartë se UBT vazhdon të promovojë talentin dhe ekselencën artistike në arenën ndërkombëtare, duke kontribuar në zhvillimin profesional të studentëve dhe rritjen e prezencës së universitetit në evente prestigjioze kulturore.

Continue Reading

Aktualitet

Turqia merr sërish komandën e KFOR-it

Published

on

Ministria e Mbrojtjes e Turqisë ka njoftuar se vendi do të marrë përsëri komandën e misionit paqeruajtës të NATO-s në Kosovë (KFOR) në tetor 2025, për një mandat njëvjeçar. Ky do të jetë rikthimi i komandës turke pas drejtimit të suksesshëm të forcave gjatë periudhës 2023–2024, raporton TurkiyeToday.

Zëdhënësi i Ministrisë së Mbrojtjes, kontradmirali Zeki Akturk, konfirmoi se Turqia do të udhëheqë sërish misionin ndërkombëtar, duke theksuar angazhimin e Ankarasë për sigurinë dhe stabilitetin në rajonin euroatlantik.

“Vendi ynë, i cili ka dhënë kontribute të rëndësishme dhe vendimtare për sigurinë e NATO-s dhe rajonit euroatlantik, do të vazhdojë ta bëjë këtë edhe në të ardhmen”, deklaroi Akturk. “Detyra do të përmbushet në mënyrë neutrale dhe transparente, në përputhje me rezolutat e NATO-s dhe Kombeve të Bashkuara.”

Që nga themelimi i KFOR-it më 12 qershor 1999, në bazë të një rezolute të Këshillit të Sigurimit të OKB-së, Turqia ka qenë një ndër kontribuesit e pandërprerë me trupa në këtë mision. Aktualisht, KFOR përbëhet nga rreth 4,500 trupa nga 29 vende anëtare dhe joanëtare të NATO-s.

Një moment i rëndësishëm për sigurinë në Kosovë ishte në qershor 2023, kur ushtarët turq morën masa sigurie në rajonin e Zubin Potokut, në veri të Kosovës, me kërkesë të KFOR-it, për të ndihmuar në ruajtjen e qetësisë në zonë.

Udhëheqja e përsëritur e KFOR-it nga Turqia vjen në një kohë të ndjeshme për rajonin e Ballkanit Perëndimor. Që nga shpallja e njëanshme e pavarësisë së Kosovës në vitin 2008, Turqia ka mbështetur vazhdimisht përpjekjet për paqe dhe ka luajtur rolin e ndërmjetësit në raportet Kosovë–Serbi.

Pas pushtimit rus të Ukrainës në vitin 2022, pasiguritë në Ballkan janë thelluar, duke i dhënë më shumë peshë rolit të Turqisë si faktor stabiliteti. Komanda turke e KFOR-it në vitet 2023–2024 u vlerësua për ndikimin e saj në uljen e tensioneve në veri të Kosovës, dhe rikthimi në krye të misionit në 2025 shihet si vazhdimësi e këtij angazhimi stabilizues.

Zëdhënësi Akturk gjithashtu bëri të ditur se për herë të parë në historinë e NATO-s, një gjeneral turk është emëruar si Drejtor i Bashkëpunimit për Siguri në Komandën Ushtarake Ndërkombëtare të NATO-s në Bruksel një tjetër tregues i rolit në rritje të Turqisë në sigurinë e aleancës.

Në raportet e fundit strategjike, Turqia përmendet si një shtyllë kyçe e NATO-s. Vizita e paralajmëruar e Kancelarit gjerman Friedrich Merz në Ankara dhe deklaratat e zyrtarëve amerikanë që vlerësojnë kontributin e Turqisë në sigurinë euroatlantike, janë tregues të rëndësisë së saj në arkitekturën e mbrojtjes kolektive të Aleancës.

Continue Reading

Aktualitet

Raporti 24 orësh nga Policia e Kosovës

Published

on

Në raportin e fundit 24 orësh nga Policia e Kosovës, në disa qytete të Kosovës ka pasur incidente kriminale dhe shifra të larta të gjobave të shqiptuara në kundërvajtje.

AKSIDENTE TRAFIKU DHE GJOBA

Gjatë 24 orëve të fundit janë shqiptuar 2587 tiketa trafiku, janë shkaktuar 48 aksidente me dëme materiale dhe 23 aksidente me të lënduar. Zyra e Informimit nga PK ka njoftuar se 23 persona janë arrestuar, kurse 16 janë dërguar në mbajtje.

INCIDENTET KRIMINALE-PRISHTINË

PËRDORIM I ARMËS

Obiliq/ 27.08.2025 – 15:00. Ankuesi mashkull kosovar ka raportuar se në drejtim të veturës së tij një person I dyshuar ka shtënë me armë tri herë. Në vendin e ngjarjes njësia policore ka gjetur dhe sekuestruar një predhë dhe një gëzhojë. Në konsultim me prokurorin është inicuar rasti, ndërsa i dyshuari në kërkim policor.

 SHKAKTIM I RREZIKUT TË PËRGJITHSHËM

Hajvali / 27.08.2025 – 11:43. Është përfshirë nga zjarri një deponi e veturave të vjetra si dhe një plantacion i mbjellur me pemë. Në vendin e ngjarjes kanë dalë njësitë përkatëse policore dhe zjarrfikësit të cilët kanë lokalizuar zjarrin. Lidhur me rastin është njoftuar prokurori, ndërsa i dyshuari në kërkim policor.

KANOSJE

Gllogoc / 27.08.2025 – 16:15. Është arrestuar i dyshuari mashkull kosovar për shkak se i njëjti dyshohet se e ka kanosur viktimën femër kosovare. I dyshuari pas inicimit të rastit me vendim të prokurorit është dërguar në mbajtje.

Prishtinë / 27.08.2025 – 13:14. Është shoqëruar në Stacion Policor e dyshuara femër kosovare pasi që e njëjta ka telefonuar në linjën emergjente 192 dhe ka kanosur zyrtarët përmes telefonit. Lidhur me rastin është njoftuar prokurori ndërsa e dyshuara është dërguar në trajtim mjekësor Psikiatrik. Rasti procedohet në procedurë të rregullt.

LËNDIM I RËNDË TRUPORË

Prishtinë/27.08.2025-23:00 Është arrestuar i dyshuari mashkull kosovar pasi i njëjti në bashkëveprim edhe me 3 të dyshuar tjerë, të cilët gjenden në arrati, kishin sulmuar fizikisht viktimën mashkull kosovar. Si pasojë e sulmit viktima ka pësuar lëndime trupore. I dyshuari me vendim të prokurorit është dërguar në mbajtje.

VRASJE NË TENTATIVË

Lipjan / 27.08.2025 – 21:40. Janë arrestuar 4 të dyshuar meshkuj kosovarë pasi të njëjtit dyshohet se kishin sulmuar fizikisht 4 viktimat meshkuj kosovarë. Gjatë përleshjes është përdorur edhe një mjet i mbrehtë (thikë). Si pasojë e përleshjes fizike viktimat kanë pësuar lëndime trupore për çka dhe janë dërguar në tretman mjekësor. Tre nga viktimat pas pranimit të tretmanit mjekësor janë liruar, kurse njëri ka ta vazhduar për trajtim mjekësor në QKUK. Me vendim të prokurorit të dyshuarit janë dërguar në mbajtje.

DHUNË NË FAMILJE

Prishtinë / 27.08.2025 – 03:00. Ankuesja femër kosovare ka raportuar se i dyshuari mashkull shtetas i huaj, kishte ushtruar dhunë ndaj saj dhe dy viktimave tjera femra kosovare. Lidhur me rastin është njoftuar prokurori, dhe po hetohet nga ekipet relevante policore.

Prishtinë / 27.08.2025 – 16:00-17:00. Është arrestuar i dyshuari mashkull kosovar për shkak se i njëjti dyshohet se ka ushtruar dhunë ndaj viktimave femra kosovare. Viktimat nuk kanë dashur të marrin trajtim mjekësor. I dyshuari me vendim të prokurorit pas inicimit të rastit është liruar, rasti vazhdon të trajtohet në procedurë të rregullt.

Prishtinë / 27.08.2025 – 20:30. Është arrestuar i dyshuari mashkull kosovar për shkak se i njëjti dyshohet se ka ushtruar dhunë ndaj viktimës femër kosovare.Viktima ka pranuar trajtim mjekësor, ndërsa i dyshuari me vendim të prokurorit pas inicimit të rastit është liruar. Rasti vazhdon në procedurë të rregullt.

AKSIDENT TRAFIKU ME LËNDIME

Prishtinë / 27.05.2025 – 15:55. Raportohet se ka ndodhur aksident trafiku në mes të dy veturave. Si pasojë tre persona kanë pësuar lëndime trupore dhe të njëjtit kanë pranuar tretman mjekësor.

AKSIDENT TRAFIKU ME FATALITET

Gllogoc / 27.08.2025 – 02:08. Raportohet se viktima mashkull kosovar derisa ka qenë duke drejtuar veturën, humb kontrollin mbi veturë dhe është rrokullisur. Si pasojë, i njëjti pëson lëndime trupore dhe transportohet në Emergjencën e Drenasit ku mjeku kujdestar konstaton vdekjen e tij. Me vendim të prokurorit, trupi i pajetë është dërguar në IML për obduksion.

INCIDENTE KRIMINALE-GJILAN

MBAJTJE NË PRONËSI, KONTROLL APO POSEDIM I PAAUTORIZUAR I ARMËVE

Viti / 27.08.2025 – 14:00. Është arrestuar i dyshuari mashkull kosovar pasi që gjatë kontrollit në shtëpinë e tij është gjetur dhe konfiskuar arma e zjarrit pushkë e gjatë pa fishekë. Pas intervistimit, me vendim të prokurorit i dyshuari është liruar në procedurë të rregullt.

INCIDENTE KRIMINALE-FERIZAJ

LËNDIM I RËNDË TRUPOR

Kaçanik / 25.08.2025 – NN. Është arrestuar i dyshuari mashkull kosovar pasi që i njëjti dyshohet se ka sulmuar fizikisht viktimën femër kosovare. Viktima ka pësuar lëndime trupore ndërsa i dyshuari me vendim të prokurorit është dërguar në mbajtje.

HETIM MBI VDEKJEN

Ferizaj / 27.08.2025 – 09:10. Raportohet se viktima mashkull kosovar dyshohet se ka rënë nga ashensori. Në vendin e ngjarjes kanë dalë njësitë përkatëse, ndërsa ekipi mjekësor ka konstatuar vdekjen e viktimës. Me vendim të prokurorit, trupi i pajetë është dërguar në IML për obduksion.

INCIDENTE KRIMINALE-PRIZREN

SULM NDAJ PERSONIT ZYRTAR

Prizren / 27.08.2025 – 18:30. Është arrestuar se i dyshuari mashkull kosovar për shkak se i njëjti në shenjë revolte pas shqiptimit të një gjobe në trafik ka sulmuar zyrtarët policor. I dyshuari me vendim të prokurorit është dërguar në mbajtje.

INCIDENTET KRIMINALE-GJAKOVË

VJEDHJE E RËNDË

Gjakovë / 24.08.2025 – 13:15. Pas hetimeve të zhvilluara lidhur me rastin, më 27.08.2025 është arrestuar i dyshuari shtetas I huaj për shkak se i njëjti dyshohet se më 24.08.2025 kishte vjedhur një trotinet elektrik nga viktima mashkull kosovar. I dyshuari me vendim të prokurorit është dërguar në mbajtje.

INCIDENTET KRIMINALE-MITROVICË JUG

LËNDIM I RËNDË TRUPOR

Vushtrri / 27.08.2025 – 08:45. Janë arrestuar tre të dyshuar meshkuj kosovar pasi që pas një mosmarrëveshje janë përleshur fizikisht në mes vete. Të njëjtit kanë pësuar lëndime trupore dhe janë dërguar për tretman mjekësor. Pas intervistimit, me vendim të prokurorit një i dyshuar është dërguar në mbajtje, ndërsa dy të dyshuarit e tjerë janë liruar në procedurë të rregullt.

LËNDIM I LEHTË TRUPOR

Skenderaj / 27.08.2025 – 09:15. Viktima femër kosovare ka njoftuar policinë se është sulmuar fizikisht nga I dyshuari mashkull kosovar. Viktima është dërguar për trajtim mjekësor, ndërsa i dyshuari është arrestuar dhe pas intervistimit me urdhër të prokurorit është dërguar në mbajtje.

MBAJTJE NË PRONËSI, KONTROLL APO POSEDIM I PAAUTORIZUAR I ARMËVE

Vushtrri / 27.08.2025 – 14:45. Është arrestuar i dyshuari mashkull kosovar pasi që i njëjti dyshohet se ka shtënë me armë zjarri. Nga i dyshuari është konfiskuar një pistoletë me karikator dhe dy fishekë. Pas intervistimit, me vendim të prokurorit i dyshuari është liruar në procedurë të rregullt.

INCIDENTET KRIMINALE-MITROVICË VERI

VJEDHJE E RËNDË

Mitrovicë Veri / 13.06.2025 – 03:00. Më 27.08.2025 pas hetimeve të zhvilluara është arrestuar i dyshuari mashkull kosovar për shkak se i njëjti dyshohet se më 13.06.2025 kishte kryer vjedhje në lokalin e ankuesit mashkull kosovar. I dyshuari me vendim të prokurorit është dërguar në mbajtje.

ARMËMBAJTJE PA LEJE

Mitrovicë Veri / 27.08.2025 – 20:50. Njësitë e hetuesisë gjatë kontrollit në banesën e të dyshuarës femër kosovare kanë gjetur dhe sekuestruar dy fishekë, dhe një sprej. Në konsultim me prokurorin është inicuar rasti, ndërsa e dyshuara gjendet në arrati.

INCIDENTET KRIMINALE-DEPARTAMENTI I POLICISË KUFITARE

KALIMI I PAAUTORIZUAR I VENDKALIMEVE KUFITARE APO I VIJËS KUFITARE

Leposaviq / 27.08.2025 – 15:30. Janë arrestuar dy të dyshuar, njëri kosovar e tjetri shtetas i serbisë, pasi që të njëjtit kanë kaluar ilegalisht kufirin nga Serbia në Kosovë. Me vendim të prokurorit, një i dyshuar është dërguar në mbajtje ndërsa tjetri është liruar në procedurë të rregullt.

 

 

 

Continue Reading

Të kërkuara